ຟັງພຣະວໍຣະສານ ບົດຮ່ຳເພິງ ແລະບົດພາວະນາ

ພີ່ນ້ອງທີ່ຮັກແພງ ສ່ວນເລື່ອງຄວາມຮັກ ຕໍ່ກັນແລະກັນ ດັ່ງພີ່ນ້ອງນັ້ນ ບໍ່ຈຳເປັນ ຕ້ອງໃຫ້ໃຜຂຽນມາສອນພວກພີ່ນ້ອງດອກ, ຍ້ອນພວກພີ່ນ້ອງເອງ ກໍໄດ້ຮັບຄຳສອນນີ້ ມາຈາກພຣະເຈົ້າແລ້ວວ່າ ໃຫ້ຮັກກັນແລະກັນ, ແລະພວກພີ່ນ້ອງ ກໍໄດ້ປະຕິບັດເລື່ອງນີ້ ຕໍ່ພວກພີ່ນ້ອງຢູ່ທົ່ວທຸກແຂວງມາເຊດວນແລ້ວ ແຕ່ເຮົາຂໍເຕືອນພວກພີ່ນ້ອງ ໃຫ້ກ້າວໜ້າທະວີຂຶ້ນຕໍ່ໄປ ໃນເລື່ອງນີ້ ຫລາຍກວ່າອີກ. ຈົ່ງຈຳເລີນຊີວິດ ຢ່າງສະຫງົບງຽບ. ເອົາໃຈໃສ່ ໃນໜ້າທີ່ພະນັກງານຂອງຕົນ ແລະທຳງານ ດ້ວຍນ້ຳເຫື່ອນ້ຳແຮງຂອງຕົນເອງ. ເພື່ອຈະໄດ້ເປັນທີ່ເຄົາລົບນັບຖື ຈາກຜູ້ອື່ນ ແລະບໍ່ຕ້ອງເພິ່ງພາອາໄສໃຜ.

ຮັບ: ພຣະອົງເຈົ້າຈະສະເດັດມາຄຸ້ມຄອງໂລກ ດ້ວຍຄວາມຍຸຕິທຳ.

- ຈົ່ງຮ້ອງບົດເພງໃໝ່ຖະຫວາຍແດ່ພຣະອົງເຈົ້າ, ຍ້ອນວ່າ ພຣະອົງໄດ້ທຳກິດຈະການອັນຍິ່ງໃຫຍ່.ພະຫັດຂວາແລະແຂນສັກສິດຂອງພຣະອົງ ໄດ້ຊົງບັນດານຄວາມຮອດ. (ເຊີນຮັບ)

- ທະເລແລະທຸກສິ່ງທີ່ຢູ່ໃນນັ້ນ ພ້ອມທັງໂລກພິພົບ ແລະປະຊາກອນທັງມວນ ຈົ່ງລັ່ນສຽງກ້ອງສະນັ່ນ.ແມ່ນ້ຳລຳທານທັງຫລາຍ ຈົ່ງຕົບມື ພູເຂົາເຫລົ່າເນີນທັງຫລາຍຈົ່ງໂຮຮ້ອງຍິນດີ. (ເຊີນຮັບ)

- ຈົ່ງໂຮຮ້ອງຍິນດີ ຕໍ່ພຣະພັກຂອງພຣະອົງເຈົ້າ ຜູ້ສະເດັດມາປົກຄອງໂລກ. ພຣະອົງຈະປົກຄອງໂລກ ດ້ວຍຄວາມຍຸຕິທຳ ແລະປົກຄອງປະຊາຊາດທັງຫລາຍ ດ້ວຍຄວາມທ່ຽງກົງ. (ເຊີນຮັບ)

ອັນເລລູລູຢາ! ອັນເລລູຢາ! ພຣະອົງເຈົ້າກ່າວວ່າ: “ໝູ່ແກະຂອງເຮົາຟັງສຽງຂອງເຮົາ ເຮົາຮູ້ຈັກໝູ່ແກະຂອງເຮົາ ແລະມັນກໍຕິດຕາມເຮົາມາ.” ອັນເລລູຢາ!

