2.- ຄວາມຮອດ

- ມະນຸດໄດ້ເປັນຜູ້ຊອບທຳ, ໄດ້ເຂົ້າດີກັບພຣະເຈົ້າ ແລະໄດ້ຮອດ

1.ພຣະເປັນເຈົ້າໄດ້ທຳໃຫ້ພວກເຮົາເປັນຜູ້ຊອບທຳ ຍ້ອນພວກເຮົາເຊື່ອ, ດັ່ງນີ້ພວກເຮົາຈຶ່ງໄດ້ເຂົ້າດີກັບພຣະເປັນເຈົ້າ ດ້ວຍອາໄສພຣະເຢຊູກຣິສໂຕພຣະເຈົ້າຂອງເຮົາທັງຫລາຍ. 2.ອາໄສຄວາມເຊື່ອນີ້ ພຣະອົງໄດ້ເປີດທາງໃຫ້ພວກເຮົາຄືນເປັນມິດກັບພຣະເຈົ້າ ແລະຕັ້ງໝັ້ນໃນມິດຕະພາບນັ້ນ. ດັ່ງນີ້ພວກເຮົາພາກພູມໃຈດ້ວຍມີຫວັງວ່າ ຈະໄດ້ຮ່ວມສີມຸງຄຸນຂອງພຣະເປັນເຈົ້າ. 3.ກວ່ານັ້ນອີກ ພວກເຮົາຍັງພາກພູມໃຈໃນຄວາມລຳບາກ ຍ້ອນຮູ້ດີວ່າ ຄວາມລຳບາກນັ້ນທຳໃຫ້ເກີດຄວາມພາກພຽນ. 4.ຄວາມພາກພຽນທຳໃຫ້ເກີດຄວາມສັດທາອັນແຮງ ກ້າ ແລະຄວາມສັດທາອັນແຮງກ້າທຳໃຫ້ເກີດຄວາມໄວ້ໃຈ. 5.ແລະຄວາມໄວ້ໃຈນີ້ບໍ່ທຳໃຫ້ເຮົາຜິດຫວັງ ຍ້ອນວ່າພຣະຈິດທີ່ເຮົາໄດ້ຮັບນັ້ນ ໄດ້ຝັງຄວາມຮັກຂອງພຣະເຈົ້າໄວ້ໃນໃຈຂອງພວກເຮົາ. 6.ແມ່ນແທ້, ເມື່ອເວລາພວກເຮົາພວມອ່ອນກຳລັງຢູ່ນັ້ນແຫລະ ພຣະກຣິສໂຕເຈົ້າໄດ້ສິ້ນພຣະຊົນເພື່ອຊ່ວຍພວກເຮົາຄົນອະທຳ ຕາມເວລາທີ່ພຣະເຈົ້າໄດ້ກຳນົດໄວ້. 7.ຕາມຈິງແລ້ວ, ຫາຜູ້ຍອມຕາຍຕາງຄົນຊອບທຳນັ້ນມັນຍາກ, ແຕ່ບາງທີ ອາດຈະມີຜູ້ຍອມຕາຍເພື່ອຄົນດີກໍໄດ້. 8.ແຕ່ມີຫລັກຖານຢືນຢັນວ່າ ພຣະເຈົ້າຮັກພວກເຮົາ ຄືເວລາພວກເຮົາຍັງເປັນຄົນບາບຢູ່ນັ້ນ, ພຣະກຣິສໂຕເຈົ້າໄດ້ສິ້ນພຣະຊົນເພື່ອພວກເຮົານັ້ນເອງ. 9.ບັດນີ້ ພວກເຮົາໄດ້ເປັນຜູ້ຊອບທຳ ດ້ວຍອາໄສພຣະໂລຫິດຂອງພຣະເຈົ້າໄດ້ຫລາຍກວ່າອີກ. 10.ດັ່ງນີ້ ເມື່ອພວກເຮົາຍັງເປັນສັດຕູກັບພຣະອົງຢູ່ນັ້ນ, ພຣະເຈົ້າກໍຍັງໄດ້ໃຫ້ພວກເຮົາຄືນດີກັບພຣະອົງ ດ້ວຍອາໄສການສິ້ນພຣະຊົນຂອງພຣະບຸດເຈົ້າ. ແລະດຽວນີ້ ພວກເຮົາໄດ້ຄືນດີກັບພຣະອົງແລ້ວ, ພວກເຮົາກໍແຮງຈະໄດ້ຮອດ ດ້ວຍອາໄສພະຊົນຊີບຂອງພຣະກຣິສໂຕຫລາຍກວ່າອີກ. 11.ບໍ່ແມ່ນແຕ່ເທົ່ານັ້ນ, ພວກເຮົາຍັງມີຄວາມພາກພູມໃຈໃນພຣະເຈົ້າ ຍ້ອນເຫັນແກ່ພຣະເຢຊູກຣິສໂຕພຣະອົງເຈົ້າຂອງເຮົາທັງຫລາຍ, ຜູ້ໄດ້ທຳໃຫ້ພວກເຮົາຄືນດີກັບພຣະເຈົ້ານັ້ນອີກດ້ວຍ.

