ການນົບໄຫວ້ບູຊາທາງຈິດ ຊີວິດໃໝ່

1.ພີ່ນ້ອງທັງຫລາຍ, ເດຊະພຣະເມດຕາກະລຸນາຂອງພຣະເຈົ້າ, ຂ້າພະເຈົ້າຂໍເຕືອນພວກພີ່ນ້ອງ ໃຫ້ຖະຫວາຍຕົວເອງເປັນເຄື່ອງບູຊາທີ່ມີຊີວິດ, ສັກສິດ ແລະເປັນທີ່ຊອບພຣະໄທພຣະເຈົ້າ. ນັ້ນຄືການນົບໄຫວ້ພຣະເຈົ້າທາງຈິດໃຈ. 2.ຢ່າເອົາໂລກປັດຈຸບັນມາເປັນແບບຢ່າງ, ແຕ່ຈົ່ງດັດແປງຄວາມປະພຶດຂອງພວກພີ່ນ້ອງ ໂດຍປ່ຽນຈິດໃຈເສຍໃໝ່ ເພື່ອຈະໄດ້ຮູ້ຈັກວ່າ ອັນໃດເປັນນ້ຳພຣະໄທຂອງພຣະເຈົ້າ, ສິ່ງໃດດີ, ສິ່ງໃດເປັນທີ່ຊອບພຣະໄທພຣະອົງ ແລະສິ່ງໃດດີກວ່າໝົດ. 3.ເດຊະພຣະຄຸນທີ່ເຮົາໄດ້ຮັບ, ເຮົາຂໍບອກພີ່ນ້ອງແຕ່ລະຄົນວ່າ: ຢ່າຖືຕົວເກີນຂອບເຂດທີ່ຕົນສົມໄດ້ຮັບ, ແຕ່ຈົ່ງຢູ່ໃນຂອບເຂດຂອງໃຜລາວ ຕາມລຳດັບຄວາມເຊື່ອທີ່ພຣະເຈົ້າໄດ້ຊົງໂຜດປະທານໃຫ້. 4.ຍ້ອນວ່າໃນຮ່າງກາຍອັນດຽວຂອງເຮົາ ມີອະໄວຍະວະຫລາຍອັນ ແລະອະໄວຍະວະເຫລົ່ານັ້ນມີໜ້າທີ່ບໍ່ຄືກັນຢ່າງໃດ. 5.ພວກເຮົາຫລາຍຄົນກໍໂຮມກັນເປັນຮ່າງກາຍດຽວໃນພຣະກຣິສໂຕ ແລະເປັນອະໄວຍະວະຊ່ວຍກັນແລະກັນ ຕາມວຽກຂອງໃຜມັນຢ່າງນັ້ນ. 6.ພວກເຮົາຍັງໄດ້ຮັບພະທານທີ່ແຕກຕ່າງກັນ ຕາມພຣະຄຸນທີ່ພຣະອົງປະທານໃຫ້. ຖ້າແມ່ນພະທານປະທານພຣະທຳ, ກໍຈົ່ງກະທຳໃຫ້ເໝາະສົມກັບຄວາມເຊື່ອ. 7.ຖ້າໄດ້ຮັບພະທານເພື່ອຮັບໃຊ້, ກໍຈົ່ງຮັບໃຊ້. ຖ້າໄດ້ຮັບພະທານເພື່ອສິດສອນ, ກໍຈົ່ງສິດສອນ. 8.ຖ້າແມ່ນພະທານເພື່ອຕຸກເຕືອນ, ກໍໃຫ້ຕຸກເຕືອນ. ຖ້າເປັນການບໍລິຈາກ, ກໍໃຫ້ບໍລິຈາກດ້ວຍໃຈກວ້າງ. ຜູ້ມີໜ້າທີ່ຄຸ້ມຄອງ, ກໍຈົ່ງທຳດ້ວຍເອົາໃຈໃສ່. ຜູ້ຕ້ອງແຜ່ເມດຕາຈິດ, ກໍຈົ່ງທຳດ້ວຍຄວາມຍິນດີ. 