ການແຜ່ເງິນຊ່ວຍຄົນທຸກຈົນຕຸກເຕືອນໃຫ້ມີໃຈເອື້ອເຟື້ອເຜື່ອແຜ່

1.ພີ່ນ້ອງທີ່ຮັກ, ພວກເຮົາຢາກໃຫ້ພວກພີ່ນ້ອງຮູ້ຈັກເຖິງພຣະຄຸນ ທີ່ພຣະເປັນເຈົ້າໄດ້ປະທານໃຫ້ໝູ່ກຣິສຕັງທີ່ແຂວງມາເຊດວນ. 2.ຄື ເມື່ອຄາວພວກເຮົາຖືກທົດລອງໃຈຢ່າງໜັກ ດ້ວຍຮັບທຸກລຳບາກນານາປະການນັ້ນ, ຄວາມຍິນດີອັນເຫລືອລົ້ນ ແລະຄວາມທຸກຈົນຢ່າງທີ່ສຸດຂອງພວກເຂົາ ໄດ້ບັນດານໃຫ້ພວກເຂົາມີໃຈເອື້ອເຟື້ອເຜື່ອແຜ່ເປັນຢ່າງຍິ່ງ. 3. ຂ້າພະເຈົ້າເປັນພິຍານໃຫ້ພວກເຂົາໄດ້ວ່າ ເຂົາເຈົ້າໄດ້ບໍລິຈາກຕາມຄວາມສາມາດຂອງເຂົາເຈົ້າ. ຕາມຈິງ ພວກເຂົາໄດ້ບໍລິຈາກເກີນຄວາມສາມາດຂອງຕົນ ແລະດ້ວຍຄວາມເຕັມໃຈອີກດ້ວຍ. 4.ເຂົາເຈົ້າຍັງໄຫວ້ວອນຂ້າພະເຈົ້າຊ້ຳໄປຊ້ຳມາວ່າ ຂໍໃຫ້ພວກເຂົາໄດ້ຮ່ວມໃນການຊ່ວຍເຫລືອບັນດາຜູ້ສັກສິດດ້ວຍ. 5.ແຕ່ສິ່ງທີ່ຂ້າພະເຈົ້າຄາດໝາຍໄວ້ກໍຄື ເຂົາເຈົ້າໄດ້ມອບຖະຫວາຍຕົວແດ່ພຣະເປັນເຈົ້າກ່ອນ, ແລ້ວຈຶ່ງມອບຕົວເຂົາໃຫ້ພວກເຮົາຕາມນ້ຳພຣະໄທພຣະເຈົ້າ. 6.ດ້ວຍເຫດນີ້ແລ້ວ, ເຮົາຈຶ່ງຮ້ອງຂໍຕີໂຕໄປຊ່ວຍພວກພີ່ນ້ອງທຳການກຸສົນໃຫ້ສຳເລັດ ຕາມທີ່ພວກພີ່ນ້ອງໄດ້ລົງມືໄວ້ກ່ອນແລ້ວ. 7.ຍ້ອນວ່າພວກພີ່ນ້ອງໄດ້ຮັບທຸກສິ່ງຢ່າງເຫລືອລົ້ນ ຄື ຄວາມເຊື່ອ, ໂວຫານ, ຄວາມຮູ້, ພ້ອມທັງຄວາມຮ້ອນຮົນອັນແຮງກ້າແລະຄວາມຮັກ ຊຶ່ງພວກພີ່ນ້ອງໄດ້ມາຈາກພວກເຮົາ, ພວກພີ່ນ້ອງກໍຕ້ອງສຳແດງຕົນເປັນຄົນໃຈກວ້າງດັ່ງດຽວກັນ. 8.