ເຖິງສັງຄະມົນທົນເອເຟໂຊ

1.ຈົ່ງຂຽນໄປຍັງເທວະທູດຂອງພຣະເຈົ້າໃນສັງຄະມົນທົນເອເຟໂຊ ພຣະອົງຜູ້ຊົງຖືດາວເຈັດດວງໃນພະຫັດຂວາ ແລະຊົງສະເດັດໄປມາຫວ່າງກາງຕີນທຽນຄຳເຈັດອັນ ໄດ້ຊົງກ່າວວ່າດັ່ງນີ້ 2.“ເຮົາຮູ້ຈັກຄວາມປະພຶດຂອງເຈົ້າ ຮູ້ຈັກຄວາມອິດເມື່ອຍແລະອົດພຽນຂອງເຈົ້າ.ແລະເຮົາຮູ້ວ່າ ເຈົ້າບໍ່ສາມາດທົນຕໍ່ພວກຄົນອະທຳ ເຈົ້າໄດ້ທົດລອງເຂົາພວກນັ້ນ ທີ່ອ້າງຕົວວ່າເປັນອັກຄະທຳມະທູດ ແລະເຈົ້າກໍເຫັນວ່າພວກເຂົາເປັນແຕ່ຄົນຂີ້ຕົວະ. 3.ເຮົາຮູ້ວ່າເຈົ້າມີຄວາມອົດພຽນ: ບໍ່ແມ່ນເພື່ອພຣະນາມຂອງເຮົາບໍ ທີ່ໄດ້ອົດທົນເອົາດັ່ງນີ້ ໂດຍບໍ່ຮູ້ອິດເມື່ອຍ? 4.ແຕ່ເຮົາຍັງມີຂໍ້ຕໍ່ວ່າເຈົ້າຄື ເຈົ້າໄດ້ເສຍຄວາມຮັກເດີມຂອງເຈົ້າໄປແລ້ວ. 5.ດ້ວຍເຫດນີ້ ຈົ່ງລະນຶກວ່າ ເຈົ້າໄດ້ຕົກໄປຮອດໃສ, ຈົ່ງກັບໃຈໃໝ່ເສຍ ແລະປະພຶດຕົນເໝືອນແຕ່ກ່ອນ ບໍ່ດັ່ງນັ້ນ ເຮົາຈະມາຫາເຈົ້າ ຖ້າເຈົ້າບໍ່ຍອມກັບໃຈໃໝ່ ເຮົາຈະຍົກຍ້າຍຕີນທຽນຂອງເຈົ້າຈາກບ່ອນມັນເສຍ. 6.ແຕ່ຍັງມີສິ່ງໜຶ່ງສຳລັບເຈົ້າ ຄື ເຈົ້າກຽດໜ່າຍກິດຈະການຂອງຄະນະ “ນິໂກລາຍ” ຊຶ່ງເຮົາເອງກໍກຽດໜ່າຍດ້ວຍ. 7.ຜູ້ໃດມີຫູກໍຈົ່ງຟັງຂໍ້ຄວາມ ຊຶ່ງພຣະຈິດເຈົ້າຊົງກ່າວກັບສັງຄະມົນທົນທັງຫລາຍວ່າ: ສຳລັບຜູ້ທີ່ຈະໄດ້ໄຊຊະນະ ເຮົາຈະໃຫ້ເຂົາໄດ້ກິນໝາກໄມ້ຈາກຕົ້ນໄມ້ບັນດານຊີວິດ ທີ່ຕັ້ງຢູ່ໃນສວນອາດອຸທະຍານຂອງພຣະເຈົ້າ”.

ເຖິງສັງຄະມົນທົນສະມຽກນາ

8.“ຈົ່ງຂຽນໄປຍັງເທວະທູດຂອງພຣະເຈົ້າໃນສັງຄະມົນທົນສະມຽກນາ ພຣະອົງຜູ້ຊົງເປັນຜູ້ຕົ້ນແລະຜູ້ປາຍ ຜູ້ໄດ້ສິ້ນພຣະຊົນແລະໄດ້ກັບຄືນຊີບ ໄດ້ຊົງກ່າວວ່າດັ່ງນີ້: “ເຮົາຮູ້ຈັກຄວາມທຸກລຳບາກແລະຄວາມຍາກຈົນຂອງເຈົ້າ ແຕ່ວ່າເຈົ້າຮັ່ງມີຢູ່ ແລະເຮົາຮູ້ຈັກການດູໝິ່ນປະໝາດຂອງບັນດາຜູ້ທີ່ອ້າງຕົວວ່າເປັນຊາວຢິວ. ພວກເຂົາເປັນພັກພວກຂອງຊາຕານ ແມ່ນຢູ່. 10.ຢ່າກົວຢ້ານຄວາມທຸກທໍຣະມານທີ່ກຳລັງຖ້າເຈົ້າຢູ່ນັ້ນເລີຍ: ພະຍາມານຕຽມພ້ອມແລ້ວ ທີ່ຈະເອົາບາງຄົນໃນພວກເຈົ້າໄປຍັດໃສ່ຄຸກ ເພື່ອຫລອກລວງພວກເຈົ້າ ແລະພວກເຈົ້າຈະຮັບທົນຊົ່ວໄລຍະສິບວັນ ໃຫ້ເຈົ້າຕັ້ງໝັ້ນຈົນເຖິງຕາຍ ແລະເຮົາຈະມອບພວງມາລາແຫ່ງຊີວິດໃຫ້ແກ່ເຈົ້າ. 11.ຜູ້ໃດມີຫູກໍຈົ່ງຟັງຂໍ້ຄວາມຊຶ່ງພຣະຈິດເຈົ້າ ຊົງກ່າວກັບສັງຄະມົນທົນທັງຫລາຍວ່າ: “ຜູ້ທີ່ໄດ້ຮັບໄຊຊະນະຈະບໍ່ກົວຢ້ານຫຍັງເລີຍ ຈາກຄວາມຕາຍຄັ້ງທີສອງ”.

