ການແຜ່ເງິນຊ່ວຍໝູ່ກຣິສຕະຊົນຢູ່ເຢຣູຊາແລມ

1.ສ່ວນເລື່ອງການຮິບໂຮມເພື່ອຊ່ວຍເຫລືອບັນດາຜູ້ສັກສິດນັ້ນ, ພວກພີ່ນ້ອງໃຫ້ເອົາຕາມຫລັກເກນທີ່ຂ້າພະເຈົ້າໄດ້ບອກກັບໝູ່ກຣິສຕະຊົນ ຢູ່ແຂວງກາລາຊີອາ. 2.ຄືວ່າທຸກໆອາທິດ ໃຫ້ທຸກຄົນເກັບມ້ຽນສ່ວນໜຶ່ງຈາກລາຍໄດ້ຂອງຕົນ, ເພື່ອບໍ່ໃຫ້ເສຍເວລາ ເມື່ອຂ້າພະເຈົ້າມາຮັບເອົາຂອງທານນັ້ນ. 3.ເມື່ອມາຮອດແລ້ວ, ຂ້າພະເຈົ້າຈະສົ່ງຜູ້ທີ່ພວກພີ່ນ້ອງໄດ້ເລືອກໄວ້ແລ້ວ ພ້ອມທັງໜັງສືແນບນຳ ເພື່ອເອົາຂອງທານນັ້ນໄປນະຄອນເຢຣູຊາແລມ. 4.ຖ້າຫາກວ່າຄວນໃຫ້ຂ້າພະເຈົ້າໄປເອງ, ກໍໃຫ້ພວກນັ້ນເດີນທາງໄປພ້ອມຂ້າພະເຈົ້າດ້ວຍ.

ແຜນການເດີນທາງ

5.ຕາມຈິງແລ້ວ, ຂ້າພະເຈົ້າຈະເດີນທາງຜ່ານແຂວງມາເຊດວນ ເພື່ອມາຫາພວກພີ່ນ້ອງ. 6.ແຕ່ບາງທີອາດພັກຢູ່ນຳພວກພີ່ນ້ອງຊົ່ວໄລຍະໜຶ່ງ ຫລືບາງທີຕະຫລອດລະດູໜາວ ເພື່ອໃຫ້ພວກພີ່ນ້ອງຫາວິທີສົ່ງຂ້າພະເຈົ້າເດີນທາງຕໍ່ໄປ. 7.ບໍ່ແມ່ນແຕ່ຢາກແວະຢາມພວກພີ່ນ້ອງເທົ່ານັ້ນ, ແຕ່ຂ້າພະເຈົ້າຫວັງຢາກພັກເຊົາຢູ່ກັບພວກພີ່ນ້ອງເຫິງແດ່ ຖ້າຫາກວ່າພຣະເປັນເຈົ້າເຫັນພ້ອມ. 8.ແຕ່ຂ້າພະເຈົ້າຈະພັກເຊົາຢູ່ເມືອງເອເຟໂຊ ຈົນຮອດວັນສະຫລອງຄົບຮອບຫ້າສິບວັນ. 9.ຍ້ອນວ່າເປັນໂອກາດດີທີ່ສຸດ, ເພື່ອປະກອບພາລະກິດທີ່ມີປະໂຫຍດມາກ, ແລະພວກທີ່ຂັດຂວາງກໍມີຫລາຍດ້ວຍ. 10.ຖ້ຫາກວ່າຕີໂມເທມາ, ພວກພີ່ນ້ອງກໍຈົ່ງເບິ່ງແຍງເພິ່ນໃຫ້ມີຄວາມສຸກໃຈ ຍ້ອນວ່າເພິ່ນກໍກະທຳວຽກການຂອງພຣະເຈົ້າຄືກັນກັບຂ້າພະເຈົ້າ. 11.ຂໍຢ່າໃຫ້ມີໃຜດູໝິ່ນເພິ່ນ ແລະຂໍໃຫ້ຫາວິທີຊ່ວຍເພິ່ນຫລົບເມືອຫາຂ້າພະເຈົ້າ ດ້ວຍຄວາມສະຫວັດດີ, ຍ້ອນວ່າຂ້າພະເຈົ້າເອງພ້ອມກັບໝູ່ພີ່ນ້ອງອື່ນ ກໍຄອງຖ້າເພິ່ນຢູ່. 12.ສ່ວນອາປອນໂລ ພີ່ນ້ອງຂອງຂ້າພະເຈົ້ານັ້ນ, ຂ້າພະເຈົ້າກໍໄດ້ຮ້ອງຂໍໃຫ້ເພິ່ນມາຢາມພວກພີ່ນ້ອງ ພ້ອມກັບໝູ່ພີ່ນ້ອງຜູ້ອື່ນດ້ວຍ, ແຕ່ດຽວນີ້ເພິ່ນບໍ່ທັນຢາກມາ ເພິ່ນຈະມາພາຍຫລັງ ເມື່ອມີໂອກາດ.

