ຊົງລ້າງເທົ້າພວກສາວົກ

1.ກ່ອນສະຫລອງປາສກາ, ພຣະເຢຊູເຈົ້າຊົງຊາບວ່າ ວັນເວລາທີ່ພຣະອົງຈະຕ້ອງຈາກໂລກເມືອຫາພຣະບິດາໄດ້ມາເຖິງແລ້ວ, ຍ້ອນພຣະອົງໄດ້ຮັກພວກຄົນຂອງພຣະອົງທີ່ຍັງຢູ່ໃນໂລກ, ພຣະອົງໄດ້ຮັກພວກເຂົາຈົນສຸດຂີດ. 2.ຮັບອາຫານແລ້ວ, ແລະໃນເວລານັ້ນ ຜີປີສາດເຂົ້າບັນດົນຫົວໃຈຂອງຢູດາອິດສະກາຣີອົດ ລູກຊາຍຂອງຊີມອນ ໃຫ້ຊອກຫາທາງມອບພຣະອົງ, 3.ແລະຍ້ອນພຣະອົງຮູ້ຈັກວ່າ ພຣະບິດາໄດ້ມອບທຸກຢ່າງໄວ້ໃນພະຫັດຂອງພຣະອົງ, ທັງຮູ້ຈັກວ່າພຣະອົງມາຈາກພຣະເປັນເຈົ້າ ແລະຈະຫລົບຄືນເມືອຫາພຣະເປັນເຈົ້າອີກ, 4.ພຣະອົງຈຶ່ງລຸກຂຶ້ນຈາກໂຕະຮັບອາຫານ, ແກ້ເສື້ອຕຸ້ມອອກ, ເອົາແພມັດແອວ 5.ແລ້ວຖອກນ້ຳໃສ່ຊາມ, ລົງມືລ້າງເທົ້າໃຫ້ພວກລູກສິດ, ພ້ອມທັງເອົາແພທີ່ພຣະອົງມັດແອວນັ້ນມາເຊັດ. 6.ເມື່ອພຣະອົງມາຮອດຊີມອນເປໂຕ, ເປໂຕທູນວ່າ: “ພຣະອົງຈະມາລ້າງເທົ້າໃຫ້ຂ້ານ້ອຍບໍ?” 7.ພຣະເຢຊູເຈົ້າກ່າວຕອບວ່າ: “ສິ່ງທີ່ເຮົາກະທຳຢູ່ດຽວນີ້, ເຈົ້າຍັງບໍ່ທັນເຂົ້າໃຈໄດ້, ເຈົ້າຈະເຂົ້າໃຈໃນພາຍຫລັງ.” 8.ເປໂຕທູນຕໍ່ໄປວ່າ: “ບໍ່ໄດ້, ຂ້ານ້ອຍບໍ່ຍອມໃຫ້ພຣະອົງລ້າງເທົ້າເປັນເດັດຂາດ.” ພຣະເຢຊູເຈົ້າກ່າວວ່າ: “ຖ້າເຮົາບໍ່ລ້າງໃຫ້ເຈົ້າ, ເຈົ້າກໍຈະບໍ່ມີສ່ວນ ນຳເຮົາ.” 9.ຊີມອນເປໂຕເລີຍທູນວ່າ: “ພຣະອົງເຈົ້າເອີຍ! ຖ້າຢ່າງນັ້ນ ກໍຢ່າລ້າງແຕ່ເທົ້າເທົ່ສນັ້ນ, ຂໍພຣະອົງລ້າງທັງມືແລະຫົວໃຫ້ຂ້ານ້ອຍດ້ວຍ.” 10.ພຣະເຢຊູເຈົ້າກ່າວຕອບວ່າ: “ຜູ້ທີ່ຫາກໍອາບນ້ຳມາໃໝ່ໆ ຕ້ອງການລ້າງແຕ່ເທົ້າເທົ່ານັ້ນ, ຍ້ອນວ່າເຂົາໄດ້ສະອາດໝົດຕົນຕົວແລ້ວ. ສ່ວນພວກເຈົ້ານັ້ນສະອາດບໍລິສຸດແລ້ວ, ແຕ່ບໍ່ໝົດທຸກຄົນ.” 11.ຍ້ອນພຣະອົງຊາບດີວ່າ ຜູ້ໃດຈະມອບພຣະອົງ, ພຣະອົງຈຶ່ງກ່າວວ່າ: “ພວກເຈົ້າສະອາດບໍລິສຸດ ຫາກບໍ່ໝົດທຸກຄົນ.”

