ຄຳຕຸກເຕືອນແລະຄຳອວຍພອນ

1.ເທື່ອນີ້ແມ່ນເທື່ອທີສາມ ທີ່ຂ້າພະເຈົ້າມາຢາມພວກພີ່ນ້ອງ. “ຂໍ້ກ່າວຫາໃດໆ ຕ້ອງອາໄສຄວາມປາກຂອງພິຍານສອງຫລືສາມຄົນ ຈຶ່ງວ່າເປັນທີ່ເຊື່ອຖືໄດ້”. 2. ຂ້າພະເຈົ້າໄດ້ຕຸກເຕືອນພວກທີ່ທຳບາບມາແລ້ວແຕ່ກ່ອນ ແລະຄົນອື່ນໆອີກດ້ວຍ. ແລະບັດນີ້ ເມື່ອຂ້າພະເຈົ້າບໍ່ຢູ່, ຂ້າພະເຈົ້າຂໍເຕືອນພວກພີ່ນ້ອງອີກ ຄືໄດ້ເຕືອນເມື່ອຢູ່ນຳພວກພີ່ນ້ອງຄັ້ງທີສອງວ່າ ຖ້າຂ້າພະເຈົ້າຫລົບມາເທື່ອໜ້າ ຂ້າພະເຈົ້າຈະຈັດການກັບຄົນພວກນີ້ຢ່າງບໍ່ຈົ່ງ, 3.ຍ້ອນພວກພີ່ນ້ອງຢາກເຫັນຫລັກຖານວ່າ ພຣະກຣິສໂຕຊົງກ່າວທາງຂ້າພະເຈົ້າ. ພຣະອົງບໍ່ໄດ້ເປັນຜູ້ອ່ອນແອກັບພວກພີ່ນ້ອງດອກ, ແຕ່ພຣະອົງຊົງສຳແດງຣິດທານຸພາບຂອງພຣະອົງຢູ່ໃນພວກພີ່ນ້ອງ. 4.ພຣະອົງຊົງຖືກຄຶງໃສ່ກາງເຂນໃນສະພາບອ່ອນແອກໍຈິງຢູ່, ແຕ່ພຣະອົງຊົງມີຊີວິດຢູ່ ດ້ວຍອາໄສລິດເດດຂອງພຣະເຈົ້າ. ພວກເຮົາກໍຄືກັນ, ພວກເຮົາອ່ອນແອດ້ວຍກັນກັບພຣະອົງ, ແຕ່ພວກເຮົາມີຊີວິດຢູ່ດ້ວຍກັນກັບພຣະອົງເພື່ອພວກພີ່ນ້ອງ ດ້ວຍອາໄສລິດເດດຂອງພຣະເຈົ້າ. 5.ພວກພີ່ນ້ອງຈົ່ງພິຈາລະນາເບິ່ງຕົວເອງວ່າ ໄດ້ຕັ້ງຢູ່ໃນຄວາມເຊື່ອຫລືບໍ? ຈົ່ງທົດລອງເບິ່ງຕົວເອງເສຍ. ພວກພີ່ນ້ອງບໍ່ຮູ້ບໍວ່າ ພຣະກຣິສໂຕຢູ່ໃນພວກພີ່ນ້ອງ? ເວັ້ນເສຍແຕ່ເມື່ອພວກພີ່ນ້ອງຮັບການທົດລອງບໍ່ໄດ້. 6. ຂ້າພະເຈົ້າຫວັງວ່າພວກພີ່ນ້ອງກໍຮູ້ດີວ່າ ພວກເຮົາໄດ້ຜ່ານການທົດລອງແລ້ວ. 7.ພວກເຮົາວອນຂໍພຣະເຈົ້າ ເພື່ອບໍ່ໃຫ້ພວກພີ່ນ້ອງທຳສິ່ງຊົ່ວຊ້າໃດໆ, ບໍ່ແມ່ນຢາກສະແດງວ່າ ພວກເຮົາໄດ້ຜ່ານການທົດລອງແລ້ວດອກ, ແຕ່ເພື່ອຢາກເຫັນພວກພີ່ນ້ອງທຳຄວາມດີ, ແມ່ນພວກເຮົາເອງຈະຖືກການທົດລອງກໍຕາມ. 8.ຍ້ອນວ່າພວກເຮົາຕໍ່ສູ້ກັບຄວາມຈິງບໍ່ໄດ້, ພວກເຮົາມີແຕ່ສົ່ງເສີມຄວາມຈິງເທົ່ານັ້ນ. 9.ດັ່ງນີ້ ພວກເຮົາມີຄວາມຍິນດີ ເມື່ອເຫັນຕົວເອງອ່ອນແອ ແລະເຫັນພວກພີ່ນ້ອງເຂັ້ມແຂງ. ຄວາມມຸ່ງມາດປາດຖະໜາຂອງພວກເຮົາເວລາສວດພາວະນາ ຄື ຂໍໃຫ້ພວກພີ່ນ້ອງເປັນຄົນດີຢ່າງຄົບບໍລິບູນ... 10. ຂ້າພະເຈົ້າຂຽນຂໍ້ຄວາມເຫລົ່ານີ້ ເມື່ອເວລາຂ້າພະເຈົ້າບໍ່ທັນມາ, ແລະເມື່ອມາຮອດແລ້ວ, ຂ້າພະເຈົ້າຈະບໍ່ຕ້ອງເຂັ້ມງວດກວດຂັນກັບພວກພີ່ນ້ອງ ໂດຍໃຊ້ອຳນາດທີ່ພຣະເປັນເຈົ້າປະທານໃຫ້ຂ້າພະເຈົ້າ ເພື່ອກໍ່ສ້າງໃຫ້ຈະເລີນ, ບໍ່ແມ່ນເພື່ອມ້າງເພ. 11.ທ້າຍສຸດນີ້, ພີ່ນ້ອງທັງຫລາຍ! ຈົ່ງຊື່ນຊົມຍິນດີເຖີດ. ຈົ່ງຊອກສະແຫວງຫາຄວາມດີບໍລິບູນ, ຈົ່ງເອົາອົກເອົາໃຈກັນ, ຈົ່ງຖືກຕ້ອງປອງດອງກັນ, ຈົ່ງຈຳເລີນຊີວິດຢູ່ໃນສັນຕິສຸກ. ແລະຂໍໃຫ້ພຣະເຈົ້າແຫ່ງຄວາມຮັກແລະສັນຕິສຸກ ຈົ່ງສະຖິດຢູ່ນຳພວກພີ່ນ້ອງ. 12.ຈົ່ງສຳແດງໄມຕີຈິດຕໍ່ກັນແລະກັນ ດ້ວຍການຄຳນັບອວຍໄຊໃຫ້ພອນກັນ. ສັດຕະບຸຣຸດທຸກຄົນຂໍຝາກໄມຕີຈິດມາຍັງພວກພີ່ນ້ອງດ້ວຍ. 13.ຂໍພຣະຄຸນຂອງພຣະເຢຊູກຣິສໂຕພຣະເຈົ້າຂອງເຮົາ ແລະຄວາມຮັກຂອງພຣະບິດາ ພ້ອມທັງຄວາມສຳພັນຂອງພຣະຈິດ ຈົ່ງສະຖິດຢູ່ນຳພວກພີ່ນ້ອງທຸກຄົນເທີ້ນ.