ຂອງທານຂອງນາງໝ້າຍ

1.ແລ້ວພຣະເຢຊູເຈົ້າຊົງເງີຍພຣະພັກຂຶ້ນ ທອດພຣະເນດເຫັນບັນດາຜູ້ຮັ່ງມີກຳລັງປ່ອນຂອງທານລົງໃນຕູ້ທານ. 2.ພຣະອົງຍັງຊົງເຫັນນາງໝ້າຍອະນາຖາຄົນໜຶ່ງ ກຳລັງປ່ອນສອງອັດລົງໃນຕູ້ທານນັ້ນດ້ວຍ. 3.ແລະພຣະອົງຊົງກ່າວວ່າ: “ເຮົາກ່າວແກ່ພວກເຈົ້າເປັນຄວາມຈິງວ່າ ນາງໝ້າຍອະນາຖານີ້ໄດ້ໃຫ້ທານຫລາຍກວ່າເຂົາທັງຫລາຍ. 4.ຍ້ອນວ່າເຂົາທຸກຄົນນັ້ນໄດ້ທານແຕ່ພຽງສ່ວນດຽວຂອງທີ່ເຫລືອໃຊ້ແລ້ວ ສ່ວນນາງໝ້າຍນີ້ ໄດ້ເອົາຂອງທີ່ນາງມີຈຳເພາະລ້ຽງຊີວິດມາທານ.”

ຊົງທຳນາຍເຖິງຄວາມພິນາດແຫ່ງນະຄອນເຢຣູຊາແລມ

5.ເນື່ອງຈາກວ່າ ມີບາງຄົນເວົ້າເຖິງພຣະວິຫານວ່າ ປະດັບດ້ວຍຫິນງາມ ແລະສິ່ງຂອງຖະຫວາຍແກ້ບະບົນຕ່າງໆ. ພຣະອົງຈຶ່ງຊົງກ່າວວ່າ: 6.“ທຸກສິ່ງທີ່ພວກເຈົ້າເຫັນແລະຊົມຢູ່ນີ້ ສັກວັນໜຶ່ງຈະບໍ່ມີຫຍັງເຫລືອ ຫາຫິນຊ້ອນກັນກໍຈະບໍ່ມີເລີຍ ທຸກສິ່ງຈະເພພັງລົງໝົດ.” 7.ພວກສາວົກຈຶ່ງທູນຖາມພຣະອົງວ່າ: “ພຣະອາຈານເອີຍ ເຫດການເຫລົ່ານັ້ນຈະເປັນມາເວລາໃດ ແລະຈະມີເຄື່ອງໝາຍອັນໃດບອກໃຫ້ຮູ້ວ່າ ເຫດການນັ້ນໃກ້ຈະມາຮອດ?”

ເຄື່ອງໝາຍທີ່ຈະປາກົດມາກ່ອນ

8.ພຣະອົງຕອບວ່າ: “ຈົ່ງລະວັງຢ່າປະໃຫ້ມີໃຜຕົວະຫລອກພວກເຈົ້າ ຍ້ອນວ່າຈະມີຄົນເປັນອັນມາກມາໃນນາມຂອງເຮົາ ຈະອ້າງຕົວວ່າ: “ແມ່ນເຮົານີ້ແຫລະ ແລະວັນເວລາໃກ້

