ເຊື່ອໃນພຣະບຸດຂອງພຣະເຈົ້າ ແມ່ນຮາກຖານຄວາມຮັກ

1ຜູ້ໃດເຊື່ອວ່າພຣະເຢຊູແມ່ນພຣະກຣິສໂຕ ຜູ້ນັ້ນກໍເກີດມາຈາກພຣະເຈົ້າ ແລະຜູ້ໃດຮັກພຣະເຈົ້າຜູ້ໃຫ້ກຳເນີດ ກໍຮັກຜູ້ທີ່ເປັນລູກຂອງພຣະເຈົ້າດ້ວຍ 2ພວກເຮົາຈະຮູ້ໄດ້ວ່າພວກເຮົາຮັກລູກຂອງພຣະເຈົ້າ ຄື ເມື່ອເວລາພວກເຮົາຮັກພຣະເຈົ້າ ແລະຖືຕາມພຣະບັນຢັດຂອງພຣະອົງນັ້ນເອງ 3ຍ້ອນວ່າຄວາມຮັກຕໍ່ພຣະເຈົ້ານັ້ນ ແມ່ນຖືຕາມພຣະບັນຢັດຂອງພຣະອົງ ແລະພຣະບັນຢັດຂອງພຣະອົງ ກໍບໍ່ແມ່ນສິ່ງໜັກໜາຫຍັງ 4ຍ້ອນວ່າທຸກສິ່ງທີ່ເກີດມາຈາກພຣະເຈົ້າ ກໍມີໄຊຊະນະຕໍ່ໂລກ ແລະຄວາມໄຊຊະນະທີ່ຜາບແພ້ໂລກນັ້ນ ຄື ຄວາມເຊື່ອຂອງພວກເຮົາ. 5ຜູ້ໃດແມ່ນຜູ້ມີໄຊຊະນະຕໍ່ໂລກ ຖ້າບໍ່ແມ່ນຜູ້ທີ່ເຊື່ອວ່າ ພຣະເຢຊູແມ່ນພຣະບຸດຂອງພຣະເຈົ້າ? 6ແມ່ນ ພຣະເຢຊູນີ້ເອງ ໄດ້ສະເດັດມາດ້ວຍນ້ຳແລະພຣະໂລຫິດ ບໍ່ແມ່ນດ້ວຍນ້ຳເທົ່ານັ້ນ ແຕ່ດ້ວຍນ້ຳແລະພຣະໂລຫິດ ແມ່ນພຣະຈິດເຈົ້າເອງຊົງເປັນພິຍານຢັ້ງຢືນ ຍ້ອນພຣະຈິດເຈົ້າແມ່ນອົງຄວາມຈິງ 7ດັ່ງນີ້ ຈຶ່ງມີພິຍານດ້ວຍກັນສາມພິຍານຄື 8ພຣະຈິດເຈົ້າ ນ້ຳ ແລະເລືອດ ແລະທັງສາມນີ້ກໍສອດຄ່ອງກັນດີ.

9ຖ້າພວກເຮົາຮັບເອົາຫລັກຖານຂອງມະນຸດ ຫລັກຖານຂອງພຣະເຈົ້າກໍແຮງມີນ້ຳໜັກກວ່າອີກ ຍ້ອນວ່າຫລັກຖານຂອງພຣະເຈົ້າ ຄື ພຣະອົງຊົງເປັນພິຍານຢັ້ງຢືນເຖິງພຣະບຸດຂອງພຣະອົງ 10.ຜູ້ໃດເຊື່ອໃນພຣະບຸດຂອງພຣະເຈົ້າ ຜູ້ນັ້ນກໍມີຫລັກຖານຂອງພຣະເຈົ້າຢູ່ໃນຕົວເຂົາ ຜູ້ທີ່ບໍ່ເຊື່ອພຣະເຈົ້າ ກໍຖືເອົາພຣະອົງເປັນຜູ້ກ່າວເທັດ ຍ້ອນເຂົາບໍ່ເຊື່ອຫລັກຖານຊຶ່ງພຣະເຈົ້າໄດ້ຢັ້ງຢືນ ກ່ຽວກັບພຣະບຸດຂອງພຣະອົງ 11ຫລັກຖານນັ້ນແມ່ນດັ່ງນີ້ ຄື ພຣະເຈົ້າໄດ້ປະທານຊີວິດນິຣັນດອນໃຫ້ພວກເຮົາ ແລະຊີວິດນິຣັນດອນນັ້ນຢູ່ໃນພຣະບຸດຂອງພຣະອົງ 12ຜູ້ທີ່ມີພຣະບຸດກໍມີຊີວິດ ຜູ້ບໍ່ມີພຣະບຸດ ກໍບໍ່ມີຊີວິດ.

