1.ແມ່ນແທ້ ພວກເຮົາຮູ້ດີວ່າ ຖ້າເຮືອນຂອງເຮົາໃນໂລກນີ້ ຄືຮ່າງກາຍນັ້ນ ຕ້ອງຖືກທຳລາຍໄປເສຍ, ພວກເຮົາກໍຍັງມີບ່ອນພັກອາໄສທີ່ພຣະເຈົ້າປະທານໃຫ້, ແມ່ນບ່ອນທີ່ບໍ່ແມ່ນຄືຄົນສ້າງ, ແລະໝັ້ນຄົງຖາວອນຕະຫລອດນິຣັນດອນໃນສະຫວັນ. 2.ດຽວນີ້ພວກເຮົາຮ້ອງຄາງ ແລະປາດຖະໜາຢ່າງແຮງກ້າ ຢາກໄດ້ທີ່ພັກອາໄສໃນສະຫວັນນັ້ນ ມາກວບເອົາທີ່ພັກນີ້ໄປເສຍ. 3.ຂໍແຕ່ໃຫ້ໄດ້ເຄຫານັ້ນມາກວບງຳ, ແລະກໍຈະບໍ່ຢູ່ເປືອຍເປົ່າ! 4.ຍ້ອນວ່າໃນເວລາທີ່ເຮົາຢູ່ໃນຮ່າງກາຍນີ້, ພວກເຮົາກໍຮ້ອງຄາງດ້ວຍຄວາມທຸກທໍຣະມານ. ທັງນີ້ບໍ່ແມ່ນພວກເຮົາປາດຖະໜາຢາກປົດເປື້ອງມັນອອກໄປດອກ, ແຕ່ຢາກສຸບກວບໃສ່ອີກ ເພື່ອໃຫ້ສິ່ງທີ່ຕາຍເປັນນັ້ນ ໄດ້ກັບມີຊີວິດຂຶ້ນມາ. 5.ຜູ້ຊົງນິລະມິດສ້າງພວກເຮົາມາເພື່ອການປ່ຽນແປງນີ້ ແມ່ນພຣະເປັນເຈົ້າ, ຜູ້ໄດ້ປະທານພຣະຈິດໄວ້ເປັນມັດຈຳໃຫ້ພວກເຮົາແລ້ວ. 6.ພວກເຮົາຮູ້ວ່າ ຕະຫລອດເວລາທີ່ພວກເຮົາມີຮ່າງກາຍຢູ່ນີ້, ພວກເຮົາກໍຈຳເລີນຊີວິດເໝືອນຖືກເນລະເທດຫ່າງໄກຈາກພຣະເຈົ້າ, ດັ່ງນີ້ ຈົ່ງມີຄວາມແນ່ໃຈໃນພຣະອົງເຈົ້າຢູ່ສະເໝີ. 7.ຍ້ອນວ່າພວກເຮົາກຳລັງເດີນທາງຢູ່ໃນຄວາມເຊື່ອ, ບໍ່ແມ່ນໄດ້ເຫັນແຈ້ງແລ້ວ. 8.ແມ່ນແທ້ ພວກເຮົາມີຄວາມແນ່ໃຈ ແລະປາດຖະໜາຢາກຕາຍປະຮ່າງກາຍນີ້ ເພື່ອໄປຢູ່ກັບພຣະອົງເຈົ້າ. 9.ດັ່ງນີ້ ບໍ່ວ່າພວກເຮົາຈະຍັງມີຮ່າງກາຍຫລືຕາຍປະມັນກໍຕາມ, ພວກເຮົາກໍມຸ່ງໝາຍແຕ່ຈະທຳໃຫ້ພໍພຣະໄທພຣະອົງເຈົ້າແຕ່ຢ່າງດຽວ. 10.ຍ້ອນວ່າພວກເຮົາທຸກຄົນຈະຕ້ອງປາກົດຕົວຕໍ່ໜ້າສານຂອງພຣະກຣິສໂຕເຈົ້າ ເພື່ອໃຫ້ແຕ່ລະຄົນໄດ້ຮັບບຳເໜັດ ສົມກັບຄວາມຊົ່ວທີ່ເຂົາໄດ້ກະທຳ ເມື່ອເວລາຍັງມີຮ່າງກາຍຢູ່ນັ້ນ.

