ຄຳເຕືອນແລະຄຳຖາມຂ່າວ

1. ຂ້າພະເຈົ້າຂໍຝາກນ້ອງສາວຂອງຂ້າພະເຈົ້າ ຄືນາງເຟເບ ໄວ້ນຳພວກພີ່ນ້ອງ. ນາງແມ່ນຜູ້ຮັບໃຊ້ຢູ່ກຸ່ມກຣິສຕະຊົນເມືອງຊັງເກຣ. 2.ຈົ່ງຕ້ອນຮັບນາງໃນພຣະອົງເຈົ້າ ຢ່າງເໝາະສົມກັບຊື່ວ່າເປັນກຣິສຕັງ ແລະຂໍໃຫ້ຊ່ວຍນາງໃນທຸກສິ່ງທີ່ນາງຕ້ອງການ. ຍ້ອນນາງໄດ້ຄຸ້ມຄອງປ້ອງກັນສັດຕະບຸຣຸດຫລາຍຄົນ ພ້ອມທັງຂ້າພະເຈົ້າດ້ວຍ. 3.ຂໍຝາກຄວາມຢາມນາງປຣິດສະກາແລະທ້າວອາກວີລາ ຜູ້ຮ່ວມງານຂອງຂ້າພະເຈົ້າໃນພຣະກຣິສໂຕ. 4.ເຂົາເຈົ້າໄດ້ສ່ຽງຊີວິດຂອງຕົນ ເພື່ອຊ່ວຍເອົາຊີວິດຂອງຂ້າພະເຈົ້າໄວ້. ຂ້າພະເຈົ້າຂໍຂອບໃຈເຂົາທັງສອງ. ແລະບໍ່ແມ່ນແຕ່ຂ້າພະເຈົ້າຜູ້ດຽວ ກຸ່ມກຣິສຕະຊົນທຸກບ່ອນຂອງຊາວຕ່າງສາດສະໜາ ກໍຂອບໃຈເຂົາດ້ວຍ. 5.ຂໍຝາກຄວາມຢາມຊາວສັດຕະບຸຣຸດ ທີ່ມາຊຸມນຸມຢູ່ເຮືອນຂອງເຂົາທັງສອງດ້ວຍ. ຂໍຝາກຄວາມຢາມທ່ານເອເຟແມັດທີ່ຮັກຂອງເຮົາ ຜູ້ເປັນຜົນແລກຂອງເຂດແຂວງອາຊີ ທີ່ເຮົານຳມາຖະຫວາຍແດ່ພຣະກຣິສໂຕ. 6.ຂໍຝາກຄວາມຢາມນາງມາຣີອາ ຜູ້ໄດ້ຮັບຄວາມຍາກລຳບາກຫລາຍເພື່ອພວກພີ່ນ້ອງ. 7.ຂໍຝາກຄວາມຢາມອັນໂດນີໂກແລະຢູນີອາ ເພື່ອນຮ່ວມຊາດແລະເພື່ອນຮ່ວມທຸກຂອງຂ້າພະເຈົ້າ ໃນເວລາຖືກຄຸມຂັງ. ທັງສອງແມ່ນສາວົກທີ່ມີຊື່ສຽງເລືອງນາມ ທັງໄດ້ມາເປັນຂອງພຣະກຣິສໂຕກ່ອນຂ້າພະເຈົ້າດ້ວຍ. 8.