ຜູ້ຮັບໃຊ້ຂອງພຣະເຈົ້າຈະຖືກຍົກເວັ້ນ

1.ຫລັງຈາກນັ້ນ ຂ້າພະເຈົ້າໄດ້ເຫັນເທວະດາສີ່ອົງ ຢືນຢູ່ໃນທິດທັງສີ່ຂອງແຜ່ນດິນໂລກ ຫ້າມລົມໃນແຜ່ນດິນທັງສີ່ທິດໄວ້ ບໍ່ໃຫ້ພັດໃສ່ດິນບົກ, ໃສ່ທະເລ ຫລືໃສ່ຕົ້ນໄມ້ໃດໆ 2.ຕໍ່ຈາກນັ້ນ ຂ້າພະເຈົ້າໄດ້ເຫັນເທວະດາອີກອົງໜຶ່ງ ຂຶ້ນມາຈາກທິດຕາເວັນອອກ ຖືຕາຂອງພຣະເຈົ້າຜູ້ຊົງຊີວິດ ເທວະດາອົງນີ້ຮ້ອງສຽງດັງບອກເທວະດາສີ່ອົງ ທີ່ໄດ້ຮັບມອບໝາຍໃຫ້ທຳລາຍແຜ່ນດິນແລະທະເລວ່າ: 3.“ຖ້າກ່ອນ ຢ່າທຳລາຍແຜ່ນດິນ, ທະເລ, ແລະຕົ້ນໄມ້ ກ່ອນທີ່ພວກເຮົາຈະໄດ້ປະທັບຕາໃສ່ໜ້າຜາກຂອງພວກຂ້າໃຊ້ຂອງພຣະເຈົ້າຂອງເຮົາ”. 4.ແລະຂ້າພະເຈົ້າໄດ້ຍິນບອກວ່າ ຈຳນວນພວກໄດ້ຖືກປະທັບຕານັ້ນ ມີໜຶ່ງແສນສີ່ໝື່ນສີ່ພັນຄົນ. ຈາກທຸກຕະກຸນແຫ່ງບຸດຫລານອິດສະລະແອນ 5.ຈາກຕະກຸນຢູດາ ມີ ໜຶ່ງໝື່ນສອງພັນຄົນ. ຈາກຕະກຸນຣຸແບນ ມີໜຶ່ງໝື່ນສອງພັນຄົນ. ຈາກຕະກຸນກາດ ມີໜຶ່ງໝື່ນສອງພັນຄົນ. 6.ຈາກຕະກຸນອາແຊ ມີໜຶ່ງໝື່ນສອງພັນຄົນ, ຈາກຕະກຸນເນບຕາລີ ມີໜຶ່ງໝື່ນສອງພັນຄົນ, ຈາກຕະກຸນມານາດເຊ ມີໜຶ່ງໝື່ນສອງພັນຄົນ 7.ຈາກຕະກຸນຊີເມອອນ ມີໜຶ່ງໝື່ນສອງພັນຄົນ, ຈາກຕະກຸນເລວີ ມີໜຶ່ງໝື່ນສອງພັນຄົນ, ຈາກຕະກຸນອີຊາກາ ມີໜຶ່ງໝື່ນສອງພັນຄົນ 8.ຈາກຕະກຸນຊາບູລອນ ມີໜຶ່ງໝື່ນສອງພັນຄົນ, ຈາກຕະກຸນຢໍແຊ ມີໜຶ່ງໝື່ນສອງພັນຄົນ, ຈາກຕະກຸນເບັນຢາໝິນ ມີໜຶ່ງໝື່ນສອງພັນຄົນ.

