ຄວາມເມດຕາແລະຄວາມໝັ່ນພຽນ

1.ພີ່ນ້ອງທັງຫລາຍ, ຖ້າຫາກມີຜູ້ໃດຖືກຈັບຜິດ, ກໍໃຫ້ພວກພີ່ນ້ອງຜູ້ຈຳເລີນຊີວິດຕາມພຣະຈິດ, ໃຊ້ຄວາມອ່ອນຫວານຊ່ວຍຜູ້ນັ້ນກັບໃຈຕັ້ງຕົວໃໝ່. ແຕ່ກໍໃຫ້ລະວັງຕົວ, ຢ້ານວ່າຕົວພີ່ນ້ອງເອງກໍອາດຖືກຫລອກລວງໄດ້. 2.ຈົ່ງຊ່ວຍແບກພາລະອັນໜັກຂອງກັນແລະກັນ, ດັ່ງນີ້ ພວກພີ່ນ້ອງຈຶ່ງຈະປະຕິບັດຕາມພຣະບັນຢັດຂອງພຣະກຣິສໂຕຢ່າງຄົບຖ້ວນ. 3.ຍ້ອນວ່າ ຖ້າຜູ້ໃດຖືວ່າຕົວເປັນຄົນສຳຄັນຜູ້ໜຶ່ງ, ແຕ່ຕາມຈິງ ບໍ່ມີຫຍັງໝົດ, ຜູ້ນັ້ນກໍຕົວະຫລອກຕົວເອງ. 4.ຂໍໃຫ້ແຕ່ລະຄົນສຳຫລວດເບິ່ງຄວາມປະພຶດຂອງຕົນເອງ, ຖ້າເຫັນຫຍັງມີພໍອວດ, ກໍແມ່ນເພື່ອອວດຕົວເອງ, ບໍ່ແມ່ນຈະເອົາໄປປຽບໃສ່ຜູ້ອື່ນ, 5.ຍ້ອນວ່າໃຜໆກໍຕ້ອງແບກເອົາພາລະໜ້າທີ່ຂອງຕົນເອງ. 6.ສ່ວນຜູ້ທີ່ຮຽນຄຳສອນ ກໍຄວນບໍລິຈາກຊ່ວຍເຫລືອຜູ້ທີ່ສິດສອນຕົນດ້ວຍ. 7.ພວກພີ່ນ້ອງຢ່າໄດ້ເຂົ້າໃຈຜິດ ຄືວ່າ ພວກພີ່ນ້ອງຈະຫລອກລວງພຣະເປັນເຈົ້າບໍ່ໄດ້ດອກ, ຍ້ອນວ່າໃຜຫວ່ານສິ່ງໃດ ກໍຈະເກັບກ່ຽວເອົາສິ່ງນັ້ນ. 8.ຜູ້ທີ່ຫວ່ານເພື່ອເນື້ອໜັງ ກໍຈະເກັບກ່ຽວເອົາສິ່ງທີ່ເກີດຈາກເນື້ອໜັງ ຄືຄວາມເສື່ອມເສຍ. ສ່ວນຜູ້ທີ່ຫວ່ານເພື່ອພຣະຈິດເຈົ້າ ກໍຈະເກັບກ່ຽວເອົາສິ່ງທີ່ເກີດຈາກພຣະຈິດເຈົ້າ ຄືຊີວິດນິຣັນດອນ. 9.ພວກເຮົາບໍ່ຕ້ອງຮູ້ຈັກເໜື່ອຍອ່ອນໃນການທຳຄວາມດີ, ຍ້ອນວ່າ ຖ້າພວກເຮົາບໍ່ທໍ້ຖອຍ, ພວກເຮົາກໍຈະເກັບກ່ຽວເອົາໝາກຜົນໃນເວລາອັນຄວນ. 10.ດັ່ງນີ້ ເມື່ອເຮົາມີໂອກາດຢູ່, ກໍໃຫ້ທຳຄວາມດີຊ່ວຍທຸກຄົນ, ເປັນຕົ້ນຊ່ວຍພວກພີ່ນ້ອງຂອງເຮົາໃນຄວາມເຊື່ອຢ່າງພິເສດ.

ບົດມ້ວນທ້າຍ

11.ຈົ່ງເບິ່ງໂຕໜັງສືບັກໃຫຍ່ນີ້, ແມ່ນລາຍມືຂອງຂ້າພະເຈົ້າເອງ! 12.ພວກທີ່ຢາກໄດ້ໜ້າໄດ້ຕາຕາມເນື້ອໜັງ, ແມ່ນພວກນັ້ນແລ້ວບັງຄັບພວກພີ່ນ້ອງໃຫ້ຮັບສິນຕັດ. ຄວາມມຸ່ງໝາຍແທ້ຂອງເຂົາເຈົ້າ ແມ່ນບໍ່ຢາກຖືກຂົ່ມເຫັງຍ້ອນກາງເຂນຂອງພຣະກຣິສໂຕເຈົ້າ.13.ຍ້ອນວ່າຄົນພວກນີ້ ແມ່ນເຂົາຈະຮັບສິນຕັດແລ້ວ, ເຂົາກໍບໍ່ຖືຕາມພຣະທຳບັນຢັດ, ພວກເຂົາຕ້ອງການໃຫ້ພວກພີ່ນ້ອງຮັບສິນຕັດ ກໍເພື່ອໃຊ້ເນື້ອໜັງຂອງພວກພີ່ນ້ອງມາເປັນເຄື່ອງ ໂອ້ອວດ.14.ສ່ວນຂ້າພະເຈົ້າເອງ ຂ້າພະເຈົ້າຖືເອົາແຕ່ໄມ້ກາງເຂນຂອງພຣະເຢຊູກຣິສໂຕ ພຣະເຈົ້າຂອງພວກເຮົາເທົ່ານັ້ນ ມາເປັນກຽດ. ຍ້ອນອາໄສໄມ້ກາງເຂນນີ້, ໂລກໄດ້ຕາຍປະຂ້າພະເຈົ້າ ແລະຂ້າພະເຈົ້າກໍໄດ້ຕາຍປະໂລກດ້ວຍ. 15.ເລື່ອງການຮັບສິນຕັດຫລືບໍ່ນັ້ນບໍ່ສຳຄັນ, ສິ່ງສຳຄັນແມ່ນເກີດເປັນຄົນໃໝ່. 16.ສັນຕິສຸກແລະພຣະເມດຕາຈົ່ງມີແກ່ຜູ້ປະຕິບັດຕາມຂໍ້ນີ້, ແລະແກ່ປະຊາກອນອິດສະລະແອນທີ່ແທ້ຈິງຂອງພຣະເປັນເຈົ້າ. 17.ແຕ່ນີ້ຕໍ່ໄປ ຢ່າໃຫ້ມີໃຜມາວຸ້ນວາຍຂ້າພະເຈົ້າອີກ, ຍ້ອນວ່າໃນຕົວຂ້າພະເຈົ້າມີຕາແຫ່ງມະຫາທໍຣະມານຂອງພຣະເຢຊູເຈົ້າພິມຢູ່. 18.ພີ່ນ້ອງທີ່ຮັກ, ຂໍພຣະຄຸນຂອງພຣະເຢຊູກຣິສໂຕພຣະເຈົ້າຂອງເຮົາ ຈົ່ງສະຖິດຢູ່ໃນຈິດໃຈຂອງພວກພີ່ນ້ອງເທີ້ນ ອາແມນ.