ງານກິນດອງຢູ່ບ້ານການາ

1.ຕໍ່ມາມື້ທີສາມ, ຢູ່ບ້ານການາແຂວງຄາລີເລໄດ້ມີງານກິນດອງ. ພຣະມານດາຂອງພຣະເຢຊູເຈົ້າກໍຢູ່ໃນງານນັ້ນ. 2.ພຣະເຢຊູເຈົ້າພ້ອມກັບພວກສາວົກກໍໄດ້ຖືກເຊີນມາໃນງານນີ້ດ້ວຍ. 3.ພໍດີນ້ຳອະງຸ່ນໝົດ ພຣະມານດາຈຶ່ງທູນພຣະເຢຊູເຈົ້າວ່າ: “ພວກເຂົາໝົດນ້ຳອະງຸ່ນແລ້ວ”. 4.ພຣະເຢຊູເຈົ້າຊົງຕອບວ່າ: “ແມ່ເອີຍ! ຈະເປັນທຸລະຂອງໄທເຮົາຫຍັງ? ບໍ່ທັນຮອດເວລາຂອງລູກ”. 5.ແຕ່ພຣະມານດາກໍບອກພວກຄົນໃຊ້ວ່າ: “ເພິ່ນບອກຫຍັງ ໃຫ້ປະຕິບັດຕາມເນີ້!” 6.ຢູ່ທີ່ນັ້ນມີໄຫຫິນຢູ່ຫົກໜ່ວຍສຳລັບໃສ່ນ້ຳລ້າງຕົວຕາມປະເພນີຂອງພວກຢິວ ໄຫໜ່ວຍໜຶ່ງໃສ່ນ້ຳໄດ້ສອງສາມຫາບ. 7.ພຣະເຢຊູເຈົ້າຊົງສັ່ງພວກຄົນໃຊ້ວ່າ: “ຈົ່ງຕັກນ້ຳໃສ່ໄຫເຫລົ່ານີ້ໃຫ້ເຕັມ”. ພວກເຂົາກໍພາກັນຕັກນ້ຳໃສ່ຈົນເຕັມພຽບ. 8.ພຣະອົງເລີຍສັ່ງອີກວ່າ: “ດຽວນີ້ຈົ່ງຕັກເອົາໄປໃຫ້ເຈົ້າພາບເຖີດ”. ພວກເຂົາກໍໄດ້ຕັກເອົາໄປ. 9.ພໍເຈົ້າພາບໄດ້ຊິມນ້ຳທີ່ໄດ້ກາຍເປັນນ້ຳອະງຸ່ນ ໂດຍບໍ່ຮູ້ວ່ານ້ຳອະງຸ່ນນັ້ນມາແຕ່ໄສ. ສ່ວນພວກຄົນໃຊ້ທີ່ໄດ້ຕັກນ້ຳ ກໍຮູ້ເລື່ອງດີ ເຈົ້າພາບຈຶ່ງເວົ້າກັບເຈົ້າບ່າວວ່າ: 10.“ໃຜໆກໍເຄີຍຢາຍນ້ຳອະງຸ່ນຢ່າງດີກ່ອນ ແລະເມື່ອເວລາມຶນເມົາແລ້ວ ຈຶ່ງຢາຍນ້ຳອະງຸ່ນທີ່ບໍ່ດີປານໃດ; ສ່ວນເຈົ້າ ເຈົ້າໄດ້ຮັກສານ້ຳອະງຸ່ນຢ່າງດີໄວ້ຈົນເຖິງປານນີ້”.

11.ນີ້ແມ່ນອັດສະຈັນອັນທີີ່ຕົ້ນຂອງພຣະເຢຊູເຈົ້າ ທີ່ພຣະອົງໄດ້ຊົງກະທຳຢູ່ບ້ານການາແຂວງຄາລີເລ. ພຣະອົງໄດ້ຊົງສຳແດງສີມຸງຄຸນຂອງພຣະອົງອອກມາ ແລະພວກສາວົກກໍໄດ້ເຊື່ອໃນພຣະອົງ. 12.ແລ້ວນັ້ນ ພຣະເຢຊູເຈົ້າກໍສະເດັດໄປເມືອງກາຟາກນາອຸມ ພ້ອມກັບພຣະມານດາ ຍາດພີ່ນ້ອງ ແລະພວກສາວົກຂອງພຣະອົງ ແລະໄດ້ພັກຢູ່ທີ່ນັ້ນສອງສາມວັນ.

