ໜ້າທີ່ຂອງພວກຜູ້ນຳໝູ່ກຣິສຕະຊົນ

1.ດັ່ງນີ້ ຂ້າພະເຈົ້າຂໍເຕືອນພວກເຖົ້າແກ່ທີ່ຢູ່ນຳພວກພີ່ນ້ອງ. ຂ້າພະເຈົ້າເອງກໍເປັນເຖົ້າແກ່ຜູ້ໜຶ່ງຄືກັນ ທັງເປັນພິຍານເຖິງຄວາມທຸກທໍຣະມານຂອງພຣະກຣິສໂຕເຈົ້າ ແລະຈະໄດ້ຮ່ວມຮັບສີມຸງຄຸນທີ່ຈະປາກົດມາພາຍຫລັງດ້ວຍ 2ຄື ຈົ່ງລ້ຽງດູຝູງແກະຊຶ່ງພຣະເຈົ້າມອບໝາຍໃຫ້, ບໍ່ແມ່ນຍ້ອນຈຳໃຈ, ແຕ່ດ້ວຍຄວາມສະໝັກໃຈ ຕາມນ້ຳພຣະໄທພຣະເຈົ້າ; ບໍ່ແມ່ນຍ້ອນຫວັງຜົນກຳໄລອັນຕ່ຳຊ້າ ແຕ່ດ້ວຍຄວາມເສຍສະລະ. 3ຢ່າໃຊ້ອຳນາດເດັດຂາດກັບຜູ້ທີ່ຢູ່ກ້ອງບັງຄັບບັນຊາຂອງພວກທ່ານ, ແຕ່ຈົ່ງເປັນແບບຢ່າງໃຫ້ຝູງແກະ. 4ແລະເມື່ອເຈົ້າຈອມຊຸມພາບານຈະປາກົດມາ, ພວກທ່ານກໍຈະໄດ້ຮັບມຸງກຸດແຫ່ງສີມຸງຄຸນ ອັນບໍ່ມີເສົ້າໝອງເລີຍ.

ຄວາມສຸພາບ ແລະຄວາມໝັ້ນໜຽວໃນຄວາມເຊື່ອ

5.ພວກເຈົ້າຜູ້ຍັງໜຸ່ມນ້ອຍ ຈົ່ງນອບນ້ອມເຊື່ອຟັງພວກເຖົ້າແກ່. ແລະຂໍໃຫ້ທຸກຄົນປະກອບດ້ວຍຄວາມສຸພາບຖ່ອມຕົນ ໃນເວລາຮັບໃຊ້ຊ່ວຍເຫລືອກັນ. ຍ້ອນວ່າ ”ພຣະເຈົ້າຕໍ່ຕ້ານຄົນຈອງຫອງ, ແຕ່ປະທານພຣະຄຸນໃຫ້ຜູ້ຖ່ອມຕົນ”. 6ດັ່ງນີ້ ຈົ່ງຖ່ອມຕົນພາຍໃຕ້ພະຫັດອັນຊົງລິດຂອງພຣະເຈົ້າ ເພື່ອພຣະອົງຈະໄດ້ຍົກຍໍພວກພີ່ນ້ອງຂຶ້ນ ໃນເວລາທີ່ຊົງກຳໜົດໄວ້. 7ຈົ່ງມອບຄວາມສົນລະວົນທຸກຢ່າງຂອງພີ່ນ້ອງໄວ້ກັບພຣະເຈົ້າ, ຍ້ອນພຣະອົງຊົງເອົາໃຈໃສ່ດູແລພວກພີ່ນ້ອງ. 8ຈົ່ງຮູ້ຈັກປະມານຕົນ. ຈົ່ງເຝົ້າລະວັງ. ຜີປີສາດ ສັດຕູຂອງພວກພີ່ນ້ອງ ເປັນດັ່ງໂຕສິງ ກຳລັງແຜດສຽງທຽວໄປມາ ຊອກຫາເຫຍື່ອມາຈີກກິນ. 9ຈົ່ງຕໍ່ສູ້ກັບມັນຢ່າງໝັ້ນໜຽວໃນຄວາມເຊື່ອ, ໂດຍເຂົ້າໃຈດີວ່າ ບັນດາພີ່ນ້ອງອື່ນໆໃນທົ່ວໂລກ ກໍຕ້ອງປະສົບຄວາມທຸກລຳບາກດັ່ງດຽວກັນ. 10ພຣະເຈົ້າແຫ່ງພຣະຄຸນທຸກຢ່າງ ຜູ້ໄດ້ຮຽກເອົາພວກພີ່ນ້ອງມາຮັບເອົາສີມຸງຄຸນນິຣັນດອນໃນພຣະກຣິສໂຕນັ້ນ ຈະປັບປຸງພວກພີ່ນ້ອງໃຫ້ໝັ້ນໜຽວ ຫລັງຈາກທີ່ໄດ້ທົນທຸກທໍຣະມານໄປຄາວໜຶ່ງແລ້ວ. ພຣະອົງຈະທຳໃຫ້ພວກພີ່ນ້ອງເຂັ້ມແຂງ, ມີແຮງມີກຳລັງ ແລະໝັ້ນຄົງຂະໜົງແກ່ນ. ຣິດທານຸພາບເປັນຂອງພຣະອົງຕະຫລອດໄປເປັນນິດ ອາແມນ.

ມ້ວນທ້າຍອຳລາ

12. ຂ້າພະເຈົ້າຂຽນສອງສາມຄວາມນີ້ຝາກນຳຊິນວາໂນ ມາຫາພວກພີ່ນ້ອງ, ເພິ່ນເປັນພີ່ນ້ອງຜູ້ສັດຊື່ຜູ້ໜຶ່ງ. ຂ້າພະເຈົ້າຂໍຕຸກເຕືອນແລະຢັ້ງຢືນວ່າ ນີ້ແຫລະຄືພຣະຄຸນອັນແທ້ຈິງຂອງພຣະເຈົ້າ. ຈົ່ງຕິດແໜ້ນກັບພຣະຄຸນນັ້ນເຖີດ. 13ກຸ່ມຜູ້ເລືອກສັນຢູ່ເມືອງບາບີລອນ ຝາກຄວາມຢາມພວກພີ່ນ້ອງ. ມັກໂກ ລູກຂອງຂ້າພະເຈົ້າ ກໍພາກຝາກຄວາມຢາມຄືກັນ. 14ຈົ່ງຄຳນັບຖາມຂ່າວກັນດ້ວຍຄວາມຮັກຄວາມແພງ. ສັນຕິສຸກຈົ່ງມີແດ່ພວກພີ່ນ້ອງທຸກຄົນທີ່ຢູ່ໃນພຣະກຣິສໂຕເທີ້ນ!