ໜ້າທີ່ຂອງສາມີພັນລະຍາ

1ດັ່ງດຽວກັນ, ພວກພີ່ນ້ອງຜູ້ເປັນພັນລະຍາທັງຫລາຍ, ຈົ່ງນອບນ້ອມຕໍ່ສາມີຂອງຕົນ, ເພື່ອວ່າ ຫາກສາມີລາງຄົນບໍ່ຍອມເຊື່ອໃນພຣະວາຈາ, ແຕ່ອາໄສຄວາມປະພຶດຂອງພັນລະຍາ, ສາມີເຫລົ່ານັ້ນກໍຈະໄດ້ກັບໃຈ ໂດຍບໍ່ຕ້ອງເວົ້າຫຍັງຈັກຄຳ. 2ໃນເມື່ອເຂົາສັງເກດເຫັນຄວາມປະພຶດອັນບໍລິສຸດ ແລະເຕັມດ້ວຍຄວາມເຄົາລົບນັບຖືຂອງພວກພີ່ນ້ອງຜູ້ເປັນພັນລະຍາ. 3ຂໍໃຫ້ການຕົກແຕ່ງກາຍຂອງພວກພີ່ນ້ອງ ຢ່າເປັນແຕ່ການຕົກແຕ່ງພາຍນອກ ຄື ເຜືອຜົມ, ໃສ່ເຄື່ອງຄຳ, ນຸ່ງຫົ່ມງາມໆ; 4ແຕ່ຂໍໃຫ້ເປັນການຕົກແຕ່ງພາຍໃນຈິດໃຈ ຄື ການຕົກແຕ່ງທີ່ບໍ່ເສື່ອມສູນ ປະກອບດ້ວຍຈິດໃຈອ່ອນຫວານ ແລະສະຫງົບສະງ່ຽມ. ນີ້ແຫລະ ແມ່ນສິ່ງທີ່ມີຄຸນຄ່າສູງຕໍ່ພຣະພັກພຣະເຈົ້າ. 5ພວກຜູ້ຍິງສັດທາໃນສະໃໝກ່ອນ ຜູ້ມີຄວາມໄວ້ວາງໃຈນຳພຣະເຈົ້າ ແລະນອບນ້ອມຕໍ່ສາມີຂອງຕົນ ກໍໄດ້ຕົກແຕ່ງຕົວເອງແບບນີ້. 6ດັ່ງເຊັ່ນນາງຊາຣາ ໄດ້ນອບນ້ອມຕໍ່ອາບຣາຮຳ ແລະເອີ້ນເພິ່ນວ່ານາຍຂອງຕົນ. ພວກພີ່ນ້ອງກໍຈະກາຍເປັນລູກສາວຂອງນາງ ຖ້າພວກພີ່ນ້ອງປະພຶດຕົວດີ ແລະບໍ່ມີຄວາມຕົກໃຈຢ້ານກົວສິ່ງໃດເລີຍ. 7ສ່ວນພວກພີ່ນ້ອງຜູ້ເປັນສາມີກໍດັ່ງດຽວກັນ, ຈົ່ງຢູ່ກິນກັບພັນລະຍາຂອງຕົນ ໂດຍເຂົ້າໃຈວ່ານາງເປັນເພດທີ່ອ່ອນແອກວ່າ. ຈົ່ງໃຫ້ກຽດນາງ ຍ້ອນວ່ານາງມີສ່ວນໃນການຮັບເອົາພຣະຄຸນແຫ່ງຊີວິດມາເປັນມໍລະດົກ ຄືກັນກັບພີ່ນ້ອງ, ເພື່ອບໍ່ໃຫ້ມີຫຍັງມາເປັນອຸປະສັກກີດຂວາງຄຳວິງວອນຂອງພວກພີີ່ນ້ອງ. 

ຍອມຮ່ວມທຸກສຸກນຳກັນ

8ທ້າຍສຸດ, ຂໍໃຫ້ທຸກຄົນເປັນນ້ຳໜຶ່ງໃຈດຽວກັນ, ເຫັນອົກເຫັນໃຈກັນ, ຮັກແພງກັນດັ່ງພີ່ ນ້ອງ, ມີຄວາມເມດຕາປານີ ແລະສຸພາບ 9ຢ່າເອົາຄວາມຊົ່ວຮ້າຍມາຕອບແທນຄວາມຊົ່ວ ຮ້າຍ, ຫລືເອົາການດ່າ ມາຕອບແທນການດ່າ. ກົງຂ້າມ ຈົ່ງອວຍພອນເຂົາ ຍ້ອນພຣະອົງໄດ້ຊົງຮຽກພວກພີ່ນ້ອງມາເພື່ອທຳແບບນີ້ ແລ້ວພວກພີ່ນ້ອງຈະໄດ້ຮັບພຣະພອນມາເປັນມໍລະດົກ. 10ດ້ວຍວ່າ “ຜູ້ໃດປາດຖະໜາຮັກແພງຊີວິດ ແລະຢາກເຫັນມື້ເຫັນວັນອັນມີລາບ ກໍໃຫ້ຫ້າມລີ້ນຂອງຕົນພົ້ນຈາກຄວາມຊົ່ວ, ຫ້າມປາກບໍ່ໃຫ້ເວົ້າຕົວະຫລອກ. 11 ຫລີກເວັ້ນຄວາມຊົ່ວ ແລະທຳຄວາມດີ ຊອກຫາສັນຕິ ແລະທຳໃຫ້ຈົນໄດ້. 12ຍ້ອນວ່າ ດວງຕາຂອງພຣະເຈົ້າເຝົ້າເບິ່ງຄົນຊອບທຳ ຫູຂອງພຣະອົງ ຄອຍຟັງສຽງເຂົາໄຫວ້ວອນ ແຕ່ພຣະພັກຂອງພຣະອົງ ຕໍ່ສູ້ກັບຜູ້ທຳຊົ່ວ”.