ເຂົ້າມາແລ້ວ.” ພວກເຈົ້າຈົ່ງຢ່າໄດ້ຕິດຕາມພວກເຂົາເລີຍ. 9.ເມື່ອພວກເຈົ້າຈະໄດ້ຍິນເວົ້າເຖິງເລື່ອງເສິກຫລືການປະຕິວັດຕ່າງໆ ກໍຢ່າຕົກໃຈ ສິ່ງເຫລົ່ານີ້ຕ້ອງເປັນມາກ່ອນ ແຕ່ວ່າວາລະສຸດທ້າຍຍັງຈະບໍ່ທັນມາຮອດດອກ.” 10.ແລ້ວພຣະອົງຊົງກ່າວຕໍ່ໄປວ່າ: “ຈະມີການຂັດສູ້ກັນລະຫວ່າງຊາດຕໍ່ຊາດ ອານາຈັກຕໍ່ອານາຈັກ. 11.ຈະເກີດແຜ່ນດິນສະເທືອນຢ່າງແຮງ ແລະໃນຫລາຍໆແຫ່ງຈະເກີດພະຍາດຕິດຕໍ່ແລະອຶດຢາກໝາກແຄ້ນ ຈະເກີດມີສິ່ງປະຫລາດໜ້າຢ້ານດ້ວຍ ແລະຈະເກີດມີສິ່ງແປກປະຫລາດໃຫຍ່ຫລວງໃນທ້ອງຟ້າ. 12.ແຕ່ວ່າ ກ່ອນອື່ນນັ້ນ ເຂົາຈະຈັບກຸມພວກເຈົ້າ ຈະບັງບຽດ ຈະນຳພວກເຈົ້າໄປໃນໂຮງທຳແລະໃສ່ຄຸກ ເຂົາຈະຟ້ອງຫາພວກເຈົ້າຕໍ່ໜ້າບັນດາກະສັດແລະຜູ້ປົກຄອງທັງຫລາຍຍ້ອນນາມຂອງເຮົາ. 13.ທັງນີ້ຈະເປັນໂອກາດໃຫ້ພວກເຈົ້າເປັນພະຍານເຖິງເຮົາ. 14.ໃຫ້ພວກເຈົ້າຈຳໃສ່ໃຈໄວ້ວ່າ ພວກເຈົ້າບໍ່ຕ້ອງຕຽມຄຳຕອບໂຕ້ເພື່ອປ້ອງກັນຕົວເລີຍ. 15.ຍ້ອນວ່າເຮົາເອງຈະໃຫ້ພວກເຈົ້າມີຄວາມເວົ້າແລະຄວາມສະຫລາດ ຈົນວ່າບໍ່ມີສັດຕູຄົນໃດຈະສາມາດຕໍ່ສູ້ຫລືຄັດຄ້ານໄດ້. 16.ແມ່ນພໍ່ແມ່ ພີ່ນ້ອງ ຄົນໃກ້ຄຽງ ແລະໝູ່ເພື່ອນຂອງພວກເຈົ້າເອງຈະມອບພວກເຈົ້າ ເຂົາຈະຂ້າຫລາຍຄົນໃນພວກເຈົ້າ. 17.ແລະຄົນທົ່ວໄປຈະຄຽດຊັງພວກເຈົ້າຍ້ອນນາມຂອງເຮົາ. 18.ແຕ່ວ່າຜົມເທິງຫົວຂອງພວກເຈົ້າຈະບໍ່ຫລົ່ນແມ່ນແຕ່ເສັ້ນດຽວ. 19.ພວກເຈົ້າຈະເອົາຊີວິດຮອດໄດ້ ກໍຍ້ອນຄວາມອົດທົນຂອງພວກເຈົ້າ.

ເຢຣູຊາແລມຖືກອ້ອມ

20.“ແຕ່ວ່າ ເມື່ອພວກເຈົ້າຈະເຫັນນະຄອນເຢຣູຊາແລມຖືກກອງທັບອ້ອມຮອບ ໃຫ້ພວກເຈົ້າສຳນຶກຕົວວ່າ ຄວາມພິນາດຂອງມັນໃກ້ເຂົ້າມາແລ້ວ. 21.ເວລານັ້ນ ໃຫ້ຜູ້ຢູ່ໃນແຂວງຢູເດໜີຂຶ້ນພູ ໃຫ້ຜູ້ຢູ່ໃນເມືອງຮີບໜີອອກໄປນອກ ແລະຜູ້ຢູ່ຕາມບ້ານນອກກໍຢ່າເຂົ້າໄປໃນເມືອງ. 22.ຍ້ອນວ່າຈະເປັນວັນແຫ່ງການລົງໂທດ, ວັນທີ່ທຸກສິ່ງຊຶ່ງຂຽນໄວ້ຈະຕ້ອງສຳເລັດໄປ. 23.ເວນກຳແກ່ພວກທີ່ຖືພາຫລືລ້ຽງລູກອ່ອນໃນວັນເຫລົ່ານັ້ນ ຍ້ອນຈະມີເຫດໄພອັນໃຫຍ່ຫລວງໃນປະເທດ ແລະຈະມີຄວາມໂກດຮ້າຍຕໍ່ຊົນຊາດນີ້. 24.ພວກເຂົາຈະລົ້ມຕາຍດ້ວຍຄົມດາບ ຈະຖືກກວາດຕ້ອນໄປເປັນຂ້າຊະເລີຍໃນປະເທດຕ່າງໆ ແລະຄົນຕ່າງຊາດຈະຢຽບຢ່ຳນະຄອນເຢຣູຊາແລມ ຈົນກວ່າສະໄໝຄົນຕ່າງຊາດຈະສິ້ນສຸດໄປ.

