ຈົ່ງທຳໃຫ້ຜູ້ອື່ນດີໃຈ

1.ພວກເຮົາຜູ້ມີຄວາມເຊື່ອເຂັ້ມແຂງ ຕ້ອງອົດທົນຜູ້ມີຄວາມເຊື່ອອອ່ອນ ແລະຢ່າຊອກຫາເຮັດຕາມໃຈມັກຂອງຕົນເອງ. 2.ເຮົາທຸກຄົນຕ້ອງເຮັດໃຫ້ເພື່ອນບ້ານດີໃຈ ເພື່ອນຳປະໂຫຍດແລະຄວາມຈະເລີນມາສູ່ເຂົາ. 3.ຍ້ອນວ່າ ພຣະກຣິສໂຕເຈົ້າບໍ່ໄດ້ຊອກຫາທຳສິ່ງທີ່ຊອບພຣະໄທພຣະອົງ, ດັ່ງທີ່ມີຈາລຶກໄວ້ໃນພຣະຄຳພີວ່າ: “ຄຳກ່າວຫຍາບຊ້າດ່າປ້ອຍພຣະອົງ ກໍໄດ້ຕົກລົງໃສ່ຫົວຂ້າພະເຈົ້າ”. 4.ດ້ວຍວ່າ ທຸກສິ່ງທີ່ໄດ້ຂຽນໄວ້ ກໍແມ່ນຂຽນໄວ້ເພື່ອສັ່ງສອນພວກເຮົາ. ພຣະຄຳພີສອນພວກເຮົາໃຫ້ມີຄວາມພຽນ ແລະບັນເທົາໃຈເຮົາໃຫ້ເກີດຄວາມຫວັງ. 5.ຂໍພຣະເປັນເຈົ້າຜູ້ເປັນບໍ່ເກີດແຫ່ງຄວາມພຽນແລະຄວາມບັນເທົາໃຈ ໂຜດໃຫ້ພວກພີ່ນ້ອງເປັນນ້ຳໜຶ່ງໃຈດຽວກັນ ຕາມແບບຢ່າງຂອງພຣະເຢຊູກຣິສໂຕເຈົ້າ, 6.ເພື່ອພວກພີ່ນ້ອງຈະໄດ້ຮ່ວມສຽງກັນສັນຣະເສີນພຣະເປັນເຈົ້າ ພຣະບິດາຂອງພຣະເຢຊູກຣິສໂຕ ພຣະເຈົ້າຂອງເຮົາທັງຫລາຍ.

- ການຮັບຕ້ອນ

7.ດ້ວຍເຫດນີ້ ພວກພີ່ນ້ອງຈົ່ງຕ້ອນຮັບກັນແລະກັນ ຄືພຣະກຣິສໂຕເຈົ້າຕ້ອນຮັບພວກພີ່ນ້ອງ ເພື່ອກຽດມຸງຄຸນໃຫ້ພຣະເປັນເຈົ້າ. 8. ຂ້າພະເຈົ້າຂໍບອກພວກພີ່ນ້ອງວ່າ ພຣະເຢຊູກຣິສໂຕເຈົ້າໄດ້ຍອມຮັບໃຊ້ພວກຢິວ ເພື່ອສຳແດງຄວາມສັດຈິງຂອງພຣະເຈົ້າ ໃນການຮັກສາຄຳໝັ້ນສັນຍາ ທີ່ໄດ້ທຳໄວ້ກັບບັນພະບຸຣຸດຂອງເຂົາ. 9.ສ່ວນພວກຊົນຊາດອື່ນນັ້ນ ຕ້ອງຍ້ອງຍໍສໍລະເສີນພຣະເມດຕາກະລຸນາຂອງພຣະເຈົ້າ ຕາມທີ່ໄດ້ມີຂຽນໄວ້ວ່າ: “ຍ້ອນເຫດນີ້, ໂອພຣະເຈົ້າ, ຂ້າພະເຈົ້າຈະປະກາດຢັ້ງຢືນເຖິງພຣະອົງຢູ່ກາງນານາຊາດ ແລະຈະຖະຫວາຍກຽດແດ່ພຣະນາມຂອງພຣະອົງດ້ວຍ”. 10.ຍັງມີຄຳກ່າວອີກວ່າ: “ປະຊາຊາດທັງຫລາຍ ຈົ່ງຊື່ນຊົມຍິນດີຮ່ວມກັບປະຊາກອນຂອງພຣະອົງ”.

