ພຣະເຢຊູເຈົ້າຢູ່ຕໍ່ໜ້າປີລາໂຕ

1.ມື້ຕໍ່ມາແຕ່ເຊົ້າໆ, ພວກຫົວໜ້າສົງ, ພວກເຖົ້າແກ່, ພວກອາຈານພຣະຄຳພີ ແລະສະມາຊິກສານສູງທັງໝົດກໍເຂົ້າປະຊຸມ. ແລະເມື່ອພວກເຂົາໄດ້ຜູກມັດພຣະເຢຊູເຈົ້າແລ້ວ, ກໍເອົາພຣະອົງໄປມອບໃຫ້ພະຍາປີລາໂຕ. 2.ປີລາໂຕທູນຖາມພຣະອົງວ່າ: “ທ່ານແມ່ນກະສັດຂອງຊາວຢິວບໍ?” ພຣະເຢຊູເຈົ້າກ່າວຕອບວ່າ: “ແມ່ນຄືທ່ານເວົ້າ”. 3.ພວກຫົວໜ້າສົງຟ້ອງຫາພຣະອົງຕື່ມອີກຫລາຍຂໍ້. 4.ປີລາໂຕທູນຖາມພຣະອົງອີກວ່າ: “ທ່ານບໍ່ຕອບຫຍັງບໍ? ເຫັນບໍ ພວກເຂົາຟ້ອງຮ້ອງທ່ານໃນຫລາຍເລື່ອງແທ້”. 5.ພຣະເຢຊູເຈົ້າບໍ່ຕອບຫຍັງ ຈົນປີລາໂຕມີຄວາມປະຫລາດໃຈ.

ບາຣາບັດ

6.ທຸກວັນສະຫລອງໃຫຍ່, ປີລາໂຕເຄີຍປ່ອຍນັກໂທດຜູ້ໜຶ່ງ, ຕາມແຕ່ປະຊາຊົນຮ້ອງຂໍ. 7.ໃນເວລານັ້ນ ມີຄົນຜູ້ໜຶ່ງຢູ່ໃນຄຸກຊື່ບາຣາບັດ. ເຂົາໄດ້ຖືກຈັບພ້ອມກັບພວກກະບົດ ທີ່ໄດ້ຂ້າຄົນໃນເວລາກໍ່ການວຸ້ນວາຍ. 8.ຝູງຊົນກໍຂຶ້ນມາຮ້ອງຂໍ ສິ່ງທີ່ປີລາໂຕເຄີຍປະທານໃຫ້. 9.ປີລາໂຕຖາມພວກເຂົາວ່າ: “ພວກເຈົ້າຢາກໃຫ້ເຮົາປ່ອຍກະສັດຂອງຊາວຢິວບໍ?” 10.ປີລາໂຕຮູ້ດີວ່າ ພວກຫົວໜ້າສົງໄດ້ມອບພຣະເຢຊູເຈົ້າຍ້ອນຄວາມອິດສາ. 11.ແຕ່ພວກຫົວໜ້າສົງໄດ້ຍຸຍົງຝູງຊົນໃຫ້ຂໍປ່ອຍບາຣາບັດດີກວ່າ. 12.ປີລາໂຕຈຶ່ງເວົ້າກັບພວກເຂົາອີກວ່າ: “ພວກເຈົ້າຢາກໃຫ້ເຮົາທຳສິ່ງໃດກັບຜູ້ທີ່ພວກເຈົ້າເອີ້ນວ່າ ກະສັດຂອງຊາວຢິວ?” 13.ພວກເຂົາພາກັນຮ້ອງຂຶ້ນອີກວ່າ: “ໃຫ້ເອົາໄປຄຶງກາງເຂນ”. 14.ປີລາໂຕເວົ້າວ່າ: “ເພິ່ນໄດ້ເຮັດຜິດຫຍັງ?” ແຕ່ພວກເຂົາແຮງຮ້ອງດັງຂຶ້ນກວ່າອີກວ່າ: “ໃຫ້ເອົາໄປຄຶງກາງເຂນ”. 15.ເພື່ອໃຫ້ພໍອົກພໍໃຈປະຊາຊົນ, ປີລາໂຕຈຶ່ງປ່ອຍບາຣາບັດ. ສ່ວນພຣະເຢຊູເຈົ້ານັ້ນ ປີລາໂຕກໍໄດ້ສັ່ງໃຫ້ພວກເຂົາຂ້ຽນຕີ, ແລ້ວມອບໃຫ້ເອົາໄປຄຶງກາງເຂນ.