ຂໍຝາກຄວາມຢາມທ່ານອູບາໂນ ເພື່ອນຮ່ວມງານຂອງຂ້າພະເຈົ້າໃນພຣະກຣິສໂຕ, ຍັງຂໍຝາກຄວາມຮັກມາຍັງທ່ານສະຕາກິດທີ່ຮັກອີກ. 10.ຂໍຝາກຄວາໃຢາມທ່ານອາເປເລ ຜູ້ເປັນທີ່ຊອບພຣະໄທພຣະກຣິສໂຕ. ຂໍຝາກຄວາມຢາມໄທເຮືອນຂອງທ່ານອາຣິດໂຕບຸນ. 11.ຂໍຝາກຄວາມຢາມທ່ານເອໂຣດີອອງ, ເພື່ອນຮ່ວມຊາດຂອງຂ້າພະເຈົ້າ ພ້ອມທັງໄທເຮືອນຂອງທ່ານມາສິດ ທີ່ຢູ່ໃນພຣະອົງເຈົ້າ. 12.ຂໍຝາກຄວາມຢາມນາງຕຣີແປນແລະຕຣີໂຟ ທີ່ໄດ້ສູ້ທົນລຳບາກຫລາຍໃນພຣະອົງເຈົ້າ. ຂໍຝາກຄວາມຢາມນາງແປຊີທີ່ຮັກ ຜູ້ໄດ້ສູ້ທົນລຳບາກໃນພຣະອົງເຈົ້າ. 13.ຂໍຝາກຄວາມຢາມທ້າວຣູໂຟ, ຜູ້ເລືອກສັນຂອງຂ້າພະເຈົ້າ ພ້ອມທັງແມ່ຂອງເພິ່ນ ຊຶ່ງແມ່ນແມ່ຂອງຂ້າພະເຈົ້າດ້ວຍ. 14.ຂໍຝາກຄວາມຢາມທ່ານອາຊິນກຣິດ, ເຟຣກົງ, ແອແໜັດ, ປາໂຕຣບາແອມາດ ແລະພວກນ້ອງນຸ່ງທີ່ຢູ່ນຳເຂົາດ້ວຍ. 15.ຂໍຝາກຄວາມຢາມທ່ານຟີໂລໂລແລະນາງຢູລີອາ, ທ່ານເນເຣແລະນ້ອງສາວ, ພ້ອມທັງທ່ານໂອລິມປີໂອ ແລະພວກກຣິສຕັງທຸກຄົນທີ່ຢູ່ນຳພວກເຂົາ.16.ຈົ່ງຄຳນັບຖາມຂ່າວກັນແລະກັນດ້ວຍຄວາມຮັກອັນບໍລິສຸດ ບັນດາກຸ່ມກຣິສຕະຊົນທຸກບ່ອນຂອງພຣະກຣິສໂຕ ຝາກຄວາມຢາມພວກທ່ານ.

