ພຣະເປັນເຈົ້າບໍ່ໄດ້ປະຖິ້ມອິສຣາແອນ

1.ເມື່ອເປັນດັ່ງນີ້ແລ້ວ, ເຮົາຂໍຖາມອີກວ່າ: “ພຣະເປັນເຈົ້າໄດ້ປະຖິ້ມຊົນຊາດອິສ ຣາແອນແລ້ວບໍ? ບໍ່ດອກ. ຍ້ອນວ່າເຮົາເອງກໍເປັນຊາດອິສຣາແອນ ເຊື້ອສາຍຂອງອາບຣາຮຳ ໃນຕະກູນຂອງເບັນຢາມິນ. 2.ພຣະເປັນເຈົ້າບໍ່ໄດ້ປະຖິ້ມປະຊາກອນທີ່ພຣະອົງໄດ້ເລືອກໄວ້ແຕ່ກ່ອນແລ້ວ. ຫລືວ່າພີ່ນ້ອງບໍ່ຮູ້ເລື່ອງໃນພຣະຄຳພີ ຕອນປະພາສົກເອລີກ່າວໂທດຊາວ ອິສຣາແອນ ຕໍ່ພຣະເຈົ້າວ່າ: 3.“ພຣະອົງເຈົ້າເອີຍ! ເຂົາເຈົ້າໄດ້ຂ້າພວກປະພາສົກຂອງພຣະອົງ, ມ້າງທຳລາຍພຣະແທ່ນບູຊາ, ຂ້າພະເຈົ້າຜູ້ດຽວຍັງເຫລືອຢູ່ ແລະພວກເຂົາກໍຢາກຂ້າຂ້າພະເຈົ້າດ້ວຍ”. 4.ແຕ່ພຣະເປັນເຈົ້າກ່າວຕອບເອລີວ່າ: “ເຮົາໄດ້ຫວງໄວ້ເຈັດພັນຄົນ ຄືພວກທີ່ບໍ່ຍອມຄູ້ເຂົ່າລົງໄຫວ້ພະ“ບາອານ”. 5.ໃນສະໄໝນີ້ກໍຄືກັນ ຍັງມີຄົນເຫລືອຢູ່ ຄືພວກທີ່ພຣະອົງໄດ້ເລືອກສັນໄວ້ດ້ວຍພຣະຄຸນຂອງພຣະອົງ. 6.ດັ່ງນີ້ ຖ້າຫາກວ່າດ້ວຍເຫັນແກ່ພຣະຄຸນແລ້ວ, ກໍບໍ່ແມ່ນດ້ວຍບຸນກຸສົນ ບໍ່ດັ່ງນັ້ນ ພຣະຄຸນກໍຈະບໍ່ແມ່ນພຣະຄຸນອີກເລີຍ. 7.ຈະມ້ວນທ້າຍຢ່າງໃດ? ອິສຣາແອນບໍ່ໄດ້ພົບພໍ້ສິ່ງທີ່ເຂົາຊອກສະແຫວງຫາ. ແຕ່ແມ່ນຜູ້ພຣະເຈົ້າເລືອກສັນໄວ້ ເປັນຜູ້ພົບເຫັນ. ນອກຈາກນັ້ນ ມີແຕ່ພວກມີໃຈແຂງກະດ້າງໄປໝົດ, 8.ດັ່ງມີຈາລຶກໄວ້ໃນພຣະຄຳພີວ່າ: “ພຣະເຈົ້າຊົງບັນດານໃຫ້ພວກເຂົາມີຈິດໃຈອ່ອນເພຍ: ມີຕາແຕ່ບໍ່ເຫັນ, ມີຫູແຕ່ບໍ່ໄດ້ຍິນ ຈົນຮອດທຸກວັນນີ້”. 9.