11.ຍັງອີກຕອນໜຶ່ງກ່າວວ່າ: “ປະຊາຊາດທັງຫລາຍ ຈົ່ງສັນຣະເສີນພຣະເຈົ້າ, ແລະນານາຊາດທັງຫລາຍ ຈົ່ງໂຮຮ້ອງສັນຣະເສີນພຣະອົງ”. 12.ປະພາສົກອີຊາຢາກໍກ່າວດ້ວຍວ່າ: “ງ່າໜຶ່ງຈະແຕກອອກຈາກເຫງົ້າຂອງແຢດເຊ, ງ່າແໜງນີ້ແລ້ວຈະຄຸ້ມຄອງປະຊາຊາດທັງຫລາຍ. ປະຊາຊາດທັງຫລາຍຈະມີຄວາມໄວ້ວາງໃຈໃນພຣະອົງ”.

13.ຂໍພຣະເຈົ້າແຫ່ງຄວາມຫວັງ ບັນດານໃຫ້ພວກພີ່ນ້ອງເຕັມພຽບດ້ວຍຄວາມຍິນດີແລະສັນຕິສຸກໃນຄວາມເຊື່ອ ເພື່ອຈະໄດ້ມີຄວາມໄວ້ວາງໃຈຢ່າງລົ້ນເຫລືອ ດ້ວຍເດຊະຣິດທານຸພາບຂອງພຣະຈິດເຈົ້າ.

