ອັນຕະລາຍຂອງການສັ່ງສອນ

1.ພີ່ນ້ອງທັງຫລາຍ, ຢ່າໄດ້ພາກັນເປັນອາຈານສອນໝົດໝູ່ເລີຍ. ພວກພີ່ນ້ອງກໍຮູ້ດີວ່າ ພວກເຮົາຜູ້ເປັນອາຈານສອນ ຈະຖືກພິພາກສາຢ່າງໝັກໜ່ວງ. 2ຍ້ອນເຮົາທຸກຄົນພາດທ່າເສຍທີຢູ່ເລື້ອຍໆ. ຖ້າຜູ້ໃດບໍ່ພາດທ່າໃນຄວາມປາກຄວາມເວົ້າ, ຜູ້ນັ້ນກໍເປັນຄົນບໍລິບູນ ແລະສາມາດຄຸມຕົວເອງໄດ້ທັງໝົດ. 3ຖ້າພວກເຮົາເອົາບັງຫຽນໃສ່ປາກມ້າໄວ້ ກໍເພື່ອໃຫ້ມັນຟັງຄວາມ, ແລ້ວພວກເຮົາກໍຄຸມຕົວມັນທັງໝົດໄດ້. 4ຈົ່ງເບິ່ງເຮືອ: ແມ່ນມັນຈະໃຫຍ່ໂຕ ແລະມີລົມແຮງພັດຍູ້ໄປມາກໍຕາມ, ເຮືອນັ້ນກໍຖືກບັງຄັບໃຫ້ໄປຕາມຄວາມປະສົງຂອງນາຍທ້າຍ ດ້ວຍອາໄສໃບຂັດທ້າຍນ້ອຍໆນັ້ນແລ. 5ລີ້ນກໍດັ່ງດຽວກັນ, ມັນເປັນອະໄວຍະວະນ້ອຍໆ. ແຕ່ເວົ້າອວດໃຫຍ່ອວດໂຕໄດ້. ເຫັນບໍ, ໄຟໝັດດຽວກໍສາມາດເຜົາຜານໝົດປ່າດົງກວ້າງໃຫຍ່ໄພສານໄດ້. 6ລີ້ນກໍເປັນໄຟດ້ວຍ, ມັນເປັນບ່ອນຮວບໂຮມຄວາມຊົ່ວຮ້າຍ. ມັນເປັນສ່ວນໜຶ່ງໃນອະໄວຍະວະຕ່າງໆຂອງພວກເຮົາ. ມັນເຮັດໃຫ້ໝົດຕົນຕົວເຮົາເປື້ອນໝອງ, ເຜົາຜານວົງໂຄຈອນຂອງຊີວິດ, ແລະມັນເອງກໍຕິດໄຟມາຈາກນະລົກ.

7.ມະນຸດເຮົາສາມາດເຝິກແອບສັດທຸກຊະໜິດໃຫ້ເຊື່ອຟັງໄດ້: ບໍ່ວ່າຈະເປັນສັດປ່າ, ນົກ, ສັດເລືອ ຫລືປູປາກໍຕາມ. 8ສ່ວນລີ້ນນັ້ນ ບໍ່ມີມະນຸດຄົນໃດເຝິກແອບມັນໄດ້: ມັນເປັນໄຟທີ່ຄຸມໄວ້ບໍ່ໄດ້ ແລະເຕັມແຕ່ພິດຮ້າຍທີ່ທຳໃຫ້ຕາຍ. 9ພວກເຮົາໃຊ້ລີ້ນເພື່ອສັນຣະເສີນ ພຣະເປັນເຈົ້າພຣະບິດາ, ແລະຍັງໃຊ້ລີ້ນເພື່ອດ່າປ້ອຍມະນຸດ ຊຶ່ງໄດ້ຖືກສ້າງຕາມຮູບແບບຂອງພຣະເປັນເຈົ້າອີກດ້ວຍ. 10ທັງຄຳສັນຣະເສີນ ແລະຄຳປ້ອຍຕ່າງໆ ກໍອອກມາຈາກປາກອັນດຽວກັນ. ພີ່ນ້ອງທັງຫລາຍ, ບໍ່ຄວນໃຫ້ເປັນໄປແບບນີ້.

11.ບໍ່ນ້ຳຈະສົ່ງທັງນ້ຳຈືດແລະເຄັມ ອອກມາທາງຮູດຽວກັນໄດ້ບໍ? 12ກົກເດື່ອຈະເກີດໝາກເປັນໝາກກອກເທດ ຫລືກົກອະງຸມຈະເກີດໝາກເປັນໝາກກອກເທດໄດ້ບໍ? - ບໍ່ນ້ຳເຄັມຈະໃຫ້ນ້ຳຈືດກໍບໍ່ໄດ້ດ້ວຍ. 13ໃຜໃນພວກພີ່ນ້ອງເປັນຄົນສະຫລາດແລະມີປັນຍາຫລັກແຫລມບໍ? ຂໍໃຫ້ຜູ້ນັ້ນໃຊ້ຄວາມປະພຶດອັນດີງາມເປັນຫລັກຖານ ສະແດງວ່າ ວຽກການທີ່ປ່ຽມດ້ວຍຄວາມອ່ອນໂຍນນັ້ນ ປະກອບດ້ວຍຄວາມສະຫລາດ. 14ແຕ່ຖ້າພວກພີ່ນ້ອງມີໃຈຫຶງສາອັນຂົມຂື່ນ ແລະມັກແຂ່ງດີກັນແລ້ວ ກໍຢ່າອວດດີແລະເວົ້າຕົວະຫລອກ ຜິດຕໍ່ຄວາມຈິງ. 15ຄວາມສະຫລາດແບບນີ້ບໍ່ໄດ້ມາຈາກເບື້ອງບົນດອກ, ມັນແມ່ນຄວາມສະຫລາດຕາມປະສາໂລກ, ຕາມທຳມະຊາດແບບຜີປີສາດ. 16ຍ້ອນວ່າຄວາມຫຶງສາ ແລະການແຂ່ງດີກັນ ທຳໃຫ້ເກີດຄວາມວຸ້ນວາຍ ແລະຄວາມຊົ່ວຮ້າຍນາໆປະການ. 17ສ່ວນຄວາມສະຫລາດທີ່ມາຈາກເບື້ອງບົນນັ້ນ ກ່ອນໝົດແມ່ນສິ່ງບໍລິສຸດ, ຄວາມສັນຕິ, ມີຄວາມປານີປານອມ, ເຕັມພຽບດ້ວຍຄວາມເມດຕາກະລຸນາ, ແລະຄຸນຄວາມດີຕ່າງໆ, ບໍ່ເລືອກໜ້າໃຜ, ບໍ່ໜ້າຊື່ໃຈຄົດ. 18.ຜູ້ມັກສ້າງຄວາມສັນຕິ ກໍໄດ້ຮັບຜົນແຫ່ງຄວາມຊອບທຳ ຊຶ່ງຫວ່ານໄປໃນຄວາມສັນຕິ.