ການສົງເຄາະກຸ່ມກຣິສຕະຊົນ

1.ຕາມຈິງແລ້ວ ຂ້າພະເຈົ້າບໍ່ຈຳເປັນຕ້ອງຂຽນມາຫາພີ່ນ້ອງ ເຖິງເລື່ອງການສົງເຄາະບັນດາກຣິສຕະຊົນ. 2. ຂ້າພະເຈົ້າຮູ້ວ່າ ພວກພີ່ນ້ອງພຽກພ້ອມຢູ່ແລ້ວ, ຂ້າພະເຈົ້າຈຶ່ງໄດ້ເວົ້າອວດເລື່ອງພວກພີ່ນ້ອງ ໃຫ້ຊາວມາເຊດວນຟັງ ວ່າ ຊາວອາກາຢາຕຽມພ້ອມແຕ່ປີກາຍແລ້ວ, ແລະໃຈຮ້ອນຮົນຂອງພວກພີ່ນ້ອງກໍໄດ້ກະຕຸ້ນເຕືອນໃຈຫລາຍຄົນ ໃຫ້ມີຄວາມສົນໃຈດ້ວຍ. 3. ຂ້າພະເຈົ້າສົ່ງບັນດາພີ່ນ້ອງມາ ເພື່ອບໍ່ໃຫ້ການເວົ້າອວດເຖິງພວກພີ່ນ້ອງໃນຂໍ້ນັ້ນ ກາຍເປັນຄວາມເວົ້າທີ່ໄຮ້ປະໂຫຍດ, ແລະເພື່ອໃຫ້ພວກພີ່ນ້ອງຕຽມ ດັ່ງທີ່ຂ້າພະເຈົ້າໄດ້ກ່າວໄວ້. 4.ບໍ່ດັ່ງນັ້ນ, ຖ້າຊາວມາເຊດວນບາງຄົນມານຳຂ້າພະເຈົ້າ ແລະເຫັນພວກພີ່ນ້ອງບໍ່ທັນຕຽມພ້ອມ ດັ່ງທີ່ຂ້າພະເຈົ້າໄດ້ອວດນັ້ນ ກໍຢ່າວ່າແຕ່ພວກພີ່ນ້ອງໄດ້ຮັບຄວາມອັບອາຍຂາຍໜ້າ, ຂ້າພະເຈົ້າເອງກໍຈະໄດ້ຮັບຄືກັນ. 5.ດັ່ງນີ້ ຂ້າພະເຈົ້າຈຶ່ງຄຶດວ່າ ຈຳເປັນຕ້ອງຂໍຮ້ອງໃຫ້ພີ່ນ້ອງເຫລົ່ານັ້ນມາຫາພວກພີ່ນ້ອງ ກ່ອນພວກຂ້າພະເຈົ້າ ແລ້ວຈັດຕຽມເຄື່ອງທານຂອງພວກພີ່ນ້ອງໄວ້ ຕາມທີ່ໄດ້ສັນຍາໄວ້ແລ້ວ ເພື່ອຈະໄດ້ມີຂອງທານນັ້ນຢູ່ພ້ອມ, ອັນແມ່ນຂອງທານທີ່ໃຫ້ດ້ວຍໃຈສັດທາ ບໍ່ແມ່ນດ້ວຍຂືນໃຈ.