ໄຊຊະນະຂອງພວກຖືກເລືອກສັນໃນສະຫວັນ

9.ຕໍ່ຈາກນັ້ນ ຂ້າພະເຈົ້າໄດ້ເຫັນຝູງຄົນເປັນຈຳນວນມາກມາຍເຫລືອທີ່ຈະນັບໄດ້ ມາຈາກທຸກປະເທດ ທຸກຕະກຸນ ທຸກຊາດ ທຸກພາສາ, ຄົນເຫລົ່ານັ້ນຢືນຢູ່ຕໍ່ໜ້າພະທີ່ນັ່ງ ຕໍ່ພຣະພັກຂອງພະຊຸມພານ້ອຍ, ທົງເຄື່ອງຂາວ ແລະຖືໃບລານໃນມື 10.ພ້ອມກັນຮ້ອງສຽງດັງຂຶ້ນວ່າ: “ຄວາມຮອດຂຶ້ນຢູ່ກັບພຣະເຈົ້າຂອງພວກເຮົາ ຜູ້ປະທັບຢູ່ເທິງບັນລັງ ແລະຂຶ້ນຢູ່ກັບພະຊຸມພານ້ອຍດ້ວຍ”. 11.ແລ້ວພວກນິກອນເທວະດາທີ່ຢືນຢູ່ອ້ອມພະທີ່ນັ່ງ ຢູ່ອ້ອມພວກອະວຸໂສແລະສັດມີຊີວິດທັງສີ່ ກໍຂາບລົງຕໍ່ໜ້າພະລາດຊະບັນລັງ ນະມັດສະການພຣະເປັນເຈົ້າ 12.ພ້ອມກັນກ່າວວ່າ: “ອາແມນ ຂໍພຣະເຈົ້າຂອງເຮົາຈົ່ງໄດ້ຮັບພຣະພອນ, ສີມຸງຄຸນ, ຄວາມສະຫລາດສຸຂຸມ, ການສົມມະນາຄຸນ, ກຽດຕິຍົດ, ຣິດທານຸພາບ, ພາລະກຳລັງ ຕະຫລອດນິຣັນດອນ! ອາແມນ!” 13.ໃນເວລານັ້ນ ອະວຸໂສຜູ້ໜຶ່ງກ່າວຖາມຂ້າພະເຈົ້າວ່າ: “ພວກທີ່ທົງເຄື່ອງຂາວເຫລົ່ານີ້ແມ່ນພວກແນວໃດ? ແລະມາແຕ່ໃສ?” 14. ຂ້າພະເຈົ້າທູນຕອບວ່າ: “ອາດຍາເອີຍ! ທ່ານເອງເປັນຜູ້ຮູ້ຢູ່ແລ້ວ” ທ່ານອະວຸໂສຈິ່ງກ່າວຕໍ່ໄປວ່າ: “ຄົນເຫລົ່ານີ້ແມ່ນພວກທີ່ໄດ້ຜ່ານຄວາມທຸກຍາກອັນໃຫຍ່ຫລວງມາແລ້ວ, ພວກເຂົາໄດ້ຊັກຟອກເສື້ອຜ້າຂອງຕົນໃຫ້ຂາວສະອາດ ດ້ວຍພຣະໂລຫິດຂອງພະຊຸມພານ້ອຍແລ້ວ 15.ດ້ວຍເຫດນີ້ ພວກເຂົາຈຶ່ງຢືນຢູ່ຕໍ່ໜ້າພຣະບັນລັງຂອງພຣະເຈົ້າ ບົວລະບັດຮັບໃຊ້ພຣະອົງຕະຫລອດວັນຕະຫລອດຄືນ ໃນພຣະວິຫານຂອງພຣະອົງ ສ່ວນພຣະອົງຜູ້ປະທັບຢູ່ເທິງພຣະບັນລັງນັ້ນ ກໍສະຖິດຢູ່ກັບພວກເຂົາ 16.ພວກເຂົາຈະບໍ່ຮູ້ຫິວເຂົ້າຫິວນ້ຳອີກເລີຍ ພວກເຂົາຈະບໍ່ຖືກແດດ ຖືກລົມຮ້ອນອີກຕໍ່ໄປດ້ວຍ. 17.ຍ້ອນວ່າພະຊຸມພານ້ອຍຜູ້ຊົງປະທັບຢູ່ເທິງບັນລັງນັ້ນ ຈະເປັນຜູ້ຄຸ້ມຄອງດູແລພວກເຂົາ ແລະຈະພາພວກເຂົາໄປສູ່ບໍ່ນ້ຳບັນດານຊີວິດ ແລະພຣະເຈົ້າຈະເຊັດນ້ຳຕາທຸກຢາດຈາກຕາຂອງພວກເຂົາໃຫ້ແຫ້ງໝົດ”.