ການກັບຄືນຊີບຂອງພຣະກຣິສໂຕເຈົ້າ

1.ພີ່ນ້ອງທີ່ຮັກ, ຂ້າພະເຈົ້າຂໍເຕືອນພວກພີ່ນ້ອງ ໃຫ້ລະລຶກເຖິງພຣະວໍຣະສານທີ່ຂ້າພະເຈົ້າໄດ້ປະກາດ ແລະທີ່ພວກພີ່ນ້ອງເອງໄດ້ຮັບເອົາ ທັງໄດ້ຢຶດຖືເອົາໄວ້ເປັນຮາກຖານອັນໝັ້ນຄົງ. 2.ພຣະວໍຣະສານນັ້ນຈະຊ່ວຍພວກພີ່ນ້ອງໃຫ້ຮອດ, ຖ້າຫາກວ່າພວກພີ່ນ້ອງຍັງຖືຕາມທີ່ຂ້າພະເຈົ້າໄດ້ປະກາດແລ້ວ, ບໍ່ດັ່ງນັ້ນ, ຄວາມເຊື່ອຂອງພວກພີ່ນ້ອງກໍຈະບໍ່ມີຜົນຫຍັງ. 3.ກ່ອນອື່ນ ຂ້າພະເຈົ້າໄດ້ມອບໃຫ້ພວກພີ່ນ້ອງ ສິ່ງທີ່ຂ້າພະເຈົ້າເອງໄດ້ຮັບມາ ຄືພຣະກຣິສໂຕເຈົ້າໄດ້ສິ້ນພຣະຊົນຍ້ອນບາບຂອງພວກເຮົາ ຕາມທີ່ພຣະຄຳພີໄດ້ຂຽນບອກໄວ້. 4.ພຣະອົງໄດ້ຊົງຖືກຝັງແລະໄດ້ຊົງກັບເປັນຄືນມາໃນວັນທີສາມ ຕາມທີ່ພຣະຄຳພີໄດ້ໄດ້ຂຽນບອກໄວ້. 5.ພຣະອົງໄດ້ປະຈັກມາຫາເກຟາດ ແລ້ວຕໍ່ມາ ກໍປະຈັກມາຫາພວກອັກຄະທຳມະທູດທັງສິບສອງ. 6.ແລະຕໍ່ມາອີກ, ກໍໄດ້ປະຈັກມາຫາພວກພີ່ນ້ອງກວ່າຫ້າຮ້ອຍຄົນໃນເວລາດຽວກັນ, ຊຶ່ງພວກເຂົາສ່ວນຫລາຍ ດຽວນີ້ກໍຍັງມີຊີວິດຢູ່, ແຕ່ບາງຄົນກໍໄດ້ລ່ວງລັບໄປແລ້ວ. 7.ຕໍ່ມາອີກ, ພຣະອົງໄດ້ປະຈັກມາຫາຢາໂກເບແລະພວກສາວົກທັງໝົດ. 8.ສຸດທ້າຍ, ພຣະອົງໄດ້ປະຈັກມາຫາຂ້າພະເຈົ້າ ຜູ້ເປັນຄືລູກຫລອດ. 9.ຍ້ອນວ່າຂ້າພະເຈົ້າເປັນຜູ້ດ້ອຍກວ່າໝົດໃນພວກອັກຄະສາວົກ. ແລະຂ້າພະເຈົ້າກໍບໍ່ສົມໄດ້ຊື່ວ່າເປັນອັກຄະສາວົກດ້ວຍ. ຄອບວ່າຂ້າພະເຈົ້າໄດ້ບັງບຽດພຣະກຣິສຕະຈັກຂອງພຣະເຈົ້າ. 10.ແຕ່ການທີ່ຂ້າພະເຈົ້າເປັນຢູ່ດັ່ງນີ້, ກໍແມ່ນຍ້ອນອາໄສພຣະຄຸນຂອງພຣະເຈົ້າ ແລະພຣະຄຸນຂອງພຣະອົງຢູ່ໃນຕົວຂ້າພະເຈົ້ານັ້ນບໍ່ໄດ້ຮັບຜົນເລີຍ. ກົງຂ້າມ, ຂ້າພະເຈົ້າໄດ້ທຳງານຫລາຍກວ່າພວກເພິ່ນ, ແຕ່ບໍ່ແມ່ນຂ້າພະເຈົ້າດອກ, ແມ່ນພຣະຄຸນຂອງພຣະເຈົ້າທີ່ຢູ່ກັບຂ້າພະເຈົ້າເທົ່ານັ້ນ. 11.ເວົ້າສັ້ນໆແລ້ວ, ຈະແມ່ນຂ້າພະເຈົ້າຫລືພວກສາວົກອື່ນກໍຕາມ, ນີ້ແຫລະແມ່ນສິ່ງທີ່ພວກເຮົາປ່າວປະກາດ ແລະແມ່ນສິ່ງທີ່ພວກພີ່ນ້ອງໄດ້ເຊື່ອດ້ວຍ.

