ເງືອກມອບອຳນາດໃຫ້ສັດຮ້າຍ

1.ເວລານັ້ນ ຂ້າພະເຈົ້າໄດ້ເຫັນສັດຮ້າຍໂຕໜຶ່ງຂຶ້ນມາຈາກທະເລ ມີເຈັດຫົວແລະສິບເຂົາ, ຢູ່ເທິງເຂົາມີມຸງກຸດສິບອັນ ແລະຢູ່ເທິງຫົວມີຄຳດ່າສົບປະໝາດ. 2.ສັດຮ້າຍໂຕນີ້ມີຮູບຮ່າງຄ້າຍກັບເສືອເຫລືອງ, ມີຕີນໝີ ແລະປາກຄືປາກສິງ. ແລະເງືອກໃຫຍ່ໄດ້ມອບລິດເດດແລະບັນລັງ ພ້ອມດ້ວຍລາດຊະອານາເຂດອັນກວ້າງໃຫຍ່ໃຫ້ແກ່ສັດໂຕນັ້ນ. 3.ຫົວໜຶ່ງຂອງສັດຮ້າຍນັ້ນປາກົດວ່າ ໄດ້ຖືກຟັນເຖິງຕາຍ ແຕ່ບາດນັ້ນໄດ້ຫາຍດີແລ້ວ ຄົນທັງໂລກຈຶ່ງອັດສະຈັນໃຈ ແລະພ້ອມກັນຕິດຕາມສັດໂຕນັ້ນ. 4.ພວກເຂົາຂາບລົງຕໍ່ໜ້າເງືອກ ເພາະມັນໄດ້ມອບອານາຈັກແກ່ສັດໂຕນັ້ນ ແລະພວກເຂົາຂາບລົງຕໍ່ໜ້າສັດໂຕນັ້ນ ໂດຍກ່າວວ່າ “ໃຜຈະທຽບເທົ່າກັບສັດນີ້ໄດ້, ແລະໃຜຈະສາມາດຕໍ່ສູ້ກັບສັດເຫລົ່ານີ້ໄດ້?” 5.ມັນໄດ້ຮັບອານຸຍາດໃຫ້ກ່າວເວົ້າຖ້ອຍຄຳຈອງຫອງ ແລະຄຳດ່າປ້ອຍສົບປະໝາດ ມັນໄດ້ອານຸຍາດໃຫ້ ເຮັດຢ່າງນັ້ນຕະຫລອດ 22 ເດືອນ. 6.ມັນຈຶ່ງເລີ່ມກ່າວດ່າສົບປະໝາດພຣະເຈົ້າ ດ່າສົບປະໝາດພຣະນາມແລະທີ່ພຳນັກຂອງພຣະອົງ ແລະພວກທີ່ອາໄສຢູ່ໃນສະຫວັນ. 7.ມັນໄດ້ຮັບອານຸຍາດໃຫ້ສູ້ຮົບກັບພວກນັກບຸນ ແລະໃຫ້ໄດ້ຊະນະ, ມັນໄດ້ຮັບສິດອຳນາດເໜືອຊົນທຸກຕະກຸນ ທຸກຊາດ ທຸກພາສາແລະທຸກປະເທດ. 8.ບັນດາຄົນທັງໂລກຈະພ້ອມກັນບູຊານະມັດສະການສັດຮ້າຍໂຕນັ້ນ ຄືທຸກຄົນທີ່ບໍ່ມີຊື່ບັນທຶກໄວ້ແຕ່ສະໄໝສ້າງໂລກ ໃນທະບຽນແຫ່ງຊີວິດຂອງພະຊຸມພານ້ອຍ ຜູ້ຊົງຖືກແທງຄໍ. 9.ຜູ້ໃດມີຫູກໍຈົ່ງຟັງເອົາ. 10.ໂສ້ຈະມາຮອດຜູ້ທີ່ຖືກໂສ້! ຄວາມຕາຍດ້ວຍດາບກໍຈະມາເຖິງຜູ້ທີ່ຕ້ອງຕາຍດ້ວຍດາບ! ນີ້ແຫລະອັນທີ່ເປັນພື້ນຖານແຫ່ງຄວາມໝັ້ນຄົງ ແລະຄວາມເຊື່ອໝັ້ນຂອງພວກນັກບຸນ.