12.ເມື່ອເວລາລ້າງເທົ້າໃຫ້ພວກເຂົາສຳເລັດແລ້ວ, ພຣະອົງກໍຊົງຫົ່ມເສື້ອ, ສະເດັດໄປປະທັບຢູ່ທີ່ເດີມ ກ່າວວ່າ: “ພວກເຈົ້າເຂົ້າໃຈ ເຮົາໄດ້ກະທຳສິ່ງໃດໃຫ້ພວກເຈົ້າບໍ? 13.ພວກເຈົ້າເອີ້ນເຮົາວ່າ ພຣະອາຈານແລະພຣະເຈົ້າ ກໍຖືກຕ້ອງດີ, ເຮົາແມ່ນຄືພວກເຈົ້າເວົ້າແທ້. 14.ຖ້າວ່າເຮົາຜູ້ເປັນພຣະເຈົ້າແລະອາຈານ ໄດ້ລ້າງເທົ້າໃຫ້ພວກເຈົ້າ, ພວກເຈົ້າເອງ, ພວກເຈົ້າກໍຕ້ອງລ້າງເທົ້າໃຫ້ກັນແລະກັນດ້ວຍ. 15.ເຮົາໄດ້ໃຫ້ແບບຢ່າງແກ່ພວກເຈົ້າ ເພື່ອໃຫ້ພວກເຈົ້າທຳຕາມທີ່ເຮົາເອງໄດ້ກະທຳນັ້ນແລ.” 16.ເຮົາບອກພວກເຈົ້າເປັນຄວາມຈິງວ່າ: “ຄົນໃຊ້ບໍ່ໃຫຍ່ກວ່ານາຍຂອງຕົນ; ຜູ້ເປັນທູດກໍບໍ່ໃຫຍ່ກວ່າຜູ້ໃຊ້ເຂົາໄປ. 17.ຮູ້ຈັກດັ່ງນີ້ແລ້ວ, ພວກເຈົ້າຈະມີບຸນລາບ ຖ້າຫາກວ່າພວກເຈົ້າປະຕິບັດຕາມ. 18.ເຮົາບໍ່ໄດ້ກ່າວເຖິງພວກເຈົ້າໝົດທຸກຄົນ; ເຮົາຮູ້ຈັກພວກທີ່ເຮົາໄດ້ເລືອກສັນ. ນີ້ກໍເພື່ອໃຫ້ສຳເລັດຕາມທີ່ພຣະຄຳພີໄດ້ບອກໄວ້ວ່າ: ຜູ້ກິນປັງຂອງເຮົາ ໄດ້ງາຕີນໃສ່ເຮົາ. 19.ເຮົາບອກພວກເຈົ້າໄວ້ແຕ່ດຽວນີ້, ກ່ອນເຫດການຈະເປັນມາ, ເພື່ອວ່າເມື່ອເຫດການນັ້ນເກີດຂຶ້ນ, ພວກເຈົ້າກໍຈະເຊື່ອວ່າ ເຮົາເປັນຢູ່. 20.ເຮົາບອກພວກເຈົ້າເປັນຄວາມຈິງວ່າ: ໃຜຕ້ອນຮັບຜູ້ທີ່ເຮົາໃຊ້ໄປ ກໍແມ່ນຕ້ອນຮັບເຮົາເອງ ແລະໃຜຕ້ອນຮັບເຮົາ ກໍແມ່ນຕ້ອນຮັບຜູ້ທີ່ຊົງໃຊ້ເຮົາມາ.”

