ຟ້າໃໝ່ແລະແຜ່ນດິນໃໝ່

ເຢຣູຊາແລມແດນສະຫວັນ

1.ຕໍ່ມາຂ້າພະເຈົ້າໄດ້ເຫັນຟ້າໃໝ່ແລະດິນໃໝ່, ດ້ວຍວ່າຟ້າເກົ່າແລະດິນເກົ່ານັ້ນໄດ້ສູນຫາຍໄປແລ້ວ, ແລະທະເລກໍບໍ່ມີອີກ. 2.ແລະຂ້າພະເຈົ້າໄດ້ເຫັນນະຄອນສັກສິດ ເຢຣູຊາແລມໃໝ່ທີ່ລົງມາຈາກສະຫວັນ ຈາກສຳນັກຂອງພຣະເຈົ້າ. ນະຄອນນີ້ແຕ່ງຕົວສວຍງາມ ເໝືອນດັ່ງເຈົ້າສາວທີ່ແຕ່ງເພດເພື່ອຕ້ອນຮັບເຈົ້າບ່າວ. 3.ເວລານັ້ນ ຂ້າພະເຈົ້າໄດ້ຍິນສຽງໜຶ່ງດັງກ້ອງມາຈາກພະລາດຊະບັນລັງ ກ່າວວ່າ: “ນີ້ແລສຳນັກຂອງພຣະເຈົ້າຮ່ວມກັບມະນຸດ, ພຣະອົງຈະສະຖິດຢູ່ກັບເຂົາ ພວກເຂົາຈະເປັນປະຊາກອນຂອງພຣະອົງ, ແລະສ່ວນພຣະອົງພຣະເຈົ້າຜູ້ສະຖິດຢູ່ກັບເຂົາ ກໍຈະເປັນພຣະເຈົ້າຂອງພວກເຂົາ. 4.ພຣະອົງຈະເຊັດນ້ຳຕາທຸກຢາດຈາກຕາຂອງເຂົາ: ຄວາມຕາຍຈະບໍ່ມີອີກເລີຍ, ສຽງຮ້ອງໄຫ້, ສຽງຄວນຄາງແລະຄວາມອຸກທຸກກໍຈະບໍ່ມີອີກຕໍ່ໄປ, ດ້ວຍວ່າໂລກເກົ່າໄດ້ສາບສູນໄປແລ້ວ. 5.ແລ້ວພຣະອົງຜູ້ປະທັບຢູ່ເທິງພະລາດຊະບັນລັງປະກາດວ່າ: ນີ້ແລ ເຮົາສ້າງໂລກຈັກກະວານຂຶ້ນໃໝ່. ແລະພຣະອົງຊົງກ່າວຕື່ມອີກວ່າ: ຈົ່ງບັນທຶກໄວ້ ຂໍ້ຄວາມເຫລົ່ານີ້ ເປັນເລື່ອງແນ່ນອນແລະສັດຈິງ.” 6.ພຣະອົງຊົງກ່າວກັບຂ້າພະເຈົ້າອີກວ່າ: ເປັນອັນສຳເລັັດແລ້ວ ເຮົາແມ່ນອັນຟາແລະໂອເມກາ, ເປັນຕົ້ນແລະປາຍ. ມີໃຜຫິວນ້ຳ, ເຮົາ, ເຮົາຈະໃຫ້ຜູ້ນັ້ນໄດ້ດື່ມຈາກບໍ່ນ້ຳບັນດານຊີວິດ ໂດຍບໍ່ໄດ້ໄລ່ຄ່າ. 7.ນີ້ແລແມ່ນສ່ວນພູດຂອງຜູ້ທີ່ໄດ້ໄຊຊະນະ, ເຮົາຈະເປັນພຣະເຈົ້າຂອງເຂົາ ແລະສ່ວນເຂົາຈະເປັນບຸດຂອງເຮົາ. 8.ແຕ່ສຳລັບພວກຂີ້ຢ້ານ, ພວກຄັດຄ້ານ, ພວກທຳການຊົ່ວຊ້າ, ພວກຄາຕະກອນ, ພວກລ່ວງປະເວນີ, ພວກໝໍຜີໝໍເຢົາ, ພວກໄຫວ້ພະເທັດທຽມ, ເວົ້າລວມ ທຸກຄົນທີ່ໃຊ້ເລ່ກົນຕົວະຫລອກ, ສ່ວນມໍລະດົກຂອງເຂົາຈະຢູ່ໃນຂຸມໄຟທີ່ລຸກໄໝ້ຢູ່ດ້ວຍມາດ. ນີ້ແລແມ່ນຄວາມຕາຍຄັ້ງທີສອງ.

