ນົບນອບຕໍ່ອຳນາດການປົກຄອງ

1.ຂໍໃຫ້ທຸກຄົນນອບນ້ອມຕໍ່ອຳນາດການປົກຄອງ. ຍ້ອນວ່າອຳນາດການໃດໆກໍມາຈາກພຣະເປັນເຈົ້າໝົດ, ແລະຜູ້ມີອຳນາດນັ້ນ ກໍແມ່ນພຣະເປັນເຈົ້າແຕ່ງຕັ້ງຂຶ້ນ. 2.ດັ່ງນີ້ ຜູ້ໃດຂັດສູ້ຕໍ່ອຳນາດນັ້ນ ກໍຂັດສູ້ຕໍ່ລະບຽບທີ່ພຣະເປັນເຈົ້າໄດ້ແຕ່ງໄວ້ ແລະຜູ້ຂັດສູ້ຈະຖືກພິພາກສາລົງໂທດ. 3.ຕາມຈິງແລ້ວ, ເມື່ອເຮົາທຳດີ, ເຮົາກໍບໍ່ຕ້ອງຢ້ານພວກມີອຳນາດປົກຄອງ. ເຮົາຢ້ານເຂົາ ເມື່ອເວລາເຮົາທຳແນວບໍ່ດີເທົ່ານັ້ນ. ເຈົ້າບໍ່ຢາກໃຫ້ຕົວເອງມີຄວາມຢ້ານກົວອຳນາດການປົກຄອງບໍ? ກໍໃຫ້ທຳຄວາມດີ ແລ້ວຈະໄດ້ຮັບການຍ້ອງຍໍສໍລະເສີນ. 4.ຍ້ອນວ່າອຳນາດການປົກຄອງນັ້ນ ແມ່ນຜູ້ຮັບໃຊ້ພຣະເຈົ້າ ເພື່ອຊຸກຍູ້ເຈົ້າທຳຄວາມດີ. ເມື່ອໃດເຈົ້າທຳແນວບໍ່ດີ ເວລານັ້ນແຫລະໃຫ້ຢ້ານ. ຍ້ອນວ່າຜູ້ມີອຳນາດໄດ້ຖືງ້າວຖືດາບໄວ້ຊື່ໆ, ເພິ່ນເປັນຜູ້ຮັບໃຊ້ພຣະເຈົ້າ ເພື່ອສຳແດງພະພິໂລດຂອງພຣະເຈົ້າຕໍ່ຜູ້ທີ່ທຳການຊົ່ວ. 5.ດ້ວຍເຫດນີ້ຈຶ່ງຕ້ອງນອບນ້ອມເຊື່ອຟັງ ບໍ່ແມ່ນຍ້ອນຢ້ານຖືກໂທດເທົ່ານັ້ນ ແຕ່ຍ້ອນສຽງມະໂນທຳຮູ້ຜິດຖືກດ້ວຍ. 6.ຍ້ອນເຫດຜົນດັ່ງດຽວກັນນີ້ແລ້ວ ພີ່ນ້ອງຈຶ່ງຕ້ອງເສຍສ່ວຍ, ຜູ້ເກັບພາສີນັ້ນແມ່ນພວກທີ່ພຣະເຈົ້າແຕ່ງຕັ້ງຂຶ້ນເພື່ອວຽກການນີ້. 7.ຈົ່ງຄືນໃຫ້ແກ່ທຸກຄົນທີ່ເຂົາຄວນໄດ້ຮັບ: ສ່ວຍໃຫ້ຜູ້ເກັບສ່ວຍ, ພາສີໃຫ້ຜູ້ເກັບພາສີ, ສະແດງຄວາມຢ້ານຈຽມຕໍ່ຜູ້ຄວນຢ້ານຈຽມ. ສະແດງຄວາມນັບຖືຕໍ່ຜູ້ຄວນນັບຖື.

- ຄວາມຮັກແມ່ນບົດຫຍໍ້ຂອງພຣະບັນຢັດ

8.ຢ່າຕິດໜີ້ໃຜເລີຍ ນອກຈາກຕິດໜີ້ຄວາມຮັກຕໍ່ກັນແລະກັນເທົ່ານັ້ນ ຍ້ອນວ່າໃຜຮັກຜູ້ອື່ນ ຜູ້ນັ້ນຖືຕາມພຣະບັນຢັດຢ່າງຄົບຖ້ວນ. 9.ພຣະບັນຢັດເຫລົ່ານີ້ຄື ຢ່າລ່ວງປະເວນີ ຢ່າຂ້າຄົນ ຢ່າລັກຂອງເພິ່ນ ຢ່າໃຫ້ການບໍ່ຈິງ ຢ່າຢາກໄດ້ຂອງຜູ້ອື່ນ ແລະພຣະບັນຢັດຂໍ້ອື່ນອີກ ກໍຫຍໍ້ຢູ່ໃນຂໍ້ຄວາມອັນນີ້ເອງ ຄື ຈົ່ງຮັກຜູ້ອື່ນຄືຮັກຕົວເຈົ້າເອງ. 10.ຄວາມຮັກບໍ່ທຳໃຫ້ຜູ້ອື່ນເສຍຫາຍຫຍັງ ດັ່ງນີ້ຈຶ່ງວ່າ ຮັກຜູ້ອື່ນແມ່ນຖືພຣະບັນຢັດຢ່າງຄົບຖ້ວນ.

- ຄົນກຣິສຕັງແມ່ນບຸດຂອງຄວາມສະຫວ່າງ

11.ຍ້ອນພວກພີ່ນ້ອງຮູ້ດີວ່າ ດຽວນີ້ ພວກເຮົາຈຳເລີນຊີວິດຢູ່ໃນກາລະສະໄໝໃດແລ້ວ ແມ່ນເວລາທີ່ພວກເຮົາຕ້ອງຕື່ນນອນ, ຍ້ອນວ່າດຽວນີ້ພວກເຮົາຢູ່ໃກ້ຄວາມຮອດ ຫລາຍກວ່າເວລາພວກເຮົາມີຄວາມເຊື່ອເທື່ອທຳອິດ. 12.ກາງຄືນລ່ວງໄປໄກ, ແລະກາງເວັນໃກ້ເຂົ້າມາ. ດັ່ງນີ້ ພວກເຮົາຈົ່ງປະຖິ້ມກິດຈະການແຫ່ງຄວາມມືດມົວ, ແລ້ວພາກັນສຸບເຄື່ອງເຫລັກແຫ່ງຄວາມສະຫວ່າງ. 13.ຈົ່ງປະພຶດຕົວຢ່າງສຸດຈະລິດ ຄືຢູ່ໃນບ່ອນແຈ້ງ ຄືວ່າ ຢ່າກິນຢ່າດື່ມເກີນຄວນ, ຢ່າປ່ອຍຕົວຕາມຄວາມຊົ່ວລາມົກ, ຢ່າຜິດຂ້ອງຕ້ອງຖຽງແລະອິດສາກັນ. 14.ແຕ່ຈົ່ງນຸ່ງຫົ່ມພຣະກຣິສໂຕເຈົ້າ ແລະຢ່າສົນລະວົນທຳຕາມຄວາມມັກໄດ້ຂອງເນື້ອໜັງເລີຍ.