ໂລກມຸ່ນທະລາຍ. ການສະເດັດມາຂອງບຸດແຫ່ງມະນຸດ

25.“ແລະຈະມີເຄື່ອງໝາຍຕ່າງໆປາກົດໃນດວງອາທິດ ໃນດວງຈັນແລະດວງດາວ. ສ່ວນພາກພື້ນດິນ ນານາຊາດກໍຈະອົກສັ່ນຂວັນຫາຍ ຕື່ນຕົກໃຈດ້ວຍສຽງນອງນັນຂອງຟອງລົມໃນທະເລ. 26.ມະນຸດທັງຫລາຍຈະລົ້ມຕາຍດ້ວຍຄວາມຢ້ານກົວ ໃນເວລາຄອຍຖ້າເຫດການທີ່ຈະເປັນມາແກ່ໂລກ ຍ້ອນວ່າລິດອຳນາດແຫ່ງທ້ອງຟ້າຈະເພພັງລົງ. 27.ແລະເວລານັ້ນ ຄົນທັງຫລາຍຈະເຫັນບຸດແຫ່ງມະນຸດສະເດັດມາເທິງເມກ ພ້ອມດ້ວຍຣິດທານຸພາບແລະສີມຸງຄຸນອັນຍິ່ງໃຫຍ່. 28.ເມື່ອເຫດການເຫລົ່ານີ້ເລີ່ມເປັນມາ ພວກເຈົ້າຈົ່ງລຸກຂຶ້ນແລະເງີຍໜ້າ ຍ້ອນວ່າການກູ້ໄຖ່ຂອງພວກເຈົ້າໃກ້ເຂົ້າມາແລ້ວ”.

ຄວາມປຽບທຽບເລື່ອງກົກໝາກເດື່ອ

29.ແລ້ວພຣະອົງຊົງກ່າວຄວາມປຽບທຽບໃຫ້ພວກສາວົກຟັງວ່າ: “ຈົ່ງເບິ່ງກົກໝາກເດື່ອ ແລະກົກໄມ້ອື່ນໆເຖີດ. 30.ເມື່ອພວກເຈົ້າສັງເກດເຫັນມັນແຕກໜໍ່ແໜງໃໝ່ ພວກເຈົ້າກໍເຂົ້າໃຈວ່າ ລະດູຮ້ອນມາໃກ້ແລ້ວ. 31.ສຳລັບພວກເຈົ້າກໍດັ່ງດຽວກັນ ເມື່ອພວກເຈົ້າຈະເຫັນເຫດການດັ່ງກ່າວແລ້ວເກີດຂຶ້ນ ກໍຈົ່ງເຂົ້າໃຈວ່າ ພຣະຣາໄຊຂອງພຣະເປັນເຈົ້າມາໃກ້ແລ້ວ. 32.ເຮົາກ່າວແກ່ພວກເຈົ້າເປັນຄວາມຈິງວ່າ ຄົນເຊັ່ນນີ້ຈະບໍ່ຜ່ານພົ້ນໄປ ກ່ອນເຫດການເຫລົ່ານັ້ນຈະເປັນມາ. 33.ຟ້າແລະແຜ່ນດິນຈະຜ່ານພົ້ນໄປ ແຕ່ພຣະວາຈາຂອງເຮົາຈະບໍ່ຜ່ານພົ້ນໄປເລີຍ.

ຈົ່ງຕື່ນເຝົ້າລະວັງຢູ່ສະເໝີ

34.“ຈົ່ງລະວັງ ຢ້ານວ່າຈິດໃຈຂອງພວກເຈົ້າຈະເມົາມົວຢູ່ໃນການຫລິ້ນກິນດື່ມຫລືຄວາມສົນລະວົນໃນຊີວິດນີ້ ແລະຢ່າໃຫ້ວັນນັ້ນມາເຖິງໂດຍກະທັນຫັນ 35.ເໝືອນດັ່ງຜືນແຫ ຍ້ອນວ່າມັນຈະຕົກລົງມາກວບທຸກຄົນທີ່ອາໄສຢູ່ເທິງແຜ່ນດິນນີ້. 36.ດັ່ງນັ້ນ ຈົ່ງຕື່ນເຝົ້າຢູ່ແລະພາວະນາຢູ່ຕະຫລອດ ເພື່ອຈະມີແຮງມີກຳລັງໜີພົ້ນເຫດການທີ່ຈະເປັນມາ ແລະເພື່ອຈະໄດ້ໄປປາກົດຕົວຢືນຢູ່ຕໍ່ພຣະພັກພຣະບຸດແຫ່ງມະນຸດ.”

37.ຍາມກາງເວັນ ພຣະເຢຊູເຈົ້າຊົງເທດສອນຢູ່ໃນພຣະວິຫານ, ແຕ່ຍາມກາງຄືນ ພຣະອົງສະເດັດໄປປະທັບຢູ່ໂນນທີ່ມີຊື່ວ່າ ໂນນສວນໝາກກອກ. 38.ແລະພໍແຕ່ແຈ້ງມາ, ປະຊາຊົນທັງໝົດກໍພາກັນມາຫາພຣະອົງໃນພຣະວິຫານ ເພື່ອຟັງພະໂອວາດຂອງພຣະອົງ.