ວຽກການຂອງເປົາໂລເພື່ອຊ່ວຍວິນຍານຜູ້ອື່ນ

11.ດັ່ງນີ້ ເມື່ອຮູ້ຈັກຄວາມຢ້ານຈຽມພຣະເປັນເຈົ້າແລ້ວ, ພວກເຮົາຊອກຫາວິທີຊັກຊວນຄົນທັງຫລາຍດ້ວຍ. ພວກເຮົາເປັນແນວໃດ ພຣະເປັນເຈົ້າກໍຮູ້ຊາບຢ່າງຊັດແຈ້ງແລ້ວ. ແລະຂ້າພະເຈົ້າກໍຫວັງວ່າ ພວກພີ່ນ້ອງຄົງຮູ້ຈັກຂ້າພະເຈົ້າດີ, ຕາມສຽງມະໂນທຳຂອງຕົນດ້ວຍ. 12.ພວກເຮົາບໍ່ອວດອ້າງຕົວເອງກັບພວກພີ່ນ້ອງອີກ. ພວກເຮົາມີແຕ່ຫາວິທີໃຫ້ພວກພີ່ນ້ອງມີໂອກາດພາກພູມໃຈໃນພວກເຮົາ, ເພື່ອໃຫ້ພວກພີ່ນ້ອງມີແນວຕອບໂຕ້ພວກທີ່ອວດແຕ່ສິ່ງທີ່ເຂົາມີພາຍນອກ ບໍ່ແມ່ນສິ່ງທີ່ມີຢູ່ພາຍໃນ. 13.ຖ້າຫາກວ່າພວກເຮົາປະພຶດຕົນຄືຄົນເສຍຈິດ, ພວກເຮົາກໍທຳໄປເພື່ອພຣະເປັນເຈົ້າ. ຖ້າພວກເຮົາປະພຶດຕົນຢ່າງຄົນປົກກະຕິ ກໍແມ່ນເພື່ອພວກພີ່ນ້ອງ. 14.ຍ້ອນວ່າຄວາມຮັກຂອງພຣະກຣິສໂຕບີບບັງຄັບໃຈພວກເຮົາ, ເມື່ອພວກເຮົາຄຶດວ່າ ຄົນຜູ້ດຽວໄດ້ຕາຍເພື່ອໝົດທຸກຄົນ ແລະທຸກຄົນກໍໄດ້ຕາຍດ້ວຍ. 15.ພຣະກຣິສໂຕໄດ້ສິ້ນພຣະຊົນສຳລັບໝົດທຸກຄົນ, ເພື່ອໃຫ້ພວກທີ່ມີຊີວິດຢູ່ນັ້ນ ຢ່າໄດ້ມີຊີວິດເພື່ອຕົວເອງອີກຕໍ່ໄປ ແຕ່ເພື່ອພຣະອົງຜູ້ໄດ້ສິ້ນພຣະຊົນ ແລະກັບຄືນຊີບເພື່ອພວກເຂົາເອງ. 16.ດັ່ງນັ້ນ ແຕ່ນີ້ໄປພວກເຮົາບໍ່ຕີລາຄາຜູ້ໃດຕາມປະສາມະນຸດ, ແມ່ນວ່າ ແຕ່ກ່ອນພວກເຮົາໄດ້ຕີລາຄາພຣະກຣິສໂຕເຈົ້າຕາມປະສາມະນຸດແລ້ວກໍຕາມ, ບັດນີ້ພວກເຮົາບໍ່ຕີລາຄາ ພຣະອົງແບບນັ້ນອີກ. 17.ດັ່ງນັ້ນ ຖ້າຜູ້ໃດຢູ່ໃນພຣະກຣິສໂຕ, ຜູ້ນັ້ນກໍເປັນຜູ້ຖືກສ້າງຂຶ້ນໃໝ່. ສະພາບເກົ່າໄດ້ຫາຍສາບສູນໄປ ແລະສະພາບໃໝ່ເຂົ້າມາແທນ. 18.ທຸກສິ່ງນີ້ມາຈາກພຣະເປັນເຈົ້າ ຜູ້ຊົງໂຜດໃຫ້ພວກເຮົາຄືນດີກັບພຣະອົງ ໂດຍອາໄສພຣະກຣິສໂຕເຈົ້າ ແລະຊົງມອບໝາຍໜ້າທີ່ໃຫ້ພວກເຮົາເປັນຜູ້ຊ່ວຍມະນຸດຄືນດີກັບພຣະອົງ. 19.ຍ້ອນວ່າແມ່ນພຣະເຈົ້າເອງທີ່ໄດ້ຊົງໂຜດໃຫ້ໂລກຄືນດີກັບພຣະອົງໃນພຣະກຣິສໂຕ ແລະບໍ່ຖືຊາຄວາມຜິດຂອງມະນຸດ, ແຕ່ໄດ້ຊົງປະທານໃຫ້ເຮົາເປັນຜູ້ປະກາດສານແຫ່ງການຄືນດີນັ້ນ. 20.ດັ່ງນັ້ນ ພວກເຮົາຈຶ່ງເປັນທູດຂອງພຣະກຣິສໂຕເຈົ້າ ພຣະເປັນເຈົ້າໄດ້ໃຊ້ເຮົາມາບອກເຕືອນພວກພີ່ນ້ອງຕາງພຣະອົງ ໃນນາມຂອງພຣະກຣິສໂຕເຈົ້າ, ພວກເຮົາວອນຂໍພວກພີ່ນ້ອງຈົ່ງຄືນດີກັບພຣະເຈົ້າເຖີດ. 21.ພຣະກຣິສໂຕບໍ່ຮູ້ຈັກບາບ, ແຕ່ຍ້ອນພວກເຮົາ, ພຣະເປັນເຈົ້າຈຶ່ງໄດ້ໃຫ້ພຣະອົງມີສະພາບຄືຄົນເຮົາທັງຫລາຍ ເພື່ອໃຫ້ພວກເຮົາເປັນຜູ້ຊອບທຳ ຕໍ່ພຣະພັກພຣະເຈົ້າດ້ວຍອາໄສພຣະອົງ.