ຈົ່ງປະຕິບັດຕາມຄວາມຊອບທຳ ແລະຢ່າທຳບາບ

ຍົດກຽດໄດ້ເປັນບຸດພຣະເຈົ້າ.

1ຈົ່ງເບິ່ງວ່າ ຄວາມຮັກທີ່ພຣະບິດາປະທານໃຫ້ພວກເຮົານັ້ນໃຫຍ່ຫລວງສັກພຽງໃດ ຈົນກັບໂຜດໃຫ້ພວກເຮົາໄດ້ຊື່ວ່າເປັນບຸດຂອງພຣະເຈົ້າ ແລະພວກເຮົາກໍໄດ້ເປັນຈິງແທ້. ດ້ວຍເຫດນີ້ແລ້ວ ໂລກຈຶ່ງບໍ່ສາມາດຮູ້ຈັກພວກເຮົາໄດ້, ຍ້ອນໂລກບໍ່ໄດ້ພົບເຫັນພຣະເຈົ້າ. 2ພວກລູກທີ່ຮັກທັງຫລາຍ, ດຽວນີ້ ພວກເຮົາໄດ້ເປັນບຸດຂອງພຣະເຈົ້າແລ້ວ, ແຕ່ໃນພາຍໜ້າເຮົາຈະເປັນຫຍັງແທ້ນັ້ນ, ຍັງບໍ່ທັນປາກົດໃຫ້ເຫັນຢ່າງຊັດແຈ້ງເທື່ອ. ພວກເຮົາຮູ້ແຕ່ວ່າ ເມື່ອພຣະບຸດຂອງພຣະເຈົ້າຈະປາກົດມາ, ພວກເຮົາກໍຈະເປັນຄືພຣະອົງ, ຍ້ອນຈະໄດ້ເຫັນພຣະອົງ ດັ່ງທີ່ພຣະອົງຊົງເປັນຢູ່. 3ແລະທຸກຄົນທີ່ມີຄວາມໄວ້ໃຈໃນພຣະອົງແບບນີ້, ກໍທຳໃຫ້ຕົວເອງເປັນຜູ້ບໍລິສຸດ, ເໝືອນດັ່ງອົງພຣະເຢຊູເປັນຜູ້ບໍລິສຸດນັ້ນແລ້ວ. 4ຜູ້ທຳບາບກໍລະເມີດຕໍ່ພຣະບັນຢັດ, ຍ້ອນວ່າບາບແມ່ນການລະເມີດຕໍ່ພຣະບັນຢັດ. 5ພວກພີ່ນ້ອງກໍຮູ້ວ່າ ພຣະເຢຊູໄດ້ຊົງປາກົດມາກໍເພື່ອຫລົກຖອນບາບ ແລະພຣະອົງເອງບໍ່ມີບາບ. 6ຄົນໃດຕັ້ງໝັ້ນຢູ່ໃນພຣະເຈົ້າ ຄົນນັ້ນກໍບໍ່ທຳບາບເລີຍ. ສ່ວນຜູ້ໃດທຳບາບ ຜູ້ນັ້ນຍັງບໍ່ໄດ້ເຫັນພຣະເຈົ້າ ແລະບໍ່ຮູ້ຈັກພຣະອົງ.

ຄົນບາບຄືລູກຂອງຜີປິສາດ

7ພວກລູກທີ່ຮັກ, ຢ່າໃຫ້ໃຜມາຕົວະຫລອກພວກເຈົ້າໄດ້. ຜູ້ທີ່ປະຕິບັດຕາມຄວາມຊອບທຳ ກໍເປັນຜູ້ຊອບທຳ ດັ່ງພຣະເຢຊູເຈົ້າຊົງເປັນຜູ້ຊອບທຳ. 8ຜູ້ໃດທຳບາບ ກໍແມ່ນມາຈາກຜີປີສາດ, ຍ້ອນວ່າຜີປີສາດເປັນຜູ້ທຳບາບແຕ່ຕົ້ນເດີມມາ. ດ້ວຍເຫດນີ້ເອງ ພຣະບຸດພຣະເຈົ້າຈຶ່ງຊົງປາກົດມາ ກໍເພື່ອທຳລາຍກິດຈະການຂອງຜີປີສາດ. 9ຜູ້ໃດເກີດມາຈາກພຣະເຈົ້າກໍບໍ່ທຳບາບເລີຍ, ຍ້ອນວ່າມູນເຊື້ອຂອງພຣະເຈົ້າໝັ້ນຄົງຢູ່ໃນຕົວເຂົາ. ເຂົາທຳບາບບໍ່ໄດ້ ຍ້ອນວ່າເຂົາເກີດມາຈາກພຣະເຈົ້າ. 10ສິ່ງທີ່ສະແດງໃຫ້ເຫັນວ່າ ໃຜເປັນບຸດຂອງພຣະເຈົ້າ ຜູ້ໃດເປັນລູກຂອງຜີປີສາດນັ້ນ ຄື ຜູ້ໃດບໍ່ປະຕິບັດຕາມຄວາມຊອບທຳ ຜູ້ນັ້ນບໍ່ແມ່ນບຸດຂອງພຣະເຈົ້າ, ແລະຜູ້ທີ່ບໍ່ຮັກແພງພີ່ນ້ອງຂອງຕົນ ກໍດັ່ງດຽວກັນ.

