ເຖິງສັງຄະມົນທົນຊາກເດ

1.“ຈົ່ງຂຽນໄປຍັງເທວະທູດຂອງພຣະເຈົ້າໃນສັງຄະມົນທົນຊາກເດ: ພຣະອົງຜູ້ຊົງມີພຣະຈິດທັງເຈັດຂອງພຣະເຈົ້າ, ແລະຊົງມີດາວທັງເຈັດດວງ ກ່າວວ່າດັ່ງນີ້: “ເຮົາຮູ້ການປະພຶດຂອງເຈົ້າ ເຈົ້າຖືຕົວເປັນຜູ້ມີຊີວິດ ແຕ່ເຈົ້າຕາຍເສຍແລ້ວ. 2.ເຈົ້າຈົ່ງຕື່ນຂຶ້ນ ແລະເຊີດຊູສ່ວນຊີວິດທີ່ຍັງເຫລືອແລະໃກ້ຈະມອດຢູ່ແລ້ວນັ້ນ ໃຫ້ແຂງແຮງຂຶ້ນ ເຮົາບໍ່ປາກົດເຫັນຊີວິດຂອງເຈົ້າໄດ້ຮັບຜົນສຳເລັດດີຕໍ່ພຣະພັກພຣະເຈົ້າຂອງເຮົາ. 3.ເຈົ້າຈົ່ງຈື່ຈຳໄວ້ວ່າ ເຈົ້າໄດ້ຍິນແລະຮັບເອົາພຣະວາຈາຢ່າງໃດ? ຈົ່ງຮັກສາພຣະວາຈາໄວ້ແລະກັບໃຈໃໝ່ເສຍ ດ້ວຍວ່າ ຖ້າເຈົ້າບໍ່ຕື່ນເຝົ້າ ເຮົາຈະມາຫາເຈົ້າເໝືອນດັ່ງຂະໂມຍ ໂດຍເຈົ້າບໍ່ຮູ້ໄດ້ວ່າ ເວລາໃດເຮົາຈະຫລອນມາຫາເຈົ້າ. 4.ແຕ່ວ່າ ທີ່ເມືອງຊາກເດເຈົ້ານີ້ ຍັງມີຄົນຈຳນວນໜຶ່ງທີ່ບໍ່ໄດ້ເຮັດໃຫ້ເສື້ອຜ້າຂອງເຂົາເປື້ອນເປິ ເຂົາເຫລົ່ານັ້ນແລຈະນຸ່ງເຄື່ອງຂາວແຫ່ຕາມເຮົາໄປ, ດ້ວຍວ່າພວກເຂົາເປັນຜູ້ສົມຄວນ. 5.ຜູ້ທີ່ຈະໄດ້ໄຊຊະນະ ຈະທົງເຄື່ອງຂາວ ແລະເຮົາຈະບໍ່ລຶບຊື່ຂອງເຂົາອອກຈາກທະບຽນແຫ່ງຊີວິດ ແຕ່ເຮົາຈະຮັບຮອງເອົາເຂົາຕໍ່ພຣະພັກພຣະບິດາຂອງເຮົາ ແລະຕໍ່ໜ້າຝູງເທວະດາຂອງພຣະອົງ. 6.ຜູ້ໃດມີຫູກໍຈົ່ງຟັງຂໍ້ຄວາມຊຶ່ງພຣະຈິດເຈົ້າ ໄດ້ຊົງກ່າວກັບສັງຄະມົນທົນທັງຫລາຍ”.