ນະຄອນເຢຣູຊາແລມໃໝ່

9.ເວລານັ້ນ, ເທວະດາອົງໜຶ່ງໃນຈຳນວນເຈັດ ທີ່ຖືຂັນເຈັດໜ່ວຍເຕັມດ້ວຍໄພພິບັດທັງເຈັດ ໄດ້ມາກ່າວກັບຂ້າພະເຈົ້າວ່າ: “ເຊີນມາ ເຮົາຈະໃຫ້ເຈົ້າເຫັນເຈົ້າສາວຂອງພະຊຸມພານ້ອຍ.” 10.ເທວະດາໄດ້ຍົກຂ້າພະເຈົ້າດ້ວຍຈິດໃຈຂຶ້ນໄປເທິງພູສູງໃຫຍ່ໜ່ວຍໜຶ່ງ ແລະໄດ້ສະແດງໃຫ້ຂ້າພະເຈົ້າເຫັນນະຄອນສັກສິດ ຄືເຢຣູຊາແລມ ກຳລັງລອຍລົງມາແຕ່ສະຫວັນຈາກພຣະເຈົ້າ. 11.ຮຸ່ງເຮືອງດ້ວຍລັດສະໝີຂອງພຣະເຈົ້າ. ນະຄອນນີ້ມີແສງເໝືອນດັ່ງແກ້ວປະເສີດ ຄືກັບແກ້ວມະນີໂຊດອັນເສາະໃສ. 12.ອ້ອມດ້ວຍກຳແພງສູງໃຫຍ່ ມີປະຕູສິບສອງປ່ອງ ແລະມີເທວະດາປະຈຳຢູ່ປ່ອງລະອົງ ແລະມີຊື່ບັນທຶກໄວ້ຢູ່ເທິງ ແມ່ນຊື່ຂອງສິບສອງຕະກູນຂອງບຸດຫລານອິດສະລະແອນ. 13.ດ້ານຕາເວັນອອກມີປະຕູສາມປ່ອງ, ດ້ານເໜືອສາມປ່ອງ ດ້ານໃຕ້ສາມປ່ອງ ດ້ານຕາເວັນຕົກສາມປ່ອງ. 14.ກຳແພງນະຄອນຕັ້ງຢູ່ເທິງຮາກສິບສອງອັນ ແຕ່ລະຮາກນັ້ນກໍມີຊື່ບັນທຶກຢູ່ເທິງຂອງຜູ້ໜຶ່ງ ໃນຈຳນວນອັກຄະທຳມະທູດທັງສິບສອງຂອງພະຊຸມພານ້ອຍ. 15.ເທວະດາອົງທີ່ປາກກັບຂ້າພະເຈົ້ານັ້ນ ຖືລຳອໍ້ຊຶ່ງມີຂີດໝາຍວັດແທກ ເຮັດດ້ວຍຄຳ ເພື່ອຈະວັດແທກນະຄອນພ້ອມທັງປະຕູແລະກຳແພງ. 16.ນະຄອນນັ້ນມີຮູບສີ່ຫລ່ຽມມົນທົນ ລວງຍາວລວງກວ້າງທໍ່ກັນ. ເທວະດາກໍວັດແທກນະຄອນດ້ວຍລຳອໍ້ນັ້ນ ມີ 12.000 ວາ; ລວງຍາວ ລວງກວ້າງ ແລະລວງສູງເທົ່າສະເໝີກັນ. 17.ແລ້ວເພິ່ນໄດ້ວັດແທກກຳແພງ, ມີ 144 ສອກ. ເທວະດາໄດ້ວັດແທກຕາມເຄື່ອງວັດແທກທຳມະດາ. 18.ກຳແພງນັ້ນກໍ່ດ້ວຍແກ້ວມະນີໂຊດ ແລະນະຄອນສ້າງດ້ວຍຄຳບໍລິສຸດເໝືອນດັ່ງແກ້ວປະເສີດ. 19.