ແຕ່ງຕັ້ງຊາຍເຈັດຄົນຂຶ້ນຕື່ມ

1.ໃນເວລານັ້ນ, ຈຳນວນພວກສັດຕະບຸຣຸດເພີ່ມທະວີຂຶ້ນ, ພວກຢິວທີ່ປາກພາສາເກັຣກຈົ່ມບໍ່ພໍໃຈນຳພວກຢິວທີ່ປາກພາສາເຮເບີຣ, ຍ້ອນນາງໝ້າຍຂອງພວກເຂົາບໍ່ໄດ້ຮັບແຈກທານປະຈຳວັນ. 2.ອັກຄະທຳມະທູດທັງສິບສອງຈຶ່ງຮຽກພວກສັດຕະບຸຣຸດເຂົ້າມາປະຊຸມ ແລະກ່າວກັບພວກເຂົາວ່າ: “ຈະໃຫ້ພວກເຮົາປະລະການປະກາດພຣະວາຈາຂອງພຣະເຈົ້າ ມາແຈກຢາຍສິ່ງຂອງນັ້ນ, ມັນເປັນການບໍ່ສົມຄວນ. 3.ດັ່ງນີ້ ໃຫ້ພວກພີ່ນ້ອງເລືອກເອົາຊາຍເຈັດຄົນທ່າມກາງພວກພີ່ນ້ອງ, ທີ່ມີຊື່ສຽງດີ, ເຕັມພຽບດ້ວຍພຣະຈິດເຈົ້າ ແລະມີຄວາມສະຫລຽວສະຫລາດ, ແລ້ວພວກເຮົາຈະມອບໜ້າທີ່ນັ້ນໃຫ້ພວກເຂົາ. 4.ສ່ວນພວກເຮົາ, ພວກເຮົາຈະກຳກັບແຕ່ການສວດພາວະນາ ແລະການປະກາດພຣະວາຈາ.” 5.ກອງປະຊຸມທັງໝົດເຫັນພ້ອມໃນຂໍ້ສະເໜີ ແລ້ວພາກັນເລືອກເອົາສະເຕຟາໂນ, ຜູ້ເຕັມພຽບດ້ວຍຄວາມເຊື່ອແລະພຣະຈິດເຈົ້າ, ຟີລິບ ໂປຣກໍ, ນີການໍ, ຕີມອນ, ປາກເມນັດ ແລະນີໂກເລົາ, ຜູ້ເຂົ້າຮີດໃໝ່ ມາຈາກເມືອງອັນຕີໂອກີອາ. 6.ເຂົາໄດ້ນຳເອົາຄົນທັງເຈັດມາສະເໜີຕໍ່ພວກອັກຄະທຳມະທູດ. ພວກເພິ່ນໄດ້ພາວະນາວິງວອນ ແລ້ວປົກມືເໜືອພວກເຂົາ. 7.ພຣະທຳຄຳສອນຂອງພຣະອົງເຈົ້າກໍແຜ່ຜາຍໄປ: ຈຳນວນພວກສັດຕະບຸຣຸດກໍເພີ່ມທະວີມາກມາຍຢູ່ນະຄອນເຢຣູຊາແລມ, ແລະມີພວກພຣະສົງຢິວຈຳນວນມາກໄດ້ເຂົ້າມາຖືຄວາມເຊື່ອດ້ວຍ.

ສະເຕຟາໂນຖືກຈັບ

8.ສະເຕຟາໂນເຕັມດ້ວຍພຣະຄຸນແລະລິດເດດ, ໄດ້ກະທຳອັດສະຈັນແລະໝາຍສຳຄັນອັນຍິ່ງໃຫຍ່ທ່າມກາງປະຊາຊົນ. 9.ຈຶ່ງມີບາງຄົນມາຈາກໂຮງທຳ, ຮຽກວ່າ“ພວກອິດສະລະ” ຄື ຊາວຊີເຣເນ, ອາແລັກຊັນດຣີ, ແລະພວກອື່ນອີກ ຈາກຊີລີຊີ ແລະອາຊີ. ພວກເຂົາໄດ້ລຸກຂຶ້ນໂຕ້ວາທີກັບສະເຕຟາໂນ, 10.ແຕ່ພວກເຂົາບໍ່ສາມາດຕໍ່ສູ້ກັບຄວາມສະຫລາດ ແລະພຣະຈິດທີ່ປະທານໃຫ້ສະເຕຟາໂນປາກເວົ້າໄດ້. 11.ພວກເຂົາຈຶ່ງຍຸຍົງເອົາຊາຍບາງຄົນມາກ່າວຫາວ່າ: “ພວກເຮົາໄດ້ຍິນເຂົາກ່າວປະຈານຕໍ່ຕ້ານໂມແຊແລະຕໍ່ຕ້ານພຣະເຈົ້າ.” 12.ດັ່ງນີ້ ພວກເຂົາຍຸຍົງປະຊາຊົນ, ພວກເຖົ້າຂຸນ ແລະພວກນັກປາດພຣະຄຳພີ, ແລ້ວພວກເຂົາກໍຫຸ້ມຈັບເອົາສະເຕຟາໂນ ນຳໄປຕໍ່ໜ້າສານສູງ. 13.ຢູ່ທີ່ນັ້ນ, ພວກເຂົາກໍສະເໜີພະຍານເທັດອອກມາປະກາດວ່າ: “ຄົນຜູ້ນີ້ມີແຕ່ກ່າວໂຄສະນາຕໍ່ຕ້ານສະຖານທີ່ສັກສິດແລະພຣະທຳບັນຢັດຢູ່ບໍ່ເຊົາ. 14.ພວກເຮົາໄດ້ຍິນເຂົາກ່າວວ່າ: ເຢຊູໄທນາຊາແຣັດນັ້ນ ຈະທຳລາຍສະຖານທີ່ນີ້ ແລະຈະປ່ຽນແປງຂະໜົບປະເພນີ, ຊຶ່ງໂມແຊໄດ້ໃຫ້ໄວ້ແກ່ພວກເຮົາ.” 15.ສ່ວນບັນດາຄົນທີ່ນັ່ງຢູ່ໃນສານນັ້ນກໍຈ້ອງຕາເບິ່ງສະເຕຟາໂນ ແລະເຫັນວ່າໜ້າຕາຂອງເພິ່ນປາກົດເໝືອນໜ້າເທວະດາ.