ຄຳມ້ວນທ້າຍ

13ຂ້າພະເຈົ້າຂຽນຂໍ້ຄວາມເຫລົ່ານີ້ມາເຖິງພວກພີ່ນ້ອງ ຜູ້ມີຄວາມເຊື່ອໃນພຣະນາມຂອງພຣະບຸດເຈົ້າ ເພື່ອໃຫ້ພວກພີ່ນ້ອງຮູ້ແນ່ວ່າ ພວກພີ່ນ້ອງມີຊີວິດນິຣັນດອນແລ້ວ.

ຄວາມໝັ້ນໃຈໃນການພາວະນາ

14ຄວາມໝັ້ນໃຈທີ່ພວກເຮົາມີຢູ່ໃນພຣະອົງ ຄື ຖ້າພວກເຮົາວອນຂໍສິ່ງໃດຕາມນ້ຳພຣະໄທຂອງພຣະອົງ, ພຣະອົງກໍຈະສະດັບຟັງ. 15ແລະເມື່ອຮູ້ວ່າພຣະອົງສະດັບຟັງສິ່ງທີ່ພວກເຮົາວອນຂໍ, ພວກເຮົາແນ່ໃຈວ່າ ໄດ້ຮັບສິ່ງທີ່ໄດ້ວອນຂໍຈາກພຣະອົງນັ້ນແລ້ວ 16ຖ້າຜູ້ໃດເຫັນພີ່ນ້ອງຂອງຕົນທຳບາບ ທີ່ບໍ່ນຳໄປສູ່ຄວາມຕາຍ ກໍໃຫ້ເຂົາວິງວອນພາວະນາ ແລະພຣະເຈົ້າຈະປະທານຊີວິດໃຫ້ຄົນບາບນັ້ນ, ຖ້າຫາກບາບທີ່ໄດ້ກະທຳບໍ່ນຳໄປເຖິງຄວາມຕາຍແທ້. ມີບາບແນວໜຶ່ງທີ່ພາໄປເຖິງຄວາມຕາຍ, ຂ້າພະເຈົ້າບໍ່ໄດ້ບອກໃຫ້ພາວະນາສຳລັບບາບນີ້.

17ຄວາມອະທຳທຸກຢ່າງເປັນບາບ ແຕ່ບໍ່ແມ່ນໝົດທຸກບາບພາໄປເຖິງຄວາມຕາຍດອກ 18ພວກເຮົາຮູ້ວ່າ ຜູ້ໃດເກີດຈາກພຣະເຈົ້າ ກໍບໍ່ທຳບາບເລີຍ ແຕ່ພຣະບຸດຂອງພຣະເຈົ້າປົກປ້ອງຮັກສາຜູ້ນັ້ນ ແລະພະຍາມານກໍບໍ່ມີອຳນາດເໜືອຜູ້ນັ້ນ 19ພວກເຮົາຮູ້ວ່າພວກເຮົາມາຈາກ ພຣະເຈົ້າ ສ່ວນໂລກມະນຸດທັງໝົດນັ້ນ ຈົມຢູ່ກ້ອງອຳນາດຂອງພະຍາມານ 20ພວກເຮົາຍັງຮູ້ອີກວ່າ ພຣະບຸດຂອງພຣະເຈົ້າໄດ້ສະເດັດມາ ແລະຊົງປະທານຄວາມເຂົ້າໃຈອັນແຈ່ມແຈ້ງແກ່ພວກເຮົາ ເພື່ອຈະໄດ້ຮູ້ອົງຄວາມຈິງ. ພວກເຮົາຢູ່ໃນຄວາມຈິງ, ຢູ່ໃນພຣະເຢຊູກຣິສໂຕພຣະບຸດຂອງພຣະອົງ. ພຣະເຢຊູແມ່ນອົງຄວາມຈິງ, ພຣະອົງເປັນພຣະເຈົ້າ ແລະເປັນຊີວິດນິຣັນດອນ 21ພວກລູກທີ່ຮັກ, ຢ່າໄປກ່ຽວຂ້ອງກັບຮູບພະເທັດທຽມ.