1.ແລະເມື່ອພະຊຸມພານ້ອຍຊົງແກະຕາທີເຈັດອອກ ກໍເກີດມີຄວາມສະຫງັດງຽບຂຶ້ນໃນສະຫວັນ ປະມານເຄິ່ງຊົ່ວໂມງ... 2.ຕໍ່ຈາກນັ້ນ ຂ້າພະເຈົ້າໄດ້ເຫັນເທວະດາເຈັດອົງ ທີ່ຢືນຢູ່ຕໍ່ພຣະພັກພຣະເຈົ້າ ແລະໄດ້ຮັບແກເຈັດອັນ 3.ແລ້ວຍັງມີເທວະດາອົງໜຶ່ງອີກ ຖືຊວ້ານດວງໜຶ່ງ (ເຮັດດ້ວຍຄຳ) ອອກມາຢືນຢູ່ເທິງພຣະແທ່ນ ເພິ່ນນີ້ໄດ້ຮັບຢາງຫອມເປັນປະລິມານຫລວງຫລາຍ ເພື່ອຈະໄດ້ຖະຫວາຍພ້ອມກັບຄຳພາວະນາຂອງບັນດາຜູ້ຖືກເລືອກສັນທັງໝົດ ຢູ່ເທິງພຣະແທ່ນຄຳ ທີ່ຕັ້ງຢູ່ຕໍ່ໜ້າພຣະບັນລັງ. 4.ແລະຈາກມືຂອງເທວະດາ ຄວັນຢາງຫອມກໍລອຍຂຶ້ນຕໍ່ພຣະພັກພຣະເຈົ້າ ພ້ອມກັບຄຳພາວະນາຂອງບັນດາຜູ້ຖືກເລືອກສັນ 5.ແລ້ວນັ້ນເທວະດາຈັບເອົາຊວ້ານໄປຕັກເອົາທ່ານໄຟຈາກພຣະແທ່ນໃຫ້ເຕັມ ແລ້ວໂຍນຖິ້ມລົງແຜ່ນດິນໂລກ ເລີຍເກີດມີສຽງຟ້າດັງ, ສຽງປາກ, ມີຟ້າແມບ, ແລະແຜ່ນດິນໄຫວ.

ແກສີ່ວົງຕົ້ນ

6.ເທວະດາເຈັດອົງທີ່ຖືແກທັງເຈັດ ຕ່າງກໍຕຽມພ້ອມທີ່ຈະເປົ່າ 7.ພໍອົງທີ່ໜຶ່ງເປົ່າຂຶ້ນ... ໝາກເຫັບແລະໄຟປົນເລືອດກໍຂຸລົງມາຍັງແຜ່ນດິນ: ແຜ່ນດິນໂລກຖືກໄໝ້ທຳລາຍເສຍໜຶ່ງສ່ວນສາມ, ຕົ້ນໄມ້ກໍຖືກໄໝ້ທຳລາຍເສຍໜຶ່ງສ່ວນສາມ, ແລະຫຍ້າຂຽວສົດຖືກໄໝ້ທຳລາຍເສຍຫາຍໝົດ 8.ເມື່ອເທວະດາອົງທີສອງເປົ່າແກຂຶ້ນ... ກໍມີຫິນໂງ່ນໜຶ່ງໃຫຍ່ສ່ຳພູ ຊຶ່ງໄຟກຳລັງໄໝ້ຢູ່ ຕົກລົງມາໃສ່ທະເລ ແລະໜຶ່ງສ່ວນສາມຂອງທະເລໄດ້ກາຍເປັນເລືອດ 9.ສາລະພັດທີ່ມີຊີວິດຢູ່ໃນທະເລກໍຕາຍໝົດໜຶ່ງສ່ວນສາມ ແລະບັນດາເຮືອສະເພົາກໍຖືກທຳລາຍເສຍໜຶ່ງສ່ວນສາມ 10.ເມື່ອເທວະດາອົງທີສາມເປົ່າແກຂຶ້ນ.... ກໍມີດາວໃຫຍ່ດວງໜຶ່ງເປັນຄືໜ່ວຍໄຟຕົກລົງຈາກທ້ອງຟ້າ ດາວນັ້ນຕົກໃສ່ໜຶ່ງສ່ວນສາມຂອງແມ່ນ້ຳ ແລະໃສ່ນ້ຳບໍ່ທັງຫລາຍ 11.ດາວດວງນີ້ມີຊື່ວ່າ “ອັບຊິນໂທ”. ໜຶ່ງສ່ວນສາມຂອງນ້ຳຈຶ່ງກັບມີລົດຂອງອັບຊິນໂທ ແລະຜູ້ຄົນຈຳນວນມາກໄດ້ຕາຍ ເພາະນ້ຳນັ້ນມີລົດຂົມ 12.ເມື່ອເທວະດາອົງທີສີ່ເປົ່າແກຂຶ້ນ... ໜຶ່ງສ່ວນສາມຂອງດວງອາທິດ, ໜຶ່ງສ່ວນສາມຂອງດວງຈັນ, ແລະໜຶ່ງສ່ວນສາມຂອງດວງດາວທັງຫລາຍກໍຖືກທຳລາຍເສຍໜຶ່ງສ່ວນສາມ ຈຶ່ງເກີດມືດມົວໄປເຖິງໜຶ່ງສ່ວນສາມ ກາງເວັນເສຍຄວາມສະຫວ່າງໄປໜຶ່ງສ່ວນສາມ ແລະກາງຄືນກໍເໝືອນກັນ. 13.ແລະການນິມິດຂອງຂ້າພະເຈົ້າກໍຍັງມີສືບຕໍ່ໄປ ຂ້າພະເຈົ້າໄດ້ຍິນນົກອິນຊີຕົວໜຶ່ງ ບິນຢູ່ໃນທ້ອງຟ້າແລະຮ້ອງສຽງດັງຂຶ້ນວ່າ: “ໄພພິບັດ, ໄພພິບັດ, ໄພພິບັດ ຈະມີແກ່ພວກທີ່ອາໄສຢູ່ເທິງແຜ່ນດິນໂລກ ເມື່ອສຽງແກສຸດທ້າຍຈະດັງຂຶ້ນ ຊຶ່ງເທວະດາສາມອົງຈວນຈະເປົ່າຢູ່ນັ້ນ”.