ຊາວຢິວແລະຄົນຕ່າງຊາດມີພຣະເຈົ້າອົງດຽວ

1.ພີ່ນ້ອງທັງຫລາຍ, ຄວາມປາດຖະໜາອັນແຮງກ້າຂອງເຮົາ ແລະຄຳວິງວອນຕໍ່ພຣະເຈົ້າເພື່ອຊາວອິສຣາແອນນັ້ນ ແມ່ນຂໍໃຫ້ພວກເຂົາໄດ້ຮອດ. 2.ຍ້ອນເຮົາໄດ້ເຫັນເປັນພິຍານແລ້ວວ່າ ພວກເຂົາມີຄວາມຮ້ອນຮົນສັດທາຕໍ່ພຣະເຈົ້າແທ້, ແຕ່ຄວາມຮ້ອນຮົນສັດທານັ້ນ ບໍ່ເປັນໄປຕາມຄວາມຮູ້ຄວາມເຂົ້າໃຈ. 3.ຍ້ອນບໍ່ຮູ້ຈັກວ່າ ຄວາມຊອບທຳນັ້ນມາຈາກພຣະເຈົ້າ, ແຕ່ແຕ່ງປັ້ນຂຶ້ນເອງ ຈຶ່ງບໍ່ຍອມຮັບເອົາຄວາມຊອບທຳທີ່ມາຈາກພຣະເຈົ້າ. 4.ຍ້ອນວ່າທ້າຍສຸດຂອງພຣະບັນຢັດແມ່ນພຣະກຣິສໂຕ ເພື່ອປະທານຄວາມຊອບທຳໃຫ້ທຸກຄົນທີ່ເຊື່ອ. 5.ທ່ານໂມແຊເອງໄດ້ຂຽນເລື່ອງຄວາມຊອບທຳ ທີ່ມາຈາກພຣະບັນຢັດວ່າ: “ຜູ້ໃດປະຕິບັດຕາມພຣະບັນຢັດຢ່າງຄົບຖ້ວນ ກໍຈະມີຊີວິດດ້ວຍອາໄສພຣະບັນຢັດ”. 6.ແຕ່ຄວາມຊອບທຳທີ່ມາຈາກຄວາມເຊື່ອ ກໍກ່າວວ່າ: “ຢ່າຄຶດໃນໃຈໂຕເອງວ່າ ໃຜຈະຂຶ້ນສະຫວັນນໍ? ຄືຢາກເອົາພຣະກຣິສໂຕລົງມາ. 7.ຫລືວ່າ ໃຜຈະລົງໄປໃນພື້ນເຫວເລິກນໍ? ຄືຢາກພາພຣະກຣິສໂຕຂຶ້ນມາຈາກພວກຜູ້ຕາຍ. 8.ແຕ່ພຣະຄຳພີໄດ້ກ່າວຢ່າງໃດ? (ພຣະຄຳພີໄດ້ກ່າວວ່າ) ຖ້ອຍຄຳນັ້ນຢູ່ໃກ້ທ່ານ, ຢູ່ໃນປາກແລະຢູ່ໃນໃຈຂອງທ່ານ, ນັ້ນຄືຖ້ອຍຄຳທີ່ທຳໃຫ້ເກີດຄວາມເຊື່ອ ຊຶ່ງພວກເຮົາປະກາດ. 9.ເພາະວ່າ ຖ້າທ່ານຮັບປາກວ່າ ພຣະເຢຊູເປັນພຣະອົງເຈົ້າ ແລະເຊື່ອໃນໃຈວ່າ ພຣະເຈົ້າໄດ້ໃຫ້ພຣະອົງກັບຄືນຊີບຈາກພວກຜູ້ຕາຍ ທ່ານກໍຈະໄດ້ຮອດ. 10.ຍ້ອນວ່າ ຄວາມເຊື່ອໃນໃຈ ພາໄປເຖິງຄວາມຊອບທຳ ແລະການປະກາດດ້ວຍປາກ ພາໄປເຖິງຄວາມຮອດ. 11.ພຣະຄຳພີກ່າວວ່າ: “ຜູ້ໃດເຊື່ອໃນພຣະອົງເຈົ້າ ຈະບໍ່ຖືກອັບອາຍຂາຍໜ້າ”. 12.ດັ່ງນີ້ຈຶ່ງບໍ່ມີຫຍັງແຕກຕ່າງກັນ ລະຫວ່າງພວກຢິວແລະພວກຕ່າງຊາດ ຍ້ອນວ່າທຸກຄົນມີພຣະເຈົ້າອົງດຽວ ຜູ້ຊົງປະທານພຣະຄຸນຢ່າງອຸດົມສົມບູນແກ່ທຸກຄົນທີ່ວອນຂໍພຣະອົງ. 13.ຍ້ອນວ່າຜູ້ໃດຮ້ອງຫາພຣະນາມພຣະອົງເຈົ້າ ກໍຈະໄດ້ຮອດຊີວິດ.

