ການພິພາກສາໂທດໃສ່ນະຄອນບາບີລອນ 

ຍິງໂສເພນີຜູ້ລືນາມ

1.ໃນເວລານັ້ນ ເທວະດາອົງໜຶ່ງໃນເຈັດອົງທີ່ຖືຈອກເຈັດໜ່ວຍນັ້ນ ໄດ້ມາຫາຂ້າພະເຈົ້າ ແລະກ່າວວ່າ: “ເຊີນມາ, ເຮົາຈະໃຫ້ເຈົ້າເຫັນການຕັດສິນໂທດຂອງຍິງໂສເພນີຜູ້ລືນາມ ທີ່ນັ່ງຢູ່ແຄມແມ່ນ້ຳໃຫຍ່. 2.ແມ່ນກັບຍິງນັ້ນແລ້ວ ທີ່ກະສັດທັງຫລາຍໃນໂລກໄດ້ທຳຄວາມຊົ່ວລາມົກ ແລະຊາວໂລກທັງຫລາຍໄດ້ກິນອິ່ມມຶນເມົາ ດ້ວຍເຫລົ້າແຫ່ງການຜິດປະເວນີຂອງມັນ” 3.ເທວະດາອົງນັ້ນຈຶ່ງໄດ້ຍົກເອົາຂ້າພະເຈົ້າ ໄປໃນທີ່ປ່ຽວແຫ່ງໜຶ່ງທາງຈິດໃຈ, ແລະຂ້າພະເຈົ້າໄດ້ເຫັນຍິງຄົນໜຶ່ງ ນັ່ງຢູ່ເທິງຫລັງສັດຮ້າຍສີແດງເຂັ້ມໂຕໜຶ່ງ ຊຶ່ງໝົດໂຕເຕັມໄປດ້ວຍຄຳຂວັນຫຍາບຄາຍ ແລະຊຶ່ງມີເຈັດຫົວແລະສິບເຂົາ. 4.ສ່ວນຍິງນັ້ນກໍນຸ່ງ ເຄື່ອງສີມ່ວງອ່ອນແລະສີແດງເຂັ້ມ ປະດັບປະດາດ້ວຍເຄື່ອງຄຳ, ດ້ວຍເພັດພອຍແລະດ້ວຍແກ້ວມຸກດາຕ່າງໆ, ມືຂອງເຂົາຖືຈອກຄຳເຕັມດ້ວຍຄວາມຊົ່ວຊ້າໜ້າກຽດແຫ່ງການລ່ວງປະເວນີຂອງເຂົາ. 5.ເທິງໜ້າຜາກຍິງນັ້ນ ມີຊື່ໜຶ່ງຂຽນຕິດໄວ້ວ່າດັ່ງນີ້: ສິ່ງເລິກລັບ! “ບາບີລອນມະຫານະຄອນ ແມ່ຂອງພວກຍິງໂສເພນີ ຜູ້ໜ້າກຽດທັງຫລາຍໃນແຜ່ນດິນໂລກ”. 6.ແລະຕໍ່ຕາຂ້າພະເຈົ້າ ຍິງນັ້ນກຳລັງດື່ມມຶນເມົາດ້ວຍເລືອດຂອງພວກນັກບຸນ ແລະພວກມໍລະນະສັກຂີຂອງພຣະເຢຊູເຈົ້າ. ເມື່ອເຫັນຍິງນັ້ນທູນ ຂ້າພະເຈົ້າກໍອັດສະຈັນໃຈຢ່າງໃຫຍ່. 7.ແຕ່ເທວະດາໄດ້ກ່າວຖາມຂ້າພະເຈົ້າວ່າ: “ເປັນຫຍັງຈຶ່ງອັດສະຈັນໃຈ? ເຮົາຈະບອກໃຫ້ທ່ານຮູ້ເຖິງຂໍ້ເລິກລັບຂອງຍິງນັ້ນ ແລະຂອງສັດຮ້າຍ ໂຕມີເຈັດຫົວແລະສິບເຂົາ ຊຶ່ງຍິງນັ້ນນັ່ງຢູ່ເທິງຫລັງ.

