ຟັງພຣະວໍຣະສານ ບົດຮ່ຳເພິງ ແລະບົດພາວະນາ

ພຣະອົງເຈົ້າ ອົງພຣະຜູ້ໄຖ່ເຈົ້າ ອົງຜູ້ສັກສິດຂອງອິສຣາແອນ ກ່າວດັ່ງນີ້: ເຮົາແມ່ນພຣະອົງ ພຣະເຈົ້າຂອງເຈົ້າ ແມ່ນຜູ້ບອກສອນສິ່ງທີ່ເປັນປະໂຫຍດແກ່ເຈົ້າ ແມ່ນຜູ້ນຳພາເຈົ້າບົນເສັ້ນທາງ ທີ່ເຈົ້າຕ້ອງນຳໄປ. ໂອນໍ! ຖ້າວ່າ ເຈົ້າໄດ້ໃສ່ໃຈຖືຕາມບັນຢັດຂອງເຮົາແລ້ວ ຄວາມສຸກສຳຣານຂອງເຈົ້າ ກໍຈະເປັນດັ່ງສາຍນ້ຳໃຫຍ່ ແລະຄວາມຊອບທຳຂອງເຈົ້າ ກໍຈະເປັນດັ່ງຟອງທະເລ ເຊື້ອສາຍຂອງເຈົ້າ ຈະເປັນດັ່ງດິນຊາຍ ແລະວົງຕະກູນຂອງເຈົ້າ ຈະມາກຫລາຍດັ່ງເມັດຊາຍ ຊື່ຂອງເຈົ້າຈະບໍ່ຖືກຕັດອອກ ຫລືຖືກລຶບລ້າງໄປຕໍ່ໜ້າເຮົາ.

ຮັບ: ໂອພຣະອົງເຈົ້າ, ຜູ້ໃດເດີນຕາມພຣະອົງໄປຈະໄດ້ຮັບແສງສະຫວ່າງແຫ່ງຊີວິດ.

- ບຸນລາບແກ່ ຜູ້ທີ່ບໍ່ຍອມ ທຳຕາມຄຳແນບນຳຂອງຄົນອະທຳ, ຜູ້ທີ່ບໍ່ຕິດພັນນຳແນວທາງ ຂອງພວກຄົນບາບ.ບໍ່ນັ່ງຮ່ວມປະຊຸມກັບ ພວກທີ່ເຢີ້ຍຫຍັນ, ແຕ່ພໍໃຈນຳ ພຣະທຳບັນຢັດຂອງພຣະອົງເຈົ້າ, ແລະຮຳພຶງເຖິງພຣະບັນຢັດ ທັງເວັນແລະຄືນ. (ເຊີນຮັບ)

- ເຂົາປຽບເໝືອນຕົ້ນໄມ້ ທີ່ຢູ່ໃກ້ແຄມນ້ຳ ທີ່ເກີດດອກອອກຜົນ ຕາມລະດູການ ແລະໃບກໍບໍ່ມີຍາມຫ່ຽວແຫ້ງ. ທຸກສິ່ງທີ່ເຂົາທຳໄປ ກໍໄດ້ຮັບຜົນສຳເລັດ, ສ່ວນຄົນອະທຳນັ້ນ ບໍ່ເປັນດັ່ງນີ້. (ເຊີນຮັບ)

- ຄົນເຫລົ່ານັ້ນ ເປັນເໝືອນເຟືອງແຫ້ງ ຊຶ່ງລົມພັດປິວໄປ; ເຂົາຈະບໍ່ປາກົດຕົວ ໃນວັນແຫ່ງການພິພາກສາ.ພຣະອົງເຈົ້າຊົງຊາບເຖິງ ເສັ້ນທາງຂອງຄົນຊອບທຳ ແຕ່ແນວທາງຂອງຄົນອະທຳນັ້ນ ຈະຕ້ອງພິນາດໄປ. (ເຊີນຮັບ)

ອັນເລລູຢາ! ອັນເລລູຢາ! ໂອພຣະອົງເຈົ້າໂຜດສະເດັດມາ ຂໍໃຫ້ການຢ້ຽມຢາມຂອງພຣະອົງ ເປັນສັນຕິສຸກໃຫ້ພວກຂ້າພະເຈົ້າ ຂໍໃຫ້ດວງໃຈຂອງພວກຂ້າພະເຈົ້າ ໄດ້ພົບຄວາມສຸກອັນບໍລິບູນ ຢູ່ຕໍ່ພຣະພັກພຣະອົງ. ອັນເລລູຢາ!

