ການສະເດັດກັບມາໃໝ່ຂອງພຣະເຢຊູເຈົ້າ

1.ພີ່ນ້ອງທີ່ຮັກ: ຈົດໝາຍສະບັບນີ້ແມ່ນສະບັບທີສອງ ທີ່ຂ້າພະເຈົ້າສົ່ງມາຫາພວກພີ່ນ້ອງ, ໃນຈົດໝາຍທັງສອງສະບັບນີ້ ຂ້າພະເຈົ້າຕຸກເຕືອນພວກພີ່ນ້ອງເພື່ອຄວາມຊົງຈຳ ແລ້ວຈະໄດ້ເຂົ້າໃຈໃຫ້ຖືກຕ້ອງ ຄື 2.ຈົ່ງລະລຶກເຖິງຖ້ອຍຄຳທີ່ພວກປະກາສົກຜູ້ສັກສິດໄດ້ກ່າວໄວ້ກ່ອນແລ້ວ ແລະເຖິງບັນຢັດຂອງພຣະເຈົ້າ ແລະຂອງພຣະຜູ້ບັນດານຄວາມຮອດ ຊຶ່ງພວກພີ່ນ້ອງໄດ້ຮັບຈາກບັນດາອັກຄະສາວົກ.

ພວກອາຈານທຽມ

3.ກ່ອນໝົດ ຈົ່ງເຂົ້າໃຈຂໍ້ນີ້ໃຫ້ດີ ຄື ໃນວາລະສຸດທ້າຍ ຈະມີພວກຫົວດື້ບໍ່ຍອມເຊື່ອ ແລະມັກຫຍໍ້ຫຍັນ ມາເວົ້າສຽດສີຕ່າງໆຕາມລາຄະຕັນຫາຂອງເຂົາ. 4.ພວກເຂົາຈະເວົ້າວ່າ: “ພຣະສັນຍາຂອງພຣະອົງ ທີ່ວ່າຈະສະເດັດມານັ້ນ ໄປເຖິງໃສແລ້ວ? ຍ້ອນວ່າ ຕັ້ງແຕ່ພວກບັນພະບຸຣຸດຂອງພວກເຮົາໄດ້ຕາຍໄປ ຈົນຮອດດຽວນີ້, ທຸກສິ່ງກໍຍັງຄືເກົ່າ ເໝືອນກັບແຕ່ຕົ້ນສ້າງໂລກ”. 5.ເມື່ອຄິດດັ່ງນີ້, ພວກເຂົາກໍລືມເສຍວ່າ ທ້ອງຟ້າອາກາດແລະແຜ່ນດິນ ມີມາແຕ່ນານແລ້ວ, ແລະແຜ່ນດິນຊຶ່ງຢູ່ໃນນ້ຳແລະອາໄສນ້ຳ ຈຶ່ງໄດ້ໂຜ່ຂຶ້ນມາ ເດຊະພຣະວາຈາຂອງພຣະເຈົ້າ. 6.ແລະຍ້ອນເຫດຜົນອັນດຽວກັນນີ້ເອງ, ໂລກໃນສະໄໝກ່ອນຈຶ່ງພິນາດໄປດ້ວຍນ້ຳຖ້ວມ. 7.ສ່ວນຟ້າແລະດິນຂອງສະໄໝເຮົາດຽວນີ້, ພຣະວາຈາອັນດຽວກັນໄດ້ຫວງໄວ້ເພື່ອໃຫ້ໄຟເຜົາ ຄືຮັກສາໄວ້ຈົນຮອດມື້ພິພາກສາ ແລະມື້ວັນພິນາດຂອງພວກຄົນອະທຳ.

