ຟັງພຣະວໍຣະສານ ບົດຮ່ຳເພິງ ແລະບົດພາວະນາ

ພຣະອົງເຈົ້າຊົງກ່າວວ່າ: ແມ່ນແລ້ວ, ເຮົາຈະສ້າງຟ້າໃໝ່ ແລະດິນໃໝ່, ຈະບໍ່ມີໃຜຈື່ຈຳອະດີດອີກ, ມັນຈະບໍ່ຄືນມາ ວຸ້ນວາຍຈິດໃຈອີກ. ຈົ່ງດີໃຈ ຢ່າງບໍ່ມີສິ້ນສຸດ, ຈົ່ງຊື່ນຊົມຍິນດີ ໃນສິ່ງທີ່ເຮົາຈະສ້າງຂຶ້ນນັ້ນ. ເພາະເຮົາສ້າງເຢຣູຊາແລມ ແຫ່ງຄວາມຍິນດີ ປະຊາກອນແຫ່ງຄວາມຊື່ນຊົມ, ເຮົາຈະປະສົບ ກັບຄວາມເບີກບານນຳເຢຣູຊາແລມ, ຄວາມຍິນດີຂອງເຮົາຢູ່ກັບປະຊາກອນຂອງເຮົາ. ຈະບໍ່ໄດ້ຍິນສຽງຮ້ອງ ແລະສຽງໄຫ້ອີກ, ຜູ້ເກີດໃໝ່ໃຫຍ່ລຸນ ຈະບໍ່ຕາຍໄວອີກ, ແລະຜູ້ໃຫຍ່ແລ້ວ ກໍຈະເຖິງໄວຊະລາ, ຜູ້ໜຸ່ມກວ່າໝູ່ ຈະມີຊີວິດຮອດຮ້ອຍປີ. ຜູ້ທີ່ຕາຍກ່ອນນັ້ນ ກໍໃຫ້ຖືວ່າ ເປັນກຳເວນ. ຈະມີການປຸກຢ້າວເຮືອນ ແລະເຂົ້າຢູ່ປະຈຳ, ຈະປູກສວນອະງຸ່ນ ແລະຮັບກິນໝາກຜົນຂອງມັນ.

ຮັບ: ໂອພຣະອົງເຈົ້າ ຂ້າພະເຈົ້າຍົກຍ້ອງສັນຣະເສີນພຣະອົງ ຜູ້ໄດ້ຍົກຍໍຂ້າພະເຈົ້າຂຶ້ນ

- ໂອພຣະອົງເຈົ້າ, ຂ້າພະເຈົ້າຍົກຍ້ອງສັນຣະເສີນພຣະອົງຜູ້ໄດ້ຍົກຍໍຂ້າພະເຈົ້າຂຶ້ນ, ພຣະອົງບໍ່ໄດ້ປະໃຫ້ພວກສັດຕູ ຫົວຂວັນຂ້າພະເຈົ້າ. ໂອພຣະອົງເຈົ້າ, ພຣະອົງໄດ້ຊົງພາຂ້າພະເຈົ້າ ຂຶ້ນຈາກເຫວເລິກ ແລະບັນດານໃຫ້ມີຊີວິດຂຶ້ນໃໝ່ ໃນເມື່ອຂ້າພະເຈົ້າຕົກຢູ່ໃນຂຸມນັ້ນ. (ເຊີນຮັບ)

- ພວກທ່ານ ຜູ້ສັດຊື່ຕໍ່ພຣະອົງ, ຈົ່ງສະເຫລີມສະຫລອງພຣະອົງເຈົ້າ. ຈົ່ງສົມມະນາພຣະຄຸນ ດ້ວຍລະລຶກເຖິງ ພຣະນາມຍອດສັກສິດຂອງພຣະອົງ. ພະພິໂລດຂອງພຣະອົງ ມີແຕ່ຄາວດຽວ, ສ່ວນພຣະໄທດີນັ້ນ ຕະຫລອດຊີວິດ. ພໍຕົກຄ່ຳກໍແມ່ນຍາມນ້ຳຕາ, ຕື່ນເຊົ້າມາແມ່ນສຽງຮ້ອງມ່ວນຊື່ນ. (ເຊີນຮັບ)

- ໂອພຣະອົງເຈົ້າ, ໂຜດສະດັບຟັງ ແລະສົງສານຂ້າພະເຈົ້າເຖີດ! ໂອພຣະອົງເຈົ້າ ໂຜດສະເດັດມາ ຊ່ວຍຂ້າພະເຈົ້າ. ພຣະອົງໄດ້ປ່ຽນແປງ ຄວາມໂສກເສົ້າຂອງຂ້າພະເຈົ້າ ໄປເປັນການເຕັ້ນລຳ. ໂອພຣະອົງ ພຣະເຈົ້າຂອງຂ້າພະເຈົ້າ, ຂ້າພະເຈົ້າຂໍຍ້ອງຍໍ ສົມມະນາຄຸນພຣະອົງ ຢ່າງບໍ່ມີວັນສິ້ນສຸດ. (ເຊີນຮັບ)

ຂໍສັນຣະເສີນເຍີນຍໍພຣະອົງ ລາຊາທີລາດ ຜູ້ຊົງກຽດນິຣັນດອນ. ຈົ່ງສະແຫວງຫາຄວາມດີ ຢ່າສະແຫວງຫາຄວາມຊົ່ວ ເພື່ອເຈົ້າຈະດຳຣົງຊີວິດຢູ່ໄດ້ ແລ້ວພຣະເຈົ້າ ຈະສະຖິດຢູ່ກັບເຈົ້າ.

ຫວິດສອງວັນ ຢູ່ກັບຊາວຊາມາຣີນັ້ນແລ້ວ, ພຣະເຢຊູເຈົ້າກໍສະເດັດໄປແຂວງກາລີເລ, ພຣະອົງເອງ ໄດ້ປະກາດວ່າ: “ບໍ່ມີປະພາສົກອົງໃດ ຈະໄດ້ຮັບກຽດ ຢູ່ບ້ານເມືອງຂອງຕົນ.” ພໍສະເດັດມາເຖິງແຂວງກາລີເລ, ຊາວບ້ານຊາວເມືອງ ພາກັນຕ້ອນຮັບພຣະອົງຢ່າງດີ ຍ້ອນໄດ້ເຫັນທຸກສິ່ງທີ່ພຣະອົງໄດ້ກະທຳ ຢູ່ນະຄອນເຢຣູຊາແລມ ໃນໂອກາດບຸນສະຫລອງ; ຍ້ອນວ່າ ພວກເຂົາເອງກໍໄດ້ໄປຮ່ວມ ໃນບຸນສະຫລອງນັ້ນດ້ວຍ.

ພຣະອົງສະເດັດກັບມາເຖິງບ້ານການາ ໃນແຂວງກາລີເລ ອັນແມ່ນບ້ານທີ່ພຣະອົງ ໄດ້ປ່ຽນນ້ຳເປັນນ້ຳອະງຸ່ນ. ໃນເວລານັ້ນ ມີຂຸນນາງຜູ້ໜຶ່ງ ມີບຸດເຈັບປ່ວຍ ຢູ່ເມືອງກາຟາກນາອຸມ. ເມື່ອຊາບຂ່າວວ່າ ພຣະເຢຊູເຈົ້າໄດ້ສະເດັດຈາກແຂວງຢູດາ ມາເຖິງແຂວງກາລີເລແລ້ວ. ລາວກໍເຂົ້າໄປ ຂາບທູນຂໍພຣະອົງ ສະເດັດໄປປົວບຸດຂອງຕົນ ທີ່ກຳລັງຈະສິ້ນໃຈ. ພຣະເຢຊູເຈົ້າກ່າວວ່າ: “ຖ້າທ່ານບໍ່ເຫັນການປະຫລາດ ອັດສະຈັນແລ້ວ, ທ່ານຄົງບໍ່ເຊື່ອ.” ຂຸນນາງຜູ້ນັ້ນທູນວ່າ: “ພຣະອົງເຈົ້າເອີຍ! ເຊີນສະເດັດໄປຮອດກ່ອນບຸດຂ້ານ້ອຍຈະສິ້ນໃຈທ້ອນ!” ພຣະເຢຊູເຈົ້າກ່າວວ່າ: “ຫລົບເມືອເຖີດ, ບຸດຂອງທ່ານມີຊີວິດຢູ່.” ຂຸນນາງເຊື່ອພຣະວາຈາ ແລ້ວກໍຫລົບເມືອ. ໃນເວລາທີ່ກຳລັງຫລົບເມືອນັ້ນ, ກໍໄດ້ພົບພວກຄົນໃຊ້ ມາບອກຂ່າວວ່າ ບຸດຂອງທ່ານມີຊີວິດຢູ່, ຂຸນນາງຈຶ່ງຖາມວ່າ ໄຄແດ່ແຕ່ເມື່ອໃດ. ຄົນໃຊ້ຕອບວ່າ: “ວານນີ້ ເວລາບ່າຍໂມງໜຶ່ງ ກໍເຊົາໄຂ້.” ຜູ້ເປັນບິດາກໍຈື່ໄດ້ວ່າ ແມ່ນກົງກັບເວລາ ທີ່ພຣະເຢຊູເຈົ້າກ່າວວ່າ: “ບຸດຂອງທ່ານມີຊີວິດຢູ່” ນັ້ນເອງ. ແລ້ວລາວເອງ ພ້ອມທັງຄອບຄົວທັງໝົດ ກໍໄດ້ເຊື່ອເຖິງພຣະອົງ. ນີ້ແມ່ນອັດສະຈັນທີ່ສອງ ຊຶ່ງພຣະເຢຊູເຈົ້າຊົງກະທຳ, ເວລາສະເດັດຈາກແຂວງຢູດາຄືນເມືອແຂວງກາລີເລ.