ໃນເວລານັ້ນ, ພຣະເຢຊູເຈົ້າ ຊົງກ່າວແກ່ຝູງຊົນວ່າ: “ເຮົາຈະປຽບຄົນເຊັ່ນນີ້ໃສ່ໃຜໜໍ? ເບິ່ງກໍຄືກັບໝູ່ເດັກນ້ອຍ ທີ່ນັ່ງຊຸມກັນຫລິ້ນ ຕາມສະໜາມຫລວງ ແລະຮ້ອງໃສ່ໝູ່ເພື່ອນອື່ນໆວ່າ: ພວກເຮົາໄດ້ເປົ່າຂຸ່ຍ ແລະພວກເຈົ້າກໍບໍ່ໄດ້ຟ້ອນລຳ ພວກເຮົາໄດ້ຮ້ອງບົດເພງໄວ້ທຸກ ແລະພວກເຈົ້າກໍບໍ່ໄດ້ຕີເອິກ.” ທີ່ຈິງທ່ານ ຢວງມາຮອດ ບໍ່ກິນບໍ່ດື່ມ ແລະເຂົາກໍວ່າ: ເປັນຄົນຖືກຜີສິງ!” ຕໍ່ມາ ບຸດແຫ່ງມະນຸດສະເດັດມາທັງກິນແລະດື່ມພ້ອມ ແລະເຂົາກໍວ່າ: ນີ້ແຫລະ ນັກກິນນັກດື່ມ! ເປັນໝູ່ຂອງຄົນເກັບສ່ວຍແລະຄົນບາບ.” ແຕ່ວ່າ ພຣະປີຊາສະຫລາດ ໄດ້ຮັບຄຳຍ້ອງຍໍ ກໍເນື່ອງຈາກກິດຈະການຂອງພຣະອົງເອງ.

ວັນນີ້, ພຣະເຢຊູເຈົ້າໄດ້ຕິຕຽນ “ຄົນເຊ່ັນນີ້” ໂດຍກ່າວວ່າ: “ເຮົາຈະປຽບຄົນເຊັ່ນນີ້ໃສ່ໃຜນໍ? ຄົນເຊັ່ນນີ້ແມ່ນຄົນແນວໃດ? ຄົນເຊັ່ນນີ້ແມ່ນຄົນທີ່ມີຈິດໃຈແຂງກະດ້າງບໍ່ຍອມເຊື່ອຟັງຄົນອື່ນ, ໂດຍສະເພາະແມ່ນບັນດາປະພາສົກ, ຜູ້ເລືອກສັນຂອງພຣະເຈົ້າ. ພຣະເຢຊູເຈົ້າໄດ້ປຽບຄົນເຊັ່ນນີ້ໃສ່ກັບເດັກນ້ອຍທີ່ປະຕິເສດບໍ່ຍອມເຂົ້າໃຈສິ່ງໃດໝົດ. ເມື່ອເດັກນ້ອຍເຫລົ່ານີ້ໄດ້ຍິນສຽງດົນຕີ, ພວກເຂົາກໍບໍ່ຟ້ອນລໍາ. ເມື່ອພວກເຂົາໄດ້ຍິນສຽງເພງໄວ້ທຸກ, ພວກເຂົາກໍບໍ່ເປັນທຸກກັບໃຈ. ຄົນເຊັ່ນນີ້ບໍ່ຍອມຟັງຄໍາປະກາດເຖິງການເປັນທຸກກັບໃຈຂອງທ່ານຢວງບັບຕິສຕາ. ແລະເຂົາກໍບໍ່ສົນໃຈໃນຄໍາເທດສອນຂອງພຣະເຢຊູເຈົ້າ.

ທັດສະນະທ່າທີຂອງຄົນເຊັ່ນນີ້ສະທ້ອນເຖິງທັດສະນະທ່າທີຂອງພວກເຮົາແຕ່ລະຄົນເຊັ່ນດຽວກັນ. ຫລາຍຄັ້ງພວກເຮົາກໍບໍ່ຍອມຟັງວາຈາພຣະເຈົ້າ. ພວກເຮົາປະຕິເສດການເປັນທຸກກັບໃຈ. ພວກເຮົາບໍ່ເຊື່ອໃນພຣະອົງຍ້ອນເຫດຜົນຕ່າງໆນາໆ.

ໃນກໍານົດແຫ່ງການຕຽມຮັບການສະເດັດມາຂອງພຣະເຢຊູເຈົ້ານີ້ ຈຶ່ງເປັນໂອກາດໃຫ້ພວກເຮົາໄດ້ຜັນປ່ຽນຊີວິດການກະທໍາທີ່ບໍ່ຖືກຕ້ອງຂອງພວກເຮົາ, ເພື່ອພວກເຮົາຈະໄດ້ຈັດຕຽມເສັ້ນທາງທີ່ຍັງເປັນໂນນ, ເປັນຂຸມໃນດວງໃຈພວກເຮົາໃຫ້ຮາບພຽງ. ເພື່ອພວກເຮົາຈະໄດ້ພ້ອມທີ່ຈະຕ້ອນຮັບອົງພຣະຜູ້ກູ້ໄຖ່ທີ່ຈະລົງມາບັງເກີດໃນດວງໃຈຂອງພວກເຮົາ.

ໂອພຣະເຢຊູເຈົ້າໂຜດຊ່ວຍລູກໃຫ້ຮູ້ຈັກຜັນປ່ຽນຊີວິດແລະຫັນມາຫາພຣະອົງຢ່າງຈິງໃຈ, ເພື່ອລູກຈະໄດ້ຮັບການອະໄພໂທດແລະສັນຕິສຸກທີ່ມາຈາກພຣະອົງພຣະຜູ້ກູ້ໄຖ່ຂອງລູກດ້ວຍເທີ້ນ. ອາແມນ.