ພຣະກຣິສໂຕເຈົ້າສະຖິດຢູ່ນຳພວກອັກຄະທຳມະທູດ

1.ດ້ວຍເຫດນີ້, ອາໄສພຣະເມດຕາຂອງພຣະອົງ ພວກເຮົາຈຶ່ງບໍ່ທໍ້ຖອຍໃນການປະຕິບັດພາລະກິດນີ້. 2.ແຕ່ພວກເຂົາໄດ້ປະຖິ້ມເລ່ຫລ່ຽມຕ່າງໆທີ່ເປັນຕາອັບອາຍ, ບໍ່ມີກົນອຸບາຍຫຍັງ ແລະບໍ່ຍອມແປງພຣະວາຈາຂອງພຣະເຈົ້າ. ກົງກັນຂ້າມ, ພວກເຮົາຊອກສະແຫວງຫາຄວາມໄວ້ວາງໃຈນຳມະນຸດທຸກຄົນຕໍ່ພຣະພັກພຣະເຈົ້າ ດ້ວຍການປະກາດຄວາມຈິງຢ່າງເປີດເຜີຍ. 3.ຖ້າຫາກວ່າຂ່າວປະເສີດຂອງພວກເຮົາມີຫຍັງປິດບັງຢູ່, ກໍແມ່ນປິດບັງສຳລັບພວກທີ່ກຳລັງຈະຖືກຄວາມພິນາດຈິບຫາຍ, 4.ສຳລັບພວກທີ່ຫົວດື້ບໍ່ຍອມເຊື່ອ. ຄົນພວກນີ້, ພະຂອງໂລກໄດ້ທຳໃຫ້ຈິດໃຈຂອງເຂົາມືດບອດແລ້ວ ເພື່ອບໍ່ໃຫ້ເຂົາແນມເຫັນແສງສະຫວ່າງຂ່າວປະເສີດ ເລື່ອງສີມຸງຄຸນຂອງພຣະກຣິສໂຕ ຜູ້ເປັນຮູບເງົາຂອງພຣະເຈົ້າໄດ້. 5.ພວກເຮົາບໍ່ໄດ້ປ່າວປະກາດຕົວພວກເຮົາເອງ, ແຕ່ປ່າວປະກາດວ່າ ພຣະເຢຊູກຣິສໂຕແມ່ນພຣະອົງເຈົ້າ. 6.ຍ້ອນພຣະເຈົ້າໄດ້ຊົງກ່າວວ່າ: “ຄວາມສະຫວ່າງຈົ່ງສ່ອງແສງອອກຈາກຄວາມມືດ”, ກໍແມ່ນພຣະອົງເອງໄດ້ສ່ອງສະຫວ່າງໃນດວງໃຈຂອງພວກເຮົາ ເພື່ອທຳໃຫ້ພວກເຮົາຮູ້ຈັກຢ່າງແຈ່ມແຈ້ງເຖິງສີມຸງຄຸນຂອງພຣະອົງ ຊຶ່ງສ່ອງລັດສະໝີຢູ່ທີ່ພຣະພັກຂອງພຣະກຣິສໂຕເຈົ້າ. 7.ແຕ່ພວກເຮົາໄດ້ເກັບຂຸມຊັບນີ້ໄວ້ໃນຮ່າງກາຍທີ່ທຳດ້ວຍດິນ, ດັ່ງນີ້ຈຶ່ງເຫັນວ່າ ຣິດທານຸພາບອັນລົ້ນເຫລືອນັ້ນມາຈາກພຣະເຈົ້າ ບໍ່ແມ່ນມາຈາກຕົວເຂົາ. 8.ພວກເຮົາຖືກບີບຄັ້ນຈາກຄວາມທຸກທໍຣະມານທຸກຢ່າງທຸກແນວ, ແຕ່ບໍ່ເຖິງກັບລົ້ມຕາຍ. ພວກເຮົາຈົນປັນຍາ, ແຕ່ບໍ່ເຖິງກັບໝົດຫວັງ. 9.ພວກເຮົາຖືກບັງບຽດ, ແຕ່ບໍ່ຖືກປະຖິ້ມ. ພວກເຮົາຖືກຟາດລົງດິນ ແຕ່ບໍ່ເຖິງຕາຍ.10.ພວກເຮົາຮັບເອົາຄວາມທຸກທໍຣະມານຂອງພຣະເຢຊູເຈົ້າໄວ້ໃນຮ່າງກາຍຂອງພວກເຮົາຢູ່ສະເໝີ ເພື່ອໃຫ້ຊີວິດຂອງພຣະເຢຊູເຈົ້າປາກົດແຈ້ງຢູ່ໃນຮ່າງກາຍຂອງພວກເຮົາ. 11.ຕາມຈິງແລ້ວ, ແມ່ນວ່າພວກເຮົາຈະມີຊີວິດຢູ່, ພວກເຮົາກໍຖືກມອບໃຫ້ແກ່ຄວາມຕາຍ ຍ້ອນເຫັນແກ່ພຣະເຢຊູເຈົ້າຢູ່ສະເໝີ. ທັງນີ້ ກໍເພື່ອໃຫ້ຊີວິດຂອງພຣະເຢຊູເຈົ້າ ໄດ້ປາກົດແຈ້ງໃນຮ່າງກາຍອັນຕາຍເປັນຂອງພວກເຮົາດ້ວຍ. 12.ດັ່ງນີ້ ຄວາມຕາຍແຜງລິດຢູ່ໃນຕົວພວກເຮົາ, ສ່ວນຊີວິດນັ້ນກຳລັງແຜງລິດຢູ່ໃນຕົວພວກພີ່ນ້ອງ. 13.ມີຄຳຂຽນໄວ້ໃນພຣະຄຳພີວ່າ: “ຂ້າພະເຈົ້າເຊື່ອ, ຂ້າພະເຈົ້າຈຶ່ງໄດ້ເວົ້າອອກມາ”, ຍ້ອນພວກເຮົາຜູ້ເປັນສາວົກ ກໍມີໃຈໝາຍໝັ້ນໃນຄວາມເຊື່ອອັນດຽວກັນນີ້ແຫລະ ພວກເຮົາຈຶ່ງເຊື່ອແລະເວົ້າອອກມາ. 14.ພວກເຮົາຮູ້ດີວ່າ ພຣະອົງຜູ້ໂຜດໃຫ້ພຣະເຢຊູເຈົ້າກັບຄືນຊີບນັ້ນ, ພຣະອົງກໍຈະໂຜດໃຫ້ພວກເຮົາກັບເປັນຄືນມາພ້ອມກັບພຣະເຢຊູດັ່ງດຽວກັນ ແລະພຣະອົງຈະໃຫ້ພວກເຮົາພ້ອມກັບພວກພີ່ນ້ອງ ໄດ້ຢູ່ໃກ້ພຣະອົງດ້ວຍ. 15.ແລະທຸກສິ່ງເຫລົ່ານີ້ເປັນມາ ເພື່ອປະໂຫຍດໃຫ້ພວກພີ່ນ້ອງ ເພື່ອວ່າ ເມື່ອພຣະຄຸນແຜ່ຜາຍໄປເຖິງຄົນເປັນຈຳນວນມາກແລ້ວ, ການສົມມະນາຄຸນຖະຫວາຍກຽດແດ່ພຣະເຈົ້າກໍຈະເພີ່ມທະວີຂຶ້ນຫລາຍດ້ວຍ.