ຈົ່ງຮັກແພງກັນຕາມຢ່າງຂອງພຣະບຸດເຈົ້າ

11ຍ້ອນວ່າ ຂ່າວສານທີ່ເຈົ້າໄດ້ຍິນແຕ່ຕົ້ນເດີມນັ້ນ ຄື ໃຫ້ພວກເຮົາຮັກກັນແລະກັນ 12ຢ່າເອົາຢ່າງຂອງກາອິນ, ຜູ້ເປັນລູກຂອງພະຍາມານ, ແລ້ວໄດ້ຂ້ານ້ອງຂອງຕົນເສຍ. ເປັນຫຍັງເຂົາຈຶ່ງຂ້ານ້ອງຂອງຕົນ? ຍ້ອນວ່າກິດຈະການຂອງເຂົາຊົ່ວຊ້າ, ສ່ວນກິດຈະການຂອງນ້ອງຊາຍນັ້ນຊອບທຳ 13ພີ່ນ້ອງທັງຫລາຍ, ຢ່າແປກປະຫລາດໃຈ ເມື່ອເຫັນໂລກຄຽດຊັງພວກພີ່ນ້ອງ. 14ພວກເຮົາຮູ້ຢູ່ວ່າ ພວກເຮົາໄດ້ຜ່ານຄວາມຕາຍເຂົ້າສູ່ຊີວິດແລ້ວ ຍ້ອນພວກເຮົາຮັກພີ່ນ້ອງຂອງພວກເຮົາ. ຜູ້ທີ່ບໍ່ຮັກ ກໍຈົມຢູ່ໃນຄວາມຕາຍ. 15ຜູ້ໃດຄຽດຊັງພີ່ນ້ອງຂອງຕົນຄົນຜູ້ນັ້ນແມ່ນຄາຕະກອນ ແລະພວກພີ່ນ້ອງກໍຮູ້ຢູ່ວ່າ ບໍ່ມີຄາຕະກອນໃດມີຊີວິດນິຣັນດອນຢູ່ໃນຕົວເຂົາ. 16ພວກເຮົາຮູ້ຈັກຄວາມຮັກຄືຫຍັງ ກໍຍ້ອນຂໍ້ນີ້ ຄື ພຣະເຢຊູໄດ້ສະລະຊີວິດເພື່ອພວກເຮົາ, ພວກເຮົາເອງກໍຕ້ອງສະລະຊີວິດຂອງຕົນເພື່ອພວກພີ່ນ້ອງດ້ວຍ. 17ຖ້າຜູ້ໃດມີຊັບສົມບັດໃນໂລກນີ້ ແລະເຫັນພີ່ນ້ອງຂອງຕົນຢູ່ໃນຄວາມຂັດສົນ, ແລ້ວເຮັດເສີຍບໍ່ຍອມເມດຕາຊ່ວຍເຫລືອເຂົາ, ຄວາມຮັກຂອງພຣະເຈົ້າຈະຢູ່ໃນຕົວຜູ້ນັ້ນໄດ້ຢ່າງໃດ?

18ພວກລູກທີ່ຮັກ, ພວກເຮົາຢ່າຮັກແຕ່ປາກ ແຕ່ສົບ, ແຕ່ໃຫ້ຮັກດ້ວຍການປະຕິບັດແລະດ້ວຍຄວາມຈິງ. 19ເມື່ອທຳດັ່ງນີ້ ພວກເຮົາຈິ່ງຮູ້ວ່າພວກເຮົາຢູ່ຝ່າຍຄວາມຈິງ ແລະຈິດໃຈຂອງພວກເຮົາກໍມີຄວາມສະຫງົບຕໍ່ພຣະພັກພຣະອົງ. 20ແຕ່ຖ້າວ່າຈິດໃຈເຮົາຕິຕຽນເຮົາ, ເຮົາກໍບໍ່ຢ້ານ, ຍ້ອນວ່າພຣະເປັນເຈົ້າຢູ່ເໜືອຈິດໃຈເຮົາ ແລະຊົງຊາບທຸກຢ່າງດ້ວຍ. 21ພີ່ນ້ອງທີ່ຮັກ, ຖ້າຈິດໃຈບໍ່ຕິຕຽນເຮົາ, ພວກເຮົາກໍຮ້ອງຫາພຣະເຈົ້າ ດ້ວຍຄວາມໄວ້ວາງໃຈໄດ້ 22ແລະສິ່ງໃດທີ່ເຮົາວອນຂໍນຳພຣະອົງ, ພຣະອົງກໍຈະປະທານໃຫ້ ຍ້ອນວ່າພວກເຮົາຖືຕາມພຣະບັນຢັດຂອງພຣະອົງ ແລະກະທຳແຕ່ສິ່ງທີ່ຊອບພຣະໄທພຣະອົງດ້ວຍ. 23ນີ້ແມ່ນບັນຢັດຂອງພຣະອົງ ຄື ໃຫ້ພວກເຮົາເຊື່ອແໜ້ນໜຽວໃນພຣະເຢຊູກຣິສໂຕ ພຣະບຸດຂອງພຣະອົງ ໃຫ້ພວກເຮົາຮັກກັນແລະກັນ ຄືພຣະອົງໄດ້ສັ່ງບອກ. 24ຜູ້ທີ່ຖືຕາມພຣະບັນຢັດຂອງພຣະເຈົ້າ ຜູ້ນັ້ນກໍຢູ່ໃນພຣະອົງ ແລະພຣະເຈົ້າກໍສະຖິດຢູ່ໃນເຂົາ. ດ້ວຍເຫດນີ້ ພວກເຮົາຮູ້ວ່າພຣະອົງສະຖິດຢູ່ໃນພວກເຮົາໂດຍທາງພຣະຈິດເຈົ້າ ຊຶ່ງພຣະອົງໄດ້ຊົງປະທານແກ່ພວກເຮົາ.