ກະສັດດາວິດກໍໄດ້ກ່າວວ່າ: “ຂໍໂຜດໃຫ້ໂຕະກິນເຂົ້າຂອງເຂົາກາຍເປັນບ້ວງແຮ້ວ, ເປັນນ່າງ ເປັນເຫດໃຫ້ເຂົາພາດລົ້ມ ແລະເປັນເຄື່ອງຈ່ອງເວນໃຫ້ເຂົາຢ່າງສະສົມ. 10.ຂໍໂຜດໃຫ້ຕາເຂົາມືດບອດຈົນແນມບໍ່ເຫັນຫຍັງ ແລະໃຫ້ຫລັງຂອງເຂົາກ່ອມລົງຢູ່ສະເໝີໄປ”. 11. ຂ້າພະເຈົ້າຂໍຖາມວ່າ: “ເມື່ອຊາວອິສຣາແອນໄດ້ຕຳສະດຸດ ລົ້ມກໍລົ້ມເລີຍບໍ? ບໍ່ແມ່ນດອກ ແຕ່ຍ້ອນການພະລາດລົ້ມຂອງພວກເຂົາ ຄົນຕ່າງຊາດຈຶ່ງໄດ້ຮັບຄວາມຮອດ ເພື່ອດົນໃຈໃຫ້ອິສຣາແອນເກີດຄວາມອິດສາ. 12.ດັ່ງນີ້ ຖ້າຫາກວ່າຄວາມພາດຜິດຂອງອິສຣາແອນທຳໃຫ້ໂລກອຸດົມສົມບູນ ແລະຄວາມຂາດຕົກບົກຜ່ອງຂອງພວກເຂົາໄດ້ທຳໃຫ້ຄົນຕ່າງຊາດຮັ່ງມີສີສຸກແລ້ວ, ຫາກໄດ້ພວກເຂົາມາຕື່ມເຂົ້ານຳອີກທັງໝົດ ກໍຈະດີກວ່າສັກເທົ່າໃດໜໍ?”

13.ດັ່ງນີ້ ຂ້າພະເຈົ້າຂໍເວົ້າກັບພວກທ່ານ ຊຶ່ງບໍ່ແມ່ນຊາວຢິວວ່າ ໃນຖານະທີ່ຂ້າພະເຈົ້າເປັນອັກຄະສາວົກຂອງນານາຊາດນັ້ນ, ຂ້າພະເຈົ້າຂໍປະຕິບັດພາລະໜ້າທີ່ນີ້ ຢ່າງສົມກຽດຈົນສຸດຄວາມສາມາດ. 14.ເພື່ອຢາກຍົວະໃຫ້ເພື່ອນຮ່ວມຊາດຂອງຂ້າພະເຈົ້າເກີດຄວາມອິດສາຂຶ້ນ ແລ້ວຂ້າພະເຈົ້າຈະໄດ້ຊ່ວຍໃຫ້ລາງຄົນໃນພວກນັ້ນ ເອົາຕົວຮອດໄດ້. 15.ຍ້ອນວ່າ ຖ້າຫາກການທີ່ພຣະເຈົ້າປະຖິ້ມພວກເຂົານັ້ນ, ເປັນເຫດໃຫ້ໂລກຄືນດີກັບພຣະເຈົ້າແລ້ວ, ໃນເມື່ອພຣະອົງຈະຮັບເອົາເຂົາມາອີກນັ້ນ ມັນຈະເປັນຢ່າງໃດ? ມັນກໍຈະເປັນ ຄືໃຫ້ຄົນຕາຍແລ້ວກັບເປັນຄືນມານັ້ນເອງ. 16.ຖ້າຫາກວ່າໝາກຜົນອັນຕົ້ນບໍລິສຸດ, ແປ້ງທັງໝົດກໍເປັນຄືກັນ. ຖ້າຫາກວ່າຮາກບໍລິສຸດ, ກິ່ງກ້ານກໍເປັນຄືກັນ. 17.