ຈົ່ງໄວ້ໃຈໃນຍາມຖືກບັງບຽດ

13ຖ້າພວກພີ່ນ້ອງໃສ່ໃຈໃນການທຳດີແລ້ວ, ມີໃຜຈະມາທຳຮ້າຍພວກພີ່ນ້ອງບໍ? 14ກ່ວານັ້ນອີກ, ໃນເມື່ອພວກພີ່ນ້ອງຕ້ອງຮັບທຸກຍ້ອນຄວາມຊອບທຳ ກໍເປັນບຸນລາບໃຫ້ພວກພີ່ນ້ອງ. ດັ່ງນີ້ ຢ່າຢ້ານເຂົາຫຍັງ ແລະຢ່າຕົກໃຈເລີຍ. 15ແຕ່ຈົ່ງເຄົາລົບນັບຖືພຣະກຣິສໂຕ ຜູ້ເປັນພຣະອົງເຈົ້າ ຢູ່ໃນຈິດໃຈຂອງພວກພີ່ນ້ອງ. ຈົ່ງຕຽມພ້ອມສະເໝີ ທີ່ຈະໃຫ້ຄຳຕອບອັນພໍອົກພໍໃຈແກ່ທຸກຄົນ ທີ່ຢາກຮູ້ເຖິງເຫດຜົນ ຊຶ່ງທຳໃຫ້ພວກພີ່ນ້ອງມີຄວາມຫວັງ 16ແຕ່ຈົ່ງແປອະທິບາຍດ້ວຍຄວາມອ່ອນຫວານ ແລະມີຄວາມນັບຖື ພ້ອມດ້ວຍຄວາມບໍລິສຸດໃຈ, ເພື່ອໃຫ້ພວກທີ່ໃສ່ຄວາມ ແລະເວົ້າຮ້າຍປ້າຍສີ ໃສ່ຄວາມປະພຶດອັນດີງາມຂອງພວກພີ່ນ້ອງໃນພຣະກຣິສໂຕນັ້ນ ໄດ້ຮັບຄວາມອັບອາຍຂາຍໜ້າ. 17ຍ້ອນວ່າຖືກທຸກທໍຣະມານຍ້ອນທຳດີ (ຖ້າແມ່ນນ້ຳພຣະໄທພຣະເຈົ້າ), ກໍດີກວ່າຖືກທຸກທໍຣະມານ ຍ້ອນທຳແນວຜິດ.

ໄຊຊະນະຂອງພຣະກຣິສໂຕໃນຕົວພວກເຮົາ

18ຕາມຄວາມຈິງ, ພຣະກຣິສໂຕເຈົ້າໄດ້ສິ້ນພຣະຊົນເທື່ອດຽວເທົ່ານັ້ນ ຍ້ອນບາບຂອງພວກເຮົາ. ພຣະອົງຜູ້ຊອບທຳໄດ້ສິ້ນພຣະຊົນເພື່ອຄົນອະທຳ ເພື່ອຈະໄດ້ຖະຫວາຍພວກເຮົາໃຫ້ພຣະເຈົ້າ. ພຣະອົງສິ້ນພຣະຊົນຝ່າຍກາຍ ແຕ່ໄດ້ກັບຄືນຊີບເດຊະພຣະຈິດ. 19ແລ້ວໂດຍທາງວິນຍານນັ້ນ, ພຣະອົງໄດ້ນຳຂ່າວດີ ໄປແຈ້ງແກ່ວິນຍານທັງຫລາຍທີ່ຖືກຄຸມຂັງ 20ຊຶ່ງແຕ່ກ່ອນດຶ້ດຶງບໍ່ຍອມເຊື່ອ ເມື່ອພຣະເຈົ້າອົດທົນຄອງຖ້າດົນນານ ໃນສະໄໝນໍແອ ກຳລັງສ້າງສຳເພົາ. ໃນຈຳນວນນີ້ ມີໜ້ອຍຄົນໄດ້ລອດຕາຍ. ດ້ວຍອາໄສນ້ຳ ຄືວ່າມີແຕ່ແປດຄົນທີ່ຢູ່ໃນສຳເພົາ ເທົ່ານັ້ນ. 21ນ້ຳນັ້ນໝາຍເຖິງສິນລ້າງບາບ ທີ່ຊ່ວຍພວກພີ່ນ້ອງໃຫ້ຮອດ ໃນປັດຈຸບັນນີ້. ຄືວ່າ ບໍ່ແມ່ນລ້າງສິ່ງໂສໂຄກອອກຈາກຮ່າງກາຍ, ແຕ່ແມ່ນການທູນຂໍນຳພຣະເຈົ້າ ດ້ວຍຄວາມບໍລິສຸດໃຈ. ສິນລ້າງບາບນີ້ຊ່ວຍພວກພີ່ນ້ອງໃຫ້ຮອດ ເດຊະການກັບຄືນຊີບຂອງພຣະເຢຊູກຣິສໂຕເຈົ້າ, 22ຜູ້ໄດ້ສະເດັດສູ່ສະຫວັນ ແລະປະທັບຢູ່ເບື້ອງຂວາຂອງພຣະເຈົ້າ, ມີພວກນິກອນເທວະດາ, ຄະນະມີອຳນາດ ແລະຄະນະມີຣິດເດດ ຢູ່ກ້ອງອຳນາດຂອງພຣະອົງທັງສິ້ນ.