ຈົດໝາຍຂອງ ນັກບຸນຢວງ ອັກຄະສາວົກສະບັບທີ 2

1.ຈາກຂ້າພະເຈົ້າຜູ້ອະວຸໂສເຖິງ: ສຸພາບສັດຕີຜູ້ເລືອກສັນຂອງພຣະເຈົ້າ ພ້ອມທັງລູກຂອງນາງ, ຊຶ່ງຂ້າພະເຈົ້າຮັກແພງ ໃນຄວາມສະຫວ່າງແຫ່ງຄວາມຈິງ. ບໍ່ແມ່ນແຕ່ຂ້າພະເຈົ້າຜູ້ດຽວ, ແຕ່ບັນດາຜູ້ທີ່ຮູ້ຈັກຄວາມຈິງແລ້ວ ກໍຮັກແພງດ້ວຍ, 2ຍ້ອນຄວາມຈິງທີ່ຕັ້ງໝັ້ນຢູ່ໃນຕົວພວກເຮົາ ແລະຈະຢູ່ນຳພວກເຮົາສະເໝີໄປ. 3ພຣະຄຸນ, ພຣະເມດຕາ ແລະສັນຕິສຸກ ທີ່ພວກເຮົາໄດ້ຮັບຈາກພຣະເຈົ້າພຣະບິດາ ແລະຈາກພຣະເຢຊູກຣິສໂຕ. ພຣະບຸດຂອງພຣະບິດານັ້ນ ຈະຢູ່ນຳພວກເຮົາ ໃນຄວາມຈິງແລະຄວາມຮັກ.

ຈົ່ງຮັກແພງກັນຖານພີ່ນ້ອງ

4. ຂ້າພະເຈົ້າມີຄວາມຍິນດີເປັນຢ່າງຍິ່ງ ທີ່ເຫັນລູກຂອງນາງເດີນຕາມເສັ້ນທາງແຫ່ງຄວາມຈິງ ຕາມບັນຢັດທີ່ພວກເຮົາໄດ້ຮັບຈາກພຣະບິດາ. 5ທ່ານສຸພາບສັດຕີເອີຍ! ຂ້າພະເຈົ້າຂໍນຳ, ບໍ່ແມ່ນຈະບອກຂໍ້ບັນຢັດຂໍ້ໃໝ່ໃຫ້ດອກ, ແຕ່ແມ່ນຂໍ້ບັນຢັດຊຶ່ງພວກເຮົາມີຢູ່ແລ້ວແຕ່ຕົ້ນເດີມຄື ພວກເຮົາຈົ່ງຮັກກັນແລະກັນເຖີດ. 6ແລະຄວາມຮັກຄື ໃຫ້ພວກເຮົາດຳເນີນຊີວິດຕາມພຣະບັນຢັດຂອງພຣະອົງ, ນີ້ແຫລະແມ່ນຂໍ້ບັນຢັດທີ່ພວກເຈົ້າທັງຫລາຍໄດ້ຍິນ ໄດ້ຟັງແຕ່ຕົ້ນເດີມແລ້ວ ເພື່ອຈະໄດ້ປະຕິບັດຕາມ.

ຈົ່ງໝັ້ນຄົງໃນຄວາມເຊື່ອ

7.ຍ້ອນພວກຫລອກລວງຈຳນວນມາກມາຍ ໄດ້ແຜ່ໄປທົ່ວໂລກແລ້ວ. ພວກເຂົາບໍ່ຍອມຮັບວ່າ ພຣະເຢຊູກຣິສໂຕເຈົ້າໄດ້ສະເດັດລົງມາບັງເກີດເປັນມະນຸດ, ນີ້ແຫລະຄົນຫລອກລວງແລະຜູ້ເປັນສັດຕູກັບພຣະເຢຊູກຣິສໂຕເຈົ້າ. 8ພວກເຈົ້າຈົ່ງລະວັງຕົວໃຫ້ດີ ເພື່ອບໍ່ໃຫ້ຜົນງານຂອງຕົນເສຍໄປ. ແຕ່ເພື່ອຈະໄດ້ຮັບລາງວັນຢ່າງເຕັມສ່ວນ. 9ຜູ້ໃດໄປກາຍຂີດ ແລະບໍ່ຕັ້ງໝັ້ນໃນພຣະທຳຄຳສອນຂອງພຣະກຣິສໂຕ ຜູ້ນັ້ນບໍ່ມີພຣະເຈົ້າ. ຜູ້ໃດໝັ້ນຄົງຢູ່ໃນພຣະທຳຄຳສອນ ຜູ້ນັ້ນແຫລະມີທັງພຣະບິດາແລະພຣະບຸດ. 10ຖ້າຜູ້ໃດມາຫາພວກເຈົ້າແລະບໍ່ຖືເອົາພຣະທຳຄຳສອນນັ້ນມານຳ, ກໍຢ່າຮັບມັນເຂົ້າເຮືອນ, ແລະຢ່າທັກທາຍປາໄສກັບມັນ. 11ຜູ້ທີ່ທັກທາຍປາໄສກັບຜູ້ນັ້ນ ກໍມີສ່ວນໃນກິດຈະການຊົ່ວຮ້າຍຂອງເຂົາ.

ຄຳມ້ວນທ້າຍ

12. ຂ້າພະເຈົ້າຍັງມີຫລາຍແນວຢາກຂຽນມາຫາພວກເຈົ້າ, ແຕ່ບໍ່ຢາກໃຊ້ເຈ້ຍໃຊ້ນ້ຳມຶກຂຽນ, ຍ້ອນຂ້າພະເຈົ້າຫວັງວ່າ ຈະໄດ້ມາຢາມພວກພີ່ນ້ອງ ແລ້ວຈະໄດ້ລົມກັນຕາມສະບາຍ ເພື່ອພວກເຮົາຈະໄດ້ມີຄວາມປິຕິຍິນດີຢ່າງເຕັມພຽບ. 13ບັນດາລູກນ້ອງສາວຂອງເຈົ້າ, ຜູ້ພຣະເຈົ້າເລືອກສັນນັ້ນ ກໍຝາກຄວາມຢາມພວກເຈົ້າດ້ວຍ!