ຮາກຂອງກຳແພງປະດັບດ້ວຍເພັດພອຍທຸກຊະໜິດ: ຮາກທີໜຶ່ງດ້ວຍແກ້ວມະນີໂຊດ, ຮາກທີສອງດ້ວຍໄພທູນ, ຮາກທີສາມດ້ວຍໂມຮາ, ຮາກທີສີ່ດ້ວຍມໍລະກົດ. 20.ຮາກທີຫ້າດ້ວຍບຸດ, ຮາກທີຫົກດ້ວຍພິລາ, ຮາກທີເຈັດດ້ວຍບຸດສະບາຄຳນ້ຳແກ່, ຮາກທີແປດດ້ວຍເພທາຍ, ຮາກທີເກົ້າດ້ວຍບຸດສະບາຄຳນ້ຳອ່ອນ, ຮາກທີສິບດ້ວຍຢົກ, ຮາກທີສິບເອັດດ້ວຍນິນ, ຮາກທີສິບສອງດ້ວຍແກ້ວເພທາຍສີມ່ວງ. 21.ແລະປະຕູທັງສິບສອງ ເຮັດດ້ວຍໄຂ່ມຸກສິບສອງໜ່ວຍ, ປະຕູລະໜ່ວຍ, ແລະຖະໜົນໃນນະຄອນເປັນຄຳບໍລິສຸດສ່ອງໃສເໝືອນແກ້ວ. 22. ຂ້າພະເຈົ້າບໍ່ໄດ້ເຫັນມີພຣະວິຫານໃນນະຄອນນັ້ນເລີຍ ດ້ວຍວ່າພຣະອົງພຣະເຈົ້າຜູ້ເປັນເຈົ້າສັບພະສິ່ງທັງປວງ ແລະພະຊຸມພານ້ອຍຊົງເປັນພຣະວິຫານຢູ່ແລ້ວ. 23.ນະຄອນນັ້ນບໍ່ຕ້ອງການດວງອາທິດແລະດວງຈັນສ່ອງສະຫວ່າງເລີຍ ດ້ວຍວ່າລັດສະໝີຂອງພຣະເຈົ້າຊົງສ່ອງສະຫວ່າງໃຫ້ ແລະພະຊຸມພານ້ອຍຊົງເປັນດວງປະທີບຢູ່ແລ້ວ. 24.ນານາຊາດຈະເດີນຕາມແສງສະຫວ່າງຂອງນະຄອນນັ້ນ ແລະບັນດາກະສັດແຫ່ງແຜ່ນດິນໂລກ ຈະນຳເອົາຊັບສົມບັດຂອງຕົນເຂົ້າມາໃນນະຄອນນັ້ນ. 25.ປະຕູທັງຫລາຍໃນນະຄອນນັ້ນຈະເປີດຢູ່່່ໃນເວລາກາງເວັນ ດ້ວຍວ່າຈະບໍ່ມີກາງຄືນ. 26.ເຂົາຈະນຳເອົາຊັບສົມບັດແລະກຽດຕິສັກຂອງນານາຊາດມາສູ່ນະຄອນນັ້ນ. 27.ສິ່ງໜຶ່ງສິ່ງໃດທີ່ຊົ່ວມົວໝອງ ຫລື ພວກທີ່ມັກສ້າງການຊົ່ວຊ້າໜ້າໜ່າຍຫລືການຜິດບາບ ຈະເຂົ້າໄປໃນນະຄອນນັ້ນບໍ່ໄດ້ເດັດຂາດ ມີແຕ່ບັນດາຜູ້ທີ່ມີຊື່ບັນທຶກໄວ້ໃນທະບຽນແຫ່ງຊີວິດຂອງພະຊຸມພານ້ອຍເທົ່ານັ້ນ ທີ່ຈະເຂົ້າໄດ້.