1ພວກລູກທີ່ຮັກ, ເຮົາຂຽນຂໍ້ຄວາມເຫລົ່ານີ້ມາຫາພວກເຈົ້າ ກໍເພື່ອບໍ່ໃຫ້ພວກເຈົ້າທຳບາບ. ແຕ່ຖ້າຫາກມີໃຜໄດ້ທຳບາບ, ພວກເຮົາກໍມີຜູ້ສະເໜີຊ່ວຍຢູ່ຕໍ່ພຣະພັກພຣະບິດາແລ້ວ, ຄື ພຣະເຢຊູກຣິສໂຕຜູ້ຊອບທຳນັ້ນເອງ. 2ຍ້ອນວ່າ ພຣະອົງຊົງເປັນເຄື່ອງບູຊາໃຊ້ໂທດບາບຂອງພວກເຮົາ, ແລະບໍ່ແມ່ນແຕ່ຂອງພວກເຮົາເທົ່ານັ້ນ, ແຕ່ສຳລັບຂອງໂລກທັງມວນດ້ວຍ. 

ຈົ່ງປະຕິບັດຕາມພຣະບັນຢັດຄວາມຮັກ

3ພວກເຮົາຮູ້ວ່າ ພວກເຮົາຮູ້ຈັກພຣະເຈົ້າ ຖ້າວ່າພວກເຮົາຖືຕາມພຣະບັນຢັດຂອງພຣະອົງ. 4ຜູ້ທີ່ເວົ້າວ່າ ຕົນຮູ້ຈັກພຣະອົງ ແຕ່ບໍ່ປະຕິບັດຕາມພຣະບັນຢັດຂອງພຣະອົງແລ້ວ, ຜູ້ນັ້ນກໍແມ່ນຄົນຂີ້ຕົວະ ແລະຄວາມຈິງບໍ່ມີຢູ່ໃນຕົວເຂົາ. 5ສ່ວນຜູ້ທີ່ປະຕິບັດຕາມພຣະວາຈາຂອງພຣະອົງ, ຜູ້ນັ້ນແຫລະມີຄວາມຮັກອັນບໍລິບູນຂອງພຣະເຈົ້າ. ພວກເຮົາຮູ້ວ່າ ພວກເຮົາຢູ່ໃນພຣະອົງ ກໍແມ່ນຍ້ອນອັນນີ້ເອງ. 6ຜູ້ໃດຖືວ່າຕົນຢູ່ໃນພຣະອົງ, ກໍໃຫ້ຜູ້ນັ້ນເດີນຕາມເສັ້ນທາງທີ່ພຣະເຢຊູເຈົ້າໄດ້ເດີນ.

7ພວກລູກທີ່ຮັກ, ສິ່ງທີ່ເຮົາຂຽນມາຫາພວກເຈົ້ານັ້ນ ບໍ່ແມ່ນຂໍ້ບັນຢັດໃໝ່ດອກ, ແຕ່ແມ່ນຂໍ້ບັນຢັດເກົ່າ ຊຶ່ງພວກເຈົ້າມີຢູ່ແລ້ວແຕ່ຕົ້ນເດີມພຸ້ນ. ຂໍ້ບັນຢັດເກົ່ານີ້ ຄື ພຣະທຳຄຳສອນ ທີ່ພວກເຈົ້າໄດ້ຍິນມາແລ້ວນັ້ນເອງ. 8ຖ້າຈະເວົ້າອີກແນວໜຶ່ງວ່າ ເຮົາຂຽນຂໍ້ບັນຢັດໃໝ່ມາຫາພວກເຈົ້າກໍໄດ້, ມັນໃໝ່ທັງໃນພຣະອົງແລະໃນພວກເຈົ້າດ້ວຍ ຍ້ອນວ່າຄວາມມືດກຳລັງຜ່ານພົ້ນໄປ ແລະຄວາມສະຫວ່າງອັນຈິງແທ້ ກໍສ່ອງແສງອອກມາ 9ຜູ້ທີ່ຖືວ່າຕົນຢູ່ໃນຄວາມສະຫວ່າງ ແຕ່ຍັງຄຽດຊັງພີ່ນ້ອງຂອງຕົນຢູ່, ຜູ້ນັ້ນກໍຈົມຢູ່ໃນຄວາມມືດສະເໝີ 10ຜູ້ໃດຮັກພີ່ນ້ອງຂອງຕົນ ຜູ້ນັ້ນຢູ່ໃນຄວາມສະຫວ່າງ, ບໍ່ມີຫຍັງຈະເປັນເຫດໃຫ້ເຂົາພາດລົ້ມໄດ້11ສ່ວນຜູ້ທີ່ຄຽດຊັງພີ່ນ້ອງຂອງຕົນ ຜູ້ນັ້ນກໍຢູ່ໃນຄວາມມືດ, ແລະບໍ່ຮູ້ຈັກວ່າກຳລັງໄປໃສ, ຍ້ອນຄວາມມືດໄດ້ທຳໃຫ້ຕາເຂົາບອດ.

