ຈິດແຫ່ງຄວາມຈິງ ແລະຈິດແຫ່ງຄວາມເທັດ

1ພີ່ນ້ອງທີ່ຮັກ, ຢ່າເຊື່ອໃນໝົດທຸກຈິດ ແຕ່ໃຫ້ພິສູດເບິ່ງວ່າ ຈິດເຫລົ່ານັ້ນມາຈາກພຣະເປັນເຈົ້າຫລືບໍ່ ເສຍກ່ອນ, ຍ້ອນວ່າມີປະພາສົກປອມແຜ່ໄປມາກຫລາຍໃນໂລກ. 2ນີ້ແມ່ນເຄື່ອງໝາຍບອກວ່າ ແມ່ນພຣະຈິດຂອງພຣະເຈົ້າ ຄື ຈິດທຸກຮູບທີ່ປະກາດວ່າ ພຣະເຢຊູກຣິສໂຕໄດ້ຊົງເອົາກາຍ ນັ້ນແຫລະແມ່ນຈິດທີ່ມາຈາກພຣະເຈົ້າ 3ສ່ວນຈິດໃດທີ່ແບ່ງແຍກພຣະເຢຊູເຈົ້າ ຈິດນັ້ນບໍ່ໄດ້ມາຈາກພຣະເຈົ້າ ແມ່ນຈິດຂອງຜູ້ເປັນສັດຕູກັບພຣະກຣິສໂຕເຈົ້າ ຊຶ່ງພວກພີ່ນ້ອງໄດ້ຍິນຂ່າວວ່າກຳລັງຈະມາ ແລະໃນເວລານີ້ ມັນກໍຢູ່ໃນໂລກແລ້ວ 4ພວກລູກທີ່ຮັກ ຜູ້ເປັນຝ່າຍພຣະເຈົ້າ ພວກເຈົ້າມີໄຊຊະນະພວກປະພາສົກເຫລົ່ານີ້ແລ້ວ. ຍ້ອນພຣະອົງຜູ້ສະຖິດຢູ່ກາງພວກເຈົ້າ ຍິ່ງໃຫຍ່ກວ່າຜູ້ທີ່ຢູ່ໃນໂລກ 5ພວກນັ້ນເຂົາຢູ່ຝ່າຍໂລກ ດັ່ງນີ້ເຂົາຈຶ່ງປາກ ເວົ້າແບບໂລກ ແລະໂລກກໍເຊື່ອຟັງຄວາມເຂົາ 6ສ່ວນພວກເຮົາ ພວກເຮົາຢູ່ຝ່າຍພຣະເຈົ້າ ຜູ້ທີ່ຮູ້ຈັກພຣະເຈົ້າ ກໍເຊື່ອຟັງພວກເຮົາ ຜູ້ທີ່ບໍ່ຢູ່ຝ່າຍພຣະເຈົ້າ ກໍບໍ່ເຊື່ອຟັງພວກເຮົາ ຍ້ອນອັນນີ້ແຫລະ ພວກເຮົາຈຶ່ງຮູ້ຈັກພຣະຈິດ ແລະຈິດແຫ່ງຄວາມເທັດ. 