- ອາດຳແລະພຣະເຢຊູເຈົ້າ

12.ດ້ວຍເຫດນີ້ ຄົນຜູ້ດຽວຄືອາດຳ ໄດ້ນຳເອົາບາບມາສູ່ໂລກ ແລະບາບໄດ້ນຳເອົາຄວາມຕາຍມານຳ ດັ່ງນີ້ ຄົນທັງຫລາຍຈຶ່ງຕ້ອງຕາຍຍ້ອນໄດ້ທຳບາບ. 13.ຍ້ອນວ່າ ກ່ອນມີພຣະບັນຢັດ ບາບກໍມີຢູ່ແລ້ວໃນໂລກ ແຕ່ບໍ່ໄດ້ນັບວ່າເປັນການບາບ ຍ້ອນບໍ່ທັນມີພຣະບັນຢັດຫ້າມ. 14.ປານນັ້ນກໍດີ ຄວາມຕາຍໄດ້ເປັນເຈົ້າຄອບຄອງ ຕັ້ງແຕ່ອາດຳຈົນຮອດໂມແຊ, ແລະພວກທີ່ບໍ່ໄດ້ທຳຜິດຕາມຢ່າງຂອງອາດຳ ຜູ້ເປັນຮູບເງົາຂອງພຣະອົງ ຜູ້ຈະມາພາຍຫລັງນັ້ນ ກໍຕ້ອງຕົກຢູ່ໃນກ້ອງອຳນາດຂອງຄວາມຕາຍດ້ວຍ. 15.ແຕ່ຈະປຽບບາບໃສ່ກັບພຣະຄຸນ ບໍ່ໄດ້. ຖ້າວ່າຄວາມຜິດຂອງຄົນຜູ້ດຽວທຳໃຫ້ມວນມະນຸດຕ້ອງຕາຍແລ້ວ ພຣະຄຸນທີ່ພຣະເປັນເຈົ້າປະທານໃຫ້ພວກເຮົາດ້ວຍອາໄສຄົນຜູ້ດຽວຄືພຣະເຢຊູກຣິສໂຕນັ້ນ ຈະບໍ່ຫລັ່ງໄຫລລົງມາສູ່ຄົນທັງຫລາຍຢ່າງອຸດົມສົມບູນກວ່ານີ້ອີກບໍ? 16.ແຕ່ຈະປຽບຜົນຂອງພຣະຄຸນໃສ່ກັບຜົນຂອງບາບ ບໍ່ໄດ້. ຄືວ່າ ບາບຂໍ້ດຽວທຳໃຫ້ມີການຕັດສິນລົງໂທດ. ສ່ວນພຣະຄຸນນັ້ນລຶບລ້າງບາບທັງມວນ ແລະປະທານຄວາມຊອບທຳໃຫ້. 17.ຖ້າຫາກວ່າ ຍ້ອນຄວາມຜິດຂອງຄົນຜູ້ດຽວ ຄວາມຕາຍຈຶ່ງມີສິດຄຸ້ມຄອງ ດ້ວຍອາໄສຄົນຜູ້ດຽວແລ້ວ, ສາຫຍັງ ພວກທີ່ໄດ້ຮັບພຣະຄຸນແລະຄວາມຊອບທຳຢ່າງສົມບູນແລ້ວ, ຈະບໍ່ສະເຫວີຍຣາດໃນຊີວິດ ດ້ວຍອາໄສຄົນຜູ້ດຽວ ຄືພຣະເຢຊູກຣິສໂຕ ຍິ່ງກວ່າອີກບໍ.

18.ດັ່ງນີ້ ການທຳຜິດຂອງຄົນຜູ້ດຽວເປັນເຫດໃຫ້ມະນຸດທຸກຄົນຖືກລົງໂທດແນວໃດ, ກິດ ຈະການຊອບທຳຂອງຄົນຜູ້ດຽວ ກໍນຳຄວາມຊອບທຳບັນດານຊີວິດ ມາໃຫ້ມະນຸດທຸກຄົນແນວນັ້ນ. 19.ມວນມະນຸດໄດ້ກາຍເປັນຄົນບາບ ຍ້ອນຄວາມບໍ່ເຊື່ອຟັງຂອງຄົນຜູ້ດຽວແນວໃດ ຄວາມເຊື່ອຟັງຂອງຄົນຜູ້ດຽວທຳໃຫ້ມວນມະນຸດເປັນຜູ້ຊອບທຳແນວນັ້ນ. 20.ພຣະບັນຢັດມີຂຶ້ນ ກໍເພື່ອໃຫ້ຄວາມຜິດແຜ່ຫລາຍຂຶ້ນດ້ວຍ. ແຕ່ບ່ອນໃດມີການບາບເພີ່ມພູນທະວີ ພຣະຄຸນກໍແຮງເພີ່ມພູນທະວີຫລາຍກວ່າອີກຢູ່ທີ່ນັ້ນ. 21.ເພື່ອໃຫ້ບ່ອນທີ່ບາບຄອບງຳເພື່ອຄວາມຕາຍນັ້ນຢ່າງໃດ ພຣະຄຸນກໍຄອບງຳດ້ວຍອາໄສຄວາມຊອບທຳ ເພື່ອຊີວິດນິຣັນດອນ ດ້ວຍເດຊະພຣະເຢຊູກຣິສໂຕ ພຣະເຈົ້າຂອງເຮົາທັງຫລາຍ ຢ່າງນັ້ນດ້ວຍ.