ທີ່ຂ້າພະເຈົ້າເວົ້າມານີ້ ບໍ່ແມ່ນການບັງຄັບ, ແຕ່ເພື່ອໄຄ່ພິສູດວ່າ ເມື່ອປຽບກັບຄວາມຮ້ອນຮົນແຮງກ້າຂອງຜູ້ອື່ນແລ້ວ ຄວາມຮັກຂອງພວກພີ່ນ້ອງຈະຈິງຫລືບໍ່ເທົ່ານັ້ນ. 9.ພວກພີ່ນ້ອງກໍຊາບດີວ່າ ພຣະເຢຊູກຣິສໂຕພຣະເຈົ້າຂອງເຮົາທັງຫລາຍ ຊົງພຣະໄທກວ້າງຂວາງ ເຜື່ອແຜ່ສັກພຽງໃດ, ແມ່ນວ່າພຣະອົງຊົງຮັ່ງມີ ກໍຍັງຍອມເປັນຄົນທຸກຍາກເພື່ອພວກພີ່ນ້ອງ. ທັງນີ້ກໍເພື່ອໃຫ້ພວກພີ່ນ້ອງໄດ້ຮັ່ງມີ ໂດຍອາໄສຄວາມທຸກຈົນຂອງພຣະອົງ. 10.ກ່ຽວກັບເລື່ອງນີ້ ຂ້າພະເຈົ້າຂໍໃຫ້ແຕ່ຄຳແນະນຳ ຄື ເລື່ອງທີ່ພວກພີ່ນ້ອງໄດ້ລົງມືເມື່ອປີກາຍນີ້: ບໍ່ແມ່ນແຕ່ໄດ້ລົງມືເທົ່ານັ້ນ, ແຕ່ຍັງມີນ້ຳໃຈຢາກທຳອີກດ້ວຍ. 11.ບັດນີ້ ຂໍໃຫ້ພີ່ນ້ອງກະທຳງານນັ້ນສຳເລັດເສຍ, ຍ້ອນວ່າ ເມື່ອພວກພີ່ນ້ອງມີໃຈພຽກພ້ອມຢູ່ແລ້ວ, ງານນັ້ນກໍຈະສຳເລັດໄປຕາມຄວາມສາມາດຂອງພວກພີ່ນ້ອງ. 12.ຍ້ອນວ່າ ເມື່ອພວກພີ່ນ້ອງທຳໄປດ້ວຍເຕັມໃຈແທ້, ເພິ່ນກໍຈະຍິນດີຮັບເອົາຕາມເຮົາມີ, ບໍ່ແມ່ນຕາມທີ່ເຮົາບໍ່ມີ. 13. ຂ້າພະເຈົ້າບໍ່ໄດ້ໝາຍຄວາມວ່າ ຢາກໃຫ້ພວກພີ່ນ້ອງຕ້ອງຕົກທຸກໄດ້ຍາກເພື່ອທຸເລົາຜູ້ອື່ນດອກ, ແຕ່ຢາກໃຫ້ການຊ່ວຍເຫລືອນັ້ນກ້ຳເກິ່ງກັນ. 14.ໃນກໍລະນີນີ້ ຂ້າພະເຈົ້າໝາຍຄວາມວ່າ ພວກພີ່ນ້ອງຄວນເອົາຂອງເຫລືອໃຊ້ນັ້ນ ໄປຊ່ວຍເຫລືອພວກທີ່ຂາດເຂີນ, ເຂົາຈະໄດ້ເອົາຂອງທີ່ເຂົາເຫລືອໃຊ້ນັ້ນ ມາຊ່ວຍເຫລືອພວກພີ່ນ້ອງອີກ. ດັ່ງນີ້ແຫລະຈຶ່ງຈະກ້ຳເກິ່ງກັນ. 15.ດັ່ງທີ່ມີຄຳຂຽນໄວ້ວ່າ: “ຜູ້ທີ່ເກັບໄດ້ຫລາຍ ກໍບໍ່ຫລາຍເຫລືອໂພດ, ສ່ວນຜູ້ເກັບໄດ້ໜ້ອຍ ກໍບໍ່ຂາດເຂີນຫຍັງ”.