ພຣະເຢຊູເຈົ້າຖືກສວມມຸງກຸດໜາມ

16.ພວກທະຫານຄຸມພຣະອົງເຂົ້າໄປດ້ານໃນຂອງວັງ ຄືວ່າບ່ອນສານຕັດສິນ. ແລ້ວຮຽກເອົາໝູ່ມາໝົດກອງ. 17.ພວກເຂົາໄດ້ເອົາເສື້ອແດງມາຫົ່ມໃຫ້ພຣະອົງ, ຂົດໜາມເປັນມົງກຸດມາສຸບໃສ່ສີສະພຣະອົງ. 18.ພວກເຂົາພາກັນສະແດງຄາລະວະຕໍ່ພຣະອົງວ່າ: “ຂໍກະສັດຊາວຢິວຊົງພະຈະເລີນ!” 19.ແລ້ວເອົາກົກເລົາຕີສີສະພຣະອົງ, ຖົ່ມນ້ຳລາຍໃສ່ ແລະຄູ້ເຂົ່າໄຫວ້. 20.ເມື່ອໄດ້ເຢີ້ຍຫຍັນພຣະອົງຫລິ້ນດັ່ງນີ້ແລ້ວ, ກໍແກ້ເສື້ອແດງອອກ, ເອົາເສື້ອຂອງພຣະອົງເອງຄືນມາໃຫ້ ແລ້ວເອົາພຣະອົງໄປຄຶງກາງເຂນ.

ຊີມອນຊາວຊີເຣເນ

21.ມີຄົນຜູ້ໜຶ່ງຊື່ຊີມອນຊາວຊີເຣເນ, ພໍ່ຂອງທ້າວອາແລັກຊັງແລະຣູຟູສ, ຫລົບມາແຕ່ນາ ກາຍມາທາງນັ້ນ; ພວກເຂົາຈຳໃຫ້ລາວແບກກາງເຂນຂອງພຣະອົງ. 22.ພວກເຂົາພາພຣະອົງໄປເຖິງບ່ອນທີ່ຊື່ວ່າ “ກອນໂກທາ” ແປວ່າ “ໂພນກະໂຫລກຫົວ”.

ພຣະເຢຊູເຈົ້າຖືກຄຶງໃສ່ກາງເຂນ

23.ຢູ່ທີ່ນັ້ນ ພວກເຂົາໄດ້ເອົານ້ຳອະງຸ່ນປົນຢາງໄມ້ຫອມໃຫ້ພຣະອົງດື່ມ, ແຕ່ພຣະອົງບໍ່ຍອມຮັບ. 24.ພວກເຂົາຈຶ່ງໄດ້ຄຶງພຣະອົງໃສ່ກາງເຂນ, ແລ້ວພວກເຂົາໄດ້ຈັບສະຫລາກແບ່ງປັນເສື້ອຜ້າຂອງພຣະອົງ ເພື່ອໃຫ້ຮູ້ວ່າໃຜຈະໄດ້ອັນໃດ. 25.ເມື່ອພວກເຂົາຄຶງກາງເຂນພຣະອົງນັ້ນ, ແມ່ນເວລາປະມານເກົ້າໂມງເຊົ້າ. 26.ມີປ້າຍຂຽນຄຳກ່າວໂທດພຣະອົງວ່າ: “ອົງກະສັດຂອງຊາວຢິວ”. 27.ພວກເຂົາໄດ້ຄຶງກາງເຂນນັກໂທດສອງຄົນຮ່ວມກັບພຣະອົງ, ຜູ້ໜຶ່ງຢູ່ເບື້ອງຂວາ, ຜູ້ໜຶ່ງຢູ່ເບື້ອງຊ້າຍ. (28).29.ພວກຜູ້ຄົນທີ່ກາຍໄປມາ, ພາກັນສັ່ນຫົວແລະດ່າປ້ອຍພຣະອົງວ່າ: “ເປັນແນວໃດ, ເຈົ້າຜູ້ມ້າງພຣະວິຫານແລະສ້າງຂຶ້ນໃໝ່ພາຍໃນສາມວັນ, 30.ເຊີນຊ່ວຍຕົວເອງ ແລະລົງຈາກກາງເຂນເຖີດ”. 31.ພວກຫົວໜ້າສົງແລະພວກອາຈານພຣະຄຳພີ ກໍພາກັນເວົ້າເຢີ້ຍຫຍັນພຣະອົງດັ່ງດຽວກັນວ່າ: “ມັນຊ່ວຍຜູ້ອື່ນໄດ້ ແຕ່ບັດນີ້ຊ່ວຍຕົວເອງບໍ່ໄດ້ຊ້ຳ! 32.ໃຫ້ພຣະກຣິສໂຕ ອົງກະສັດແຫ່ງປະເທດອິສຣາແອນ ສະເດັດລົງຈາກກາງເຂນດຽວນີ້ຊາ, ເພື່ອໃຫ້ພວກເຮົາເຫັນແລະເຊື່ອ”. ແມ່ນແຕ່ພວກທີ່ຖືກຄຶງກາງເຂນຮ່ວມກັບພຣະອົງ ກໍພາກັນສົບປະໝາດພຣະອົງດ້ວຍ.

