ການສູ້ຄວາມລະຫວ່າງພີ່ນ້ອງດ້ວຍກັນ

1.ເມື່ອເວລາພວກພີ່ນ້ອງຜິດຂ້ອງຕ້ອງຖຽງກັນ, ຈະກ້າໄປສູ້ຄວາມກັນຕໍ່ໜ້າຄົນຕ່າງສາດສະໜາ, ແລະບໍ່ແມ່ນຕໍ່ໜ້າຜູ້ສັກສິດ ໄດ້ບໍ? 2.ພວກພີ່ນ້ອງບໍ່ຮູ້ບໍວ່າ ຜູ້ສັກສິດຈະຕັດສິນໂລກ? ແລະຖ້າວ່າພວກພີ່ນ້ອງຈະຕັດສິນໂລກແລ້ວ, ພວກພີ່ນ້ອງຈະບໍ່ສາມາດຕັດສິນເລື່ອງເລັກໆນ້ອຍໆບໍ? 3.ພວກພີ່ນ້ອງບໍ່ຮູ້ບໍວ່າ ພວກເຮົາຈະຕັດສິນພວກເທວະດາດ້ວຍ? ຖ້າເປັນດັ່ງນີ້ແລ້ວ, ຈະຕັດສິນເລື່ອງຕ່າງໆໃນຊີວິດນີ້ ກໍແຮງເປັນການສົມຄວນ. 4.ເມື່ອພວກພີ່ນ້ອງເປັນຄວາມກັນໃນເລື່ອງຂອງຊີວິດນີ້, ເປັນຫຍັງເອົາຄົນທີ່ໝູ່ກຣິສຕະຊົນບໍ່ນັບຖື ມາຕັ້ງເປັນຜູ້ຕັດສິນ? 5. ຂ້າພະເຈົ້າເວົ້າດັ່ງນີ້ເພື່ອໃຫ້ພວກພີ່ນ້ອງມີຄວາມລະອາຍ. ໃນພວກພີ່ນ້ອງ, ບໍ່ມີໃຜສະຫລາດພໍຕັດສິນຄວາມທີ່ເກີດຂຶ້ນລະຫວ່າງພວກພີ່ນ້ອງບໍ? 6.ແຕ່ເມື່ອມີພີ່ນ້ອງກັບພີ່ນ້ອງຜິດກັນ ກໍຕ້ອງໄປສູ້ຄວາມຕໍ່ໜ້າຄົນຕ່າງສາດສະໜານໍ? 7.ແນວໃດກໍຕາມ, ເມື່ອພວກພີ່ນ້ອງມີການຟ້ອງລ້ອງກັນດັ່ງນີ້ ກໍເປັນການເສື່ອມເສຍໄປແລ້ວ ຍອມໃຫ້ເຂົາເຮັດຮ້າຍໃສ່ ແລະຍອມໃຫ້ເຂົາໂກງເອົາ ຈະບໍ່ດີກວ່າບໍ? 8.ແຕ່ແມ່ນພວກພີ່ນ້ອງເອງເຮັດຮ້າຍໃສ່ ແລະສໍ້ໂກງກັນ ລະຫວ່າງພວກພີ່ນ້ອງຂອງຕົນຊ້ຳ! 9.ພວກພີ່ນ້ອງບໍ່ຮູ້ບໍວ່າ ຄົນອະທຳຈະບໍ່ໄດ້ຮັບສ່ວນມໍລະດົກໃນອານາຈັກຂອງພຣະເຈົ້າ? ພວກພີ່ນ້ອງຢ່າເຂົ້າໃຈຜິດ ຄືພວກລ່ວງປະເວນີ, ພວກນົບພະເທັດທຽມ, ພວກຫລິ້ນຊູ້, ພວກລາມົກຜິດກົດທຳມະຊາດທຸກຢ່າງ. 10.ພວກຂີ້ລັກ, ພວກລັກໂລບ, ພວກຂີ້ເຫລົ້າ, ພວກມັກເວົ້າຫຍາບຊ້າ, ພວກຂີ້ສໍ້ເຫລົ່ານີ້ ຈະບໍ່ໄດ້ຮັບສ່ວນມໍລະດົກໃນອານາຈັກຂອງພຣະເຈົ້າດອກ. 11.ແຕ່ກ່ອນ ລາງຄົນໃນພວກພີ່ນ້ອງກໍເປັນແບບນີ້ແລ້ວ, ແຕ່ໄດ້ຮັບການຊຳຣະລ້າງໃຫ້ສະອາດ, ໄດ້ເປັນຜູ້ສັກສິດແລະຊອບທຳ ເດຊະພຣະນາມຂອງພຣະເຢຊູກຣິສໂຕເຈົ້າ ແລະເດຊະພຣະຈິດຂອງພຣະເຈົ້າຂອງພວກເຮົາດ້ວຍ.

