ຈົດໝາຍຂອງນັກບຸນ ເປໂຕ ອັກຄະທຳມະທູດສະບັບທີ 2

ຄຳນັບຖາມຂ່າວ

1ຈາກຊີມອນເປໂຕ, ຜູ້ຮັບໃຊ້ແລະອັກຄະທຳມະທູດຂອງພຣະເຢຊູກຣິສໂຕ ເຖິງພວກພີ່ນ້ອງຜູ້ໄດ້ຮັບຄວາມເຊື່ອອັນມີຄ່າ ເທົ່າທຽມກັບຄວາມເຊື່ອຂອງພວກເຮົາ ເດຊະຄວາມຊອບທຳຂອງພຣະເຈົ້າແລະພຣະເຢຊູກຣິສໂຕ ພຣະຜູ້ບັນດານຄວາມຮອດຂອງພວກເຮົາ. 2.ຂໍພຣະຄຸນແລະສັນຕິສຸກຈົ່ງຫລັ່ງໄຫລມາສູ່ພວກພີ່ນ້ອງຢ່າງສົມບູນ ດ້ວຍອາໄສການຮູ້ຈັກພຣະເຈົ້າ ແລະພຣະເຢຊູກຣິສໂຕພຣະອົງເຈົ້າຂອງເຮົາ.