ໃນເວລານັ້ນ ພຣະເຢຊູເຈົ້າຊົງກ່າວແກ່ພວກລູກສິດວ່າ: ອານາຈັກສະຫວັນຍັງປຽບກັບຄົນຜູ້ໜຶ່ງ ກ່ອນຈະອອກເດີນທາງໄປເມືອງໄກ ລາວໄດ້ເອີ້ນພວກຄົນໃຊ້ເຂົ້າມາ ແລະມອບຊັບໃຫ້ພວກເຂົາ ຄົນໃຊ້ຜູ້ທີ່ໜຶ່ງ ໄດ້ຫ້າຫລຽນ ຜູ້ທີ່ສອງ ໄດ້ສອງຫລຽນ ແລະຜູ້ທີ່ສາມ ໄດ້ໜຶ່ງຫລຽນ ຕາມຄວາມສາມາດຂອງແຕ່ລະຄົນ ແລ້ວຄົນຜູ້ນັ້ນ ກໍອອກເດີນທາງໄປ. ທັນທີ ຜູ້ທີ່ໄດ້ຮັບຫ້າຫລຽນ ກໍເອົາເງິນຈຳນວນນັ້ນ ໄປທຳປະໂຫຍດ ແລະກໍໄດ້ກຳໄລມາຕື່ມອີກຫ້າຫລຽນ ດັ່ງດຽວກັນ ຜູ້ທີ່ໄດ້ຮັບສອງຫລຽນ ກໍຫາກຳໄລມາຕື່ມອີກສອງຫລຽນ. ສ່ວນຜູ້ທີ່ໄດ້ຮັບແຕ່ໜຶ່ງຫລຽນ ເຂົາໄດ້ໄປຂຸດດິນ ແລ້ວເອົາເງິນຂອງນາຍໄປຝັງໄວ້. ເຫິງນານຕໍ່ມາ ນາຍຜູ້ນັ້ນໄດ້ກັບມາ ແລະໄດ້ເອີ້ນພວກຄົນໃຊ້ຂອງຕົນ ເຂົ້າມາລາຍງານ ຜູ້ໄດ້ຮັບຫ້າ ຫລຽນເຂົ້າມາ ແລະໄດ້ນຳເອົາເງິນກຳໄລຫ້າຫລຽນນັ້ນ ມາສະເໜີນາຍເວົ້າວ່າ: “ທ່ານໄດ້ມອບໃຫ້ຂ້ານ້ອຍຫ້າຫລຽນ ນີ້ແຫລະ ຂ້ານ້ອຍໄດ້ກຳໄລອີກຫ້າຫລຽນ.” ນາຍຈຶ່ງເວົ້າກັບເຂົາວ່າ: “ດີແລ້ວ ຄົນໃຊ້ຜູ້ດີ ແລະສັດຊື່. ເຈົ້າໄດ້ສັດຊື່ໃນສິ່ງເລັກນ້ອຍ ເຮົາຈະແຕ່ງຕັ້ງເຈົ້າ ໃຫ້ຄວບຄຸມໃນສິ່ງຫລວງຫລາຍ ເຊີນມາຮ່ວມຍິນດີກັບນາຍຂອງເຈົ້າ.” ຕໍ່ມາ ຜູ້ໄດ້ຮັບສອງຫລຽນກໍເຂົ້າມາ ເວົ້າວ່າ: “ທ່ານໄດ້ມອບໃຫ້ຂ້ານ້ອຍ ສອງຫລຽນ ນີ້ແຫລະ ຂ້ານ້ອຍໄດ້ກຳໄລມາອີກສອງຫລຽນ.” ນາຍຈຶ່ງເວົ້າວ່າ: “ດີແລ້ວ ຄົນໃຊ້ຜູ້ດີ ແລະສັດຊື່. ເຈົ້າໄດ້ສັດຊື່ໃນສິ່ງເລັກນ້ອຍ ເຮົາຈະແຕ່ງຕັ້ງເຈົ້າ ໃຫ້ຄວບຄຸມສິ່ງໃຫຍ່ຫລວງ ເຊີນມາຮ່ວມຍິນດີ ກັບນາຍຂອງເຈົ້າ.” ທີ່ສຸດ ຜູ້ໄດ້ຮັບແຕ່ໜຶ່ງຫລຽນ ກໍເຂົ້າມາເວົ້າວ່າ: “ຂ້ານ້ອຍຮູ້ວ່າ ທ່ານເປັນຄົນເຄັ່ງຄັດ: ທ່ານກ່ຽວເຂົ້າບ່ອນທີ່ທ່ານບໍ່ໄດ້ຫວ່ານ ແລະຮິບໂຮມບ່ອນທີ່ທ່ານບໍ່ໄດ້ແຈກຈ່າຍ. ເພາະສະນັ້ນ ຂ້ານ້ອຍຢ້ານຫລາຍ ຂ້ານ້ອຍຈຶ່ງໄດ້ເອົາເງິນຂອງທ່ານ ໄປຝັງດິນໄວ້ ນີ້ແຫລະ ເງິນຂອງທ່ານ ໃຫ້ທ່ານເອົາຄືນເສຍ.” ແຕ່ນາຍໄດ້ຕອບເຂົາວ່າ: “ຄົນໃຊ້ຜູ້ຊົ່ວຊ້າ ແລະກຽດຄ້ານ! ເຈົ້າຮູ້ແລ້ວວ່າ ເຮົາກ່ຽວເຂົ້າ ບ່ອນທີ່ເຮົາບໍ່ໄດ້ຫວ່ານ ແລະຮິບໂຮມບ່ອນທີ່ເຮົາບໍ່ໄດ້ແຈກຈ່າຍ. ດັ່ງນັ້ນ ເຈົ້າກໍຄວນເອົາເງິນຂອງເຮົາ ໄປຝາກທະນາຄານໄວ້ ແລະເວລາເຮົາກັບມາ ເຮົາກໍຈະຖອນເອົາຊັບຂອງເຮົາ ພ້ອມກັບດອກເບ້ຍ. ຈົ່ງຢຶດເອົາເງິນຫລຽນຂອງມັນ ໄປໃຫ້ຜູ້ທີ່ມີສິບຫລຽນແລ້ວ. ຍ້ອນວ່າ ຜູ້ທີ່ມີແລ້ວຈະໄດ້ຮັບຕື່ມອີກ ແລະຈະມີຫລາຍຂຶ້ນ. ສ່ວນຜູ້ທີ່ບໍ່ມີ ແມ່ນວ່າອັນທີ່ມີແລ້ວ ກໍຈະຖືກຢຶດເອົາໄປຊ້ຳ. ສ່ວນຄົນໃຊ້ທີ່ບໍ່ມີປະໂຫຍດນີ້ ຈົ່ງເອົາມັນໄປຖິ້ມທາງນອກ ບ່ອນມືດເສຍ ຢູ່ທີ່ນັ້ນຈະມີແຕ່ສຽງຮ້ອງໄຫ້ແລະກັດແຂ້ວ.