ປະພາສົກທຽມທີ່ຮັບໄຊ້ສັດຮ້າຍ

11.ຕໍ່ຈາກນັ້ນ ຂ້າພະເຈົ້າໄດ້ເຫັນສັດຮ້າຍໂຕໜຶ່ງອີກ ຂຶ້ນມາຈາກພື້ນດິນ ມີສອງເຂົາເໝືອນແກະນ້ອຍ ແຕ່ປາກເວົ້າຄືໂຕເງືອກ. 12.ມັນຮັບໃຊ້ໃຫ້ສິດອຳນາດຂອງສັດໂຕກ່ອນນັ້ນ ແຜ່ຂະຫຍາຍທົ່ວໄປ ແລະມັນເຮັດໃຫ້ແຜ່ນດິນໂລກແລະຄົນທັງຫລາຍບູຊານະມັດສະການສັດໂຕກ່ອນນັ້ນ ທີ່ມີບາດແຜເຖິງຕາຍນັ້ນຫາຍດີແລ້ວ 13.ສັດໂຕນີ້ໄດ້ສະແດງໝາຍສຳຄັນອັນໃຫຍ່ ຈົນສາມາດເຮັດໃຫ້ໄຟຕົກຈາກຟ້າ ລົງສູ່ແຜ່ນດິນໂລກ ຕໍ່ສາຍຕາຂອງມະນຸດທຸກຄົນ. 14.ແລະດ້ວຍໝາຍສຳຄັນຊຶ່ງມັນໄດ້ຮັບອານຸຍາດໃຫ້ເຮັດໄດ້ ເພື່ອຮັບໃຊ້ສັດໂຕກ່ອນນັ້ນ ມັນຫລອກລວງຄົນທັງຫລາຍໃນແຜ່ນດິນ ໂດຍສັ່ງເຕືອນໃຫ້ເຂົາປັ້ນ ຫລໍ່ຮູບສັດໂຕຖືກຟັນແຕ່ບໍ່ຕາຍນັ້ນຂຶ້ນ 15.ມັນໄດ້ຮັບສິດຈົນສາມາດເຮັດໃຫ້ຮູບສັດໂຕນັ້ນ ມີຊີວິດແລະປາກເວົ້າໄດ້ ແລະມັນມີສິດເຮັດໃຫ້ທຸກຄົນທີ່ບໍ່ຍອມບູຊານະມັດສະການຮູບສັດໂຕນັ້ນ ຖືກປະຫານຊີວິດ 16.ມັນນຳໃຊ້ວິທີການໃຫ້ມະນຸດທຸກຄົນ, ບໍ່ວ່າຜູ້ນ້ອຍຫລືຜູ້ໃຫຍ່ ທັງຜູ້ຮັ່ງແລະຜູ້ທຸກ ທັງພວກເສລີແລະພວກຂ້ອຍຂ້າ ຖືກໝາຍຢູ່ທີ່ມືຂວາ ຫລືຢູ່ເທິງໜ້າຜາກ 17.ແລະບໍ່ມີໃຜຊື້ຫລືຂາຍໄດ້ ຖ້າບໍ່ມີໝາຍໃນນາມຂອງສັດໂຕນັ້ນ ຫລືໃນຈຳ ນວນເລກໝາຍເຖິງຊື່ຂອງມັນ. 18.ຢູ່ນີ້ ຕ້ອງໃຊ້ຄວາມສະຫລາດຫລັກແຫລມ! ໃຫ້ມະນຸດຜູ້ມີສະໝອງ ຈົ່ງຄິດເລກຂອງສັດໂຕນັ້ນ ແມ່ນເລກຂອງບຸກຄົນຜູ້ໜຶ່ງ ເລກຂອງມັນຄື: 666.