1.ແລ້ວເທວະດາໄດ້ສະແດງໃຫ້ຂ້າພະເຈົ້າເຫັນແມ່ນ້ຳບັນດານຊີວິດ ໃສເໝືອນແກ້ວເພັດ ທີ່ໄຫລພຸ່ງອອກມາຈາກພະລາດຊະບັນລັງຂອງພຣະເຈົ້າ ແລະຂອງພະຊຸມພານ້ອຍ. 2.ຢູ່່ກາງຖະໜົນທີ່ເລາະສອງຟາກຝັ່ງແມ່ນ້ຳ ມີຕົ້ນໄມ້ບັນດານຊີວິດ ທີ່ເປັນໝາກສິບສອງເທື່ອ ເທື່ອລະເດືອນ. ສ່ວນໃບຂອງມັນກໍໃຊ້ປົວບັນດານານາຊາດໃຫ້ຫາຍດີ. 3.ຄວາມໂຫດຮ້າຍຈະບໍ່ມີອີກຕໍ່ໄປ ພະລາດຊະບັນລັງຂອງພຣະເຈົ້າ ແລະຂອງພະຊຸມພານ້ອຍຈະປະທັບຢູ່ໃນນະຄອນ ແລະຝູງຂ້າໃຊ້ຂອງພຣະເຈົ້າຈະໄຫວ້ນະມັດສະການພຣະອົງ. 4.ພວກເຂົາຈະເຫັນພຣະພັກຂອງພຣະອົງ ແລະພຣະນາມຂອງພຣະອົງຈະຊົງປະທັບຢູ່ທີ່ໜ້າຜາກຂອງພວກເຂົາ. 5.ກາງຄືນຈະບໍ່ມີອີກຕໍ່ໄປ ພວກເຂົາຈະບໍ່ຕ້ອງການແສງໂຄມຫລືແສງອາທິດເພື່ອ ເຫັນຮຸ່ງ ດ້ວຍວ່າພຣະອົງເຈົ້າຈະຊົງສ່ອງສະຫວ່າງໃສ່ເຂົາ ແລະເຂົາຈະປົກຄອງຢູ່່ຕະຫລອດໄປເປັນນິດ. 6.ແລ້ວເທວະດາໄດ້ກ່າວບອກຂ້າພະເຈົ້າວ່າ: “ຖ້ອຍຄຳເຫລົ່ານີ້ແນ່ນອນແລະສັດຈິງ ພຣະອົງພຣະເຈົ້າຜູ້ຊົງດົນໃຈບັນດາປະພາສົກ ໄດ້ຊົງສົ່ງເທວະດາຂອງພຣະອົງມາສະແດງໃຫ້ບັນດາຂ້າໃຊ້ຂອງພຣະອົງຮູ້ເຖິງເຫດການ ທີ່ຕ້ອງເກີດເປັນມາໃນບໍ່ຊ້ານີ້. 7.ນີ້ແລການກັບມາຂອງເຮົາໃກ້ເຂົ້າມາແລ້ວ! ບຸນລາບແກ່ຜູ້ທີ່ຢຶດຖືເອົາຄຳທຳນາຍໃນໜັງສືມ້ວນນີ້”. 8.ແມ່ນຂ້າພະເຈົ້າຢວງເປັນຜູ້ໄດ້ເຫັນ ແລະໄດ້ຍິນເຫດການທັງໝົດນັ້ນ ເມື່ອຄຳກ່າວແລະນິມິດໄດ້ສິ້ນສຸດລົງແລ້ວ ຂ້າພະເຈົ້າກໍຂາບລົງແທບຕີນຂອງເທວະດາ ຜູ້ໄດ້ສະເໜີໃຫ້ເຫັນເຫດການທັງໝົດນັ້ນ ເພື່ອນະມັດສະການທ່ານ. 9.ແຕ່ເທວະດາໄດ້ກ່າວກັບຂ້າພະເຈົ້າ ວ່າ: “ບໍ່, ຕ້ອງລະວັງໃຫ້ດີ ເຮົາກໍແມ່ນຜູ້ຮັບໃຊ້ດັ່ງດຽວກັນກັບເຈົ້າແລະບັນດາປະພາສົກທັງຫລາຍ ແລະພວກທີ່ຢຶດຖືເອົາຖ້ອຍຄຳໃນໜັງສືນີ້ໄວ້ ແມ່ນພຣະເຈົ້າທີ່ຕ້ອງນະມັດສະການ”. 10.ເທວະດາຍັງກ່າວກັບຂ້າພະເຈົ້າອີກວ່າ: “ຢ່າປິດບັງຖ້ອຍຄຳທຳນາຍຂອງໜັງສືມ້ວນນີ້ ໄວ້ເລີຍ, ດ້ວຍວ່າວັນເວລາໃກ້ເຂົ້າມາແລ້ວ. 11.ໃຫ້ຄົນບາບເຮັດບາບຕໍ່ໄປ, ໃຫ້ຄົນເປື້ອນໝອງສືບຕໍ່ການເປື້ອນເຂົ້າອີກ, ສ່ວນຄົນຊອບທຳກໍໃຫ້ເຮັດການຊອບທຳຕໍ່ໄປ ແລະໃຫ້ຄົນບຸນສ້າງບຸນທະວີຂຶ້ນ. 12.ນີ້ແລ, ການກັບຄືນມາຂອງເຮົາໃກ້ເຂົ້າມາແລ້ວ, ແລະເຮົາຈະນຳເອົາຄ່າຈ່າຍມາພ້ອມ, ເພື່ອຈະຈ່າຍໃຫ້ແຕ່ລະຄົນ ຕາມຜົນງານຂອງໃຜລາວ”.13.ເຮົາແມ່ນ “ອັນຟາແລະໂອເມກາ” ແມ່ນຜູ້ກ່ອນແລະຜູ້ຫລັງ, ແມ່ນຕົ້ນແລະປາຍ. 14.ບຸນລາບແກ່ພວກທີ່ຊັກຟອກເສື້ອຜ້າຂອງຕົນ, ພວກເຂົາຈະມີສ່ວນໃນຕົ້ນໄມ້ບັນດານຊີວິດ ແລະຈະມີສິດເຂົ້າໃນນະຄອນທາງປະຕູໄດ້. 15.ສ່ວນຝູງໝາ, ພວກໝໍຜີ, ພວກເປື້ອນໝອງ, ພວກຄາຕະກອນ, ພວກໄຫວ້ພະເທັດທຽມ ແລະທຸກຄົນທີ່ມັກເຮັດຄວາມຊົ່ວ, ພວກເຂົາຕ້ອງຢູ່່ນອກ”.