- ເຂົາເຈົ້າບໍ່ມີທາງແກ້ຕົວ

14.ແຕ່ເມື່ອບໍ່ທັນເຊື່ອໃນພຣະອົງ ຈະຮ້ອງຫາພຣະອົງໄດ້ຢ່າງໃດ? ແລະເມື່ອບໍ່ທັນໄດ້ຍິນຄຳເວົ້າເຖິງເລື່ອງພຣະອົງ ຈະເຊື່ອໃນພຣະອົງໄດ້ຢ່າງໃດ? ແລະເມື່ອບໍ່ມີຜູ້ມາປ່າວປະກາດ ຈະໄດ້ຍິນເຖິງເລື່ອງພຣະອົງໄດ້ຢ່າງໃດ? 15.ແລະຈະປ່າວປະກາດໄດ້ຢ່າງໃດ ຖ້າຫາກບໍ່ຖືກສົ່ງໄປ? ດັ່ງມີຂຽນໄວ້ໃນພຣະຄຳພີວ່າ: “ບາດຍ່າງຂອງພວກໄປປະກາດຂ່າວປະເສີດ ເກີນວ່າສວຍງາມແທ້.” 16.ແຕ່ທ່ານທຸກຄົນບໍ່ໄດ້ຟັງຂ່າວປະເສີດ ຍ້ອນປະກາສົກອີຊາຢາໄດ້ກ່າວໄວ້ວ່າ: “ພຣະອົງເຈົ້າເອີຍ! ມີໃຜແດ່ບໍໄດ້ເຊື່ອຄຳສອນຂອງພວກຂ້າພະເຈົ້າ?” 17.ດັ່ງນີ້ ຄວາມເຊື່ອເກີດມາຈາກການເທດສອນ ແລະການເທດສອນແມ່ນການປ່າວປະກາດວາຈາຂອງພຣະກຣິສໂຕ. 18.ແຕ່ຂ້າພະເຈົ້າຂໍຖາມວ່າ: “ເຂົາເຈົ້າບໍ່ໄດ້ຍິນບໍ? ໄດ້ຍິນແທ້ ຍ້ອນສຽງຂອງພວກເພິ່ນດັງກ້ອງທົ່ວແຜ່ນດິນ ແລະຄຳເວົ້າຂອງພວກເພິ່ນກໍແຜ່ໄປຈົນສຸດມຸມໂລກ.” 19. ຂ້າພະເຈົ້າຢາກຂໍຖາມອີກວ່າ: ຊາວອິສຣາແອນເອງບໍ່ໄດ້ຍິນບໍ່ໄດ້ເຂົ້າໃຈບໍ? ທ່ານໂມແຊໄດ້ກ່າວໄວ້ແລ້ວວ່າ: “ເຮົາຈະຍົວະໃຫ້ພວກເຈົ້າອິດສາຊົນຊາດທີ່ບໍ່ທັນໂຮມເປັນປະເທດ ຈະຍົວະໃຫ້ພວກເຈົ້າເຄືອງແຄ້ນປະເທດທີ່ເປັນຊາດໂງ່ງ່າວເບົາປັນຍາ”. 20.ແລະປະພາສົກອີຊາຢາຍັງຫານເວົ້າຕື່ມວ່າ: “ເຮົາໄດ້ໃຫ້ພວກທີ່ບໍ່ຊອກສະແຫວງຫາເຮົາ ໄດ້ພົບພໍ້ເຮົາ, ເຮົາໄດ້ສຳແດງຕົວໃຫ້ພວກທີ່ບໍ່ຖາມຫາເຮົາ ເຫັນເຮົາ. 21.ແຕ່ກ່ຽວກັບອິສຣາແອນນັ້ນ, ເພິ່ນກ່າວວ່າ: “ເຮົາໄດ້ເດ່ມືອອກ ເພື່ອຄອຍຕ້ອນຮັບຊົນຊາດໜຶ່ງທີ່ບໍ່ເຊື່ອຟັງແລະດື້ດ້ານ.