ຄວາມແນ່ໃຈໃນການກັບເປັນຄືນມາແມ່ນວ່າຈະຕ້ອງຕາຍກໍຕາມ

16.ດ້ວຍເຫດນີ້ພວກເຮົາຈຶ່ງບໍ່ທໍ້ຖອຍ ແມ່ນວ່າຮ່າງກາຍພາຍນອກຈະເສື່ອມໂຊມລົງກໍຕາມ ແຕ່ຈິດໃຈພາຍໃນກໍໄດ້ຮັບການຟື້ນຟູຂຶ້ນໃໝ່ທຸກມື້ທຸກວັນ. 17.ຍ້ອນວ່າຄວາມທຸກຍາກຕ່າງໆໃນປັດຈຸບັນນີ້ ເປັນແຕ່ຊົ່ວຄາວແລະເບົາບາງ ເມື່ອເອົາມາປຽບກັບນ້ຳໜັກເຫລືອລົ້ນແຫ່ງສີມຸງຄຸນຮຸ່ງເຮືອງນິຣັນດອນ ຊຶ່ງຄວາມທຸກຍາກລຳບາກເຫລົ່ານັ້ນ ຈັດຕຽມໄວ້ໃຫ້ພວກເຮົາແລ້ວ. 18.ດັ່ງນັ້ນ ສາຍຕາຂອງພວກເຮົາຈຶ່ງບໍ່ຕິດພັນຢູ່ກັບສິ່ງທີ່ຕາເຫັນໄດ້ ແຕ່ຕິດພັນຢູ່ກັບສິ່ງທີ່ຕາເຫັນບໍ່ໄດ້. ສິ່ງທີ່ຕາເຫັນໄດ້ນີ້ ເປັນແຕ່ຂອງຊົ່ວຄາວ. ສ່ວນສິ່ງທີ່ຕາເຫັນບໍ່ໄດ້ນັ້ນ ເປັນສິ່ງທີ່ຄົງຢູ່ນິຣັນດອນ.