ພອນຂອງການມີໃຈເຜື່ອແຜ່

6.ພວກພີ່ນ້ອງຈົ່ງຈຳຄຳນີ້ ຄື: ຜູ້ທີ່ຫວ່ານພຽງເລັກນ້ອຍ, ກໍເກັບກ່ຽວໄດ້ແຕ່ພຽງເລັກນ້ອຍ. ຜູ້ທີ່ຫວ່ານຫລາຍ ກໍເກັບກ່ຽວໄດ້ຫລາຍ. 7.ທຸກຄົນຈົ່ງໃຫ້ທານຕາມທີ່ຕົນໄດ້ຕັ້ງໃຈໄວ້, ບໍ່ແມ່ນໃຫ້ທານດ້ວຍຄວາມເສຍດາຍ ຫລືດ້ວຍຂືນໃຈໃຫ້, ຍ້ອນພຣະເປັນເຈົ້າມັກຊອບຜູ້ທີ່ໃຫ້ທານດ້ວຍຄວາມຍິນດີ. 8.ພຣະເປັນເຈົ້າສາມາດປະທານພຣະພອນທຸກຢ່າງໃຫ້ພວກພີ່ນ້ອງຢ່າງອຸດົມສົມບູນ ເພື່ອໃຫ້ພວກພີ່ນ້ອງມີທຸກສິ່ງທຸກຢ່າງພຽງພໍສຳລັບຕົວເອງສະເໝີ ແລ້ວຍັງມີເຫລືອເພື່ອການກຸສົນຕ່າງໆອີກດ້ວຍ. 9.ດັ່ງມີຂຽນໄວ້ໃນພຣະຄຳພີວ່າ: “ເຂົາແຈກຈ່າຍ, ເຂົາໃຫ້ທານແກ່ຜູ້ຍາກຈົນ, ຄຸນຄວາມດີຂອງເຂົາກໍໝັ້ນຄົງຢູ່ເປັນນິດ”. 10.ພຣະອົງຜູ້ປະທານເມັດພືດໃຫ້ແກ່ຜູ້ຫວ່ານ ແລະປະທານເຂົ້າເປັນອາຫານນັ້ນ, ຈະປະທານແລະເພີ່ມພູນເມັດພືດຂອງພວກພີ່ນ້ອງ ແລະຈະທຳໃຫ້ໝາກຜົນແຫ່ງຄວາມຊອບທຳຂອງພວກພີ່ນ້ອງຈະເລີນຍິ່ງໆຂຶ້ນ. 11.ພວກພີ່ນ້ອງຈະຮັ່ງມີສີສຸກຂຶ້ນໃນທຸກຢ່າງ ເພື່ອຈະໄດ້ມີຂອງແຈກຈ່າຍຢ່າງໃຈກວ້າງຂວາງ ໂດຍອາໄສພວກເຮົາເປັນຜູ້ແຈກ ແລະການກຸສົນຂອງພວກພີ່ນ້ອງກໍຈະທຳໃຫ້ເກີດການຂອບພຣະຄຸນພຣະເປັນເຈົ້າ. 12.ດ້ວຍວ່າ ການສົງເຄາະຄາວນີ້ ບໍ່ແມ່ນພຽງແຕ່ຈະຊ່ວຍກຸ່ມກຣິສຕະຊົນທີ່ຂາດເຂີນເທົ່ານັນ, ຍັງເປັນເຫດໃຫ້ມີການຂອບພຣະຄຸນພຣະເປັນເຈົ້າທະວີຂຶ້ນຫລາຍກວ່າອີກ. 13.ອາໄສການສົງເຄາະນີ້, ພວກເຂົາຈຶ່ງພາກັນສັນຣະເສີນພຣະເປັນເຈົ້າ ຍ້ອນພວກພີ່ນ້ອງໄດ້ນອບນ້ອມເຊື່ອຟັງ ແລະຮັບເອົາຂ່າວປະເສີດຂອງພຣະກຣິສໂຕ, ແລະຍ້ອນພວກພີ່ນ້ອງໄດ້ຊ່ວຍເຫລືອພວກເຂົາແລະຜູ້ອື່ນດ້ວຍໃຈກວ້າງຂວາງ. 14.ສ່ວນພວກເຂົາເຈົ້າກໍຈະຄຶດເຖິງພວກພີ່ນ້ອງ ແລະພາວະນາອຸທິດໃຫ້ ຍ້ອນເຫັນແກ່ພຣະຄຸນອັນເຫລືອລົ້ນ ທີ່ພຣະເປັນເຈົ້າໄດ້ປະທານໃຫ້ແກ່ພວກພີ່ນ້ອງ. 15.ຂໍຂອບພຣະຄຸນພຣະເປັນເຈົ້າ ຍ້ອນຂອງທານອັນເຫລືອທີ່ຈະພັນລະນາຂອງພຣະອົງ.