ວັນນີ້, ພຣະກຣິສຕະຈັກໃຫ້ພວກເຮົາມີໂອກາດຟັງວາຈາພຣະເຈົ້າໃນພຣະວໍລະສານໂດຍນັກບຸນຢວງ. ສໍາລັບນັກບຸນຢວງ, ພຣະເຢຊູເຈົ້າແມ່ນວາຈາຂອງພຣະເຈົ້າທີ່ລົງມາຮັບເອົາກາຍເປັນມະນຸດເພື່ອຢູ່ນໍາມະນຸດ (ຢງ. 1, 14). ອາໄສພຣະວາຈານີ້ທຸກສິ່ງກໍເກີດເປັນມາແລະມີຊີວິດ. ສິ່ງນີ້ເລີ່ມສະແດງອອກຢ່າງຈະແຈ້ງໃນງານວິວາຫະມຸງຄຸນຢູ່ບ້ານການາ, ແຂວງກາລີເລ. ເມື່ອເວລາເຈົ້າພາບໝົດເຫລົ້່າແລ້ວ,ແມ່ພຣະກໍບອກກັບພວກຄົນໃຊ້ວ່າ: “ຖ້າພຣະເຢຊູເຈົ້າກ່າວຫຍັງ ກໍໃຫ້ທໍາຕາມເນີ” (ຢງ. 2, 5). ເມື່ອພວກຄົນໃຊ້ທໍາຕາມວາຈາພຣະເຢຊູເຈົ້າໂດຍຕັກນໍ້າໃສ່ເຕັມຫົກໄຫແລ້ວ, ນໍ້າກໍໄດ້ກາຍເປັນເຫລົ້າທີ່ແຊບນົວ. ຈາກນັ້ນ, ເມື່ອພຣະເຢຊູເຈົ້າສົນທະນາກັບຜູ້ຍິງຕ່າງສາດສະໜາຊາວຊາມາຣີແຕນ, ນາງກໍຮູ້ສຶກໄດ້ວ່າສິ່ງທີ່ພຣະເຢຊູເຈົ້າກ່າວກັບນາງນັ້ນລ້ວນແຕ່ຖືກຕ້ອງໝົດ (ຢງ. 4, 39). ແລະຫລາຍຄົນໃນເຂດຊາມາຣີນັ້ນກໍໄດ້ເຊື່ອໃນພຣະຢຊູເຈົ້າຍ້ອນວາຈາຂອງພຣະອົງ (ຢງ. 4, 40).

ວັນນີ້, ພຣະເຢຊູເຈົ້າກໍກ່າວກັບຂຸນນາງຜູ້ໜຶ່ງທີ່ມາວອນຂໍພຣະອົງໃຫ້ລົງໄປປິ່ນປົວລູກຂອງລາວທີ່ພວມຈະຕາຍ. ພຣະເຢຊູເຈົ້າກໍກ່າວກັບຂຸນນາງນັ້ນວ່າ: “ຈົ່ງເມືອເຖີດ, ລູກຂອງເຈົ້າມີຊີວິດຢູ່”. ຂຸນນາງຜູ້ນັ້ນກໍເຊື່ອໃນວາຈາຂອງພຣະເຢຊູເຈົ້າ ແລະລູກຂອງລາວກໍມີຊີວິດ.

ສິ່ງເຫລົ່ານີ້ຢັ້ງຢືນໃຫ້ພວກເຮົາເຫັນວ່າ ພຣະເຢຊູເຈົ້າຜູ້ເປັນມະນຸດເໝືອນກັບພວກເຮົານີ້, ພຣະອົງແມ່ນພຣະວາຈາຂອງພຣະເຈົ້າ. ວາຈາຂອງພຣະອົງເປັນວາຈາທີ່ຊົງຊີວິດ. ຜູ້ໃດເຊື່ອໃນວາຈາຂອງພຣະອົງແມ່ນວ່າຈະຕາຍໄປແລ້ວ ກໍຈະກັບມາມີຊີວິດອີກຄັ້ງ.

ໃນກໍານົດບໍາເພັນສິນນີ້ກໍເປັນໂອກາດໃຫ້ພວກເຮົາຖາມຕົວເອງວ່າ ຂ້ອຍໄດ້ມີເວລາເພື່ອຟັງວາຈາພຣະເຈົ້າບໍ? ຂ້ອຍໄດ້ເຊື່ອໃນວາຈາຂອງພຣະອົງບໍ? ສໍາລັບຂ້ອຍ, ພຣະເຢຊູເຈົ້າແມ່ນໃຜ?

ໂອພຣະເຢຊູ, ພຣະວາຈາຊົງຊີວິດ ໂຜດປິ່ນປົວລູກໃຫ້ຫາຍຈາກການຂາດຄວາມເຊື່ອ. ເພື່ອລູກຈະໄດ້ເຊື່ອໝັ້ນຢ່າງຈິງຈັງວ່າ ພຣະອົງແມ່ນວາຈາຂອງພຣະເຈົ້າທີ່ລົງມາເປັນມະນຸດເພື່ອຊ່ວຍລູກແລະທຸກຄົນໃຫ້ຮອດຊີວິດນັ້ນແລ. ອາແມນ.