ການແນະນຳຜູ້ແທນ

16.ຂໍຂອບພຣະຄຸນພຣະເປັນເຈົ້າ ຜູ້ຊົງບັນດານໃຫ້ຕີໂຕມີໃຈຂະຫຍັນຂັນແຂງເພື່ອພວກພີ່ນ້ອງຢ່າງດຽວກັນ. 17.ເພິ່ນບໍ່ພຽງແຕ່ທຳຕາມຄຳຮ້ອງຂໍຂອງພວກເຮົາເທົ່ານັ້ນ, ແຕ່ຍ້ອນເພິ່ນມີໃຈຂະຫຍັນຂັນແຂງ ເພິ່ນເອງຈຶ່ງອົດສາມາຫາພວກພີ່ນ້ອງດ້ວຍ. 18.ພວກເຮົາໄດ້ສົ່ງພີ່ນ້ອງຜູ້ໜຶ່ງມານຳຕີໂຕ. ບັນດາກຸ່ມກຣິສຕະຊົນກໍຍ້ອງຍໍສັນຣະເສີນພີ່ນ້ອງຜູ້ນັ້ນ ໃນເລື່ອງການປ່າວປະກາດຂ່າວປະເສີດ. 19.ຍິ່ງກວ່ານັ້ນອີກ ບັນດາກຸ່ມກຣິສຕະຊົນເອງກໍໄດ້ພ້ອມໃຈກັນເລືອກພີ່ນ້ອງຜູ້ນີ້ ໃຫ້ເປັນໝູ່ເດີນທາງໄປກັບຂ້າພະເຈົ້າໃນການກຸສົນ ຊຶ່ງພວກເຮົາເອງໄດ້ຮັບທຸລະ ເພື່ອເປັນກຽດໃຫ້ອົງພຣະເຈົ້າ ແລະເປັນການສະແດງເຖິງນ້ຳໃຈດີຂອງພວກເຮົາ. 20.ພວກເຮົາລະມັດລະວັງ ຫລີກເວັ້ນ ບໍ່ໃຫ້ມີໃຜຕຳໜິຕິຕຽນຫຍັງ ໃນເລື່ອງເງິນບໍລິຈາກຈຳນວນມາກມາຍ ຊຶ່ງພວກເຮົາຮັບພາລະໄປແຈກນັ້ນ. 21.ພວກເຮົາມຸ່ງຫວັງຢາກເປັນຄົນສັດຊື່ ບໍ່ແມ່ນແຕ່ຕໍ່ສາຍພຣະເນດຂອງພຣະເຈົ້າເທົ່ານັ້ນ, ແຕ່ຕໍ່ໜ້າຄົນທັງຫລາຍອີກດ້ວຍ. 22.ພວກເຮົາໄດ້ສົ່ງພີ່ນ້ອງຂອງເຮົາຜູ້ໜຶ່ງມາກັບເຂົາທັງສອງດ້ວຍ, ເຂົາແມ່ນຜູ້ທີ່ເຮົາໄດ້ລອງໃຈເບິ່ງຫລາຍເທື່ອແລ້ວ ເຫັນວ່າມີຄວາມຂະຫຍັນຂັນແຂງໃນເລື່ອງຕ່າງໆ, ແລະບັດນີ້ເຂົາແຮງມີຄວາມຂະຫຍັນຂັນແຂງຫລາຍກວ່າອີກ ຍ້ອນເຂົາມີຄວາມໄວ້ວາງໃຈນຳພວກພີ່ນ້ອງຫລາຍ. 23.ສ່ວນຕີໂຕນັ້ນ, ເພິ່ນເປັນເພື່ອນແລະຜູ້ຮ່ວມງານຂອງຂ້າພະເຈົ້າ ໃນການຮັບໃຊ້ພວກພີ່ນ້ອງ. ສ່ວນພີ່ນ້ອງສອງຄົນນັ້ນ ແມ່ນຜູ້ແທນຂອງບັນດາກຸ່ມກຣິສຕະຊົນ ແລະເປັນກຽດສັກສີຂອງພຣະກຣິສໂຕເຈົ້າ. 24.ດັ່ງນີ້ ພວກພີ່ນ້ອງຈົ່ງສະແດງຫລັກຖານແກ່ບັນດາກຸ່ມກຣິສຕະຊົນ ເພື່ອໃຫ້ເຂົາເຈົ້າເຫັນພວກພີ່ນ້ອງມີຄວາມຮັກຈິງ ສົມກັບທີ່ຂ້າພະເຈົ້າໄດ້ອວດເລື່ອງພວກພີ່ນ້ອງ ສູ່ເຂົາເຈົ້າຟັງ.