ຄວາມຮັກມາຈາກພຣະເຈົ້າແລະມີຮາກເລິກໃນຄວາມເຊື່ອ

7ພີ່ນ້ອງທີ່ຮັກ, ຈົ່ງຮັກກັນແລະກັນ ດ້ວຍວ່າຄວາມຮັກມາຈາກພຣະເຈົ້າ. ຜູ້ໃດຮັກ ຜູ້ນັ້ນກໍເກີດມາຈາກພຣະເຈົ້າແລະຮູ້ຈັກພຣະອົງ 8ຜູ້ບໍ່ຮັກ ຜູ້ນັ້ນບໍ່ຮູ້ຈັກພຣະເຈົ້າ ຍ້ອນວ່າພຣະເຈົ້າຄືອົງຄວາມຮັກ. 9ຄວາມຮັກຂອງພຣະເຈົ້າປະຈັກແຈ້ງອອກມາແກ່ພວກເຮົາດັ່ງນີ້ ຄື ພຣະອົງໄດ້ສົ່ງພຣະເອກະບຸດມາໃນໂລກນີ້ ເພື່ອໃຫ້ພວກເຮົາມີຊີວິດເດຊະພຣະອົງ 10ຄວາມຮັກແມ່ນດັ່ງນີ້ ຄື ບໍ່ແມ່ນພວກເຮົາໄດ້ຮັກພຣະເຈົ້າ ແຕ່ແມ່ນພຣະເຈົ້າໄດ້ຊົງຮັກພວກເຮົາ ແລະໄດ້ສົ່ງອົງ ພຣະບຸດມາໃຊ້ໂທດບາບແທນພວກເຮົາ. 11ຖ້າວ່າພຣະເຈົ້າຮັກເຮົາເຖິງພຽງນີ້ ພວກເຮົາກໍຕ້ອງຮັກກັນແລະກັນດ້ວຍ 12ບໍ່ມີໃຜໄດ້ເຫັນໄດ້ຊົມພຣະເປັນເຈົ້າຈັກເທື່ອ ຖ້າພວກເຮົາຮັກກັນແລະກັນ ພຣະເຈົ້າກໍສະຖິດຢູ່ໃນພວກເຮົາ ແລະຄວາມຮັກຂອງພຣະອົງກໍຈຳເລີນຢູ່ໃນພວກເຮົາຢ່າງຄົບບໍລິບູນ. 13ພວກເຮົາຮູ້ວ່າ ພວກເຮົາຢູ່ໃນພຣະອົງ ແລະພຣະອົງສະຖິດຢູ່ໃນພວກເຮົາ ຍ້ອນວ່າພຣະອົງໄດ້ປະທານພຣະຈິດຂອງພຣະອົງໃຫ້ພວກເຮົາ 14ສ່ວນພວກເຮົາ ພວກເຮົາໄດ້ເຫັນແລະໄດ້ຢັ້ງຢືນວ່າ ພຣະບິດາເຈົ້າໄດ້ໃຊ້ພຣະບຸດຂອງພຣະອົງມາເປັນພຣະຜູ້ບັນດານຄວາມຮອດໃຫ້ແກ່ໂລກ 15ຜູ້ໃດຍອມຮັບວ່າ ພຣະເຢຊູເປັນພຣະບຸດຂອງພຣະເຈົ້າ ພຣະເຈົ້າກໍສະຖິດຢູ່ໃນຜູ້ນັ້ນ ແລະຜູ້ນັ້ນກໍຢູ່ໃນພຣະເຈົ້າ 16ພວກເຮົາໄດ້ຮູ້ຈັກແລະເຊື່ອໃນຄວາມຮັກ ຊຶ່ງພຣະເຈົ້າໄດ້ສຳແດງຕໍ່ພວກເຮົາ ພຣະເປັນເຈົ້າແມ່ນຄວາມຮັກ ຜູ້ໃດຢູ່ໃນຄວາມຮັກ ຜູ້ນັ້ນກໍຢູ່ໃນພຣະເຈົ້າ ແລະພຣະເຈົ້າກໍສະຖິດຢູ່ໃນຜູ້ນັ້ນດ້ວຍ 17ຄວາມຮັກໃນເຮົາເຖິງຂັ້ນສົມບູນໃນຂໍ້ນີ້ ຄື ພວກເຮົາມີຄວາມໝັ້ນໃຈໃນວັນພິພາກສາ ຍ້ອນວ່າພວກເຮົາທີ່ຢູ່ໃນໂລກນີ້ ກໍຄ້າຍຄືກັບ ພຣະເຢຊູເຈົ້າແລ້ວ 18ຢູ່ໃນຄວາມຮັກບໍ່ມີຄວາມຢ້ານກົວ ແຕ່ຄວາມຮັກອັນບໍລິບູນຂັບໄລ່ຄວາມຢ້ານກົວໃຫ້ໜີໄປ ຍ້ອນຄວາມຢ້ານກົວມີການລົງໂທດຢູ່ນຳ ຜູ້ມີຄວາມຢ້ານກົວບໍ່ໄດ້ເປັນຜູ້ບໍລິບູນໃນຄວາມຮັກ. 19ສ່ວນພວກເຮົາ ພວກເຮົາຮັກ ຍ້ອນພຣະອົງໄດ້ຊົງຮັກພວກເຮົາກ່ອນ 20ຖ້າຜູ້ໃດເວົ້າວ່າ: “ຂ້າພະເຈົ້າຮັກພຣະເຈົ້າ ແຕ່ຍັງຄຽດຊັງພີ່ນ້ອງຂອງຕົນຢູ່ ຜູ້ນັ້ນກໍເປັນຄົນຂີ້ຕົວະ ຍ້ອນວ່າຜູ້ທີ່ບໍ່ຮັກພີ່ນ້ອງຂອງຕົນທີ່ຕາເຫັນແລ້ວ ຈະຮັກພຣະເຈົ້າທີ່ຕາແນມບໍ່ເຫັນນັ້ນ ບໍ່ໄດ້.” 21ນີ້ແຫລະແມ່ນຂໍ້ບັນຢັດທີ່ພວກເຮົາໄດ້ຮັບຈາກພຣະອົງ ຄືຜູ້ທີ່ຮັກພຣະເຈົ້າ ກໍຕ້ອງຮັກພີ່ນ້ອງຂອງຕົນດ້ວຍ.