ຄຳມ້ວນທ້າຍ

- ພາລະກິດຂອງເປົາໂລ

14.ພີ່ນ້ອງທັງຫລາຍ, ຕາມຄວາມຮູ້ສຶກຂອງຂ້າພະເຈົ້າເອງ ຂ້າພະເຈົ້າແນ່ໃຈວ່າ ພວກພີ່ນ້ອງເຕັມພຽບດ້ວຍຄວາມດີ ແລະມີຄວາມຮູ້ທຸກຢ່າງຢ່າງຄົບຖ້ວນ ສາມາດຕຸກເຕືອນກັນໄດ້. 15.ແຕ່ເພື່ອເຕືອນຄວາມຈົດຈຳຂອງພວກພີ່ນ້ອງ ຂ້າພະເຈົ້າກໍໄດ້ອົງອາດຂຽນບາງຢ່າງມາຫາພວກພີ່ນ້ອງ ກໍຍ້ອນພຣະຄຸນທີ່ພຣະເປັນເຈົ້າໄດ້ປະທານໃຫ້ຂ້າພະເຈົ້າ. 16.ຄືໃຫ້ຂ້າພະເຈົ້າເປັນຜູ້ຮັບໃຊ້ຂອງພຣະເຢຊູກຣິສໂຕ ຢູ່ກັບຄົນຕ່າງສາດສະໜາ ມີໜ້າທີ່ເປັນຜູ້ປ່າວປະກາດຂ່າວປະເສີດຂອງພຣະເຈົ້າ ເພື່ອໃຫ້ຄົນຕ່າງສາດສະໜາທີ່ພຣະຈິດເຈົ້າໄດ້ທຳໃຫ້ສັກສິດບໍລິສຸດແລ້ວ ໄດ້ກາຍເປັນເຄື່ອງບັນນາການທີ່ຊອບພຣະໄທພຣະເຈົ້າ. 17.ດັ່ງນີ້ ຂ້າພະເຈົ້າຈຶ່ງກ້າອວດຕົວໄດ້ໃນພຣະເຢຊູກຣິສໂຕ ກ່ຽວກັບວຽກການຂອງພຣະເຈົ້າ. 18.ຍ້ອນວ່າຂ້າພະເຈົ້າບໍ່ອວດອ້າງເຖິງສິ່ງອື່ນໃດ ນອກຈາກສິ່ງທີ່ພຣະກຣິສໂຕໄດ້ໃຊ້ໃຫ້ຂ້າພະເຈົ້າທຳ. ເພື່ອພາພວກຕ່າງສາດສະໜາເຊື່ອຟັງພຣະເຈົ້າ ດ້ວຍອາໄສການເທດສອນແລະການກະທຳ 19.ດ້ວຍອາໄສເຄື່ອງໝາຍຕ່າງໆແລະການປະຫລາດອັດສະຈັນ ແລະດ້ວຍຣິດທານຸພາບຂອງພຣະຈິດ. ດັ່ງນີ້ ເຮົາໄດ້ປະກາດຂ່າວປະເສີດຂອງພຣະກຣິສໂຕຢ່າງຄົບຖ້ວນ ຕັ້ງແຕ່ນະຄອນເຢຣູຊາແລມ ອ້ອມໄປຈົນເຖິງແຂວງອິນລີຣີອາ. 20.ດັ່ງນີ້ ຂ້າພະເຈົ້າຈຶ່ງຕັ້ງເປົ້າໝາຍໄວ້ດັ່ງນີ້ ຄື ຈະປະກາດຂ່າວປະເສີດ ໃນບ່ອນທີ່ຍັງບໍ່ທັນມີຜູ້ໃດອອກພຣະນາມຂອງພຣະກຣິສໂຕ ເພື່ອຈະບໍ່ໄດ້ກໍ່ຂຶ້ນຢູ່ເທິງຮາກຖານທີ່ຄົນອື່ນໄດ້ວາງໄວ້ແລ້ວ. 21.ດ້ວຍເຫດນີ້ ຂ້າພະເຈົ້າຈຶ່ງປະຕິບັດໃຫ້ຖືກຕ້ອງຕາມທີ່ໄດ້ຂຽນໄວ້ວ່າ: “ພວກທີ່ບໍ່ໄດ້ຍິນກ່າວເຖິງພຣະອົງ, ກໍຈະໄດ້ເຫັນ. ແລະພວກທີ່ບໍ່ທັນໄດ້ຍິນໄດ້ຟັງກ່າວເຖິງພຣະອົງ, ກໍຈະໄດ້ເຂົ້າໃຈ.”