ຊົງຂັບໄລ່ພວກພໍ່ຄ້າອອກຈາກພຣະວິຫານ

13.ວັນປາສກາຂອງພວກຢິວໃກ້ເຂົ້າມາແລ້ວ, ພຣະເຢຊູເຈົ້າຈຶ່ງສະເດັດຂຶ້ນໄປຍັງນະ ຄອນເຢຣູຊາແລມ. 14.ເມື່ອສະເດັດເຂົ້າໃນພຣະວິຫານ ພຣະອົງຊົງພົບເຫັນພໍ່ຄ້າງົວ, ແກະ, ນົກກາງແກ, ແລະພວກປ່ຽນເງິນນັ່ງຢູ່. 15.ພຣະອົງຊົງເອົາເຊືອກມາທຳເປັນແສ້ ແລ້ວຂັບໄລ່ພວກເຫລົ່ານັ້ນອອກຈາກພຣະວິຫານ ພ້ອມທັງງົວແລະແກະ. ພຣະອົງຊົງປັດເງິນຂອງພວກປ່ຽນເງິນເຮ່ຍຊະໄປ ແລະຄວ່ຳໂຕະຂອງພວກເຂົາ. 16.ພຣະອົງກ່າວກັບຜູ້ຂາຍນົກກາງແກ ວ່າ: “ຈົ່ງເອົາຂອງເຫລົ່ານີ້ອອກໄປ, ຢ່າທຳໃຫ້ພຣະວິຫານຂອງພຣະບິດາເຈົ້າກາຍເປັນຕະຫລາດການຄ້າ.” 17.ພວກສາວົກຈຶ່ງຈື່ຈຳຂໍ້ຄວາມໃນພຣະຄຳພີຕອນໜຶ່ງວ່າ: “ຄວາມຮັກອັນແຮງກ້າຕໍ່ພຣະວິຫານຂອງພຣະອົງເຜົາສຸມຂ້າພະເຈົ້າ.”

18.ພວກຢິວທູນຖາມພຣະອົງວ່າ: “ທ່ານມີຫລັກຖານອັນໃດສະແດງວ່າ ທ່ານມີສິດທຳດັ່ງນີ້ໄດ້?” 19.ພຣະອົງຊົງຕອບວ່າ: “ຈົ່ງທຳລາຍພຣະວິຫານນີ້ ແລ້ວເຮົາຈະສ້າງໃໝ່ພາຍໃນສາມວັນ”. 20.ພວກຢິວຕອບວ່າ: “ພຣະວິຫານນີ້ສ້າງສີ່ສິບຫົກປີຈຶ່ງແລ້ວ, ທ່ານຈະສ້າງໃຫ້ແລ້ວພາຍໃນສາມວັນໄດ້ບໍ? 21.“ແຕ່ພຣະອົງຊົງກ່າວເຖິງພຣະວິຫານອັນແມ່ນພຣະກາຍຂອງ ພຣະອົງ. 22.ເມື່ອພຣະອົງໄດ້ກັບຄືນຊີບຈາກພວກຜູ້ຕາຍແລ້ວ ພວກສາວົກຈຶ່ງຈື່ແລະເຂົ້າໃຈວາຈາທີ່ພຣະອົງໄດ້ກ່າວໄວ້ ພວກເຂົາເລີຍເຊື່ອພຣະຄຳພີແລະວາຈາຂອງພຣະອົງ.

23.ໃນເວລາທີ່ພຣະອົງປະທັບຢູ່ນະຄອນເຢຣູຊາແລມ ໃນເທດສະການປາສການັ້ນ, ຄົນເປັນອັນມາກໄດ້ເຫັນອັດສະຈັນທີ່ພຣະອົງໄດ້ຊົງກະທຳ ແລະໄດ້ເຊື່ອເຖິງພຣະນາມຂອງພຣະອົງ. 24.ແຕ່ພຣະເຢຊູເຈົ້າບໍ່ຊົງໄວ້ວາງໃຈນຳພວກເຫລົ່ານັ້ນ, ຍ້ອນພຣະອົງຮູ້ຈັກເຂົາດີໝົດທຸກຄົນ 25.ແລະບໍ່ຕ້ອງການໃຫ້ຜູ້ໃດມາເວົ້າເລື່ອງຄົນໃຫ້ພຣະອົງຟັງ, ຍ້ອນພຣະອົງຊົງຊາບດີວ່າມີຫຍັງໃນຕົວຄົນແລ້ວ.