ຈົດໝາຍຂອງນັກບຸນເປົາໂລຂຽນເຖິງສັດຕະບຸຣຸດຢູ່ເມືອງໂກຣິນໂທ ສະບັບທີ 1

ຄຳນັບຖາມຂ່າວແລະຂອບພຣະຄຸນ

1.ຈາກຂ້າພະເຈົ້າເປົາໂລ ຜູ້ຖືກຮຽກມາໃຫ້ເປັນອັກຄະສາວົກຂອງພຣະເຢຊູກຣິສໂຕເຈົ້າ ຕາມນ້ຳພຣະໄທຂອງພຣະເຈົ້າ ພ້ອມທັງໂຊດເທແນດ ພີ່ນ້ອງຂອງເຮົາ, 2.ເຖິງໝູ່ກຣິສຕະຊົນຂອງພຣະເຈົ້າຢູ່ເມືອງໂກຣິນໂທ ແລະເຖິງທຸກຄົນທີ່ໄດ້ກາຍເປັນຜູ້ສັກສິດໃນພຣະເຢຊູກຣິສໂຕແລ້ວ, ຜູ້ໄດ້ຖືກຮຽກມາໃຫ້ເປັນຜູ້ສັກສິດ ພ້ອມກັບທຸກຄົນໃນທຸກຫົນທຸກແຫ່ງທີ່ຮ້ອງຫາພຣະນາມຂອງພຣະເຢຊູກກຣິສໂຕ ຜູ້ເປັນພຣະເຈົ້າຂອງພວກເຂົາແລະຂອງພວກເຮົາດ້ວຍ. 3.ຂໍ ພຣະຄຸນແລະສັນຕິສຸກທີ່ມາຈາກພຣະບິດາ ພຣະເຈົ້າຂອງພວກເຮົາ ແລະຈາກພຣະເຢຊູກຣິສໂຕນັ້ນ ຈົ່ງສະຖິດຢູ່ນຳພວກພີ່ນ້ອງເທີ້ນ. 4. ຂ້າພະເຈົ້າບໍ່ໄດ້ຢຸດຢ່ອນຂອບພຣະຄຸນພຣະເປັນເຈົ້າ ເພື່ອພວກພີ່ນ້ອງ, ຍ້ອນພຣະຄຸນທີ່ພຣະເປັນເຈົ້າໄດ້ປະທານໃຫ້ພວກພີ່ນ້ອງ ໃນພຣະເຢຊູກຣິສໂຕເຈົ້າ. 5.ພວກພີ່ນ້ອງໄດ້ຮັ່ງມີທຸກຢ່າງໃນພຣະອົງ, ທັງທາງວາຈາແລະທາງຄວາມຮູ້ທຸກແນວ. 6.ຍ້ອນພວກພີ່ນ້ອງໄດ້ຢັ້ງຢືນເຖິງພຣະກຣິສໂຕເຈົ້າຢ່າງໜັກແໜ້ນ 7.ຈົນວ່າ ພວກພີ່ນ້ອງບໍ່ຂາດພຣະຄຸນຫຍັງ ໃນເວລາຄອງຖ້າພຣະເຢຊູກຣິສໂຕພຣະເຈົ້າຂອງເຮົາປາກົດມາ. 8.ແມ່ນພຣະອົງເອງດ້ວຍ ຈະບັນດານໃຫ້ພວກພີ່ນ້ອງໝັ້ນຄົງຈົນເຖິງທີ່ສຸດ, ເພື່ອຈະໄດ້ພົ້ນຈາກຂໍ້ຕ້ອງຕິ ໃນມື້ພຣະເຢຊູກຣິສໂຕພຣະເຈົ້າຂອງເຮົາຈະສະເດັດມາ. 9.ພຣະເຈົ້າຜູ້ຊົງສັດຈິງ ໄດ້ຮຽກພວກພີ່ນ້ອງ ໃຫ້ມາຮ່ວມສຳພັນກັບພຣະເຢຊູກຣິສໂຕ ພຣະບຸດຂອງພຣະອົງແລະພຣະເຈົ້າຂອງເຮົາທັງຫລາຍ. 