ແຕ່ຖ້າຫາກມີບາງກິ່ງຖືກຕັດອອກ, ແລ້ວເອົາເຈົ້າຜູ້ເປັນກິ່ງໝາກກອກເທດປ່າ ມາຕໍ່ໃສ່ແທນກິ່ງເຫລົ່ານັ້ນ ເພື່ອຈະໄດ້ຮັບເອົານ້ຳລ້ຽງອັນບໍລິສຸດຈາກຕົ້ນໝາກກອກ ຮ່ວມກັບກິ່ງເຫລົ່ານັ້ນແລ້ວ. 18.ເຈົ້າກໍຢ່າອວດດີອວດເດັ່ນກັບກິ່ງເຫລົ່ານັ້ນ. ຫລືຖ້າເຈົ້າຢາກອວດດີ, ກໍບໍ່ແມ່ນເຈົ້າດອກເປັນຜູ້ລ້ຽງຮາກ, ແຕ່ແມ່ນຮາກລ້ຽງເຈົ້າ. 19.ເຈົ້າຄົງຈະເວົ້າວ່າ: “ເພິ່ນຕັດກິ່ງກ້ານເຫລົ່ານັ້ນອອກ ກໍເພື່ອຕໍ່ຂ້ອຍເຂົ້າແທນ. 20.ແມ່ນຄືວ່າແທ້. ມັນຖືກຕັດຖິ້ມຍ້ອນໃຈດື້ດ້ານຂອງມັນ, ສ່ວນເຈົ້າ ເຈົ້າຢູ່ໄດ້ກໍຍ້ອນຄວາມເຊື່ອເທົ່ານັນ. ດັ່ງນີ້ ຢ່າສູ່ຈອງຫອງ ແຕ່ໃຫ້ມີຄວາມຢ້ານຈຽມ. 21.ຍ້ອນວ່າ ຖ້າພຣະເຈົ້າບໍ່ໂຜດກິ່ງກ້ານເດີມແລ້ວ ກໍໃຫ້ເຈົ້າລະວັງ, ພຣະອົງກໍຈະບໍ່ໂຜດເຈົ້າຄືກັນ. 22.ຈົ່ງພິຈາລະນາເບິ່ງນ້ຳພຣະໄທດີ ແລະຄວາມເຄັ່ງຄັດຂອງພຣະເຈົ້າ: ພຣະອົງເຄັ່ງຄັດກັບພວກທີ່ພາດລົ້ມ, ແຕ່ພຣະອົງຊົງເມດຕາສົງສານເຈົ້າ ຄະແນມວ່າເຈົ້າຕັ້ງໝັ້ນຢູ່ໃນຄວາມເມດຕາຂອງພຣະອົງ. ບໍ່ດັ່ງນັ້ນ ເຈົ້າກໍຈະຖືກຕັດຖິ້ມດ້ວຍ. 23.ສ່ວນພວກເຂົາ, ເຂົາຈະບໍ່ໄດ້ດື້ດ້ານໃນຄວາມບໍ່ເຊື່ອ, ເພິ່ນຈະຕໍ່ກິ່ງໃຫ້ດ້ວຍ. ຍ້ອນພຣະເປັນເຈົ້າສາມາດໃຫ້ເຂົາຕໍ່ກິ່ງເຂົ້າໃໝ່ອີກກໍໄດ້. 24.ຕາມຈິງແລ້ວ, ຖ້າພຣະເຈົ້າຕັດເຈົ້າອອກຈາກຕົ້ນກອກປ່າ ອັນເປັນທຳມະຊາດຂອງເຈົ້າ, ແລ້ວເອົາມາຕໍ່ເຂົ້າກັບຕົ້ນກອກພັນດີ ອັນຜິດກັບທຳມະຊາດຂອງເຈົ້າ, ການທີ່ຈະເອົາກິ່ງເດີມມາຕິດຕໍ່ໃສ່ກັບຕົ້ນມັນເອງແລ້ວ, ຈະບໍ່ເປັນການງ່າຍແລະຖືກຕ້ອງກວ່າສັກເທົ່າໃດ!