- ເປົາໂລມີໂຄງການຢາກໄປໂຣມາ

22.ນີ້ແຫລະ ຄືສິ່ງກີດຂວາງຂ້າພະເຈົ້າຢູ່ເລື້ອຍໆ ບໍ່ໃຫ້ມາຢາມພວກພີ່ນ້ອງໄດ້. 23.ແຕ່ວ່າດຽວນີ້ ຂ້າພະເຈົ້າບໍ່ມີກິດທຸລະຫຍັງຢູ່ໃນເຂດແຂວງເຫລົ່ານັ້ນອີກ, ແລະຂ້າພະເຈົ້າກໍມີຄວາມປາດຖະໜາອັນແຮງກ້າ ຢາກມາຢາມພວກພີ່ນ້ອງ ແຕ່ຫລາຍປີແລ້ວ, 24.ເມື່ອເວລາຂ້າພະເຈົ້າຈະໄປປະເທດສະເປນ.... ຍ້ອນຫວັງວ່າຈະໄດ້ພົບພີ່ນ້ອງ ໃນເວລາຜ່ານມາທາງນະຄອນໂຣມາ, ແລະເມື່ອໄດ້ມີຄວາມຍິນດີພົບໜ້າພໍ້ຕາພວກພີ່ນ້ອງແລ້ວ ຂ້າພະເຈົ້າກໍຫວັງວ່າພວກພີ່ນ້ອງຄົງຈະຫາທາງ ຈັດສົ່ງຂ້າພະເຈົ້າໄປໃຫ້ເຖິງປະເທດນັ້ນ. 25.ປັດຈຸບັນນີ້ ຂ້າພະເຈົ້າເດີນທາງໄປນະຄອນເຢຣູຊາແລມແລ້ວ ເພື່ອຊ່ວຍສົງເຄາະປະຊາກອນຂອງພຣະເຈົ້າ. 26.ຍ້ອນວ່າພວກສັດຕະບຸຣຸດຢູ່ແຂວງມາເຊດວນແລະອາກາຢາ ກໍຍິນດີບໍລິຈາກຊັບ ໄປຊ່ວຍເຫລືອພວກສັດຕະບຸຣຸດທີ່ກຳລັງຕົກທຸກໄດ້ຍາກຢູ່ນະຄອນເຢຣູຊາແລມ 27.ແມ່ນແລ້ວ ພວກເຂົາພໍໃຈທຳດັ່ງນີ້ ແລະພວກເຂົາເອງກໍຕິດໜີ້ພວກສັດຕະບຸຣຸດເຫລົ່ານັ້ນດ້ວຍ: ຍ້ອນວ່າ ຖ້າເຂົາເຈົ້າຮັບຄົນຕ່າງສາດສະໜາເຂົ້າມາມີສ່ວນໃນສິ່ງຝ່າຍຈິດນີ້ແລ້ວ, ກໍເປັນການສົມຄວນ ທີ່ພວກຄົນຕ່າງສາດສະໜານັ້ນຕ້ອງໄດ້ຮັບການອຸປະຖຳທາງຝ່າຍກາຍດ້ວຍ 28.ດັ່ງນີ້ ເມື່ອຂ້າພະເຈົ້າທຳທຸລະກິດນີ້ແລ້ວ ແລະມອບເງິນທານໃຫ້ເຂົາເຈົ້າເປັນທາງການຮຽບຮ້ອຍແລ້ວ, ຂ້າພະເຈົ້າກໍຈະເດີນທາງໄປປະເທດສະເປນ ໂດຍຈະແວ່ຢາມພວກພີ່ນ້ອງ. 29.ແລະຂ້າພະເຈົ້າຮູ້ແນ່ວ່າ ເມື່ອມາຫາພວກພີ່ນ້ອງນັ້ນ ແມ່ນຂ້າພະເຈົ້າມາພ້ອມທັງພຣະພອນອັນອຸດົມສົມບູນຂອງພຣະກຣິສໂຕເຈົ້າ. 30.ພີ່ນ້ອງທັງຫລາຍ, ຂ້າພະເຈົ້າຂໍເຕືອນພວກພີ່ນ້ອງ ດ້ວຍເຫັນແກ່ພຣະເຢຊູກຣິສໂຕພຣະເຈົ້າຂອງເຮົາທັງຫລາຍ ແລະດ້ວຍຄວາມຮັກຂອງພຣະຈິດ, ຄືໃຫ້ພວກພີ່ນ້ອງຈົ່ງຕໍ່ສູ້ຮ່ວມກັບຂ້າພະເຈົ້າ ທາງຄຳພາວະນາທີ່ພວກພີ່ນ້ອງອຸທິດໃຫ້ຂ້າພະເຈົ້າ. 31.ເພື່ອໃຫ້ຂ້າພະເຈົ້າຫວິດພົ້ນຈາກເງື່ອມມືຂອງພວກຫົວດື້ບໍ່ຍອມເຊື່ອ ຢູ່ແຂວງຢູເດ ແລະເພື່ອໃຫ້ຂອງທານທີ່ຂ້າພະເຈົ້ານຳໄປນະຄອນເຢຣູຊາແລມນັ້ນ ໄດ້ເປັນທີ່ຖືກອົກຖືກໃຈຂອງພວກສັດຕະບຸຣຸດ. 32.ດັ່ງນີ້ ຂ້າພະເຈົ້າຈະໄດ້ມາຫາພວກພີ່ນ້ອງດ້ວຍຄວາມປິຕິຍິນດີ ຕາມນ້ຳພຣະໄທພຣະເຈົ້າ ແລະພັກຜ່ອນຢູ່ກັບພວກພີ່ນ້ອງຢ່າງສຳຣານໃຈ. 33.ຂໍພຣະເຈົ້າແຫ່ງສັນຕິສຸດສະຖິດຢູ່ນຳພວກພີ່ນ້ອງທຸກຄົນເທີ້ນ ອາແມນ.