ການເທດສອນຂອງເປົາໂລຢູ່ເມືອງໂກຣິນໂທ

1.ພີ່ນ້ອງທັງຫລາຍ, ເມື່ອຂ້າພະເຈົ້າມາຫາພວກພີ່ນ້ອງນັ້ນ, ຂ້າພະເຈົ້າບໍ່ໄດ້ມາປ່າວປະກາດຂໍ້ເລິກລັບຂອງພຣະເຈົ້າ ດ້ວຍອາໄສສຳນວນໂວຫານຫລືຄວາມສະຫລຽວສະຫລາດໃດໆ. 2. ຂ້າພະເຈົ້າບໍ່ຢາກອວດອ້າງກັບພວກພີ່ນ້ອງວ່າ ໄດ້ຮູ້ຈັກເລື່ອງອື່ນໃດ ນອກຈາກເລື່ອງພຣະເຢຊູກຣິສໂຕເຈົ້າ ແລະເລື່ອງພຣະເຢຊູກຣິສໂຕເຈົ້າຜູ້ຖືກຄຶງໃສ່ກາງເຂນເທົ່ານັ້ນ. 3.ດັ່ງນີ້ ຂ້າພະເຈົ້າຈຶ່ງປາກົດແກ່ສາຍຕາຂອງພວກພີ່ນ້ອງ ເປັນດັ່ງຄົນອ່ອນແອ ແລະມີຄວາມຢ້ານກົວຈົນຕົວສັ່ນ. 4.ວາຈາແລະຄຳເທດສອນຂອງຂ້າພະເຈົ້າ ບໍ່ແມ່ນຄວາມເວົ້າຊວນເຊື່ອຢ່າງສະຫລຽວສະຫລາດດອກ ແຕ່ເປັນການສະແດງຢ່າງເປີດເຜີຍເຖິງພຣະຈິດເຈົ້າແລະຣິດທານຸພາບຂອງພຣະອົງ. 5.ເພື່ອບໍ່ໃຫ້ຄວາມເຊື່ອຂອງພວກພີ່ນ້ອງມີຮາກຖານຢູ່ໃນຄວາມສະຫລຽວສະຫລາດຂອງມະນຸດ, ແຕ່ມີຮາກຖານຢູ່ໃນຣິດທານຸພາບຂອງພຣະເຈົ້າ.

