ການແຕ່ງຕັ້ງພຣະກຣິສຕະຈັກທີ່ເມືອງໂກຣິນໂທ

1.ຫລັງຈາກນັ້ນ ເປົາໂລໄດ້ໂຍກຍ້າຍຈາກເມືອງອາແທນໄປສູ່ເມືອງໂກຣິນໂທ. 2.ທ່ານໄດ້ພົບຄົນຢິວຜູ້ໜຶ່ງຊື່ອາກີລາ, ຊາວເມືອງປົນໂຕ, ທີ່ຫາກໍມາຈາກປະເທດອີຕາລີ ພ້ອມກັບປຣິດຊິນລາ ພັນລະຍາຂອງລາວ, ເນື່ອງຈາກກະສັດເກົຼາດີໂອໄດ້ອອກດຳຣັດ ສັ່ງໃຫ້ຊາວຢິວທຸກຄົນອອກໄປຈາກກຸງໂຣມ. ເປົາໂລໄດ້ໄປສຳພັນກັບເຂົາ, 3.ແລະຍ້ອນເຂົາກໍມີອາຊີບອັນດຽວກັນ, ເປົາຈຶ່ງໄດ້ໄປພັກອາໄສຢູ່ນຳ ແລະເຮັດວຽກການຢູ່ທີ່ນັ້ນ ເພາະໃຜໆກໍເປັນຊ່າງເຮັດຜ້າເຕັນ. 4.ຄັນເຖິງວັນພຣະໃດ, ເປົາໂລກໍໄປສົນທະນາຢູ່ໂຮງທຳ, ຫາວິທີຊັກຊວນພວກຢິວແລະພວກເກັຣກໃຫ້ເຊື່ອ. 5.ເມື່ອສີລາແລະຕີໂມເທມາຈາກແຂວງມາເຊໂດນີອາແລ້ວ, ເປົາໂລໄດ້ສະລະເວລາທັງໝົດເພື່ອປະກາດພຣະວາຈາ, ໂດຍຢືນຢັນຕໍ່ພວກຢິວວ່າ ພຣະເຢຊູແມ່ນພຣະກຣິສໂຕ. 6.ແຕ່ເມື່ອພວກເຂົາຂັດສູ້ແລະກ່າວຄຳຫຍາບຄາຍ, ເປົາໂລກໍສັ່ນເສື້ອຜ້າຂອງຕົນ ແລະກ່າວຕໍ່ພວກເຂົາວ່າ: “ໃຫ້ບາບຂອງພວກທ່ານຕົກໃສ່ຫົວພວກທ່ານເອງ! ສ່ວນເຮົາ, ເຮົາບໍ່ມີໂທດ, ແຕ່ນີ້ໄປ ເຮົາຈະໄປຫາພວກຕ່າງສາດສະໜາ.”

7.ເປົາໂລຈຶ່ງອອກຈາກທີ່ນັ້ນໄປເຮືອນຊາຍຜູ້ໜຶ່ງຊື່ຢຸດສະໂຕ, ເປັນຄົນນັບຖືພຣະເຈົ້າ ແລະມີເຮືອນຢູ່ໃກ້ກັບໂຮງທຳນັ້ນ. 8.ກຣິດສະໂປ ຫົວໜ້າໂຮງທຳ ພ້ອມທັງໝົດຄອບຄົວຂອງຕົນ ໄດ້ເຊື່ອໃນພຣະອົງເຈົ້າ. ຊາວເມືອງໂກຣິນໂທຫລາຍຄົນທີ່ໄດ້ຟັງເປົາໂລ ກໍໄດ້ເຊື່ອແລະໄດ້ຮັບສິນລ້າງບາບດ້ວຍ. 9.ຄືນໜຶ່ງ, ພຣະອົງເຈົ້າໄດ້ຊົງກ່າວກັບເປົາໂລທາງນິມິດວ່າ: “ຢ່າຢ້ານເລີຍ, ຈົ່ງກ່າວຕໍ່ໄປໂດຍບໍ່ຢຸດບໍ່ເຊົາ. 10.ດ້ວຍວ່າເຮົາຢູ່ນຳເຈົ້າ ແລະຈະບໍ່ມີຜູ້ໃດຜູ້ໜຶ່ງໂຈມຕີທຳຮ້າຍເຈົ້າໄດ້, ຍ້ອນວ່າໃນເມືອງນີ້ເຮົາມີປະຊາກອນເປັນຈຳນວນມາກ.” 11. ເປົາໂລໄດ້ພັກອາໄສຢູ່ທີ່ນັ້ນເປັນເວລາໜຶ່ງປີຫົກເດືອນ, ໂດຍປະກາດພຣະວາຈາພຣະເຈົ້າໃຫ້ຝູງຊົນຟັງ.