ເຖິງສັງຄະມົນທົນຟີລາແດນຟີ

7.“ຈົ່ງຂຽນໄປຍັງເທວະທູດຂອງພຣະເຈົ້າໃນສັງຄະມົນທົນຟີລາແດນຟີ: ພຣະອົງຜູ້ສັກສິດ ຜູ້ສັດຈິງ, ຜູ້ຊົງຖືກະແຈຂອງດາວິດ ຜູ້ຊົງໄຂແລ້ວຈະບໍ່ມີໃຜອັດ ຜູ້ຊົງອັດແລ້ວຈະບໍ່ມີໃຜໄຂ ພຣະອົງຊົງກ່າວວ່າດັ່ງນີ້: “ເຮົາຮູ້ການປະພຶດຂອງເຈົ້າ ເຮົາໄດ້ໄຂປະຕູໄວ້ຕໍ່ໜ້າເຈົ້າ ຊຶ່ງບໍ່ມີໃຜອັດໄດ້ ແລະແມ່ນວ່າເຈົ້າຈະມີກຳລັງພຽງແຕ່ເລັກນ້ອຍ ເຈົ້າກໍຍັງໄດ້ຮັກສາຖ້ອຍຄຳຂອງເຮົາໄວ້ ໂດຍບໍ່ໄດ້ປະຕິເສດນາມຂອງເຮົາ. 9.ເຮົາຈະບັງຄັບໃຫ້ພັກພວກຂອງຊາຕານ ພວກຂີ້ຕົວະທີ່ອ້າງຕົວວ່າເປັນຢິວ ແມ່ນແລ້ວ ເຮົາຈະບັງຄັບໃຫ້ພວກເຂົາມາຂາບລົງແທບຕີນຂອງເຈົ້າ ແລະໃຫ້ຮັບຮູ້ວ່າເຮົາໄດ້ຮັກເຈົ້າ.10.ດ້ວຍວ່າເຈົ້າໄດ້ຮັກສາຄຳສັ່ງແຫ່ງຄວາມພາກພຽນຂອງເຮົາ. ສ່ວນເຮົາ ເຮົາກໍຈະປ້ອງກັນເຈົ້າໃຫ້ພົ້ນຈາກເຫດຮ້າຍທີ່ຈະເກີດຂຶ້ນໃນທົ່ວໂລກ ເພື່ອລອງໃຈຄົນທັງຫລາຍໃນແຜ່ນດິນ. 11.ເຮົາຈະກັບມາໃນໝໍ່ໆນີ້ ຈົ່ງຢຶດໝັ້ນຢູ່ໃນສິ່ງທີ່ເຈົ້າມີຢູ່ນັ້ນ ເພື່ອບໍ່ໃຫ້ໃຜມາຍາດເອົາພວງມະໄລຂອງເຈົ້າໄປໄດ້. 12.ສຳລັບຜູ້ທີ່ຈະໄດ້ໄຊຊະນະ ເຮົາຈະຕັ້ງໃຫ້ເຂົາເປັນເສົາໃນພຣະວິຫານພຣະເຈົ້າຂອງເຮົາ ເຂົາຈະບໍ່ອອກນອກພຣະວິຫານອີກຈັກເທື່ອ ແລະເຈົ້າຈະຈາລຶກພຣະນາມພຣະເຈົ້າຂອງເຮົາໃສ່ຕົວເຂົາໄວ້ ພ້ອມດ້ວຍຊື່ມະຫານະຄອນພຣະເຈົ້າຂອງເຮົາ ຄືນະຄອນເຢຣູຊາແລມໃໝ່ ທີ່ລົງມາຈາກສະຫວັນ ຈາກທີ່ພຳນັກພຣະເຈົ້າຂອງເຮົາ ແລະເຮົາຈະຈາລຶກນາມໃໝ່ຂອງເຮົາໃສ່ຕົວເຂົາອີກດ້ວຍ. 13.ຜູ້ໃດມີຫູກໍຈົ່ງຟັງຂໍ້ຄວາມຊຶ່ງພຣະຈິດເຈົ້າໄດ້ຊົງກ່າວກັບກັບສັງຄະມົນທົນທັງຫລາຍ”.