ການກັບເປັນຄືນມາຂອງພວກຜູ້ຕາຍ

12.ເມື່ອພວກເຮົາປະກາດວ່າ ພຣະກຣິສໂຕເຈົ້າໄດ້ກັບຄືນຊີບຈາກພວກຜູ້ຕາຍແລ້ວ ເປັນຫຍັງພວກພີ່ນ້ອງບາງຄົນເວົ້າວ່າ ພວກຜູ້ຕາຍຈະບໍ່ກັບເປັນຄືນມາ? 13.ຖ້າພວກຜູ້ຕາຍຈະບໍ່ກັບເປັນຄືນມາແລ້ວ, ພຣະກຣິສໂຕເຈົ້າກໍບໍ່ໄດ້ກັບເປັນຄືນມາດ້ວຍ. 14.ຖ້າວ່າພຣະກຣິສໂຕເຈົ້າບໍ່ໄດ້ກັບເປັນຄືນມາ, ການເທດສອນຂອງພວກເຮົາກໍເປົ່າປະໂຫຍດ ແລະຄວາມເຊື່ອຂອງພວກພີ່ນ້ອງກໍເປົ່າປະໂຫຍດຄືກັນ. 15.ດັ່ງນັ້ນພວກເຮົາກໍກາຍເປັນພິຍານເທັດຂອງພຣະເຈົ້າ ຍ້ອນພວກເຮົາໂຄສະນາຕ້ານພຣະເຈົ້າ ໂດຍຢືນຢັນວ່າ ພຣະເຈົ້າໄດ້ບັນດານໃຫ້ພຣະກຣິສໂຕເຈົ້າໄດ້ກັບຄືນຊີບ ໂດຍພຣະອົງເອງບໍ່ໄດ້ກະທຳ ຖ້າຫາກຜູ້ຕາຍບໍ່ກັບເປັນຄືນມາຈິງ. 16.ຖ້າພວກຜູ້ຕາຍບໍ່ກັບເປັນຄືນມາ, ພຣະກຣິສໂຕເຈົ້າກໍບໍ່ໄດ້ກັບເປັນຄືນມາຄືກັນ. 17.ແລະຖ້າວ່າພຣະກຣິສໂຕເຈົ້າບໍ່ໄດ້ກັບຄືນຊີບແລ້ວ ຄວາມເຊື່ອຂອງພວກພີ່ນ້ອງກໍເປັນຄວາມເຊື່ອງົມງາຍ ແລະພວກພີ່ນ້ອງກໍຍັງຈົມຢູ່ໃນບາບຂອງຕົນ. 18.ເມື່ອເປັນດັ່ງນີ້, ພວກທີ່ສິ້ນໃຈໃນພຣະກຣິສໂຕເຈົ້າ ກໍໄດ້ພິນາດໄປແລ້ວ. ຖ້າພວກເຮົາມີຄວາມຫວັງໃນພຣະກຣິສໂຕເຈົ້າສຳລັບຊີວິດນີີ້ເທົ່ານັ້ນ, ພວກເຮົາກໍເປັນຜູ້ໜ້າສົມເພດເວດທະນາກວ່າໝົດໃນມວນມະນຸດ. 20.ບໍ່ແມ່ນດັ່ງນັ້ນດອກ, ພຣະກຣິສໂຕໄດ້ກັບຄືນຊີບຈາກພວກຜູ້ຕາຍແລ້ວ. ແລະໃນບັນດາຜູ້ລ່ວງລັບໄປແລ້ວທັງໝົດ ແມ່ນພຣະອົງເປັນຜູ້ໄດ້ກັບຄືນຊີບກ່ອນໝູ່. 21.