ການແບ່ງແຍກໃນໝູ່ກຣິສຕະຊົນ

10.ພີ່ນ້ອງທັງຫລາຍ, ຂ້າພະເຈົ້າຂໍຮ້ອງພວກພີ່ນ້ອງ ໃນນາມຂອງພຣະເຢຊູກຣິສໂຕພຣະເຈົ້າຂອງເຮົາທັງຫລາຍ ຄືໃຫ້ທຸກຄົນຖືກຕ້ອງປອງດອງກັນ ແລະຢ່າມີການແບ່ງແຍກກັນໃນໝູ່ພວກພີ່ນ້ອງ. ຈົ່ງສະໝານສາມັກຄີເປັນຈິດໜຶ່ງໃຈດຽວກັນ. 11.ພີ່ນ້ອງທັງຫລາຍ, ຂ້າພະເຈົ້າໄດ້ຍິນຄົນໃນຄອບຄົວຂອງນາງ”ໂກລເອ” ເລົ່າໃຫ້ຂ້າພະເຈົ້າຟັງວ່າ ເກີດມີການຜິດຂ້ອງຕ້ອງຖຽງກັນໃນໝູ່ພວກພີ່ນ້ອງ. 12. ຂ້າພະເຈົ້າຂໍບອກໃຫ້ແຈ້ງ ຄື ພວກພີ່ນ້ອງຕ່າງຄົນຕ່າງເວົ້າວ່າ: “ຂ້ອຍເປັນພວກຂອງເປົາໂລ”, “ຂ້ອຍເປັນພວກຂອງອາປອນໂລ”, “ຂ້ອຍເປັນພວກຂອງເກຟັດ (ເປໂຕ)”, “ຂ້ອຍເປັນພວກຂອງພຣະກຣິສໂຕ”. 13.ດັ່ງນີ້ ມີການແບ່ງແຍກຢູ່ໃນອົງພຣະກຣິສໂຕເຈົ້າບໍ? ເປົາໂລໄດ້ຖືກຄຶງໃສ່ກາງເຂນເພື່ອພວກພີ່ນ້ອງຊັ້ນບໍ? ພວກພີ່ນ້ອງໄດ້ຮັບສິນລ້າງບາບໃນນາມຂອງເປົາໂລບໍ? 14.ຂໍຂອບພຣະຄຸນພຣະເປັນເຈົ້າ ຍ້ອນວ່າເຮົາບໍ່ໄດ້ໂຜດສິນລ້າງບາບໃຫ້ພວກພີ່ນ້ອງສັກຄົນ, ເວັ້ນແຕ່ກຣິດສະໂປແລະກາຍໂຢເທົ່ານັ້ນ. 15.ດັ່ງນີ້ຈຶ່ງບໍ່ມີໃຜໃນພວກພີ່ນ້ອງກ້າເວົ້າວ່າ ໄດ້ຮັບສິນລ້າງບາບໃນນາມຂອງເປົາໂລ. 16.ແມ່ນແລ້ວ, ເຮົາຍັງໄດ້ໂຜດສິນລ້າງບາບໃຫ້ຄອບຄົວຂອງສະເຕຟານາອີກ, ນອກຈາກນັ້ນແລ້ວ, ເຮົາກໍຮູ້ວ່າບໍ່ໄດ້ໂຜດສິນລ້າງບາບໃຫ້ຜູ້ໃດອື່ນເລີຍ. 17.ຕາມຈິງແລ້ວ, ພຣະກຣິສໂຕບໍ່ໄດ້ສົ່ງຂ້າພະເຈົ້າມາໂຜດສິນລ້າງບາບ ແຕ່ສົ່ງມາປ່າວປະກາດຂ່າວປະເສີດ ໂດຍບໍ່ໃຊ້ໂວຫານການເວົ້າອັນສະຫລາດຂອງມະນຸດ ເພື່ອບໍ່ໃຫ້ກາງເຂນຂອງພຣະກຣິສໂຕເຈົ້າໝົດຄຸນຄ່າໄປ.