ຂໍ້ຄວາມຕອນທ້າຍ

16.ເຮົາເຢຊູ ໄດ້ໃຊ້ເທວະດາຂອງເຮົາມາປະກາດຢັ້ງຢືນແກ່ພວກທ່ານ ເຖິງສິ່ງທັງມວນທີ່ກ່ຽວຂ້ອງກັບສັງຄະມົນທົນທັງຫລາຍ. ເຮົາແມ່ນໜໍ່ແໜງອອກຈາກເຊື້ອສາຍຂອງດາວິດ, ແມ່ນດາວດວງໃສຮຸ່ງຍາມເຊົ້າ. 17.ພຣະຈິດເຈົ້າແລະພັນລະຍາກ່າວວ່າ: “ເຊີນມາເຖີດ!” ໃຫ້ຜູ້ຟັງກ່າວວ່າ: “ເຊີນມາເຖີດ!” ໃຫ້ຄົນຜູ້ຫິວນ້ຳຫຍັບເຂົ້າມາ ໃຫ້ຄົນຜູ້ປະສົງໄດ້ຮັບນ້ຳແຫ່ງຊີວິດໂດຍບໍ່ຕ້ອງເສຍຄ່າ. 18.ສ່ວນເຮົາ ເຮົາຂໍປະກາດແກ່ທຸກຄົນທີ່ຟັງຄຳທຳນາຍໃນໜັງສືມ້ວນນີ້ວ່າ: “ຖ້າຜູ້ໃດຫາກບັງອາດຕື່ມຂໍ້ຄວາມໃດໃສ່ໜັງສືນີ້, ພຣະເຈົ້າກໍຈະໃຫ້ເຂົາຮັບຜິດຊອບດ້ວຍໄພພິບັດ ຊຶ່ງມີບັນທຶກໄວ້ໃນໜັງສືມ້ວນນີ້! 19.ແລະຖ້າຜູ້ໃດຫາກບັງອາດ ຕັດຂໍ້ຄວາມໃດອອກຈາກໜັງສືທຳນາຍນີ້: ພຣະເຈົ້າກໍຈະຕັດສ່ວນແບ່ງໃນຕົ້ນໄມ້ບັນດານຊີວິດ ແລະໃນນະຄອນສັກສິດ, ຊຶ່ງມີບັນທຶກໄວ້ໃນໜັງສືມ້ວນນີ້ອອກດ້ວຍ!” 20.ຜູ້ທີ່ຢັ້ງຢືນເຖິງເຫດການທັງຫລາຍນີ້ກ່າວວ່າ: “ແມ່ນແລ້ວ, ການກັບຄືນມາຂອງເຮົາໃກ້ເຂົ້າມາແລ້ວ!

ສາທຸ, ເຊີນມາເຖີດ, ໂອພຣະເຢຊູພຣະອົງເຈົ້າ, 21.ຂໍພຣະຄຸນຂອງພຣະເຢຊູພຣະອົງເຈົ້າ ຈົ່ງສະຖິດຢູ່ນຳທຸກຄົນເທີ້ນ! ອາແມນ.