ຈົດໝາຍຂອງນັກບຸນ ເປໂຕ ອັກຄະທຳມະທູດສະບັບທີ 1

ຄຳນັບຖາມຂ່າວ

1ຈາກເປໂຕ ອັກຄະທຳມະທູດຂອງພະເຊູກຣິສໂຕເຈົ້າ ເຖິງພວກເລືອກສັນທີ່ແຕກຢາຍກັນໄປຢູ່ ດັ່ງຄົນຕ່າງຖິ່ນ ໃນແຂວງປອນໂຕ, ກາລາຊີ, ກັບປາໂດຊີ ອາຊີ ແລະບີທີນີ. 2ຄືພວກທີ່ພຣະເຈົ້າພຣະບິດາ ໄດ້ຊົງເລືອກສັນໄວ້ໃຫ້ເປັນຜູ້ສັກສິດ ເດຊະພຣະຈິດເຈົ້າ ຕາມໂຄງການຂອງພຣະອົງ ເພື່ອນົບນອບເຊື່ອຟັງພຣະເຢຊູກຣິສໂຕເຈົ້າ ແລະໄດ້ຮັບການສາດພົມດ້ວຍພຣະໂລຫິດຂອງພຣະອົງ. ຂໍພຣະຄຸນແລະສັນຕິສຸກ ຈົ່ງຫລັ່ງໄຫລມາສູ່ພວກພີ່ນ້ອງຢ່າງອຸດົມສົມບູນເທີ້ນ!

ຂອບພຣະຄຸນເຖິງຄວາມຮອດໃນພຣະເຢຊູເຈົ້າ

3ຂໍຖະຫວາຍພອນແດ່ພຣະເຈົ້າ, ພຣະບິດາຂອງພຣະເຢຊູກຣິສໂຕ ພຣະອົງເຈົ້າຂອງເຮົາທັງຫລາຍ ຜູ້ຊົງພຣະເມດຕາເຫລືອລົ້ນ ໄດ້ບັນດານໃຫ້ພວກເຮົາໄດ້ເກີດໃໝ່ ດ້ວຍອາໄສການກັບຄືນຊີບຈາກພວກຜູ້ຕາຍ ຂອງພຣະເຢຊູກຣິສໂຕເຈົ້າ, ເພື່ອໃຫ້ພວກເຮົາມີຄວາມຫວັງອັນມີຊີວິດຊີວາ 4ແລະຈະໄດ້ຮັບມໍລະດົກອັນບໍ່ມີຍາມເສື່ອມສູນ, ປາດສະຈາກມົນທິນ, ຫລືເສົ້າໝອງໄດ້, ຊຶ່ງພຣະອົງໄດ້ສະຫງວນໄວ້ສຳລັບພວກພີ່ນ້ອງຢູ່ສະຫວັນ. 5ພຣະອົງໄດ້ໃຊ້ລິດເດດຂອງພຣະເຈົ້າ ມາປົກປ້ອງຄຸ້ມຄອງພວກພີ່ນ້ອງໄວ້ ດ້ວຍອາໄສຄວາມເຊື່ອທີ່ບັນດານຄວາມຮອດ ຊຶ່ງພຣະອົງຕຽມພ້ອມທີ່ຈະເປີດເຜີຍອອກມາໃນວັນສິ້ນໂລກ. 6ດ້ວຍເຫດນີ້ ພວກພີ່ນ້ອງຈົ່ງຊື່ນຊົມຍິນດີ ແມ່ນວ່າ ເວລານີ້ ພວກພີ່ນ້ອງຍັງຈະຕ້ອງຮັບທຸກຈາກການທົດລອງຕ່າງໆ ເປັນເວລາຊົ່ວຄາວກໍຕາມ, 