ເປົາໂລຖືກຟ້ອງຫາຈາກພວກຢິວ

12.ຄາວເມື່ອການລີອອນເປັນຜູ້ປົກຄອງແຂວງອາກາຢາ ພວກຢິວໄດ້ພາກັນລຸກຮື້ຂຶ້ນຕໍ່ຕ້ານເປົາໂລ, ແລະນຳຕົວທ່ານໄປມອບໃຫ້ສານ ພ້ອມກ່າວຫາວ່າ: 13.“ຕາຄົນນີ້ຊັກຊວນປະຊາຊົນໃຫ້ນະມັດສະການພຣະເຈົ້າແບບບໍ່ຖືກຕ້ອງຕາມກົດໝາຍ.” 14.ເປົາໂລພວມຈະອ້າປາກໂຕ້ຕອບ, ການລີອອນກໍເວົ້າກັບພວກຢິວວ່າ: “ຊາວຢິວທັງຫລາຍເອີຍ, ຖ້າຫາກເປັນເລື່ອງກ່ຽວກັບຄວາມຜິດຫລືການຊົ່ວຊ້າປະການໃດແລ້ວ, ເຮົາກໍຈະອົດສາຟັງຄຳກ່າວຫາຂອງພວກທ່ານ. 15.ແຕ່ຖ້າຫາກເປັນການໂຕ້ຖຽງກ່ຽວກັບເລື່ອງຖ້ອຍຄຳຫລືຊື່ຕ່າງໆ ກ່ຽວກັບເລື່ອງພຣະບັນຢັດຂອງພວກທ່ານແລ້ວ ກໍແມ່ນທຸລະຂອງພວກທ່ານເອງ! ສ່ວນເຮົາ, ເຮົາບໍ່ຢາກເປັນຜູ້ຕັດສິນໃນເລື່ອງຢ່າງນັ້ນດອກ.” 16.ທ່ານຈຶ່ງໄລ່ພວກເຂົາອອກໄປຈາກສານ. 17.ພວກເຂົາທຸກຄົນຈຶ່ງພາກັນຫຸ້ມຈັບໂຊດສະແຕນ, ຫົວໜ້າໂຮງທຳ, ໄປຂ້ຽນຕີຕໍ່ໜ້າສານ. ແລະໃນເລື່ອງນັ້ນ, ການລີອອນກໍບໍ່ໄດ້ເຂົ້າຫຍຸ້ງກ່ຽວກັບພວກເຂົາເລີຍ.

ກັບສູ່ເມືອງອັນຕີໂອກີອາແຂວງຊີຣີ

18.ເປົາໂລຍັງຄ້າງຢູ່ເມືອງໂກຣິນໂທອີກຊົ່ວລະຍະໜຶ່ງ, ແລ້ວທ່ານໄດ້ອຳລາພວກພີ່ນ້ອງ ແລະລົງເຮືອໄປສູ່ແຂວງຊີຣີ. ປຣິດຊິນລາແລະອາກີລາກໍໄປນຳທ່ານດ້ວຍ. ທີ່ເມືອງແຊນ ເກຣ ທ່ານໄດ້ແຖຫົວຍ້ອນທ່ານໄດ້ບະບົນໄວ້. 19.ເມື່ອພວກທ່ານໄປເຖິງເອເຟໂຊ, ເປົາໂລກໍໄດ້ປະປຣິດຊິນລາແລະອາກີລາ ເພື່ອໄປສົນທະນາກັບພວກຢິວຢູ່ໂຮງທຳ. 20.ພວກນີ້ໄດ້ຮ້ອງຂໍໃຫ້ທ່ານຢຸດພັກຢູ່ກັບພວກເຂົາເຫິງກວ່າອີກ, ແຕ່ທ່ານບໍ່ຍອມ, 21.ໂດຍກ່າວລາພວກເຂົາໃນທຳນອງວ່າ: “ຖ້າຫາກແມ່ນນ້ຳພຣະໄທຂອງພຣະເຈົ້າ, ເຮົາຍັງຈະກັບມາຫາພວກທ່ານເທື່ອໃໝ່ອີກ.”