ຈົ່ງເຊື່ອໝັ້ນຄົງສະເໝີ - ລະວັງຢ່າເອົາຢ່າງໂລກ

12ພວກລູກທີ່ຮັກ, ເຮົາຂຽນບອກພວກເຈົ້າວ່າ “ບາບຂອງພວກເຈົ້າໄດ້ຮັບການອະໄພແລ້ວ ເດຊະພຣະນາມຂອງພຣະອົງພຣະເຢຊູ.” 13ພວກເຈົ້າຜູ້ເປັນພໍ່ທັງຫລາຍ, ເຮົາຂຽນບອກພວກເຈົ້າວ່າ “ພວກເຈົ້າຮູ້ຈັກພຣະອົງຜູ້ດຳຣົງຢູ່ແຕ່ໃດໆມາ.” ພວກຊາຍໜຸ່ມທັງຫລາຍ, ເຮົາຂຽນບອກພວກເຈົ້າວ່າ ພວກເຈົ້າເປັນຜູ້ມີໄຊຊະນະຕໍ່ມານຮ້າຍ. 14ພວກລູກນ້ອຍທັງຫລາຍ, ເຮົາໄດ້ຂຽນບອກພວກເຈົ້າວ່າ: “ພວກເຈົ້າຮູ້ຈັກພຣະບິດາ.” ພວກເຈົ້າຜູ້ເປັນພໍ່ທັງຫລາຍ, ເຮົາໄດ້ຂຽນບອກພວກເຈົ້າວ່າ ພວກເຈົ້າຮູ້ຈັກພຣະອົງຜູ້ດຳຣົງແຕ່ໃດໆມາ”. ພວກຊາຍໜຸ່ມທັງຫລາຍ, ເຮົາໄດ້ຂຽນບອກພວກເຈົ້າວ່າ: “ພວກເຈົ້າເປັນຜູ້ມີກຳລັງເຂັ້ມແຂງ ແລະພຣະວາຈາຂອງພຣະເຈົ້າດຳຣົງຢູ່ໃນພວກເຈົ້າ, ພວກເຈົ້າມີໄຊຊະນະຕໍ່ມານຮ້າຍ.” 15ພວກເຈົ້າຢ່າຮັກຫອມໂລກ ແລະສິ່ງທີ່ມີຢູ່ໃນໂລກ. ຖ້າຜູ້ໃດຮັກໂລກ, ຜູ້ນັ້ນກໍບໍ່ຮັກພຣະບິດາ. 16ຍ້ອນວ່າສິ່ງຕ່າງໆທີ່ຢູ່ໃນໂລກນັ້ນ ຄືຄວາມມັກໄດ້ທາງເນື້ອໜັງ, ຄວາມມັກໄດ້ທາງຕາ, ແລະຄວາມໄວ້ວາງໃຈຢ່າງໂອ້ອວດນຳສິ່ງຂອງໆໂລກ. ສິ່ງເຫລົ່ານີ້ບໍ່ໄດ້ມາຈາກພຣະບິດາ, ແຕ່ມາຈາກໂລກ. 17ແຕ່ໂລກແລະຄວາມມັກໄດ້ຂອງມັນ ກຳລັງເສື່ອມສູນໄປ, ສ່ວນຜູ້ທີ່ທຳຕາມນ້ຳພຣະໄທພຣະເຈົ້ານັ້ນ ໝັ້ນຄົງຢູ່ສະເໝີ.

ລະວັງພວກອາຈານທຽມ

18ພວກລູກທີ່ຮັກ, ແມ່ນວາລະສຸດທ້າຍແລ້ວ. ພວກເຈົ້າກໍໄດ້ຍິນຂ່າວວ່າ ຜູ້ເປັນສັດຕູກັບພຣະກຣິສໂຕເຈົ້າຈະມາ. ແລະດຽວນີ້ ຜູ້ເປັນສັດຕູກັບພຣະກຣິສໂຕເຈົ້າ ກໍປາກົດຕົວອອກມາ ຫລາຍແລ້ວ. ດ້ວຍເຫດນີ້ ພວກເຮົາຈຶ່ງຮູ້ວ່າແມ່ນວາລະສຸດທ້າຍ. 19ພວກນັ້ນອອກໄປຈາກພວກເຮົາ, ແຕ່ບໍ່ແມ່ນໝູ່ຂອງພວກເຮົາ. ຖ້າພວກເຂົາແມ່ນໝູ່ຂອງພວກເຮົາ, ເຂົາເຈົ້າກໍຈະຢູ່ນຳພວກເຮົາ. ທັງນີ້ກໍເພື່ອໃຫ້ປາກົດແຈ້ງວ່າ ພວກນັ້ນບໍ່ແມ່ນໝູ່ຂອງພວກເຮົາເລີຍ. 20ສ່ວນພວກເຈົ້າ, ພວກເຈົ້າໄດ້ຮັບການສະເຫລີມນ້ຳມັນຈາກພຣະຜູ້ສັກສິດ ແລະພວກເຈົ້າກໍໄດ້ຮັບຄວາມຮູ້ແລ້ວ. 21ເຮົາໄດ້ຂຽນຈົດໝາຍຫາພວກເຈົ້າ ບໍ່ແມ່ນວ່າຍ້ອນພວກເຈົ້າບໍ່ຮູ້ຄວາມຈິງດອກ. ແຕ່ແມ່ນຍ້ອນພວກເຈົ້າຮູ້ຄວາມຈິງແລ້ວ, ແລະຍັງຮູ້ວ່າ ແນວຂີ້ຕົວະອອກມາຈາກຄວາມຈິງບໍ່ໄດ້.