ຄຳເຕືອນສຸດທ້າຍ

17.ບັດນີ້ ພີ່ນ້ອງທັງຫລາຍ, ຂ້າພະເຈົ້າຂໍເຕືອນພວກພີ່ນ້ອງ ໃຫ້ລະວັງພວກທີ່ກໍ່ຄວາມແຕກແຍກ ແລະສ້າງຄວາມສະດຸດ ອັນເປັນການຜິດຕໍ່ຄຳສອນທີ່ພວກພີ່ນ້ອງໄດ້ຮັບ. ຈົ່ງຫລີກເວັ້ນພວກຄົນແບບນີ້. 18.ດ້ວຍວ່າ ຄົນຈຳພວກນີ້ບໍ່ໄດ້ຮັບໃຊ້ພຣະກຣິສໂຕພຣະເຈົ້າຂອງພວກເຮົາດອກ, ແຕ່ຮັບໃຊ້ພະທ້ອງຂອງເຂົາ. ເຂົາເຈົ້າໃຊ້ຄຳເວົ້າອັນອ່ອນຫວານແລະຫລໍ່ແຫລມ ເພື່ອຕົວະຫລອກຜູ້ມີໃຈຊື່ ໃຫ້ຫລົງຜິດ. 19.ຕາມຈິງ ຄວາມນອບນ້ອມເຊື່ອຟັງຂອງພວກພີ່ນ້ອງນັ້ນ ກໍໄດ້ຊ່າລືໄປທົ່ວແຫ່ງຫົນແລ້ວ ແລະຂ້າພະເຈົ້າກໍຊື່ນຊົມຍິນດີນຳພວກພີ່ນ້ອງດ້ວຍ. ຂ້າພະເຈົ້າຂໍໃຫ້ພວກພີ່ນ້ອງເປັນຄົນສະຫລຽວສະຫລາດໃນການທຳດີ, ແລະເປັນຄົນໂງ່ງ່າວໃນການທຳແນວຊົ່ວຮ້າຍ. ບໍ່ເຫິງ ພຣະເຈົ້າແຫ່ງສັນຕິສຸກຈະຢຽບຜີຊາຕານໃຫ້ແຫລກແຫລວ. ຂໍພຣະຄຸນຂອງພຣະເຢຊູກຣິສໂຕພຣະເຈົ້າຂອງເຮົາທັງຫລາຍ ສະຖິດຢູ່ນຳພວກພີ່ນ້ອງເທີ້ນ. 21.ທ່ານຕີໂມເທ, ເພື່ອນຮ່ວມງານຂອງຂ້າພະເຈົ້າ ພ້ອມທັງທ່ານລູຊີອາ, ຢາຊົງແລະໂຊຊີປາຕຣອດ ເພື່ອນຮ່ວມຊາດຂອງຂ້າພະເຈົ້າ ຝາກຄວາມຢາມພວກພີ່ນ້ອງດ້ວຍ. 22.ສ່ວນຂ້າພະເຈົ້າ ນາຍແຕກຊີໂອ ຜູ້ຂຽນຈົດໝາຍນີ້ ຂໍຝາກຄວາມຢາມພີ່ນ້ອງໃນພຣະອົງເຈົ້າດ້ວຍ. 23.ທ່ານກາຍໂຢເຈົ້າຂອງເຮືອນ ຜູ້ຮັບລ້ຽງຂ້າພະເຈົ້າ ແລະຜູ້ບຳລຸງກຸ່ມກຣິສຕະຊົນທັງໝົດໃນພາກນີ້ ຂໍຝາກຄວາມຢາມພວກພີ່ນ້ອງ. 24.ທ່ານເອຣາດສະໂຕ ສະໝຸດບັນຊີຂອງເມືອງ ແລະທ່ານຄວາກໂຕ ນ້ອງຂອງເຮົາ ຝາກຄວາມຢາມພວກພີ່ນ້ອງດ້ວຍ.

ຖະຫວາຍພະກຽດມຸງຄຸນ

25.ຈົ່ງຖະຫວາຍພະກຽດມຸງຄຸນແດ່ພຣະອົງຜູ້ຊົງລິດເດດ ທຳໃຫ້ພວກພີ່ນ້ອງໝັ້ນໜຽວຕາມຂ່າວປະເສີດ ທີ່ຂ້າພະເຈົ້າໄດ້ປະກາດດ້ວຍການເທດສອນ ເລື່ອງພຣະເຢຊູກຣິສໂຕ ຄືໄຂສຳແດງຂໍ້ເລິກລັບ ຊຶ່ງໄດ້ປິດບັງໄວ້ຕັ້ງແຕ່ອະດີດຕະການພຸ້ນ.

26.ບັດນີ້ໄດ້ເປີດອອກມາຢ່າງຈະແຈ້ງ ແລະປະຊາຊາດທັງຫລາຍກໍໄດ້ຮູ້ໄດ້ເຂົ້າໃຈ ດ້ວຍອາໄສຂໍ້ຄວາມທີ່ປະພາສົກໄດ້ຂຽນໄວ້ ຕາມຄຳສັ່ງຂອງພຣະເຈົ້າຜູ້ຊົງຊີວິດ ເພື່ອພາເຂົາທັງຫລາຍມາເຊື່ອຟັງພຣະເຈົ້າ.

27.ສີມຸງຄຸນຈົ່ງມີແດ່ພຣະເຈົ້າຜູ້ສະຫລາດສຸຂຸມແຕ່ຜູ້ດຽວ ດ້ວຍເດຊະພຣະເຢຊູກຣິສໂຕ ຕະຫລອດນິຣັນດອນເທີ້ນ ອາແມນ.