ຄຳສັ່ງສຸດທ້າຍ ແລະຄຳອຳລາ

13.ຈົ່ງເຝົ້າລະວັງ, ຈົ່ງໝັ້ນໜຽວໃນຄວາມເຊື່ອ, ຈົ່ງເປັນຄົນໜັກແໜ້ນແລະເຂັ້ມແຂງ. 14.ຈົ່ງກະທຳທຸກຢ່າງດ້ວຍຄວາມຮັກ. 15.ພີ່ນ້ອງທັງຫລາຍ, ຂ້າພະເຈົ້າຂໍສັ່ງອີກແນວໜຶ່ງຄື ພີ່ນ້ອງກໍຮູ້ດີວ່າ ທ່ານສະເຕຟານາດແລະຄອບຄົວຂອງເພິ່ນ ເປັນຜົນງານອັນຕົ້ນຂອງແຂວງອາກາຢາ, ພວກເພິ່ນໄດ້ສະລະຕົນເພື່ອຮັບໃຊ້ຜູ້ສັກສິດທັງຫລາຍ. 16.ຂໍພີ່ນ້ອງນົບນອບຟັງຄວາມພວກທີ່ທຳແບບນີ້ ແລະທຸກຄົນທີ່ຮ່ວມວຽກການ ແລະຮ່ວມທຸກລຳບາກນຳເຂົາເຈົ້າ. 17. ຂ້າພະເຈົ້າດີໃຈໄດ້ສະເຕຟານາດ, ຟອກຕູນາໂຕ ແລະອາກາຍໂຢ ຢູ່ນຳ, ພວກເຂົາເຈົ້າຊ່ວຍຂ້າພະເຈົ້າໃນເວລາພວກພີ່ນ້ອງບໍ່ຢູ່. 18.ພວກເຂົາເຈົ້າໄດ້ທຳໃຫ້ຈິດໃຈຂອງຂ້າພະເຈົ້າແລະຂອງພວກພີ່ນ້ອງ ມີຄວາມສະຫງົບສຸກ, ຈົ່ງຮູ້ຈັກນິຍົມຊົມຊອບບຸກຄົນທີ່ມີຄຸນຄ່າແບບນີ້. 19.ໝູ່ກຣິສຕະຊົນຢູ່ເຂດອາຊີ ຝາກຄວາມຢາມພວກພີ່ນ້ອງ, ທ່ານອາກວີລາແລະປຣິດສະກາ ແລະໝູ່ກຣິສຕະຊົນທີ່ຊຸມນຸມກັນຢູ່ເຮືອນຂອງທັງສອງ ກໍຝາກຄວາມຢາມພວກພີ່ນ້ອງ ໃນພຣະອົງເຈົ້າດ້ວຍ. 20.ພີ່ນ້ອງທຸກຄົນຝາກຄວາມຢາມ, ຈົ່ງຖາມຂ່າວກັນແລະກັນດ້ວຍຄວາມຮັກ. 21.ຄຳຖາມຂ່າວນີ້ແມ່ນຂຽນດ້ວຍມືຂອງເຮົາເປົາໂລເອງ. 22.ຖ້າຜູ້ໃດບໍ່ຮັກພຣະອົງເຈົ້າ ຂໍໃຫ້ພວກເຂົາຖືກສາບແຊ່ງ, ຂໍພຣະອົງເຈົ້າສະເດັດມາ. 23.ຂໍພຣະຄຸນຂອງພຣະເຢຊູກຣິສໂຕເຈົ້າ ຈົ່ງສະຖິດຢູ່ກັບພວກພີ່ນ້ອງ. 24. ຂ້າພະເຈົ້າຮັກແພງພີ່ນ້ອງທຸກຄົນໃນພຣະເຢຊູກຣິສໂຕເຈົ້າ.