7ທັງນີ້ກໍເພື່ອໃຫ້ຄຸນຄ່າແຫ່ງຄວາມເຊື່ອຂອງພວກພີ່ນ້ອງ ຊຶ່ງປະເສີດກວ່າຄຳທີ່ເສື່ອມເສຍເປັນ ແຕ່ຍັງຕ້ອງຖືກລອງດ້ວຍໄຟນັ້ນ ກາຍເປັນການຍ້ອງຍໍສໍລະເສີນ, ເປັນກຽດແລະສີມຸງຄຸນ, ເມື່ອເວລາພຣະເຢຊູກຣິສໂຕເຈົ້າຈະປະຈັກມາ. 8ພຣະອົງແມ່ນຜູ້ທີ່ພວກພີ່ນ້ອງຮັກ ໂດຍບໍ່ໄດ້ເຫັນພຣະອົງ, ແມ່ນຜູ້ທີ່ພວກພີ່ນ້ອງເຊື່ອຢູ່ດຽວນີ້ ຢ່າງຕາບໍ່ເຫັນດ້ວຍ. ດັ່ງນີ້ ຈົ່ງຊື່ນຊົມຍິນດີຢ່າງສຸດຊຶ້ງ ແລະປ່ຽມດ້ວຍຄວາມຮຸ່ງເຮືອງ 9ຍ້ອນໄດ້ຮັບບຳເໜັດລາງວັນແຫ່ງຄວາມເຊື່ອ ຄື ຄວາມຮອດຂອງວິນຍານພວກພີ່ນ້ອງເອງນັ້ນແລ. 10ບັນດາປະພາສົກທັງຫລາຍໄດ້ພະຍາຍາມຄົ້ນຄວ້າ ຊອກຫາຫລັກຖານກ່ຽວກັບຄວາມຮອດນີ້ ແລະໄດ້ເປີດເຜີຍໃຫ້ຮູ້ຈັກລ່ວງໜ້າ ເຖິງພຣະຄຸນທີ່ໄດ້ຊົງຕຽມໄວ້ສຳລັບພວກພີ່ນ້ອງ. 11ທ່ານເຫລົ່ານັ້ນໄດ້ພາກັນຄົ້ນຄວ້າ ເພື່ອຢາກຮູ້ວັນເວລາ ແລະສິ່ງແວດລ້ອມຕ່າງໆ ຕາມທີ່ພຣະຈິດຂອງພຣະກຣິສໂຕເຈົ້າໄດ້ດົນໃຈ. ເມື່ອເວລາພຣະອົງຊົງເປີດເຜີຍລ່ວງໜ້າ ເຖິງຄວາມທຸກທໍຣະມານທີ່ພະກກຣິສໂຕຈະຕ້ອງໄດ້ຮັບ ແລະສີມຸງຄຸນຕ່າງໆທີ່ຈະຕິດຕາມມາ. 12ບັນດາປະພາສົກໄດ້ຮັບການດົນໃຈໃຫ້ຮູ້ວ່າ ຂ່າວສານທີ່ພວກເພິ່ນປະກາດນັ້ນ ບໍ່ແມ່ນສຳລັບຕົວເພິ່ນເອງ, ແຕ່ສຳລັບພວກພີ່ນ້ອງ. ບັດນີ້ ບັນດາຜູ້ປະກາດພຣະວໍຣະສານທັງຫລາຍ ໄດ້ປະກາດຂ່າວສານນັ້ນໃຫ້ພວກພີ່ນ້ອງຊາບ ດ້ວຍເດຊະພຣະຈິດທີ່ຖືກສົ່ງມາແຕ່ສະຫວັນ ແລະເທວະດາທັງຫລາຍກໍມີຄວາມປາດຖະໜາແຮງກ້າຢາກຮູ້ຂ່າວສານນີ້ດ້ວຍ.