ເຖິງສັງຄະມົນທົນ ລາວດີເຊ

14.“ຈົ່ງຂຽນໄປຍັງເທວະທູດຂອງພຣະເຈົ້າໃນສັງຄະມົນທົນລາວດີເຊ ພຣະອົງຜູ້ຊົງເປັນອາແມນ ຊົງເປັນພະຍານທີ່ຊື່ສັດແລະທ່ຽງແທ້ ຊົງເປັນກົກເຄົ້າແຫ່ງສັບພະສິ່ງຊຶ່ງພຣະເຈົ້າໄດ້ຊົງສ້າງ ໄດ້ຊົງກ່າວວ່າດັ່ງນີ້: 15.“ເຮົາຮູ້ການປະພຶດຂອງເຈົ້າ ເຈົ້າບໍ່ເຢັນບໍ່ຮ້ອນ ເຮົາຢາກໃຫ້ເຈົ້າເປັນແນວໃດຫລືແນວໜຶ່ງ 16.ຍ້ອນເຈົ້າເປັນພຽງແຕ່ອຸ່ນໆບໍ່ເຢັນບໍ່ຮ້ອນ ເຮົາຈຶ່ງຈະຄາຍເຈົ້າອອກຈາກປາກເຮົາເສຍ 17.ສ່ວນເຈົ້າ ຊ້ຳຄຶດວ່າ ຂ້ອຍຮັ່ງມີແລ້ວ ມີຊັບສິ່ງຂອງຄູນທະວີ ແລະຂ້ອຍບໍ່ຂາດເຂີນຫຍັງເລີຍ, ແຕ່ເຈົ້າບໍ່ເຫັນແຈ້ງເລີຍ ເຈົ້າເປັນຄົນທຸກຮ້ອນ ເປັນຄົນໜ້າສົງສານ ເປັນຄົນຂັດສົນຕາບອດ ແລະເປືອຍກາຍຢູ່ 18.ດ້ວຍເຫດນີ້ ຈົ່ງຕາມຄຳແນະນຳຂອງເຮົາ ໃຫ້ຊື້ເອົາຄຳຊຶ່ງໄຟໄດ້ຫລອມໃຫ້ບໍລິສຸດແລ້ວ ຈາກເຮົາ ເພື່ອຈະເປັນຄົນຮັ່ງມີ ໃຫ້ຊື້ເອົາຜ້າຂາວມາຫົ່ມຕົວ ເພື່ອປົກບັງຄວາມເປືອຍແປນໜ້າລະອາຍຂອງເຈົ້າ ແລະສຸດທ້າຍ ໃຫ້ຊື້ຢາໃສ່ຕາເຈົ້າເພື່ອຈະໄດ້ເຫັນຮຸ່ງ. 19.ສຳລັບພວກທີ່ເຮົາຮັກ ເຮົາກໍມັກຕິຕຽນຂ້ຽນສອນເຂົາ ດັ່ງນີ້ຈົ່ງມີໃຈເຂັ້ມແຂງແລະປັບໃຈໃໝ່ເສຍ. 20.ນີ້ເດ ເຮົາກຳລັງຢືນຢູ່ໜ້າປະຕູແລະເຄາະ, ຖ້າຜູ້ໃດຜູ້ໜຶ່ງໄດ້ຍິນສຽງເຮົາແລະໄຂປະຕູ ເຮົາກໍຈະເຂົ້າໄປຮັບປະທານອາຫານທີ່ເຮືອນເຂົາ ເຂົາແລະເຮົາຈະນັ່ງແປະກັນ. 21.ສຳລັບຜູ້ຈະໄດ້ໄຊຊະນະ ເຮົາຈະໃຫ້ເຂົານັ່ງຢູ່ໃກ້ເຮົາເທິງບັນລັງຂອງເຮົາ ດັ່ງດຽວກັບເຮົາ ເມື່ອໄດ້ໄຊຊະນະແລ້ວ ເຮົາໄດ້ນັ່ງຢູ່ໃກ້ພຣະບິດາຂອງເຮົາເທິງລາດຊະບັນລັງຂອງພຣະອົງ. 22.ຜູ້ໃດມີຫູກໍຈົ່ງຟັງຂໍ້ຄວາມຊຶ່ງພຣະຈິດເຈົ້າໄດ້ຊົງກ່າວກັບສັງຄະມົນທົນທັງຫລາຍ”.