ຕັດຂາດກັບບາບ

1ດັ່ງນີ້ ຍ້ອນວ່າພຣະກຣິສໂຕຊົງຮັບທຸກທໍຣະມານໃນພຣະກາຍ, ພວກພີ່ນ້ອງກໍຕ້ອງປ້ອງກັນຕົວເອງ ດ້ວຍຄວາມຄຶດຢ່າງດຽວກັນ ຄືຜູ້ໃດຮັບທຸກທໍຣະມານໃນເນື້ອໜັງກໍແມ່ນຕັດຂາດກັບບາບ 2ເພື່ອຈະໄດ້ຈຳເລີນຊີວິດທີ່ຍັງເຫລືອຢູ່ໃນໂລກ ບໍ່ແມ່ນຕາມຄວາມມັກໄດ້ຂອງມະນຸດ, ແຕ່ຕາມນ້ຳພຣະໄທຂອງພຣະເຈົ້າ. 3ຕາມຈິງ, ໃນຄາວກ່ອນ ພວກພີ່ນ້ອງກໍໄດ້ເຮັດໄປພໍແລ້ວ ໃນການທຳຕາມສິ່ງທີ່ຄົນຕ່າງສາດສະໜາມັກຊອບ ຄືປ່ອຍໂຕຕາມຄວາມລາມົກ, ຕາມລາຄະຕັນຫາ, ເມົາເຫລົ້າເມົາຢາ, ກິນລ້ຽງຟູມເຟືອຍ, ອອກໝູ່ເຫລົ້າເຂົ້າໝູ່ສຸລາ, ນົບໄຫວ້ບູຊາພະເທັດທຽມ ອັນເປັນສິ່ງອັບປະຍົດ. 4ກ່ຽວກັບເລື່ອງນີ້ ພວກເຂົາມີຄວາມປະຫລາດໃຈ ເມື່ອເຫັນພວກພີ່ນ້ອງບໍ່ປະພຶດຊົ່ວຄືພວກເຂົາອີກ, ພວກເຂົາຈິ່ງພາກັນດ່າວ່າພວກພີ່ນ້ອງ. 5ແຕ່ພວກເຂົາຈະຕ້ອງໃຫ້ການແກ່ພຣະອົງ ຜູ້ຕຽມພ້ອມທີ່ຈະຕັດສິນ ທັງຄົນເປັນແລະຄົນຕາຍ. 6ດ້ວຍເຫດນີ້ ຈຶ່ງໄດ້ມີການປະກາດຂ່າວປະເສີດ ໃຫ້ທັງພວກຄົນຕາຍດ້ວຍ, ເພື່ອໃຫ້ພວກເຂົາ ຜູ້ຖືກຕັດສິນຕາມເນື້ອໜັງຢ່າງມະນຸດນັ້ນ ໄດ້ມີຊີວິດຢ່າງພຣະເຈົ້າ ເດຊະພຣະຈິດ.

ຄວາມລະມັດລະວັງຢູ່ຮ່ວມກັນເປັນໝູ່

7ທ້າຍສຸດຂອງທຸກສິ່ງທຸກຢ່າງໃກ້ຈະມາເຖິງແລ້ວ. ດັ່ງນີ້ ພວກພີ່ນ້ອງຈົ່ງມີຄວາມສະຫລາດຮອບຄອບ, ຮູ້ຈັກປະມານຕົນເພື່ອສວດພາວະນາ. 8ແຕ່ກ່ອນໝົດທຸກຢ່າງ ແມ່ນຈົ່ງມີຄວາມຮັກຕໍ່ກັນແລະກັນສະເໝີໄປ ຍ້ອນວ່າຄວາມຮັກເຫລື່ອມງຳການບາບໄດ້ມາກມາຍ. 9ຈົ່ງຕ້ອນຮັບລ້ຽງດູກັນແລະກັນ ຢ່າງບໍ່ຈົ່ມບໍ່ວ່າ. 10 ຈົ່ງຮັບໃຊ້ຊ່ວຍເຫລືອກັນ ຕາມພະທານທີ່ໄດ້ຮັບ ດັ່ງຜູ້ຈັດການທີ່ດີ ຊຶ່ງມີໜ້າທີ່ແຈກທານພຣະຄຸນນານາປະການຂອງພຣະເຈົ້າ 11ຜູ້ໃດປາກເວົ້າ ກໍໃຫ້ຄືກັບວ່າເອົາວາຈາຂອງພຣະເຈົ້າມາເວົ້າ ຜູ້ໃດມີໜ້າທີ່ຮັບໃຊ້ ກໍໃຫ້ຮັບໃຊ້ຕາມກຳລັງທີ່ພຣະເຈົ້າຊົງປະທານ ເພື່ອໃຫ້ພຣະເຈົ້າໄດ້ຮັບກຽດມຸງຄຸນໃນທຸກຢ່າງ ເດຊະພຣະເຢຊູກຣິສໂຕເຈົ້າ. ສີມຸງຄຸນແລະຣິດທານຸພາບ ເປັນຂອງພຣະອົງສະເໝີໄປເປັນນິດ ອາແມນ.