ຄວາມສະຫລາດຂອງພຣະເຈົ້າ

6.ພວກເຮົາສັ່ງສອນຄວາມສະຫລາດແກ່ບັນດາຜູ້ເປັນກຣິສຕັງຄົບບໍລິບູນແລ້ວ ແຕ່ບໍ່ແມ່ນຄວາມສະຫລາດຂອງໂລກນີ້ ຫລືຂອງຜູ້ຄຸ້ມຄອງໂລກນີ້ ຊຶ່ງຈະຕ້ອງດັບສູນໄປ. 7.ກົງກັນຂ້າມ, ພວກເຮົາສັ່ງສອນຄວາມສະຫລາດຂອງພຣະເຈົ້າ, ອັນເປັນສິ່ງເລິກລັບແລະຖືກປິດບັງໄວ້, ຊຶ່ງພຣະເຈົ້າຊົງກຳໜົດໄວ້ລ່ວງໜ້າແຕ່ໃດໆມາ ເພື່ອເປັນກຽດມຸງຄຸນໃຫ້ພວກເຮົາ. 8.ຄວາມສະຫລາດນີ້ ບໍ່ມີຜູ້ຄອບຄອງໂລກຄົນໃດຮູ້ຈັກ, ຍ້ອນວ່າ ຖ້າເຂົາຮູ້ຈັກແລ້ວ, ເຂົາກໍຄົງບໍ່ຄຶງກາງເຂນພຣະອົງເຈົ້າຜູ້ຊົງສີມຸງຄຸນຮຸ່ງເຮືອງດອກ. 9.ແຕ່ສິ່ງທີ່ພວກເຮົາປະກາດນີ້ ກໍເປັນດັ່ງທີ່ໄດ້ຈາລຶກໄວ້ໃນພຣະຄຳພີວ່າ: “ສິ່ງທີ່ພຣະເຈົ້າຊົງຈັດຕຽມໄວ້ສຳລັບຜູ້ທີ່ຮັກຫອມພຣະອົງນັ້ນ ແມ່ນສິ່ງທີ່ຕາບໍ່ເຄີຍເຫັນ, ຫູບໍ່ເຄີຍໄດ້ຍິນ ແລະຈິດໃຈມະນຸດບໍ່ໄດ້ຄິດເຖິງເລີຍ”. 10.ຕາມຈິງແລ້ວ, ພຣະເຈົ້າຊົງໄຂສຳແດງຂໍ້ເລິກລັບນີ້ໃຫ້ພວກເຮົາຊາບໂດຍທາງພຣະຈິດເຈົ້າ, ຍ້ອນວ່າພຣະຈິດເຈົ້າຊົງຢັ່ງຮູ້ທຸກສິ່ງທຸກຢ່າງ ແລະຮູ້ເຖິງຄວາມເລິກລ້ຳຂອງພຣະເຈົ້າດ້ວຍ. 11.ແມ່ນໃຜຮູ້ຈັກຄວາມຄິດຂອງຄົນໄດ້, ນອກຈາກຈິດໃຈທີ່ຢູ່ໃນຄົນຜູ້ນັ້ນເອງ? ກໍດັ່ງດຽວກັນ, ບໍ່ມີໃຜຮູ້ຈັກຄວາມຄິດຂອງພຣະເປັນເຈົ້າໄດ້, ນອກຈາກພຣະຈິດຂອງພຣະເຈົ້າ. 12.ສ່ວນພວກເຮົາ, ພວກເຮົາບໍ່ໄດ້ຮັບຈິດໃຈຂອງໂລກ, ແຕ່ໄດ້ຮັບພຣະຈິດທີ່ມາຈາກພຣະເຈົ້າ, ເພື່ອພວກເຮົາຈະໄດ້ຮູ້ຈັກພຣະຄຸນຕ່າງໆທີ່ພຣະເປັນເຈົ້າໄດ້ໂຜດປະທານໃຫ້. 13.ແລະພວກເຮົາບໍ່ໄດ້ເທດສອນຕາມຄວາມສະຫລາດທີ່ໂລກສອນ, ແຕ່ຕາມຄວາມສະຫລາດທີ່ ພຣະຈິດເຈົ້າສິດສອນໃຫ້ ຄືແປອະທິບາຍຂອງຝ່າຍຈິດດ້ວຍຄວາມຄຳສັບຝ່າຍຈິດ. 14.ມະນຸດທຳມະດາບໍ່ຮັບເອົາສິ່ງທີ່ມາຈາກພຣະຈິດຂອງພຣະເຈົ້າ, ເຂົາຖືເປັນຄວາມໂງ່, ເຂົາເຂົ້າໃຈບໍ່ໄດ້, ຍ້ອນວ່າຕ້ອງຕັດສິນຕາມແບບຝ່າຍຈິດ ຈຶ່ງເຂົ້າໃຈໄດ້. 15.ກົງຂ້າມ, ຄົນຝ່າຍຈິດຕັດສິນທຸກຢ່າງ, ແລະບໍ່ມີໃຜຕັດສິນເຂົາໄດ້. 16.ຍ້ອນວ່າ ມີໃຜຮູ້ຈັກຄວາມຄິດຂອງພຣະເຈົ້າ ເພື່ອຈະໄດ້ເປັນຜູ້ສິດສອນພຣະອົງບໍ? ສ່ວນພວກເຮົານີ້, ພວກເຮົາມີຄວາມນຶກຄິດຂອງພຣະກຣິສໂຕເຈົ້າ.