ຍ້ອນວ່າຄວາມຕາຍໄດ້ອຸບັດຂຶ້ນຍ້ອນຄົນຜູ້ໜຶ່ງແນວໃດ, ການກັບຄືນຊີບຂອງບັນດາຜູ້ຕາຍ ກໍອຸບັດຂຶ້ນຍ້ອນຄົນຜູ້ໜຶ່ງແນວນັ້ນດ້ວຍ. 22.ທຸກຄົນຕາຍໃນອາດຳ ແລະທຸກຄົນກໍຈະຄືນມີຊີວິດໃນພຣະກຣິສໂຕ. 23.ແຕ່ຕາມລຳດັບຂອງໃຜມັນ, ສ່ວນພຣະກຣິສໂຕເປັນຄົນທຳອິດ, ແລ້ວຕໍ່ໄປກໍແມ່ນຜູ້ທີ່ຈະເປັນຂອງພຣະກຣິສໂຕໃນເວລາພຣະອົງຈະສະເດັດມາ. 24.ເມື່ອພຣະກຣິສໂຕຈະໄດ້ທຳລາຍລິດອຳນາດຕ່າງໆຂອງສັດຕູໃຫ້ສູນສ້ຽງ ແລະຊົງມອບອານາຈັກໃຫ້ພຣະເຈົ້າພຣະບິດາແລ້ວ, ເວລານັ້ນຈະແມ່ນວາລະສຸດທ້າຍ. 25.ຍ້ອນວ່າພຣະອົງຈະຕ້ອງສະເຫວີຍຣາດ ຈົນເຖິງເວລາທີ່ພຣະອົງຈະເອົາພວກສັດຕູມາເປັນຂຽງຮອງພະບາດ. 26.ສັດຕູຜູ້ສຸດທ້າຍທີ່ພຣະອົງຈະຊົງທຳລາຍຄືຄວາມຕາຍ. 27.ດ້ວຍວ່າ ທຸກສິ່ງໄດ້ຖືກມອບໄວ້ຢູ່ກ້ອງພະບາດຂອງພຣະອົງ. ແຕ່ເມື່ອກ່າວວ່າ: “ທຸກສິ່ງທຸກຢ່າງຢູ່ກ້ອງອຳນາດພຣະອົງ”ນັ້ນ ກໍເປັນທີ່ຊັດແຈ້ງວ່າ ຕ້ອງຍົກເວັ້ນພຣະເປັນເຈົ້າ ຜູ້ຊົງທຳໃຫ້ທຸກສິ່ງທຸກຢ່າງຢູ່ກ້ອງອຳນາດຂອງພຣະອົງ. 28.ແລະເມື່ອທຸກສິ່ງທຸກຢ່າງຢູ່ກ້ອງອຳນາດຂອງພຣະເຈົ້າແລ້ວ, ພຣະບຸດເຈົ້າເອງກໍຈະຊົງຢູ່ກ້ອງອຳນາດຂອງພຣະເຈົ້າ ຜູ້ໄດ້ຊົງມອບທຸກສິ່ງທຸກຢ່າງຢູ່ໃຕ້ອຳນາດຂອງພຣະບຸດ ເພື່ອໃຫ້ພຣະເຈົ້າຈະໄດ້ເປັນທຸກຢ່າງໃນທຸກຄົນ. 29.ຖ້າຫາກວ່າບໍ່ແມ່ນດັ່ງນີ້, ພວກທີ່ຂໍຮັບພິທີລ້າງບາບເພື່ອພວກຜູ້ຕາຍນັ້ນຈະໄດ້ປະໂຫຍດຫຍັງ? ແລະຖ້າວ່າພວກຜູ້ຕາຍບໍ່ກັບເປັນຄືນມາ, ເປັນຫຍັງຄົນຈຶ່ງຂໍຮັບພິທີລ້າງບາບເພື່ອພວກຜູ້ຕາຍ. 31.