ພະກະແສຮຽກ ແລະການຄັດເລືອກ

3.ດ້ວຍວ່າຣິດທານຸພາບຂອງພຣະເຈົ້າໄດ້ຊົງປະທານທຸກສິ່ງທີ່ຈຳເປັນແກ່ຊີວິດ ແລະຄວາມສັດທາໃຫ້ພວກເຮົາ ດ້ວຍທຳໃຫ້ພວກເຮົາຮູ້ຈັກພຣະອົງຜູ້ຊົງຮຽກພວກເຮົາ ເດຊະສີມຸງຄຸນແລະຣິດທານຸພາບຂອງພຣະອົງເອງ. 4.ອາໄສສີມຸງຄຸນແລະຣິດທານຸພາບນັ້ນ ພຣະອົງໄດ້ປະທານສັບພຣະຄຸນຄວາມດີອັນຍິ່ງໃຫຍ່ ແລະປະເສີດເລີດລ້ຳໃຫ້ພວກເຮົາ ເພື່ອຊ່ວຍໃຫ້ຫລຸດພົ້ນຈາກຄວາມເສື່ອມເສຍ ຊຶ່ງກິເລດຕັນຫາທະນຸບຳລຸງໄວ້ໃນໂລກນີ້ ແລ້ວພວກເຮົາຈະໄດ້ມີສ່ວນຮ່ວມໃນສະພາວະຂອງພຣະເຈົ້າ. 5.ດ້ວຍເຫດນີ້ເອງ, ຈົ່ງພະຍາຍາມສຸດກຳລັງ ຕື່ມລິດກຸສົນເຂົ້າກັບຄວາມເຊື່ອ, ຕື່ມຄວາມຮູ້ເຂົ້າກັບລິດກຸສົນ, 6.ຕື່ມການຮູ້ຈັກປະມານຕົວເຂົ້າກັບຄວາມຮູ້ ຕື່ມຄວາມອົດທົນເຂົ້າກັບການຮູ້ຈັກປະມານຕົວ, ຕື່ມຄວາມສັດທາເຂົ້າກັບຄວາມອົດທົນ, 7.ຕື່ມຄວາມເປັນມິດຖານພີ່ຖານນ້ອງເຂົ້າກັບຄວາມສັດທາ ແລະຕື່ມຄວາມຮັກເຂົ້າກັບຄວາມເປັນມິດຖານພີ່ຖານນ້ອງ. 8.ຍ້ອນວ່າ ຖ້າພວກພີ່ນ້ອງມີຄຸນທຳດັ່ງນີ້ຢ່າງອຸດົມສົມບູນແລ້ວ ມັນກໍຈະບໍ່ປະໃຫ້ພວກພີ່ນ້ອງຢູ່ລ້າໆແລະໄຮ້ຜົນ ໃນການຊອກຫາໃຫ້ຮູ້ຈັກພຣະເຢຊູກຣິສໂຕພຣະເຈົ້າຂອງພວກເຮົາດອກ. 9.ຕາມຈິງແລ້ວ, ຜູ້ໃດຂາດຄຸນທຳນີ້, ຜູ້ນັ້ນກໍເປັນຄົນຕາບອດງົມທາວໄປ ແລະຫລົງລືມວ່າ ບາບເກົ່າກ່ອນຂອງຕົນນັ້ນ ໄດ້ຮັບການຊຳຣະໃຫ້ບໍລິສຸດແລ້ວ. 10.ພີ່ນ້ອງທັງຫລາຍ, ດ້ວຍເຫດນີ້ ຈົ່ງອອກແຮງຫລາຍກວ່າອີກ ເພື່ອທຳໃຫ້ພະກະແສຮຽກແລະການໄດ້ຮັບເລືອກສັນຂອງພວກພີ່ນ້ອງ ໝັ້ນແກ່ນແໜ້ນໜາ, ດ້ວຍວ່າ ຖ້າທຳດັ່ງນີ້ແລ້ວ, ພວກພີ່ນ້ອງກໍບໍ່ມີຢ້ານພາດລົ້ມເລີຍ. 11.ດັ່ງນີ້ ພວກພີ່ນ້ອງຈະໄດ້ຮັບສິດສົມບູນ ເພື່ອເຂົ້າໃນອານາຈັກນິຣັນດອນຂອງພຣະເຢຊູກຣິສໂຕ ພຣະຜູ້ບັນດານຄວາມຮອດຂອງພວກເຮົາ. 12. ຂ້າພະເຈົ້າເອງກໍຫວັງຢາກເຕືອນພວກພີ່ນ້ອງ ໃຫ້ລະລຶກເຖິງສິ່ງເຫລົ່ານີ້ຢູ່ສະເໝີ ແມ່ນວ່າພວກພີ່ນ້ອງຮູ້ຈັກເລື່ອງນີ້ແລ້ວ ແລະໝັ້ນໜຽວຢູ່ໃນຄວາມຈິງທີ່ພວກພີ່ນ້ອງຖືຢູ່ກໍຕາມ. 13.ແຕ່ຂ້າພະເຈົ້າເຫັນວ່າ ເປັນການຖືກຕ້ອງທີ່ຈະຄອຍຕຸກເຕືອນພວກພີ່ນ້ອງ ໃຫ້ລະລຶກເຖິງຂໍ້ນີ້ຢູ່ສະເໝີ ຕະຫລອດເວລາທີ່ຂ້າພະເຈົ້າຍັງມີຊີວິດຢູ່ໃນໂລກນີ້. 14. ຂ້າພະເຈົ້າກໍຮູ້ວ່າ ເວລາຕ້ອງຈາກກາຍນີ້ໄປກໍໃກ້ເຂົ້າມາ ດັ່ງທີ່ພຣະເຢຊູ ກຣິສໂຕເຈົ້າ ພຣະເຈົ້າຂອງພວກເຮົາ ໄດ້ສຳແດງໃຫ້ຂ້າພະເຈົ້າຮູ້ແລ້ວ. 15.ແຕ່ຂ້າພະເຈົ້າກໍພະຍາຍາມເອົາໃຈໃສ່ເຕັມກຳລັງ ເພື່ອຊ່ວຍພວກພີ່ນ້ອງໃຫ້ສາມາດລະລຶກເຖິງຄຳສອນເຫລົ່ານີ້ໄວ້ໃນທຸກໂອກາດ ຫລັງຈາກທີ່ຂ້າພະເຈົ້າໄດ້ສິ້ນອາຍຸສັງຂານໄປແລ້ວ. 16.ຍ້ອນວ່າ ເມື່ອເວລາພວກເຮົາຊີ້ແຈງໃຫ້ພວກພີ່ນ້ອງຊາບ ເຖິງຣິດທານຸພາບແລະການສະເດັດມາຂອງພຣະເຢຊູກຣິສໂຕ ພຣະເຈົ້າຂອງພວກເຮົານັ້ນ, ພວກເຮົາບໍ່ໄດ້ເວົ້າຕາມນິຍາຍທີ່ປັ້ນປະດິດຂຶ້ນເລີຍ, ແຕ່ພວກເຮົາເອງຮູ້ເຫັນຄວາມສະງ່າລາສີຂອງພຣະອົງ. 17.ຍ້ອນພຣະອົງໄດ້ຮັບກຽດແລະສີມຸງຄຸນຈາກພຣະເຈົ້າພຣະບິດາ ໃນເວລາພຣະເຈົ້າຜູ້ຊົງສະງ່າລາສີ ໄດ້ມີພະສຸລະສຽງຈາກເບື້ອງບົນກ່າວວ່າ: “ຜູ້ນີ້ຄືບຸດສຸດທີ່ຮັກຂອງເຮົາ, ເຮົາພໍໃຈນຳເພິ່ນເປັນຢ່າງຍິ່ງ”. 18.ພວກເຮົາເອງໄດ້ຍິນພະສຸລະສຽງນີ້ດັງມາຈາກຟ້າ ໃນເວລາພວກເຮົາຢູ່ກັບພຣະອົງເທິງພູສັກສິດນັ້ນ. 19.ດັ່ງນີ້ພວກເຮົາຈຶ່ງເຊື່ອວາຈາຂອງປະພາສົກຢ່າງໝັ້ນຄົງຍິ່ງຂຶ້ນກວ່າອີກ. ການທີ່ພວກພີ່ນ້ອງເຕັມໃຈຖືເອົາພຣະວາຈານີ້ ເປັນດັ່ງຕະກຽງທີ່ສ່ອງແສງໃຫ້ເຫັນຮຸ່ງໃນບ່ອນມືດ ຕະຫລອດເວລາທີ່ຄອງຖ້າຈະໄດ້ເຫັນດວງຕາເວັນຍາມເຊົ້າ ແລະເຫັນດາວເພັດຮຸ່ງຂຶ້ນໃນຈິດໃຈຂອງພວກພີ່ນ້ອງນັ້ນ ກໍເປັນການຖືກຕ້ອງດີແລ້ວ. 20.ກ່ອນອື່ນໝົດ, ຂໍໃຫ້ເຂົ້າໃຈຂໍ້ນີ້ຄື ຈະແປອະທິບາຍຄຳທຳນາຍໃດໆໃນພຣະຄຳພີຕາມໃຈໂຕເອງບໍ່ໄດ້. 21.ຍ້ອນວ່າບໍ່ມີຄຳທຳນາຍໃດເກີດມາຈາກນ້ຳໃຈຂອງມະນຸດ. ແຕ່ມະນຸດປາກເວົ້າໃນນາມຂອງພຣະເຈົ້າ ຕາມທີ່ໄດ້ຮັບການດົນໃຈຈາກພຣະຈິດເຈົ້າ.