ຂ້າພະເຈົ້າທຳໄດ້ທຸກຢ່າງ

12.“ຂ້າພະເຈົ້າເຮັດຫຍັງກໍໄດ້”, ແຕ່ບໍ່ແມ່ນທຸກຢ່າງເປັນປະໂຫຍດໃຫ້ຂ້າພະເຈົ້າ, “ຂ້າພະເຈົ້າເຮັດຫຍັງກໍໄດ້”, ແຕ່ຂ້າພະເຈົ້າບໍ່ຍອມໃຫ້ສິ່ງໃດເປັນນາຍບັງຄັບ. 13.ອາຫານມີໄວ້ສຳລັບທ້ອງ, ແລະທ້ອງສຳລັບອາຫານ, ແຕ່ພຣະເຈົ້າຈະທຳລາຍທັງສອງຢ່າງນັ້ນໃຫ້ສູນສິ້ນໄປ. ແຕ່ວ່າຮ່າງກາຍບໍ່ແມ່ນມີໄວ້ສຳລັບການຊົ່ວລາມົກ, ແຕ່ເພື່ອພຣະອົງເຈົ້າ, ແລະພຣະອົງເຈົ້າເພື່ອຮ່າງກາຍ. 14.ພຣະເຈົ້າຜູ້ໄດ້ຊົງບັນດານໃຫ້ພຣະອົງກັບຄືນຊີບນັ້ນ ກໍຈະທຳໃຫ້ພວກເຮົາກັບເປັນຄືນມາດ້ວຍອາໄສຣິດທານຸພາບຂອງພຣະອົງດ້ວຍ. 15.ພວກພີ່ນ້ອງບໍ່ຮູ້ບໍວ່າ ຮ່າງກາຍຂອງພວກພີ່ນ້ອງເປັນອະໄວຍະວະຂອງພຣະກຣິສໂຕ? ຂ້າພະເຈົ້າຈະເອົາອະໄວຍະວະຂອງພຣະກຣິສໂຕມາໃຊ້ເປັນອະໄວຍະວະຂອງໂສເພນີໄດ້ບໍ? ມັນບໍ່ເປັນໄປໄດ້ຢ່າງແນ່ ນອນ. 16.ພວກພີ່ນ້ອງບໍ່ຮູ້ບໍວ່າ ຜູ້ໃດຮ່ວມສະໜິດກັບໂສເພນີ, ຜູ້ນັ້ນກໍເປັນກາຍດຽວກັບເຂົາ? ຍ້ອນມີຂຽນໄວ້ວ່າ: “ທັງສອງຈະເປັນເນື້ອໜຶ່ງໜັງດຽວ” 17.ຜູ້ໃດຮ່ວມເປັນໜຶ່ງດຽວກັບພຣະອົງເຈົ້າ, ຜູ້ນັ້ນກໍເປັນຈິດດຽວກັນກັບພຣະອົງ. 18.ພວກພີ່ນ້ອງຈົ່ງຫລີກໜີຄວາມຊົ່ວຊ້າລາມົກເສຍ. ບາບທຸກຢ່າງທີ່ມະນຸດກະທຳນັ້ນຢູ່ນອກຮ່າງກາຍ. ແຕ່ຜູ້ທຳຊົ່ວລາມົກນັ້ນ ທຳບາບຜິດຕໍ່ຮ່າງກາຍຕົວເອງ. 19.ພວກພີ່ນ້ອງບໍ່ຮູ້ບໍວ່າ ຮ່າງກາຍຂອງພວກພີ່ນ້ອງເປັນວິຫານຂອງພຣະຈິດເຈົ້າ ຜູ້ສະຖິດຢູ່ໃນພວກພີ່ນ້ອງ, ແລະຊຶ່ງພວກພີ່ນ້ອງໄດ້ຮັບຈາກພຣະເຈົ້າ, ດັ່ງນີ້ ພວກພີ່ນ້ອງຈຶ່ງບໍ່ເປັນເຈົ້າຂອງໆຕົນອີກແລ້ວ. 20.ມີຜູ້ໜຶ່ງໄດ້ໄຖ່ເອົາພວກພີ່ນ້ອງດ້ວຍລາຄາແພງທີ່ສຸດ. ດັ່ງນີ້ ພວກພີ່ນ້ອງຈົ່ງຖະຫວາຍກຽດມຸງຄຸນແດ່ພຣະເຈົ້າ ດ້ວຍທາງຮ່າງກາຍຂອງພວກພີ່ນ້ອງເຖີດ.