ວາຈາພຣະເຈົ້າວັນນີ້ສືບຕໍ່ຄວາມປຽບທຽບກ່ຽວກັບເລື່ອງອານາຈັກສະຫວັນ. ມື້ວານນີ້, ວາຈາພຣະເຈົ້າໄດ້ໃຊ້ຮູບພາບຂອງການພົບພໍ້ລະຫວ່າງເຈົ້າບ່າວແລະເຈົ້າສາວທັງສິບຄົນ. ເປັນຮູບພາບຂອງຄວາມຮັກລະຫວ່າງເຈົ້າບ່າວແລະເຈົ້າສາວ. ສິ່ງສໍາຄັນໃນຄວາມຮັກນີ້ແມ່ນຄວາມໄວ້ວາງໃຈຊຶ່ງກັນແລະກັນ.

ສ່ວນວັນນີ້, ວາຈາພຣະເຈົ້າພັດໃຊ້ຮູບພາບຂອງນາຍແລະຜູ້ທໍາງານຂອງເຂົາ. ນາຍຜູ້ນີ້ກ່ອນທີ່ຈະອອກເດີນທາງໄປໄກ, ເຂົາໄດ້ໄວ້ວາງໃຈນໍາຄົນທໍາງານຂອງເຂົາໂດຍມອບໃຫ້ແຕ່ລະຄົນ ຜູ້ລະຫ້າຫລຽນ, ສອງຫລຽນແລະໜຶ່ງຫລຽນຕາມຄວາມສາມາດຂອງແຕ່ລະຄົນ. ແລ້ວກໍອອກເດີນທາງໄປ. ເມື່ອເຈົ້ານາຍໄວ້ວາງໃຈນໍາຄົນທໍາງານຂອງເຂົາເຊ່ັນນີ້. ຝ່າຍຄົນທໍາງານກໍຕ້ອງມີຄວາມໄວ້ວາງໃຈໃນນາຍຂອງຕົນເຊັ່ນດຽວກັນ. ຄວາມໄວ້ວາງໃຈນີ້ສະແດງອອກດ້ວຍການນໍາເອົາເງິນທີ່ນາຍມອບໃຫ້ຕົນນັ້ນໄປທໍາໃຫ້ເກີດດອກອອກຜົນບໍ່ວ່າຈະຫລາຍຫລືນ້ອຍກໍຕາມ. ຊຶ່ງກໍເປັນສິ່ງທີ່ຄົນທໍາງານທີ່ໄດ້ຮັບຫ້າຫລຽນແລະສອງຫລຽນໄດ້ກະທໍາ. ສ່ວນຜູ້ທີ່ໄດ້ຮັບໜຶ່ງຫລຽນນັ້ນ, ເຂົາບໍ່ມີຄວາມໄວ້ວາງໃຈໃນນາຍຂອງຕົນ. ສິ່ງນີ້ສະແດງອອກຜ່ານທາງຄໍາເວົ້າຂອງຄົນຜູ້ນີ້ຕໍ່ນາຍຂອງເຂົາວ່າ: “ຂ້ານ້ອຍຮູ້ວ່າທ່ານເປັນຄົນເຄັ່ງຄັດ: ທ່ານກ່ຽວເຂົ້າບ່ອນທີ່ທ່ານບໍ່ໄດ້ຫວ່ານແລະຮິບໂຮມບ່ອນທີ່ທ່ານບໍ່ໄດ້ແຈກຈ່າຍ. ເພາະສະນັ້ນ, ຂ້ານ້ອຍຢ້ານຫລາຍ ຂ້ານ້ອຍຈຶ່ງໄດ້ເອົາເງິນຂອງທ່ານໄປຝັງດິນໄວ້. ນີ້ແລ, ເງິນຂອງທ່ານໃຫ້ທ່ານເອົາຄືນເສຍ”. ຍ້ອນການຂາດຄວາມໄວ້ໃຈໃນນາຍຂອງຕົນ, ຄົນໃຊ້ຜູ້ນີ້ຈຶ່ງໄດ້ຖືກໂຍນອອກໃນບ່ອນທີ່ມືດ, ຊຶ່ງມີແຕ່ສຽງຮ້ອງໄຫ້ແລະກັດແຂ້ວ.

ໂອພຣະເຢຊູເຈົ້າ, ໂຜດຊ່ວຍລູກໃຫ້ມີຄວາມໄວ້ວາງໃຈໃນຄວາມຮັກເມດຕາຂອງພຣະອົງ. ເພື່ອລູກຈະໄດ້ນໍາເອົາພຣະຄຸນທີ່ພຣະອົງປະທານໃຫ້ນັ້ນອອກມານໍາໃຊ້ເພື່ອໃຫ້ເກີດປະໂຫຍດແກ່ຄົນອື່ນ. ເມື່ອເວລາພຣະອົງຈະກັບມາ, ລູກຈະໄດ້ສະເໜີໃຫ້ພຣະອົງສິ່ງທີ່ລູກໄດ້ກະທໍາດ້ວຍຄວາມຍິນດີເທີ້ນ. ອາແມນ.