8.ພີ່ນ້ອງທີ່ຮັກ, ມີແນວໜຶ່ງທີ່ຈະອຳພວກພີ່ນ້ອງໄວ້ບໍ່ໄດ້ຄື ສຳລັບພຣະເປັນເຈົ້າ ໜຶ່ງ ວັນກໍເໝືອນດັ່ງພັນປີ, ແລະພັນປີກໍເໝືອນໜຶ່ງວັນ. 9.ພຣະອົງເຈົ້າບໍ່ໄດ້ຢືດເຢື້ອນເວລາທີ່ຈະປະຕິບັດຕາມພຣະສັນຍາຂອງພຣະອົງ ດັ່ງທີ່ບາງຄົນເຂົ້າໃຈ. ແຕ່ຍ້ອນເຫັນພວກພີ່ນ້ອງ, ພຣະອົງຈຶ່ງອົດພຽນໄວ້, ພຣະອົງບໍ່ປາດຖະໜາໃຫ້ຜູ້ໃດສິບຫາຍ, ແຕ່ຊົງປາດຖະໜາໃຫ້ທຸກຄົນກັບໃຈ. 10.ວັນຂອງພຣະອົງເຈົ້າຈະມາເໝືອນດັ່ງໂຈນຜູ້ຮ້າຍ. ໃນວັນນັ້ນ ເທິງຟ້າຈະພັງທະລາຍໄປດ້ວຍສຽງສະນັ່ນຫວັ່ນໄຫວ, ແລະໂລກະທາດຈະຖືກເຜົາຜານເປື່ອຍລະລາຍໄປໝົດ. ໂລກແລະສັບພະສິ່ງທັງຫລາຍໃນໂລກ ກໍຈະຖືກເຜົາໄໝ້ສູນໄປດ້ວຍ. 11.ຍ້ອນວ່າສິ່ງເຫລົ່ານີ້ຈະຕ້ອງສາບສູນໄປດັ່ງວ່ານີ້ແລ້ວ, ພວກພີ່ນ້ອງຈຶ່ງຕ້ອງເປັນຄົນແນວໃດ! ຕ້ອງດຳເນີນຊີວິດຢ່າງສັກສິດແລະສັດທາສັກພຽງໃດ! 12.ເກີນວ່າພວກພີ່ນ້ອງຄອງຖ້າ ແລະຢາກໃຫ້ວັນຂອງພຣະອົງເຈົ້າມາເຖິງໄວໆ, ອັນແມ່ນວັນທີ່ທ້ອງຟ້າຈະລຸກເປັນໄຟ ແລະລະລາຍຫາຍສູນໄປ, ໂລກະທາດທັງປວງຈະຖືກໄຟໄໝ້ລະລາຍກ້ຽງ. 13.ສ່ວນພວກເຮົາ, ພວກເຮົາຄອງຖ້າເຫັນຟ້າໃໝ່ແລະດິນໃໝ່ຕາມພຣະສັນຍາຂອງພຣະອົງ, ອັນແມ່ນບ່ອນຈະມີແຕ່ຄວາມຊອບທຳ.

14.ດ້ວຍເຫດນີ້, ພີ່ນ້ອງທີ່ຮັກ, ໃນເວລາຄອງຖ້າເຫດການເຫລົ່ານີ້ຢູ່, ຈົ່ງພະຍາຍາມປະພຶດຕົນໃຫ້ເປັນຜູ້ປາດສະຈາກມົນທິນ ແລະຄວາມຕ້ອງຕິຕ່າງໆ, ເພື່ອໃຫ້ພຣະອົງໄດ້ພົບເຫັນພວກພີ່ນ້ອງຢູ່ໃນຄວາມສັນຕິ. 15.ຈົ່ງຖືວ່າ ການທີ່ພຣະອົງເຈົ້າຊົງອົດພຽນຢູ່ດົນນານດັ່ງນີ້ ກໍເພື່ອຊ່ວຍພວກພີ່ນ້ອງໃຫ້ຮອດ. ດັ່ງທີ່ເປົາໂລ ນ້ອງທີ່ຮັກຂອງເຮົາ ໄດ້ຂຽນບອກພວກພີ່ນ້ອງ ຕາມຄວາມສະຫລາດທີ່ໄດ້ຮັບຈາກພຣະເຈົ້າ. 16.ໃນຈົດໝາຍທຸກກ້ານທີ່ກ່າວເຖິງເລື່ອງນີ້ ທ່ານກໍຊີ້ແຈງໄປໃນທຳນອງດຽວກັນຄື ມີຂໍ້ຄວາມບາງຕອນເຂົ້າໃຈຍາກ, ຊຶ່ງພວກທີ່ດ້ອຍປັນຍາແລະຂາດຄວາມຊຳນານ ບິດເບືອນຄວາມໝາຍໄປ ດັ່ງທີ່ເຂົາເຄີຍທຳກັບພຣະຄຳພີຕອນອື່ນໆມາແລ້ວ, ຜົນກໍຄື ນຳຄວາມຈິບຫາຍມາສູ່ຕົວພວກເຂົາເອງ. 17.ດັ່ງນີ້, ພີ່ນ້ອງທີ່ຮັກ, ຍ້ອນໄດ້ຮັບຄຳເຕືອນລ່ວງໜ້າແລ້ວ, ຈຶ່ງໃຫ້ລະມັດລະວັງ ຢ່າໃຫ້ພວກຄົນຊົ່ວທີ່ຫລົງຜິດດຶງແກ່ພວກພີ່ນ້ອງໄປຕາມເຂົາ, ແລະຢ່າປະໃຫ້ເຂົາທຳໃຫ້ພວກພີ່ນ້ອງສູນເສຍຄວາມໝັ້ນຄົງ. 18.ແຕ່ຈົ່ງຈະເລີນຂຶ້ນໃນພຣະຄຸນ ແລະໃນການຮູ້ຈັກພຣະເຢຊູກຣິສໂຕ ພຣະເຈົ້າແລະພຣະຜູ້ບັນດານຄວາມຮອດຂອງພວກເຮົາ. ສີມຸງຄຸນຈົ່ງມີແດ່ພຣະອົງ ດຽວນີ້ ແລະຕະຫລອດນິຣັນດອນເທີ້ນ ອາແມນ.