ພີ່ນ້ອງທັງຫລາຍ, ຂ້າພະເຈົ້າຕາຍຢູ່ທຸກວັນນີ້, ແມ່ນຈິງກັບທີ່ວ່າ ພວກພີ່ນ້ອງແມ່ນຄວາມພາກພູມໃຈຂອງຂ້າພະເຈົ້າ ໃນພຣະເຢຊູກຣິສໂຕພຣະເຈົ້າຂອງເຮົາທັງຫລາຍ. 32.ຖ້າຂ້າພະເຈົ້າຕໍ່ສູ້ກັບສັດປ່າ ຢູ່ເມືອງເອເຟໂຊ ຍ້ອນເຫດຜົນປະສາມະນຸດແລ້ວ ມັນຈະມີປະໂຫຍດຫຍັງໃຫ້ຂ້າພະເຈົ້າບໍ? ຖ້າພວກຜູ້ຕາຍບໍ່ກັບເປັນຄືນມາ, “ຈົ່ງພາກັນກິນກັນດື່ມເຖີດ, ດ້ວຍວ່າມື້ອື່ນພວກເຮົາຈະຕາຍ. 33.ພວກພີ່ນ້ອງຢ່າເຂົ້າໃຈຜິດ ຄື ການຄົບຄ້າສະມາຄົມກັບຄົນຊົ່ວ ທຳໃຫ້ສິນທຳເສື່ອມເສຍ”. 34.ຈົ່ງສຳນຶກຕົວແລະຢ່າທຳບາບອີກ, ຍ້ອນວ່າມີບາງຄົນບໍ່ຮູ້ຈັກພຣະເປັນເຈົ້າເລີຍ. ຂ້າພະເຈົ້າເວົ້າດັ່ງນີ້ ເພື່ອໃຫ້ພວກພີ່ນ້ອງຮູ້ສຶກລະອາຍ.

ຮ່າງກາຍຂອງຜູ້ກັບເປັນຄືນມາ

35.ມີບາງຄົນຈະຖາມວ່າ: “ຜູ້ຕາຍຈະກັບເປັນຄືນມາຢ່າງໃດ? ເມື່ອຫລົບຄືນມາ ເຂົາເຈົ້າຈະມີຮ່າງກາຍແນວໃດ? 36.ຄືວ່າໂງ່ແທ້ນໍ! ເມັດທີ່ເຈົ້າຫວ່ານລົງໄປນັ້ນ ຖ້າບໍ່ຕາຍກ່ອນ ມັນກໍບໍ່ປົ່ງຂຶ້ນດອກ. 37.ສິ່ງທີ່ເຈົ້າຫວ່ານລົງນັ້ນ ບໍ່ແມ່ນຕົ້ນເບ້ຍທີ່ຕ້ອງເຕີບໂຕຂຶ້ນ, ແຕ່ແມ່ນເມັດພືດລ້າໆ, ຈະເປັນເມັດເຂົ້າສາລີຫລືຫຍັງແນວອື່ນກໍຕາມ. 38.ແລ້ວພຣະເປັນເຈົ້າຈະໃຫ້ມັນມີລຳຕົ້ນ ຕາມນ້ຳພຣະໄທຂອງພຣະອົງ ແລະໃຫ້ແຕ່ລະແນວມີລຳຕົ້ນຕາມຊະໜິດຂອງມັນ. 39.ບໍ່ມີຊີ້ນໃດຄືກັນ, ຊີ້ນຄົນ, ຊີ້ນສັດ, ຊີ້ນນົກ, ຊີ້ນປາ ກໍບໍ່ຄືກັນ. 40.ມີກາຍໃນສະຫວັນ, ມີກາຍໃນແຜ່ນດິນ ແລະທັງສອງກາຍບໍ່ມີແສງລັດສະໝີຄ້າຍຄືກັນ. 41.ແສງຕາເວັນກໍເປັນແນວໜຶ່ງ, ແສງເດືອນກໍເປັນແນວໜຶ່ງ, ແສງດາວກໍແນວໜຶ່ງ, ແມ່ນດວງດາວເອງກໍມີແສງບໍ່ຄືກັນ.