ເຖິງສັງຄະມົນທົນແປກກາມ

12.“ຈົ່ງຂຽນໄປຍັງເທວະທູດຂອງພຣະເຈົ້າໃນສັງຄະມົນທົນແປກກາມ ພຣະອົງຜູ້ຊົງຖືດາບແຫລມສອງຄົມ ໄດ້ຊົງກ່າວວ່າດັ່ງນີ້ 13.ເຮົາຮູ້ຈັກທີ່ຢູ່ປະຈຳຂອງເຈົ້າ ຮູ້ວ່າທີ່ນັ້ນເປັນບັນລັງຂອງຊາຕານ ແຕ່ວ່າເຈົ້າຍັງຢຶດໝັ້ນໃນພຣະນາມຂອງເຮົາ ແລະບໍ່ໄດ້ປະຕິເສດຄວາມເຊື່ອໃນເຮົາ ແມ່ນວ່າໃນຄາວ “ອັນຕີປາດ” ພະຍານຜູ້ສັດຊື່ຂອງເຮົາ ຜູ້ໄດ້ຖືກຂ້າຕາຍໃນທ່າມກາງພວກເຈົ້າ ໃນເມືອງຊາຕານນີ້. 14.ແຕ່ເຮົາຍັງມີຂໍ້ເລື່ອງບາງຢ່າງຢາກຕໍ່ວ່າກັບເຈົ້າ: ມີບາງຄົນໃນພວກເຈົ້າທີ່ຖືຕາມຄຳສອນຂອງບາລາອຳ ຜູ້ໄດ້ສອນໃຫ້ກະສັດບາລັກໃຊ້ເລ່ກົນຍົວະພວກອິດສະລະແອນໃຫ້ກິນຊີ້ນ ທີ່ໄດ້ບູຊາພະທຽມແລ້ວ ແລະໄດ້ລ່ວງປະເວນີ. 15.ຖ້າເປັນດັ່ງນີ້ກໍແປວ່າ ໃນພວກເຈົ້າຍັງມີບາງຄົນທີ່ຖືຕາມຄຳສອນຂອງຄະນະນີໂກລາຍດ້ວຍ. 16.ດ້ວຍເຫດນີ້ ຈົ່ງກັບໃຈໃໝ່ເສຍ ຖ້າບໍ່ດັ່ງນັ້ນ ເຮົາຈະມາຫາເຈົ້າໃນບໍ່ຊ້າ ເພື່ອປາບເຂົາເຫລົ່ານັ້ນດ້ວຍດາບຈາກປາກຂອງເຮົາ. 17.ຜູ້ໃດມີຫູກໍຈົ່ງຟັງຂໍ້ຄວາມຊຶ່ງພຣະຈິດເຈົ້າຊົງກ່າວກັບສັງຄະມົນທົນທັງຫລາຍວ່າ: “ສຳລັບຜູ້ທີ່ຈະໄດ້ໄຊຊະນະ ເຮົາຈະປະທານມານນາທີ່ເຊື່ອງໄວ້ ແລະເຮົາຈະມອບຫີນຂາວໃຫ້ເຂົາອີກດ້ວຍ ເປັນຫີນທີ່ມີຊື່ໃໝ່ຈາລຶກໄວ້ ຊຶ່ງບໍ່ມີໃຜຮູ້ນອກຈາກຜູ້ທີ່ຮັກເທົ່ານັ້ນ”.