ຕຸກເຕືອນໃຫ້ເປັນຜູ້ສັກສິດ

13ດ້ວຍເຫດນີ້, ຈົ່ງຕຽມຕົວຕຽມໃຈໃຫ້ພຽກພ້ອມຮັບໃຊ້. ຈົ່ງມີສະຕິລະວັງຕົວ ແລະມີຄວາມຫວັງຢ່າງເຕັມພຽບໃນພຣະຄຸນ ຊຶ່ງພຣະເຢຊູເຈົ້າຈະປະທານໃຫ້ພວກພີ່ນ້ອງ ເມື່ອເວລາພຣະອົງຈະປະຈັກມາ. 14ພວກພີ່ນ້ອງເປັນດັ່ງບຸດທີ່ນອບນ້ອມເຊື່ອຟັງແລ້ວ. ຂໍຢ່າໄດ້ດຳເນີນຊີວິດຕາມກິເລດຕັນຫາຄືແຕ່ກ່ອນ ເມື່ອຍັງບໍ່ທັນຮູ້ເທົ່າເຖິງການ. 15ແຕ່ຈົ່ງເປັນຜູ້ສັກສິດໃນຄວາມປະພຶດທຸກຢ່າງ. ເໝືອນດັ່ງພຣະອົງ ຜູ້ໄດ້ຊົງຮຽກເອົາພວກພີ່ນ້ອງນັ້ນ ຊົງເປັນຜູ້ສັກສິດ. 16ດັ່ງມີຄຳຂຽນໄວ້ວ່າ: “ພວກເຈົ້າຈົ່ງເປັນຜູ້ສັກສິດ ຍ້ອນເຮົາເປັນຜູ້ສັກສິດ.” 17ແລະຖ້າພວກພີ້ນ້ອງເອີ້ນຫາພຣະອົງ ຜູ້ພິພາກສາແຕ່ລະຄົນຢ່າງສະເໝີໜ້າກັນ ຕາມວຽກການຂອງໃຜລາວນັ້ນ ວ່າເປັນພຣະບິດາແລ້ວ, ພວກພີ້ນ້ອງກໍຈົ່ງປະພຶດຕົນເປັນຜູ້ຢ້ານຈຽມພຣະອົງ ຕະຫລອດເວລາທີ່ເດີນທາງຢູ່ໃນໂລກນີ້ດ້ວຍ. 18ພວກພີ່ນ້ອງຈົ່ງຮູ້ເຖີດວ່າ ພວກພີ່ນ້ອງໄດ້ຖືກກູ້ໄຖ່ໃຫ້ຫວິດຈາກການດຳເນີນຊີວິດອັນໄຮ້ຄ່າ ທີ່ສືບມາແຕ່ບັນພະບຸຣຸດຂອງພວກພີ່ນ້ອງ ບໍ່ແມ່ນດ້ວຍສິ່ງທີ່ສູນເສຍໄດ້ ຢ່າງເງິນຫລືຄຳດອກ 19ແຕ່ດ້ວຍພຣະໂລຫິດອັນປະເສີດຂອງພຣະກຣິສໂຕ ຜູ້ເປັນດັ່ງຊຸມພານ້ອຍທີ່ປາດສະຈາກມົນທິນແລະຕຳໜິໃດໆ 20ຊຶ່ງພຣະເຈົ້າໄດ້ກຳໜົດໄວ້ລ່ວງໜ້າແລ້ວແຕ່ກ່ອນສ້າງໂລກ ແລະໄດ້ເປີດເຜີຍອອກມາໃນເວລາສຸດທ້າຍນີ້ ຍ້ອນເຫັນແກ່ພວກພີ່ນ້ອງ. 21ດ້ວຍອາໄສພຣະອົງນີ້ແຫລະ ພວກພີ່ນ້ອງຈຶ່ງມີຄວາມເຊື່ອໃນພຣະເຈົ້າ ຜູ້ຊົງບັນດານໃຫ້ພຣະອົງກັບຄືນຊີບຈາກພວກຜູ້ຕາຍ ແລະໄດ້ປະທານສີມຸງຄຸນແດ່ພຣະອົງ ເພື່ອໃຫ້ຄວາມເຊື່ອແລະຄວາມຫວັງຂອງພວກພີ່ນ້ອງຕັ້ງໝັ້ນຢູ່ໃນພຣະເຈົ້າ.

ຈົ່ງຮັກແພງກັນ ດັ່ງພີ່ດັ່ງນ້ອງ

22ເມື່ອໄດ້ນອບນ້ອມຕາມຄວາມຈິງແລ້ວ, ພວກພີ່ນ້ອງກໍໄດ້ຊຳຣະວິນຍານຂອງຕົນໃຫ້ບໍລິສຸດ ເພື່ອຈະໄດ້ຮັກແພງກັນດັ່ງພີ່ນ້ອງຢ່າງຈິງໃຈ. ດັ່ງນີ້ ຈົ່ງຮັກແພງກັນດ້ວຍນ້ຳໃສໃຈຈິງ ແລະຖາວອນສືບໄປ. 23ດ້ວຍວ່າພວກພີ່ນ້ອງໄດ້ເກີດໃໝ່ ບໍ່ແມ່ນເກີດຈາກແນວປູກທີ່ເປື່ອຍເໜົ່າເປັນ ແຕ່ເກີດຈາກແນວປູກທີ່ບໍ່ອາດເປື່ອຍເໜົ່າໄດ້ຄື ຈາກພຣະວາຈາອັນຊົງຊີວິດ ແລະຄົງຢູ່ຕະຫລອດນິຣັນດອນ ຂອງພຣະເຈົ້າ. 24ຍ້ອນວ່າມະນຸດທັງໝົດເປັນດັ່ງຕົ້ນຫຍ້າ ແລະຄວາມຮຸ່ງເຮືອງຕ່າງໆຂອງມະນຸດກໍຄືດອກຫຍ້າ. ເມື່ອຫຍ້າຫ່ຽວ ດອກມັນກໍຫລົ່ນ 25ແຕ່ພຣະວາຈາຂອງພຣະເຈົ້າດຳຣົງຢູ່ຕະຫລອດນິຣັນດອນ ພຣະວາຈານີ້ແຫລະຄືຂ່າວປະເສີດທີ່ໄດ້ປະກາດໃຫ້ພວກພີ່ນ້ອງຊາບ.