42.ສຳລັບການກັບຄືນຊີບຂອງພວກຜູ້ຕາຍກໍດັ່ງດຽວກັນ ຄື ສິ່ງທີ່ຫວ່ານລົງໄປນັ້ນແມ່ນຂອງເປື່ອຍເໜົ່າເປັນ. ສ່ວນທີ່ກັບເປັນຄືນມານັ້ນ ເປື່ອຍເໜົ່າບໍ່ເປັນ. 43.ສິ່ງທີ່ຫວ່ານລົງໄປນັ້ນບໍ່ມີກຽດ ແຕ່ກັບເປັນຄືນມາຮຸ່ງເຮືອງເຫລືອງເຫລື້ອມ. ສິ່ງທີ່ຫວ່ານລົງໄປນັ້ນອ່ອນແອ ແຕ່ກັບເປັນຄືນມາເຕັມດ້ວຍອານຸພາບ. 44.ສິ່ງທີ່ຫວ່ານລົງໄປເປັນຮ່າງກາຍທຳມະຊາດ ແຕ່ສິ່ງທີ່ກັບເປັນຄືນມາເປັນຮ່າງກາຍຄືຈິດ. ຖ້າວ່າມີຮ່າງກາຍທຳມະຊາດ ກໍມີຮ່າງກາຍຄືຈິດດ້ວຍ. 45.ດ້ວຍເຫດນີ້ ຈຶ່ງມີຈາລຶກໄວ້ວ່າ: ອາດຳຄົນທຳອິດເປັນມະນຸດທີ່ມີຊີວິດທຳມະຊາດ ສ່ວນອາດຳຄົນສຸດທ້າຍເປັນຈິດທີ່ບັນດານຊີວິດ. 46.ແຕ່ສິ່ງທີ່ປາກົດມາກ່ອນແມ່ນມະນຸດຕາມທຳມະຊາດ, ບໍ່ແມ່ນມະນຸດແບບຈິດ, ມະນຸດແບບຈິດປາກົດມາຕາມຫລັງ. 47.ມະນຸດຄົນທີໜຶ່ງມາຈາກດິນ ກໍເປັນຂອງໆແຜ່ນດິນ, ສ່ວນມະນຸດຄົນທີສອງນັ້ນມາຈາກສະຫວັນ. 48.ມະນຸດທີ່ເກີດມາຈາກດິນເປັນແນວໃດ, ພວກທີ່ເກີດມາແບບຜູ້ມາຈາກດິນ ກໍເປັນແນວນັ້ນ. ມະນຸດທີ່ເກີດມາຈາກສະຫວັນເປັນແນວໃດ? ພວກທີ່ເກີດມາແບບຜູ້ມາຈາກສະຫວັນກໍເປັນດັ່ງນັ້ນ. 49.ພວກເຮົາມີລັກສະນະຂອງມະນຸດທີ່ມາຈາກດິນຢ່າງໃດ, ພວກເຮົາກໍຈະມີລັກສະນະຄືມະນຸດທີ່ມາຈາກສະຫວັນຢ່າງນັ້ນ. 50.ພີ່ນ້ອງທີ່ຮັກ, ຂ້າພະເຈົ້າຂໍບອກກັບພວກພີ່ນ້ອງວ່າ ເລືອດເນື້ອບໍ່ໄດ້ມີສ່ວນໃນອານາຈັກສະຫວັນດອກ, ແນວເປື່ອຍເໜົ່າກໍຈະບໍ່ໄດ້ຮັບແນວບໍ່ເປື່ອຍເໜົ່າ ມາເປັນມໍລະດົກດ້ວຍ.