ຖືກບັງບຽດເປັນການບຸນ

12ພີ່ນ້ອງທີ່ຮັກ, ຢ່າມີຄວາມແປກປະຫລາດໃຈ ເມື່ອຖືກໂຍນເຂົ້າໃນກອງໄຟເພື່ອເປັນການທົດລອງ ຄືກັບວ່າ ແມ່ນແນວບໍ່ເຄີຍມີແກ່ພວກພີ່ນ້ອງເທື່ອ. 13ຈົ່ງມີຄວາມຊື່ນຊົມຍິນດີ ຍ້ອນໄດ້ມີສ່ວນຮ່ວມໃນຄວາມທຸກທໍຣະມານຂອງພຣະກຣິສໂຕເຈົ້າ, ເມື່ອເຖິງເວລາພຣະອົງຈະສຳແດງສີມຸງຄຸນ, ພວກພີ່ນ້ອງຈະມີຄວາມໂສມະນັດຍິນດີເປັນຢ່າງຍິ່ງ. 14ຖ້າພວກພີ່ນ້ອງຖືກດ່າວ່າ ຍ້ອນພຣະນາມຂອງພຣະກຣິສໂຕເຈົ້າ ພວກພີ່ນ້ອງກໍເປັນຜູ້ມີບຸນ ຍ້ອນວ່າພຣະຈິດແຫ່ງສີມຸງຄຸນ, ພຣະຈິດຂອງພຣະເຈົ້າ ສະຖິດຢູ່ນຳພວກພີ່ນ້ອງ. 15ຢ່າໃຫ້ມີໃຜໃນພວກພີ່ ນ້ອງຕ້ອງທຸກທໍມານ ຍ້ອນເປັນຄາຕະກອນ, ເປັນໂຈນຜູ້ຮ້າຍ, ເປັນຄົນຊົ່ວຊ້າ ຫລືເປັນຄົນແຊກແຊງໃນວຽກການຂອງຜູ້ອື່ນ. 16ແຕ່ຖ້າຜູ້ໃດຕ້ອງທຸກທໍຣະມານ ຍ້ອນວ່າເປັນກຣິສຕັງ ກໍຢ່າມີຄວາມອັບອາຍ. ໃຫ້ຜູ້ນັ້ນຖະຫວາຍກຽດແດ່ພຣະເຈົ້າ ຍ້ອນໄດ້ມີຊື່ວ່າເປັນກຣິສຕັງເສຍດີກ່ວາ.17ຍ້ອນວ່າເວລາແຫ່ງການຕັດສິນພິພາກສາ ໄດ້ເລີ່ມຕົ້ນຢູ່ໃນວົງຄອບຄົວຂອງພຣະເຈົ້າແລ້ວ. ແລະຖ້າການຕັດສິນນັ້ນເລີ່ມຕົ້ນໃນພວກເຮົາກ່ອນ, ສຸດທ້າຍປາຍທາງຂອງຜູ້ທີ່ບໍ່ຍອມເຊື່ອຂ່າວປະເສີດຂອງພຣະເຈົ້າ ຈະເປັນຢ່າງໃດ? 18ແລະຖ້າຄົນຊອບທຳເອົາຕົວຮອດໄດ້ ດ້ວຍຄວາມຍາກລຳບາກແລ້ວ, ສຳລັບຄົນອະທຳແລະຄົນບາບ ຈະເປັນຢ່າງໃດ? 19ດ້ວຍເຫດນີ້ ຈຶ່ງຂໍໃຫ້ທຸກຄົນທີ່ທົນທຸກທໍຣະມານຕາມນ້ຳພຣະໄທພຣະເຈົ້ານັ້ນ ຈົ່ງຝາກຝັງວິນຍານຂອງຕົນໄວ້ກັບອົງພຣະຜູ້ສ້າງ ຜູ້ສັດຊື່ ພ້ອມທັງສ້າງຄຸນງາມຄວາມດີຕ່າງໆໄວ້ດ້ວຍ.