ຈົດໝາຍຂອງນັກບຸນຢວງ ອັກຄະທຳມະທູດສະບັບທີ 1

ພຣະວາຈາແຫ່ງຊີວິດ

1ສິ່ງທີ່ເປັນຢູ່ແຕ່ຕົ້ນເດີມ, ສິ່ງທີ່ພວກເຮົາໄດ້ຍິນໄດ້ຟັງ, ສິ່ງທີ່ພວກເຮົາໄດ້ເຫັນດ້ວຍຕາ, ສິ່ງທີ່ພວກເຮົາໄດ້ດູໄດ້ຊົມ ແລະບາຍຕ້ອງດ້ວຍມືຂອງພວກເຮົາ ກ່ຽວກັບພຣະວາຈາແຫ່ງຊີວິດ 2.ຍ້ອນວ່າຊີວິດໄດ້ປາກົດອອກມາ ແລະພວກເຮົາໄດ້ເຫັນ ໄດ້ເປັນພິຍານ ແລະໄດ້ປະກາດຊີວິດນິຣັນດອນນີ້ໃຫ້ພວກພີ່ນ້ອງຊາບ. ຊີວິດນິຣັນດອນນີ້ສະຖິດຢູ່ກັບພຣະບິດາ ແລະໄດ້ສຳແດງພຣະອົງແກ່ພວກເຮົາ. 3.ສິ່ງທີ່ພວກເຮົາໄດ້ເຫັນແລະໄດ້ຍິນ, ພວກເຮົາກໍປະກາດໃຫ້ພວກພີ່ນ້ອງຊາບດ້ວຍ ເພື່ອໃຫ້ພວກພີ່ນ້ອງມີສ່ວນຮ່ວມໃນຄວາມສຳພັນຂອງພວກເຮົາ, ແລະຄວາມສຳພັນຂອງພວກເຮົານັ້ນ ແມ່ນຄວາມສຳພັນກັບພຣະບິດາ ແລະກັບພຣະບຸດຂອງພຣະອົງ ຄື ພຣະເຢຊູກຣິສໂຕ 4ພວກເຮົາຂຽນເລື່ອງນີ້ມາຫາພວກພີ່ນ້ອງ ເພື່ອໃຫ້ຄວາມຊື່ນຊົມຍິນດີຂອງພວກເຮົາໄດ້ເຕັມປ່ຽມ. 

ພຣະເປັນເຈົ້າເປັນຄວາມສະຫວ່າງ

5ນີ້ຄືຂ່າວສານທີ່ພວກເຮົາໄດ້ຍິນຈາກພຣະອົງ ແລະໄດ້ເປີດເຜີຍໃຫ້ພວກພີ່ນ້ອງຊາບ ຄື ພຣະເປັນເຈົ້າເປັນຄວາມສະຫວ່າງ ແລະຢູ່ໃນພຣະອົງບໍ່ມີຄວາມມືດເລີຍແມ່ນແຕ່ໜ້ອຍດຽວ. 6ຖ້າພວກເຮົາເວົ້າວ່າ ພວກເຮົາຮ່ວມສຳພັນກັບພຣະອົງ, ແຕ່ດຳເນີນຊີວິດຢູ່ໃນຄວາມມືດແລ້ວ, ພວກເຮົາກໍເວົ້າຕົວະ ແລະບໍ່ດຳເນີນຊີວິດຕາມຄວາມຈິງ. 7ແຕ່ຖ້າພວກເຮົາດຳເນີນຊີວິດໃນຄວາມສະຫວ່າງ ດັ່ງພຣະອົງເອງສະຖິດຢູ່ໃນຄວາມສະຫວ່າງ, ພວກເຮົາກໍມີຄວາມສຳພັນຕໍ່ກັນແລະກັນ, ແລະພຣະໂລຫິດຂອງພຣະເຢຊູ ພຣະບຸດຂອງພຣະອົງ ກໍຊຳຣະລ້າງພວກເຮົາໃຫ້ບໍລິສຸດ ປາດສະຈາກການບາບທັງໝົດ.

ຈົ່ງຕັດຂາດກັບບາບ

8ຖ້າພວກເຮົາເວົ້າວ່າ ພວກເຮົາບໍ່ມີບາບ, ພວກເຮົາກໍລວງຕົວເອງ ແລະຄວາມຈິງບໍ່ມີໃນຕົວເຮົາ. 9ຖ້າພວກເຮົາສາຣະພາບຄວາມຜິດ, ພຣະອົງຜູ້ຊົງສັດຈະແລະທ່ຽງທຳ ກໍຈະອະໄພບາບໃຫ້ພວກເຮົາ ແລະຊຳຣະໃຫ້ບໍລິສຸດ ປາດສະຈາກຄວາມຊົ່ວຮ້າຍທັງປວງດ້ວຍ. 10ຖ້າພວກເຮົາເວົ້າວ່າ ພວກເຮົາບໍ່ເປັນຄົນບາບ, ພວກເຮົາກໍຖືເອົາພຣະອົງເປັນຜູ້ບໍ່ມີສັດຈະ ແລະພຣະວາຈາຂອງພຣະອົງກໍບໍ່ມີໃນຕົວເຮົາ.