ຊົງບອກຕົວຜູ້ທໍລະຍົດ

21.ເມື່ອກ່າວດັ່ງນີ້ແລ້ວ, ພຣະເຢຊູເຈົ້າຊົງຄັ່ງແຄ້ນພຣະໄທກ່າວວ່າ: “ເຮົາບອກພວກເຈົ້າເປັນຄວາມຈິງວ່າ ຜູ້ໜຶ່ງໃນພວກເຈົ້າຈະມອບເຮົາ.” 22.ພວກສາວົກຫລຽວເບິ່ງໜ້າກັນ ໂດຍບໍ່ຮູ້ວ່າພຣະອົງເວົ້າໃສ່ຜູ້ໃດ. 23.ຜູ້ໜຶ່ງໃນພວກສາວົກຂອງພຣະອົງ ຜູ້ທີ່ພຣະອົງຊົງຮັກແພງ ນັ່ງຢູ່ຕິດພະຊວງຂອງພຣະອົງ. 24.ຊີມອນເປໂຕຈຶ່ງໃຫ້ສັນຍານບອກສາວົກນັ້ນວ່າ: “ຖາມເບິ່ງວ່າ ພຣະອົງເວົ້າໃສ່ໃຜ?” 25.ສາວົກຜູ້ນັ້ນເນີ້ງຕົວລົງໃສ່ພະຊວງທູນວ່າ: “ພຣະອົງເຈົ້າເອີຍ ແມ່ນຜູ້ໃດຂ້ານ້ອຍ?” 26.ພຣະເຢຊູເຈົ້າຕອບວ່າ: “ແມ່ນຜູ້ທີ່ເຮົາຈະເອົາປັງຈ້ຳນ້ຳແກງຍື່ນໃຫ້.” ແລ້ວພຣະອົງເອົາປັງຈ້ຳນ້ຳແກງ ຍື່ນໃຫ້ຢູດາ, ບຸດຂອງຊີມອນອິດສະກາຣີອັອດ. 27.ພໍຢູດາຮັບເອົາປັງ, ເວລານັ້ນຊາຕານກໍເຂົ້າສິງຕົວເຂົາ. ພຣະເຢຊູເຈົ້າຈຶ່ງກ່າວກັບເຂົາວ່າ: “ສິ່ງທີ່ເຈົ້າຈະເຮັດກໍໃຫ້ເຮັດເສຍໄວໆ.” 28.ແຕ່ບໍ່ມີໃຜໃນພວກຮ່ວມຮັບອາຫານ ເຂົ້າໃຈພຣະວາຈານັ້ນວ່າ ເປັນຫຍັງພຣະອົງຈຶ່ງເວົ້າດັ່ງນີ້ກັບຢູດາ. 29.ຍ້ອນຢູດາຮັກສາຖົງເງິນ, ຈຶ່ງມີຫລາຍຄົນຄິດວ່າ ພຣະເຢຊູເຈົ້າຢາກບອກເຂົາໃຫ້ໄປຫາຊື້ສິ່ງຈຳເປັນສຳລັບວັນບຸນສະຫລອງ ຫລືສັ່ງໃຫ້ໄປແຈກທານແກ່ຄົນຈົນ. 30.ເມື່ອຮັບກິນປັງນັ້ນແລ້ວ, ຢູດາກໍອອກໄປ, ເວລານັ້ນມືດແລ້ວ. 31.ເມື່ອຢູດາອອກໄປແລ້ວ ພຣະເຢຊູເຈົ້າກ່າວວ່າ: “ດຽວນີ້ ບຸດແຫ່ງມະນຸດໄດ້ຮັບກຽດມຸງຄຸນແລ້ວ, ແລະພຣະເປັນເຈົ້າກໍໄດ້ຮັບກຽດມຸງຄຸນໃນບຸດແຫ່ງມະນຸດດ້ວຍ. 32.ຖ້າພຣະເປັນເຈົ້າໄດ້ຮັບກຽດມຸງຄຸນໃນບຸດແຫ່ງມະນຸດ, ພຣະເປັນເຈົ້າກໍຈະທຳໃຫ້ບຸດແຫ່ງມະນຸດໄດ້ຮັບກຽດມຸງຄຸນດ້ວຍ ແລະພຣະອົງຈະທຳໃຫ້ບຸດແຫ່ງມະນຸດໄດ້ຮັບກຽດມຸງຄຸນໃນມໍ່ໆນີ້.

ການອຳລາ

33.“ພວກລູກທີ່ຮັກ! ເຮົາຈະຢູ່ນຳພວກເຈົ້າອີກບໍ່ດົນນານ; ພວກລູກຈະຊອກຫາເຮົາ ແຕ່ເຮົາບອກພວກລູກດຽວນີ້ ຄືເຮົາໄດ້ບອກກັບພວກຢິວວ່າ: “ບ່ອນເຮົາໄປ ພວກລູກໄປນຳບໍ່ໄດ້.” 34.ເຮົາມອບບົດບັນຢັດໃໝ່ໃຫ້ພວກລູກຄື ຈົ່ງຮັກກັນແລະກັນ ຄືເຮົາໄດ້ຮັກພວກລູກ. ແມ່ນແລ້ວ, ພວກລູກຈົ່ງຮັກກັນແລະກັນ. 35.ຄົນທັງຫລາຍຈະຮູ້ວ່າ ພວກລູກເປັນລູກສິດຂອງເຮົາ ກໍຍ້ອນເຫັນພວກລູກມີຄວາມຮັກຕໍ່ກັນແລະກັນນັ້ນເອງ”.

36.ຊີມອນເປໂຕທູນພຣະອົງວ່າ: “ພຣະອົງເຈົ້າຈະໄປໃສ?” ພຣະເຢຊູເຈົ້າຕອບວ່າ: “ບ່ອນເຮົາໄປນັ້ນ ດຽວນີ້ເຈົ້າໄປນຳບໍ່ໄດ້, ແຕ່ເຈົ້າຈະໄປນຳຕາມທີຫລັງ.” 37.ເປໂຕທູນວ່າ: “ພຣະອົງເຈົ້າ, ເປັນຫຍັງຂ້ານ້ອຍຈຶ່ງໄປນຳພຣະອົງແຕ່ເວລານີ້ບໍ່ໄດ້? ຂ້ານ້ອຍພ້ອມທີ່ຈະສະລະຊີວິດເພື່ອພຣະອົງແລ້ວ.” 38.ພຣະເຢຊູເຈົ້າຕອບວ່າ: “ເຈົ້າພ້ອມຈະສະລະຊີວິດເພື່ອເຮົາແລ້ວ ບໍ? ເຮົາບອກເຈົ້າເປັນຄວາມຈິງວ່າ: ໄກ່ຍັງບໍ່ທັນຂັນ ເຈົ້າກໍຈະປະຕິເສດເຮົາເຖິງສາມເທື່ອ.”