ຄວາມສະຫລາດແລະຄວາມໂງ່

18.ຕາມຈິງແລ້ວ, ພວກທີ່ກຳລັງຈະພິນາດນັ້ນ ຖືເອົາເລື່ອງກາງເຂນເປັນເລື່ອງໂງ່, ແຕ່ພວກທີ່ກຳລັງຈະໄດ້ຮອດ ຄືພວກເຮົານີ້ ກໍຖືເອົາເລື່ອງກາງເຂນເປັນຣິດທານຸພາບຂອງພຣະເຈົ້າ. 19.ຍ້ອນມີຂໍ້ຄວາມກ່າວໄວ້ວ່າ: “ເຮົາຈະທຳລາຍຄວາມສະຫລາດຂອງພວກສະຫລາດ, ຈະທຳໃຫ້ສະຕິປັນຍາຂອງຜູ້ມີປັນຍາ ສູນສິ້ນໄປ.” 20.ຄົນສະຫລາດຢູ່ໃສ? ນັກທຳຢູ່ໃສ? ນັກໂຕ້ບັນຫາສະໄໝນີ້ຢູ່ໃສ? ພຣະເປັນເຈົ້າບໍ່ໄດ້ທຳໃຫ້ຄວາມສະຫລາດຂອງໂລກ ກາຍເປັນຄວາມໂງ່ບໍ? 21.ຍ້ອນວ່າ ອາໄສຄວາມສະຫລາດຂອງຕົນເອງ, ໂລກບໍ່ສາມາດຮູ້ຈັກພຣະເຈົ້າ ໃນຄວາມສະຫລາດຂອງພຣະເຈົ້າໄດ້, ພຣະອົງຈຶ່ງພໍພຣະໄທຊ່ວຍພວກທີ່ເຊື່ອພຣະອົງໃຫ້ຮອດ ດ້ວຍອາໄສການເທດສອນເລື່ອງທີ່ເຂົາຖືວ່າໂງ່. 22.ພວກຢິວຮ້ອງຂໍຢາກເຫັນອັດສະຈັນ, ແລະພວກເກັຣກສະແຫວງຫາຄວາມສະຫລຽວສະຫລາດ. 23.ສ່ວນພວກເຮົາ, ພວກເຮົາປ່າວປະກາດພຣະກຣິສໂຕຜູ້ຖືກຄຶງໃສ່ກາງເຂນ ຊຶ່ງພວກຢິວຖືວ່າເປັນສິ່ງບາດຫູບາດຕາ, ແລະຄົນຕ່າງຊາດຖືວ່າເປັນຄວາມໂງ່ຊ້າ, 24.ສ່ວນພວກທີ່ພຣະເຈົ້າຊົງຮຽກນັ້ນ, ບໍ່ວ່າຈະເປັນຊາດຢິວຫລືຊາດເກັຣກກໍຕາມ ຕ່າງກໍຖືວ່າ ພຣະກຣິສໂຕແມ່ນຣິດທານຸພາບຂອງພຣະເຈົ້າ, ແລະແມ່ນຄວາມສະຫລາດສຸຂຸມຂອງພຣະເຈົ້າ. 25.ຍ້ອນວ່າ ສິ່ງທີ່ເປັນຄວາມໂງ່ຊ້າຂອງພຣະເຈົ້ານັ້ນ ຍັງສະຫລາດກວ່າມະນຸດ, ແລະສິ່ງທີ່ເປັນຄວາມອ່ອນແອຂອງພຣະເຈົ້ານັ້ນກໍຍັງແຂງແຮງກວ່າມະນຸດອີກ. 26.ພີ່ນ້ອງທັງຫລາຍ, ຈົ່ງພິຈາລະນາເບິ່ງວ່າ ຕົວເປັນແນວໃດ, ເມື່ອພຣະເຈົ້າຊົງຮຽກພວກພີ່ນ້ອງນັ້ນ ມີໜ້ອຍຄົນເປັນຜູ້ສະຫລຽວສະຫລາດຕາມປະສາມະນຸດ, ມີໜ້ອຍຄົນເປັນຜູ້ມີອຳນາດວາດສະໜາ, ໜ້ອຍຄົນມີຕະກູນສູງ. 27.ແຕ່ ພຣະເຈົ້າໄດ້ເລືອກເອົາແນວໂງ່ໃນສາຍຕາຂອງໂລກ ມາທຳໃຫ້ຜູ້ສະຫລຽວສະຫລາດຕ້ອງອັບອາຍຂາຍໜ້າ. ພຣະເຈົ້າໄດ້ເລືອກເອົາສິ່ງທີ່ອ່ອນແອໃນສາຍຕາຂອງໂລກ ມາທຳໃຫ້ສິ່ງທີ່ແຂງແຮງຕ້ອງອັບອາຍຂາຍໜ້າ. 28.ພຣະອົງໄດ້ເລືອກເອົາສິ່ງທີ່ຕ່ຳຕ້ອຍ, ສິ່ງທີ່ໂລກປະໝາດ ສິ່ງທີ່ບໍ່ມີ ມາທຳລາຍສິ່ງທີ່ມີຢູ່ນັ້ນ ໃຫ້ສາບສູນໄປ. 29.ທັງນີ້ ກໍເພື່ອບໍ່ໃຫ້ມີມະນຸດຄົນໃດ ສາມາດອວດອ້າງຕົວໄດ້ຕໍ່ພຣະພັກພຣະເຈົ້າ. 30.ຍ້ອນອາໄສພຣະເຈົ້ານີ້ແລ້ວ ພວກພີ່ນ້ອງຈຶ່ງໄດ້ຢູ່ໃນພຣະກຣິສໂຕເຢຊູ, ຜູ້ພຣະເຈົ້າໄດ້ປະທານໃຫ້ເປັນຄວາມສະຫລຽວສະຫລາດ, ເປັນຄວາມຊອບທຳ, ເປັນຄວາມສັກສິດ ແລະເປັນການກູ້ໄຖ່ສຳລັບເຮົາທັງຫລາຍ. 31.ດັ່ງທີ່ມີກ່າວໃນພຣະຄຳພີວ່າ: “ຜູ້ມີຄວາມພາກພູມໃຈ ກໍໃຫ້ພາກພູມໃຈໃນພຣະອົງເຈົ້າເຖີດ.”