ພຣະເຢຊູເຈົ້າສິ້ນພຣະຊົນ

33.ພໍເຖິງເວລາທ່ຽງ ກໍເກີດມີຄວາມມືດມົວທົ່ວເຂດແຂວງຈົນເຖິງບ່າຍສາມໂມງ. 34.ເວລາບ່າຍສາມໂມງ, ພຣະເຢຊູເຈົ້າຮ້ອງສຽງດັງວ່າ: “ເອໂລອີ! ເອໂລອີ! ລາມາຊາບັກທານີ?” ແປວ່າ: “ໂອພຣະເຈົ້າ! ໂອພຣະເຈົ້າ! ເປັນຫຍັງພຣະອົງຈຶ່ງໄດ້ປະຖິ້ມຂ້າພະເຈົ້າ?” 35.ລາງຄົນຢູ່ທີ່ນັ້ນໄດ້ຍິນ ເລີຍເວົ້າວ່າ: “ໄດ້ຍິນບໍ! ມັນຮ້ອງຫາເອລີ!” 36.ມີຜູ້ໜຶ່ງໃນພວກນັ້ນ ແລ່ນໄປເອົາຟອງທະເລຈຸ່ມນ້ຳສົ້ມ ສຽບໃສ່ປາຍເລົາ, ແລ້ວຍື່ນໃຫ້ພຣະອົງສະເຫວີຍ ພ້ອມທັງເວົ້າວ່າ: “ຖ້າເບິ່ງ, ຈະເຫັນເອລີມາເອົາມັນລົງບໍ?” 37.ແຕ່ພຣະເຢຊູເຈົ້າໄດ້ຮ້ອງສຽງດັງ ແລ້ວສິ້ນພຣະຊົນ. 38.ເວລານັ້ນ ຜ້າກັ້ງຢູ່ພຣະວິຫານກໍຈີກແຫລ່ງອອກເປັນສອງ ແຕ່ເທິງຮອດລຸ່ມ. 39.ນາຍຮ້ອຍທະຫານທີ່ຢືນຢູ່ຕໍ່ພຣະພັກພຣະເຢຊູເຈົ້າ ເຫັນພຣະອົງສິ້ນພຣະຊົນດັ່ງນີ້ ຈຶ່ງເວົ້າວ່າ: “ຄົນຜູ້ນີ້ແມ່ນບຸດຂອງພຣະເປັນເຈົ້າແທ້ແລ້ວ”. 40.ຢູ່ທີ່ນັ້ນ ມີຍິງພວກໜຶ່ງຢືນເບິ່ງຢູ່ແຕ່ໄກ; ໃນຈຳນວນນີ້ມີນາງມາຣີອາມັກດາເລນາ, ນາງມາຣີອາແມ່ຂອງຢາໂກເບນ້ອຍ, ຢໍແຊແລະນາງຊາໂລເມ. 41.ພວກນາງນັ້ນໄດ້ຕິດຕາມຮັບໃຊ້ພຣະເຢຊູເຈົ້າ ເມື່ອເວລາຢູ່ແຂວງກາລີເລ. ຍັງມີຍິງອີກຫລາຍຄົນ ທີ່ໄດ້ຂຶ້ນມານະຄອນເຢຣູຊາແລມພ້ອມກັບພຣະອົງ.

ປົງພຣະສົບພຣະເຢຊູເຈົ້າ

42.ມີບຸລຸດຜູ້ໜຶ່ງຊື່ຢໍແຊແຫ່ງອາຣີມາທີ, ເປັນສະມາຊິກສຳຄັນຄົນໜຶ່ງຂອງສະພາສູງ; ເພິ່ນກຳລັງຄອງຖ້າພຣະຣາໄຊຂອງພຣະເປັນເຈົ້າດ້ວຍ. 43.ພໍຕົກຄ່ຳແລ້ວ, ແລະເປັນມື້ຕຽມບຸນ ຄືມື້ກ່ອນວັນພຣະ, ເພິ່ນເດັດດ່ຽວກ້າຫານເຂົ້າຫາປີລາໂຕເພື່ອຂໍເອົາພຣະສົບຂອງພຣະເຢຊູເຈົ້າ. 44.ປີລາໂຕມີຄວາມປະຫລາດໃຈ ເມື່ອຮູ້ວ່າພຣະເຢຊູເຈົ້າສິ້ນພຣະຊົນແລ້ວ, ຈຶ່ງຮຽກນາຍຮ້ອຍທະຫານມາຫາແລະຖາມວ່າ ພຣະອົງສິ້ນພຣະຊົນແລ້ວຫລືບໍ່? 45.ເມື່ອໄດ້ຮັບລາຍງານແນ່ນອນຈາກນາຍຮ້ອຍທະຫານແລ້ວ, ປີລາໂຕກໍມອບພຣະສົບໃຫ້ຢໍແຊ. 46.ເມື່ອຊື້ແພໂລມສົບແລ້ວ, ຢໍແຊກໍເອົາພຣະສົບພຣະເຢຊູເຈົ້າລົງຈາກກາງເຂນ, ເອົາແພມາຫໍ່ ແລະວາງໄວ້ໃນຄູຫາທີ່ເຈາະຢູ່ໃນຫີນ. ແລ້ວກື່ງກ້ອນຫີນອັດປາກຄູຫາໄວ້. 47.ສ່ວນນນາງມາຣີອາມັກດາເລນາ ແລະນາງມາຣີອາແມ່ຂອງຢໍແຊ ກໍໄດ້ໄປເບິ່ງບ່ອນເຂົາວາງພຣະສົບດ້ວຍ.