ກ່ຽວເລື່ອງພວກຜູ້ຕາຍ

51. ຂ້າພະເຈົ້າຂໍບອກຂໍ້ເລິກລັບຂໍ້ໜຶ່ງໃຫ້ພວກພີ່ນ້ອງຊາບຄື ພວກເຮົາຈະບໍ່ຕາຍໝົດທຸກຄົນ ແຕ່ຈະປ່ຽນສະພາບໃໝ່ໝົດທຸກຄົນ. 52.ໃນຄາວໜຶ່ງ, ໃນພິບຕາດຽວ, ເມື່ອສຽງແກດັງກ້ອງຂຶ້ນເປັນເທື່ອສຸດທ້າຍ. ຍ້ອນວ່າສຽງແກຈະດັງຂຶ້ນ, ແລ້ວພວກຜູ້ຕາຍຈະກັບເປັນຄືນມາ ບໍ່ເປື່ອຍເໜົ່າອີກ, ສ່ວນພວກເຮົາຈະປ່ຽນສະພາບໃໝ່. 53.ຍ້ອນວ່າຈຳເປັນຕ້ອງໃຫ້ຮ່າງກາຍທີ່ມີສະພາບເປື່ອຍເໜົ່າເປັນນີ້ ຮັບເອົາສະພາບທີ່ບໍ່ເປື່ອຍເໜົ່າເປັນ ແລະຮ່າງກາຍທີ່ຕາຍເປັນນີ້ ຈະໄດ້ຮັບຊີວິດອະມະຕະ. 54.ເມື່ອຮ່າງກາຍທີ່ເປື່ອຍເໜົ່າເປັນນີ້ ຈະບໍ່ເປື່ອຍເໜົ່າເປັນ ແລະເມື່ອຮ່າງກາຍທີ່ຕາຍເປັນນີ້ໄດ້ຊີວິດອະມະຕະແລ້ວ ເວລານັ້ນຈຶ່ງຈະສຳເລັດຕາມຂໍ້ຄວາມໃນພຣະຄຳພີວ່າ: “ຄວາມໄຊຊະນະໄດ້ກືນກິນຄວາມຕາຍແລ້ວ. 55.ຄວາມຕາຍເອີຍ! ໄຊຊະນະຂອງເຈົ້າຢູ່ໃສ? ຄວາມຕາຍເອີຍ! ໄລຂອງເຈົ້າຢູ່ໃສ? 56.ໄລຂອງຄວາມຕາຍແມ່ນບາບ, ລິດຂອງບາບແມ່ນພຣະບັນຢັດ. 57.ຈົ່ງຂອບພຣະຄຸນພຣະເປັນເຈົ້າ ຜູ້ໄດ້ຊົງປະທານໄຊຊະນະໃຫ້ພວກເຮົາ ເດຊະພຣະກຣິສໂຕ ພຣະເຈົ້າຂອງເຮົາທັງຫລາຍ”. 58.ດັ່ງນີ້ ພີ່ນ້ອງທີ່ຮັກ, ຈົ່ງຕັ້ງໝັ້ນຢ່າຫວັ່ນໄຫວ ຈົ່ງກ້າວໜ້າໃນການປະກອບພາລະກິດຂອງພຣະອົງເຈົ້າສະເໝີ ແລະຈົ່ງຮູ້ດີວ່າ ຄວາມບາກບັ່ນຂອງພວກພີ່ນ້ອງໃນພຣະອົງເຈົ້ານັ້ນ ບໍ່ເສຍໄປຊື່ໆດອກ.