ຄວາມໝາຍຂອງສັດຮ້າຍແລະຂອງຍິງໂສເພນີ

8.ສັດຮ້າຍໂຕນັ້ນໄດ້ເປັນຢູ່ໃນຄາວກ່ອນ ແຕ່ດຽວນີ້ໄດ້ຫາຍໄປແລ້ວ ມັນຈວນຈະກັບຂຶ້ນມາຈາກເຫວເລິກ ແຕ່ເພື່ອຄວາມຈິບຫາຍຂອງມັນ, ແລະບັນດາຊາວໂລກ ທີ່ບໍ່ມີຊື່ບັນທຶກໄວ້ໃນບັນຊີແຫ່ງຊິວິດຕັ້ງແຕ່ເລີ່ມມີໂລກ ກໍປະຫລາດໃຈ ເມື່ອເຫັນສັດຮ້າຍໂຕນັ້ນ ຍ້ອນ ມັນໄດ້ເປັນຢູ່ໃນຄາວກ່ອນ ດຽວນີ້ໄດ້ຫາຍໄປ ແລະຈວນຈະປາກົດມາອີກ. 9.ຢູ່ນີ້ ຕ້ອງໃຊ້ສະຕິປັນຍາ ຕ້ອງມີຄວາມສະຫລາດຮູ້! ເຈັດຫົວນັ້ນ ໝາຍເຖິງພູນ້ອຍເຈັດໜ່ວຍ ຊຶ່ງຍິງນັ້ນນັ່ງຢູ່ເທິງ. 10.ຍັງໝາຍເຖິງກະສັດເຈັດອົງອີກ ຊຶ່ງຫ້າອົງໄດ້ລ່ວງຫາຍໄປແລ້ວ ອົງໜຶ່ງຍັງຄົງຢູ່ ແລະອົງສຸດທ້າຍຍັງບໍ່ທັນມາຮອດ ເມື່ອມາແລ້ວທ່ານກໍຈະຄົງຢູ່ຊົ່ວໄລຍະໜຶ່ງ 11. ສ່ວນສັດຮ້າຍໂຕໄດ້ເປັນຢູ່ໃນຄາວກ່ອນ ແຕ່ບັດນີ້ໄດ້ຫາຍໄປແລ້ວນັ້ນ ມັນເອງປະກອບເປັນອົງຖ້ວນແປດ, ແຕ່ກໍຍັງເປັນໜຶ່ງໃນເຈັດນັ້ນດ້ວຍ ມັນຈະໄປສູ່ຄວາມຈິບຫາຍຂອງມັນ. 12.ສ່ວນວ່າເຂົາສິບເຂົານັ້ນ ໝາຍເຖິງກະສັດສິບອົງ ພວກທ່ານຍັງບໍ່ທັນໄດ້ຮັບກຽດເປັນກະສັດ ແຕ່ຈະໄດ້ຮັບສິດເປັນກະສັດຊົ່ວໄລຍະໜຶ່ງຊົ່ວໂມງເທົ່ານັ້ນ ຮ່ວມກັບສັດຮ້າຍໂຕນັ້ນ. 13.ພວກທ່ານພ້ອມພຽງກັນທີ່ຈະມອບສິດແລະອຳນາດຂອງຕົນໃຫ້ແກ່ສັດຮ້າຍໂຕນັ້ນ 14.ພວກທ່ານຈະສູ້ຮົບກັບພະຊຸມພານ້ອຍ ແລະພະຊຸມພານ້ອຍຈະໄດ້ໄຊຊະນະຕໍ່ພວກທ່ານ, ຮ່ວມກັບຂ້າບໍລິວານຂອງພຣະອົງ ຜູ້ໄດ້ຮັບຮຽກເອີ້ນ ຜູ້ໄດ້ຮັບເລືອກສັນ ຜູ້ໄດ້ຊື່ສັດ ດ້ວຍວ່າພຣະອົງຊົງເປັນຈອມເຈົ້າ ແລະຈອມກະສັດທັງຫລາຍ. 15.ເທວະດາກ່າວຕໍ່ໄປວ່າ: “ສ່ວນວ່າແມ່ນ້ຳ ຊຶ່ງທ່ານເຫັນຍິງໂສເພນີນັ່ງຢູ່ແຄມນັ້ນ ໝາຍເຖິງຊົນຊາດ ມວນຊົນ ປະຊາຊາດ ແລະພາສາຕ່າງໆ. 16.ແຕ່ວ່າເຂົາທັງສິບເຂົານັ້ນພ້ອມກັບສັດຮ້າຍ ຈະກຽດຊັງຍິງໂສເພນີ, ຈະປອກລອກສິ້ນເສື້ອ ໃຫ້ຕົນຕົວມັນເປືອຍແປນໄປ ແລ້ວກໍຈີກກິນຊີ້ນ ແລະຈະເອົາໄຟເຜົາມັນເສຍ 17.ດ້ວຍວ່າພຣະເຈົ້າໄດ້ຊົງດົນໃຈເຂົາ ໃຫ້ທຳຕາມແຜນການຂອງພຣະອົງເອງ ແລະໃຫ້ພ້ອມພຽງກັນມອບອຳນາດກະສັດຂອງຕົນໃຫ້ແກ່ສັດຮ້າຍນັ້ນ ຈົນພຣະວາຈາຂອງພຣະອົງຈະໄດ້ສຳເລັດໄປ. 18.ສ່ວນຍິງຜູ້ນັ້ນແມ່ນມະຫານະຄອທີ່ມີອຳນາດເໜືອກະສັກທັງຫລາຍທົ່ວແຜ່ນດິນໂລກ”.