- ອິສຣາແອນກັບໃຈ 

25.ພີ່ນ້ອງທັງຫລາຍ, ເຮົາຢາກບອກຂໍ້ເລິກລັບນີ້ໃຫ້ພວກພີ່ນ້ອງຊາບ ຢ້ານວ່າພວກພີ່ນ້ອງຈະພໍໃຈໃນຄວາມສະຫລາດຂອງຕົນ ຄືມີຊາວອິສຣາແອນສ່ວນໜຶ່ງເປັນຄົນໃຈແຂງດື້ ຈົນເຮັດໃຫ້ຄົນຕ່າງຊາດພາກັນເຂົ້າມາແທນຈົນຄົບຈຳນວນ. 26.ດັ່ງນີ້ອິສຣາແອນທັງໝົດຈະໄດ້ຮອດ ດັ່ງທີ່ມີຈາລຶກໄວ້ໃນພຣະຄຳພີວ່າ: “ອົງພຣະຜູ້ໄຖ່ຈະມາຈາກຊີອອນ, ພຣະອົງຈະຊົງລຶບລ້າງສິ່ງອະທຳໃຫ້ໝົດສ້ຽງໄປຈາກຢາກັອບ. 27.ນີ້ແຫລະຈະແມ່ນສຳພັນໄມຕີຂອງເຮົາກັບພວກເຂົາ ເມື່ອເຮົາຈະໂຜດຄວາມຜິດການບາບທັງໝົດໃຫ້ເຂົາເຈົ້າ.” 28.ຖ້າຈະວ່າຕາມພຣະວໍຣະສານແລ້ວ ເຂົາເຫລົ່ານັ້ນກໍເປັນສັດຕູຂອງພຣະເຈົ້າ ແຕ່ຖ້າເວົ້າເຖິງເລື່ອງການຄັດເລືອກແລ້ວ, ເຂົາເຈົ້າກໍເປັນຜູ້ທີ່ພຣະເຈົ້າຮັກແພງ ຍ້ອນເຫັນແກ່ບັນພະບຸຣຸດຂອງພວກເຂົາ. 29.ຍ້ອນວ່າພຣະເຈົ້າບໍ່ໄດ້ປ່ຽນແປງພຣະໄທ ໃນການປະທານພຣະຄຸນແລະກະແສຮຽກຂອງພຣະອົງເລີຍ. 30.ແຕ່ກ່ອນພວກພີ່ນ້ອງບໍ່ໄດ້ເຊື່ອຟັງພຣະເຈົ້າ, ແຕ່ໃນປັດຈຸບັນນີ້ ພວກພີ່ນ້ອງໄດ້ຮັບພຣະເມດຕາກະລຸນາ ຍ້ອນຄວາມດື້ດ້ານບໍ່ຍອມເຊື່ອຟັງຂອງພວກເຂົາຢ່າງໃດ. 31.ເວລານີ້ພວກເຂົາບໍ່ໄດ້ເຊື່ອຟັງ ຍ້ອນພຣະເມດຕາກະລຸນາທີ່ພວກພີ່ນ້ອງໄດ້ຮັບ, ເພື່ອວ່າໃນທີ່ສຸດ ພວກເຂົາກໍຈະໄດ້ຮັບພຣະເມດຕາກະລຸນາຢ່າງດຽວກັນແນວນັ້ນ, 32.ຍ້ອນວ່າພຣະເຈົ້າໄດ້ຊົງກັກຂັງມະນຸດທັງສິ້ນໃຫ້ຈົມໃນຄວາມດື້ດ້ານບໍ່ເຊື່ອຟັງ. ເພື່ອພຣະອົງຈະໄດ້ສຳແດງພຣະເມດຕາກະລຸນາຕໍ່ມະນຸດທຸກຄົນ. 33.ເກີນວ່າພຣະເຈົ້າມີຄວາມສະຫລາດສຸຂຸມ ແລະຄວາມຮູ້ຮອບຄອບເລິກເຊິ່ງ ບໍ່ມີຂອບເຂດສັກພຽງໃດ, ໂຄງການຂອງພຣະອົງເກີນວ່າເຂົ້າໃຈໄດ້ຍາກ ແລະເສັ້ນທາງຂອງພຣະອົງກໍເກີນວ່າເລິກລັບແທ້! 34.ໃຜແດ່ຮູ້ຈັກຄວາມຄຶດຂອງ ພຣະອົງໄດ້? ໃຜເຄີຍເປັນທີ່ປຶກສາໃຫ້ພຣະອົງບໍ? 35.ໃຜໄດ້ໃຫ້ຫຍັງແກ່ພຣະອົງ ພໍຈະໃຫ້ພະ ອົງຕອບແທນຄືນບໍ? 36.ຍ້ອນວ່າທຸກສິ່ງເກີດມາຈາກພຣະອົງ, ດ້ວຍເດຊະພຣະອົງ ແລະຢູ່ໃນພຣະອົງ. ຂໍພຣະອົງຈົ່ງໄດ້ຮັບສີມຸງຄຸນຕະຫລອດນີລັນດອນເທີນ ອາແມນ.