22.ເມື່ອເຮືອມາຮອດທີ່ເມືອງເຊຊາເຣ ທ່ານໄດ້ຂຶ້ນໄປຖາມຂ່າວພຣະກຣິສຕະຈັກ ແລ້ວຈຶ່ງເດີນທາງຕໍ່ໄປຍັງເມືອງອັນຕີໂອກີອາ. 23.ເມື່ອໄດ້ຢຸດພັກຢູ່ທີ່ນັ້ນລະຫວ່າງໜຶ່ງແລ້ວ, ທ່ານໄດ້ອອກທ່ຽວໄປຕາມແຂວງກາລາຊີອາແລະຟຣີຊີອາຕໍ່ໆກັນ ໂດຍໃຫ້ຄວາມອົບອຸ່ນແກ່ບັນດາສັດຕະບຸຣຸດທັງຫລາຍ.

ອາໂປໂລດ

24.ມີຄົນຢິວຜູ້ໜຶ່ງຊື່ອາໂປໂລດ, ເກີດທີ່ເມືອງອາແລັກຊັນດຣີ, ເປັນຄົນມີໂວຫານໃນການປາກເວົ້າ ແລະຊຳນານທາງດ້ານພຣະຄຳພີ. ທ່ານຜູ້ນີ້ໄດ້ມາຍັງເມືອງເອເຟໂຊ. 25.ທ່ານໄດ້ຮັບການອົບຮົມໃນແນວທາງຂອງພຣະອົງເຈົ້າ, ແລະມີໃຈຮ້ອນຮົນສັ່ງສອນເລື່ອງກ່ຽວກັບພຣະເຢຊູເຈົ້າຢ່າງຖືກຕ້ອງ, ເຖິງແມ່ນວ່າທ່ານໄດ້ຮັບແຕ່ພິທີລ້າງຂອງທ່ານຢວງກໍດີ. 26.ທ່ານໄດ້ກ່າວສັ່ງສອນດ້ວຍໃຈກ້າຫານໃນໂຮງທຳ. ປຣິດຊີນລາແລະອາກີລາໄດ້ຟັງທ່ານປະກາດ, ຈຶ່ງໄດ້ຮັບເອົາທ່ານມາອະທິບາຍໃຫ້ຮູ້ແຈ້ງເຖິງແນວທາງຂອງພຣະອົງເຈົ້າຢ່າງຖືກຕ້ອງ ກວ່າອີກ. 27.ຍ້ອນທ່ານມີຄວາມຕັ້ງໃຈຈະຂ້າມໄປຍັງແຂວງອາກາຢາ, ພວກພີ່ນ້ອງກໍໃຫ້ກຳລັງໃຈທ່ານຕື່ມ ແລະຂຽນຈົດໝາຍຝາກໄປຫາພວກສັດຕະບຸຣຸດໃນທີ່ນັ້ນ ໃຫ້ຮັບຕ້ອນທ່ານຢ່າງດີ. ເມື່ອໄປເຖິງທີ່ນັ້ນແລ້ວ, ເດຊະພຣະຄຸນພຣະເຈົ້າ, ທ່ານກໍໄດ້ຊ່ວຍຊູບັນດາຜູ້ເຊື່ອຢ່າງຫລວງຫລາຍ: 28.ດ້ວຍວ່າທ່ານໄດ້ໂຕ້ຖຽງກັບພວກຢິວຢ່າງແຂງແຮງຢູ່ກາງປະຊາຊົນ, ໂດຍອ້າງເຖິງຂໍ້ຄວາມໃນພຣະຄຳພີ ໃຫ້ເຫັນວ່າ ພຣະເຢຊູແມ່ນພຣະກຣິສໂຕເຈົ້າ.