ຄູຫາເປົ່າວ່າງ
1.ເມື່ອວັນເສົາລ່ວງໄປແລ້ວ, ນາງມາຣີອາມັກດາເລນາ, ນາງມາຣີອາແມ່ຂອງຢາໂກເບ ແລະນາງຊາໂລເມ ໄດ້ພາກັນຊື້ນ້ຳຫອມເພື່ອເອົາໄປຊະໂລມພຣະສົບ. 2.ແຕ່ເຊົ້າໆ, ມື້ຕົ້ນອາທິດ, ພວກນາງພາກັນໄປຄູຫາ, ເວລານັ້ນຕາເວັນພວມຂຶ້ນ. 3.ພວກນາງເວົ້າກັນວ່າ: “ໃຜຈະກື່ງກ້ອນຫິນອອກຈາກປາກຄູຫາໃຫ້ພວກເຮົາ”. 4.ພໍແນມເບິ່ງ ກໍເຫັນກ້ອນຫິນນັ້ນກິ້ງອອກຢູ່ທາງຂ້າງແລ້ວ, ແລະກ້ອນຫີນນັ້ນກໍໃຫຍ່ຫລາຍ. 5.ເມື່ອເຂົ້າໄປໃນຄູຫາ, ພວກນາງກໍເຫັນຊາຍໜຸ່ມຜູ້ໜຶ່ງນັ່ງຢູ່ທາງຂວາ, ແຕ່ງຕົວດ້ວຍເສື້ອຍາວສີຂາວ. ພວກ

ນາງຕົກໃຈຢ້ານ. 6.ແຕ່ຊາຍໜຸ່ມຜູ້ນັ້ນເວົ້າວ່າ: “ຢ່າຢ້ານກົວເລີຍ! ພວກນາງຊອກຫາພຣະເຢຊູຊາວນາຊາແຣັດຜູ້ຖືກຄຶງໃສ່ກາງເຂນ. ພຣະອົງກັບເປັນຄືນມາແລ້ວ ພຣະອົງບໍ່ຢູ່ບ່ອນນີ້ດອກ. ນີ້ແຫລະບ່ອນເຂົາວາງພຣະອົງໄວ້. 7.ໃຫ້ພວກນາງໄປບອກພວກສາວົກ, ແລະເປັນຕົ້ນບອກເປໂຕວ່າ: ພຣະອົງກຳລັງຄອງຖ້າພວກເຈົ້າຢູ່ແຂວງກາລີເລ. ຢູ່ທີ່ນັ້ນ ພວກເຈົ້າຈະໄດ້ເຫັນພຣະອົງ ຕາມທີ່ພຣະອົງໄດ້ກ່າວໄວ້ກ່ອນແລ້ວ”. 8.ພວກນາງທັງສາມກໍແລ່ນອອກຈາກຄູຫາ ດ້ວຍຄວາມຕົກໃຈຄືຄົນເສຍສະຕິ. ແລະບໍ່ໄດ້ຂ່າວໃຫ້ຜູ້ໃດຟັງເລີຍຍ້ອນຄວາມຢ້ານ. 

ການປະຈັກມາຂອງພຣະເຢຊູເຈົ້າ

9.ເມື່ອໄດ້ກັບເປັນຄືນມາໃນຕອນເຊົ້າມື້ຕົ້ນອາທິດນັ້ນ, ກ່ອນໝົດພຣະເຢຊູເຈົ້າໄດ້ປະຈັກມາຫານາງມາຣີອາມັກດາເລນາ, ຜູ້ພຣະອົງໄດ້ໄລ່ຜີເຈັດຕົວອອກນັ້ນ. 10.ນາງນີ້ແຫລະໄດ້ນຳເອົາຂ່າວໄປບອກໃຫ້ແກ່ພວກທີ່ເຄີຍຢູ່ກັບພຣະອົງ ຊຶ່ງກຳລັງຮ້ອງໄຫ້ໄວ້ທຸກຢູ່ນັ້ນຊາບ 11.ແຕ່ພວກນັ້ນ, ເມື່ອໄດ້ຍິນນາງມາຣີອາເວົ້າວ່າ: ພຣະອົງມີຊີວິດຢູ່ແລະໄດ້ປະຈັກໃຫ້ນາງເຫັນ, ພວກເຂົາກໍບໍ່ຍອມເຊື່ອ.

12.ຕໍ່ຈາກນັ້ນ ພຣະອົງຍັງໄດ້ປະຈັກໃນລັກສະນະໃໝ່ ແກ່ລູກສິດສອງຄົນທີ່ເດີນທາງໄປບ້ານນອກ. 13.ສອງຄົນນີ້ໄດ້ຫລົບມາແຈ້ງຂ່າວໃຫ້ໝູ່ລູກສິດອື່ນໆຮູ້, ແຕ່ພວກນີ້ກໍບໍ່ເຊື່ອຄວາມເວົ້າພວກເຂົາເລີຍ. 14.ທ້າຍສຸດ, ພຣະອົງໄດ້ປະຈັກມາຫາພວກອັກຄະສາວົກສິບເອັດຄົນ ໃນເວລາພວກເຂົາກຳລັງຮັບປະທານອາຫານ. ພຣະອົງໄດ້ຕິຕຽນພວກເຂົາຍ້ອນໃຈແຂງດື້ ບໍ່ຍອມເຊື່ອຄວາມເວົ້າຂອງຜູ້ທີ່ໄດ້ເຫັນພຣະອົງກັບເປັນຄືນມາແລ້ວ. 15.ພຣະອົງກ່າວກັບພວກເຂົາວ່າ: “ຈົ່ງໄປທົ່ວໂລກ, ປະກາດພຣະວໍຣະສານແກ່ມວນມະນຸດ.16.ຜູ້ໃດເຊື່ອແລະຮັບສິນລ້າງບາບ, ຜູ້ນັ້ນຈະເອົາຕົວຮອດ; ຜູ້ໃດບໍ່ຍອມເຊື່ອ ຈະຖືກຕັດສິນລົງໂທດ. 17.ຜູ້ເຊື່ອຈະທຳອັດສະຈັນນີ້ໄດ້ຄື: ຈະໄລ່ຜີປີສາດໄດ້ດ້ວຍອາໄສນາມຂອງເຮົາ, ຈະປາກພາສາຕ່າງໆໄດ້, 18.ຈັບງູໄດ້, ແລະຖ້າເຂົາກິນຂອງເບື່ອແນວຕາຍ, ກໍບໍ່ເປັນອັນຕະລາຍ; ເຂົາຈະປົກມືເທິງຄົນເຈັບໂຊ, ແລະຜູ້ເຈັບໂຊກໍຈະຫາຍຈາກພະຍາດ.” 

ສະເດັດຂຶ້ນສະຫວັນ

19.ເມື່ອກ່າວດັ່ງນີ້ແລ້ວ, ພຣະເຢຊູເຈົ້າກໍສະເດັດຂຶ້ນສະຫວັນ, ປະທັບຢູ່ເບື້ອງຂວາຂອງພຣະເປັນເຈົ້າ. 20.ສ່ວນພວກອັກຄະສາວົກກໍໄດ້ແຕກກັນໄປ ເທດສະໜາສັ່ງສອນທຸກ

ແຫ່ງຫົນ, ພຣະອົງເຈົ້າໄດ້ຮ່ວມມືກັບພວກເຂົາ, ແລະໄດ້ຮັບຮອງຄຳສັ່ງສອນຂອງພວກເຂົາ ດ້ວຍບັນດານໃຫ້ເກີດມີການອັດສະຈັນຕ່າງໆໄປພ້ອມດ້ວຍ.