22ຜູ້ໃດແມ່ນຄົນເວົ້າຕົວະ, ຄັນບໍ່ແມ່ນຜູ້ປະຕິເສດວ່າ ພຣະເຢຊູບໍ່ແມ່ນພຣະກຣິສໂຕ. ຜູ້ເປັນສັດຕູກັບພຣະກຣິສໂຕ ແມ່ນຜູ້ທີ່ປະຕິເສດພຣະບິດາແລະພຣະບຸດ. 23ຜູ້ໃດປະຕິເສດພຣະບຸດ, ຜູ້ນັ້ນບໍ່ມີພຣະບິດາ, ສ່ວນຜູ້ທີ່ຮັບຮູ້ພຣະບຸດ ກໍພົບເຫັນພຣະບິດາດ້ວຍ. 24ຝ່າຍພວກພີ່ນ້ອງນັ້ນ, ຈົ່ງຮັກສາສິ່ງທີ່ໄດ້ຍິນນັ້ນໄວ້ໃນຕົວພວກພີ່ນ້ອງ. ຖ້າວ່າສິ່ງທີ່ພວກພີ່ນ້ອງໄດ້ຍິນແຕ່ຕົ້ນນັ້ນ, ຕັ້ງໝັ້ນຢູ່ໃນຕົວພວກພີ່ນ້ອງ, ພວກພີ່ນ້ອງກໍຈະຕັ້ງໝັ້ນຢູ່ໃນພຣະບຸດແລະພຣະບິດາດ້ວຍ. 25ສິ່ງທີ່ພຣະເຈົ້າເອງໄດ້ສັນຍາແກ່ພວກເຮົາ ຄືຊິີວິດນິຣັນດອນ. 26ນີ້ແຫລະ ເລື່ອງລາວທີ່ເຮົາຂຽນບອກພວກພີ່ນ້ອງ ກ່ຽວກັບພວກທີ່ຊອກຫາລວງພວກພີ່ນ້ອງໃຫ້ໄປທາງຜິດ. 

27ສ່ວນພວກເຈົ້າ, ການສະເຫລີມນ້ຳມັນ ທີ່ພວກພີ່ນ້ອງໄດ້ຮັບຈາກພຣະອົງເຈົ້ານັ້ນ ໝັ້ນຄົງຢູ່ໃນຕົວພວກພີ່ນ້ອງ, ແລະບໍ່ຕ້ອງການໃຫ້ໃຜມາສອນພວກພີ່ນ້ອງອີກ ແລະຍ້ອນວ່າ ການສະເຫລີມນ້ຳມັນນັ້ນ ໄດ້ສອນພວກພີ່ນ້ອງໃຫ້ຮູ້ຈັກທຸກຢ່າງ ມັນແມ່ນຄວາມຈິງ ບໍ່ແມ່ນການຕົວະຫລອກ. ການສະເຫລີມນ້ຳມັນນັ້ນໄດ້ສອນພວກເຈົ້າຢ່າງໃດ, ພວກເຈົ້າກໍໝັ້ນຄົງໃນພຣະອົງຢ່າງນັ້ນດ້ວຍ.

28ດັ່ງນີ້, ລູກທີ່ຮັກທັງຫລາຍ, ຈົ່ງຕັ້ງໝັ້ນຢູ່ໃນພຣະອົງ, ເພື່ອວ່າ ເມື່ອພຣະອົງຈະປາກົດມາ, ພວກເຮົາຈະໄດ້ມີຄວາມໝັ້ນໃຈ, ບໍ່ຫລົບໜ້າໜີຈາກພຣະອົງດ້ວຍຄວາມອັບອາຍ ໃນເມື່ອພຣະອົງຈະສະເດັດມາ. 29ເມື່ອພວກເຈົ້າຮູ້ວ່າ ພຣະອົງຊົງເປັນຜູ້ຊອບທຳ, ພວກເຈົ້າກໍຕ້ອງຮັບຮູ້ວ່າ ຜູ້ໃດປະຕິບັດຕາມຄວາມຊອບທຳ ຜູ້ນັ້ນກໍເກີດມາຈາກພຣະອົງ.