9.ຈົ່ງຮັກແພງດ້ວຍໃຈຈິງ. ຈົ່ງຫລີກເວັ້ນຄວາມຊົ່ວຮ້າຍ, ແຕ່ຕິດໃຈນຳຄວາມດີ. 10.ຈົ່ງຮັກແພງກັນຖານພີ່ນ້ອງ. ຈົ່ງຖືວ່າຜູ້ອື່ນດີກວ່າຕົນ. 11.ຈົ່ງຮັບໃຊ້ພຣະອົງເຈົ້າດ້ວຍຄວາມເອົາໃຈໃສ່ທີ່ບໍ່ເຊື່ອຍຊາ ພ້ອມທັງມີຄວາມຮ້ອນແຮງສັດທາ. 12.ຈົ່ງປິຕິຍິນດີໃນຄວາມຫວັງ, ພາກພຽນອົດທົນໃນຍາມລຳບາກ, ດຸໝັ່ນໃນການສວດພາວະນາ. 13.ຈົ່ງຊ່ວຍເຫລືອເກື້ອກູນພວກສັດຕູທີ່ຂັດສົນ, ຈົ່ງຕ້ອນຮັບແຂກຄົນດ້ວຍໃຈເຫລື້ອມໃສ. 14.ຈົ່ງອວຍພອນໃຫ້ພວກທີ່ບັງບຽດ. ຈົ່ງໃຫ້ລາບໃຫ້ພອນແລະຢ່າປ້ອຍດ່າ. 15.ຈົ່ງຊື່ນຊົມຍິນດີກັບຜູ້ທີ່ມີຄວາມຊື່ນຊົມຍິນດີ. ຈົ່ງຮ້ອງໄຫ້ກັບຜູ້ທີ່ຮ້ອງໄຫ້. 16.ຈົ່ງເປັນນ້ຳໜຶ່ງໃຈດຽວກັນ. ຢ່າມັກໃຫຍ່ໃຝ່ສູງ, ແຕ່ມັກຄວາມສຸພາບຖ່ອມຕົວ. ຢ່າຖືວ່າຕົວເປັນຄົນສະຫລຽວສະ ຫລາດ. 17.ຢ່າແກ້ແຄ້ນ. ຈົ່ງໃສ່ໃຈທຳດີຕໍ່ໜ້າທຸກຄົນ. 18.ຢູ່ດີກິນດີນຳທຸກຄົນ ຕາມແຕ່ຈະທຳໄດ້. 19.ພີ່ນ້ອງທີ່ຮັກ, ຢ່າຜູກພະຍາບາດ, ແຕ່ຈົ່ງປ່ອຍໃຫ້ພະພິໂລດຂອງພຣະເປັນເຈົ້າຈັດການເອງ, ຍ້ອນໄດ້ມີຈາລຶກໄວ້ວ່າ: “ພຣະອົງເຈົ້າກ່າວວ່າ: ການແກ້ແຄ້ນແມ່ນທຸລະຂອງເຮົາ, ເຮົາເອງຈະເປັນຜູ້ຕອບແທນ”. 20.ແຕ່ຖ້າສັດຕູຂອງເຈົ້າຢາກເຂົ້າ, ກໍຈົ່ງໃຫ້ເຂົາກິນ; ຖ້າເຂົາຢາກນ້ຳ, ກໍຈົ່ງໃຫ້ເຂົາດື່ມ. ດ້ວຍວ່າ ເມື່ອກະທຳດັ່ງນີ້ແລ້ວ, ກໍເປັນການກອງໄຟແດງໄວ້ຢູ່ເທິງຫົວຂອງພວກເຂົາ”. 21.ຢ່າຍອມເສຍໄຊແກ່ຄວາມຊົ່ວ, ແຕ່ຈົ່ງໃຊ້ຄວາມດີມາຜາບຄວາມຊົ່ວ.