ເຖິງສັງຄະມົນທົນເຈຍຕີຣາ (ທີອາຕີ)

18.“ຈົ່ງຂຽນໄປຍັງເທວະທູດຂອງພຣະເຈົ້າໃນສັງຄະມົນທົນເຈຍຕີຣາ ພຣະບຸດຂອງພຣະເຈົ້າ ຜູ້ມີພຣະເນດເໝືອນແປວໄຟ ແລະມີພະບາດຄ້າຍຄືກັບທອງເຫລືອງ ໄດ້ຊົງກ່າວວ່າດັ່ງນີ້: 19.ເຮົາຮູ້ຈັກຄວາມປະພຶດຂອງເຈົ້າ ເຮົາຮູ້ຈັກຄວາມຮັກ ຄວາມເຊື່ອ ຄວາມເສຍສະລະ ແລະຄວາມອົດພຽນ ຊຶ່ງເຈົ້າສຳແດງອອກມາໃຫ້ເຮົາຮູ້ວ່າ ກິດຈະການຂອງເຈົ້າກ້າວກອງຂຶ້ນຢ່າງບໍ່ຮູ້ຢຸດຮູ້ຖອຍ. 20.ແຕ່ເຮົາມີຂໍ້ຢາກຕໍ່ວ່າກັບເຈົ້າ ກ່ຽວໃນເລື່ອງທີ່ຍັງຍອມອົດຟັງຜູ້ຍິງຊື່ເຊຊາແບນ ທີ່ອ້າງຕົວເປັນປະພາສົກ ຍິງຜູ້ນີ້ສອນແລະລໍ້ລວງພວກຂ້າໃຊ້ຂອງເຮົາ ໃຫ້ລ່ວງປະເວນີໂດຍກິນຊີ້ນທີ່ໄດ້ບູຊາພະທຽມແລ້ວ. 21.ເຮົາໄດ້ປ່ອຍໃຫ້ຍິງນັ້ນມີເວລາພໍທີ່ຈະກັບໃຈໃໝ່ໄດ້, ແຕ່ເຂົາບໍ່ຍອມກັບໃຈຈາກການລ່ວງປະເວນີຂອງເຂົາ. 22.ດັ່ງນີ້ເຮົາຈະໃຫ້ຍິງນັ້ນລົ້ມນອນຄາຕຽງແຫ່ງຄວາມເຈັບປວດ ແລະສ່ວນພັກພວກທີ່ລ່ວງປະເວນີນັ້ນ ເຮົາກໍຈະໃຫ້ເຂົາໄດ້ປະສົບກັບຄວາມທຸກລຳບາກອັນແສບໜັກ, ເວັ້ນໄວ້ແຕ່ພວກເຂົາຈະກັບໃຈໃໝ່ ຈາກຄວາມປະພຶດຊົ່ວຊ້າຂອງພວກເຂົາ. 23.ສ່ວນພວກລູກນ້ອງຂອງຍິງນັ້ນ ເຮົາຈະປະທານໃຫ້ພວກເຂົາຕາຍເສຍ, ເຫັນດັ່ງນີ້ ສັງຄະມົນທົນທັງໝົດຈະຮູ້ໄດ້ວ່າ ແມ່ນເຮົາຜູ້ຢັ່ງຮູ້ໃນຈິດໃຈ ແລະເຮົາຈະຈ່າຍບຳເໜັດໃຫ້ພວກເຈົ້າທຸກຄົນ ຕາມຜົນງານຂອງໃຜລາວ.24.ສ່ວນພວກເຈົ້າເອງທີ່ເຈຍຕີຣາ ຄື ພວກທີ່ບໍ່ຍອມມີສ່ວນໃນຄຳສອນນັ້ນ ແລະບໍ່ຮູ້ເລື່ອງໃນສິ່ງທີ່ເຂົາເອີ້ນວ່າ “ຄວາມເລິກລັບຂອງຊາຕານ” ນັ້ນ ເຮົາຂໍປະກາດກັບພວກເຈົ້າວ່າ ເຮົາບໍ່ມອບພາລະອື່ນໃດຕື່ມໃຫ້ອີກ 25.ເວັ້ນເສຍແຕ່ສິ່ງທີ່ພວກເຈົ້າມີຢູ່ແລ້ວ ຈົ່ງຢຶດຖືໄວ້ໃຫ້ໝັ້ນຄົງຈົນກວ່າເຮົາຈະກັບມາ. 26.ສຳລັບຜູ້ທີ່ຈະໄດ້ໄຊຊະນະ ຄືຜູ້ທີ່ຈະຕັ້ງໝັ້ນໃນການຮັບໃຊ້ເຮົາຈົນຮອດຂັ້ນສຸດທ້າຍ, ເຮົາຈະມອບສິດອຳນາດໃຫ້ປົກຄອງປະຊາຊາດທັງຫລາຍ 27.ເຂົາຈະບັງຄັບບັນຊາປະຊາຊາດດ້ວຍຄ້ອນເທົ້າເຫລັກ ເໝືອນດັ່ງຊ່າງປັ້ນທັບພາຊະນະປັ້ນດ້ວຍດິນໜຽວ. 28.ດັ່ງທີ່ເຮົາເອງໄດ້ຮັບສິດອຳນາດນີ້ຈາກພຣະບິດາຂອງເຮົາເໝືອນກັນ ແລະເຮົາຈະປະທານດາວເພັກໃຫ້ເຂົາດ້ວຍ. 29.ຜູ້ໃດມີຫູກໍຈົ່ງຟັງຂໍ້ຄວາມຊຶ່ງພຣະຈິດເຈົ້າ ໄດ້ຊົງກ່າວກັບສັງຄະມົນທົນທັງຫລາຍ”.