ມະຫາສົງແຫ່ງພຣະສັນຍາໃໝ່

1ຈຸດສຳຄັນຂອງເລື່ອງຄື ພວກເຮົາມີມະຫາສົງຜູ້ຍິ່ງໃຫຍ່ ຜູ້ປະທັບຢູ່ຂ້າງຂວາແຫ່ງລາດຊະບັນລັງຂອງຜູ້ຊົງສະງ່າລາສີຢູ່ສະຫວັນ. 2ພຣະອົງເປັນດັ່ງຜູ້ຮັບໃຊ້ຢູ່ວິຫານ ແລະຢູ່ໃນຜາມໄຊຫລັງແທ້ ຊຶ່ງພຣະເຈົ້າໄດ້ຊົງຕັ້ງຂຶ້ນ, ບໍ່ແມ່ນມະນຸດຕັ້ງ. 3ມະຫາສົງທຸກອົງໄດ້ຮັບການແຕ່ງຕັ້ງ ເພື່ອຖະຫວາຍຂອງແລະບູຊາຍັນ. ດັ່ງນີ້ ຈຳເປັນເພິ່ນເອງກໍຕ້ອງມີຫຍັງມາຖະຫວາຍດ້ວຍ. 4ຖ້າຫາກວ່າພຣະກຣິສໂຕຍັງປະທັບຢູ່ໃນໂລກ, ພຣະອົງກຈະໍບໍ່ໄດ້ເປັນສົງ, ຍ້ອນວ່າມີສົງຄອຍຖະຫວາຍຂອງຕາມບັນຢັດຢູ່ແລ້ວ. 5ແຕ່ພວກພຣະສົງເຫລົ່ານັ້ນ ຖະຫວາຍສັກກາລະບູຊາແກ່ສິ່ງທີ່ເປັນຮູບເງົາແຫ່ງຂອງຈິງໃນສະຫວັນ ຕາມທີ່ໂມແຊໄດ້ຮັບຄຳເຕືອນຈາກ ພຣະເຈົ້າ ເພື່ອສ້າງຜາມໄຊນັ້ນ ວ່າ: “ເຫັນບໍ ເຈົ້າຕ້ອງສ້າງທຸກຢ່າງ ຕາມແບບທີ່ເຮົາໄດ້ສຳແດງໃຫ້ເຫັນຢູ່ເທິງພູ.” 6ຕາມຄວາມຈິງແລ້ວ ພຣະເຢຊູເຈົ້າກໍໄດ້ຮັບຕຳແໜ່ງສົງທີ່ສູງກວ່າ, ຍ້ອນພຣະອົງຊົງເປັນຄົນກາງແຫ່ງພຣະສຳພັນໄມຕີທີ່ດີກວ່າ ແລະມີພຣະສັນຍາທີ່ປະເສີດກວ່າອີກ ເປັນຮາກຖານ.

ພຣະສັນຍາໃໝ່

7ດັ່ງນີ້ ຖ້າຫາກວ່າພຣະສຳພັນໄມຕີເກົ່າບໍ່ມີຂໍ້ຕ້ອງຕິ, ກໍບໍ່ຈຳເປັນຕ້ອງຫາແນວໃໝ່ມາແທນ. 8ແຕ່ຕາມຈິງແລ້ວ, ວາຈາຕໍ່ໄປນີ້ ແມ່ນເປັນການຕ້ອງຕິແທ້ ຄື: ພຣະອົງເຈົ້າກ່າວວ່າ: ເຫັນບໍ? ບັດນີ້ເຖິງເວລາແລ້ວ, ທີ່ເຮົາຈະທຳສັນຍາໃໝ່ກັບຕະກູນອິດສະລະແອນ ແລະຕະກູນຢູດາ. 9ບໍ່ແມ່ນຄືສັນຍາທີ່ເຮົາໄດ້ກະທຳກັບພວກບັນພະບຸຣຸດຂອງພວກເຂົາ ເວລາເຮົາພາອອກຈາກປະເທດເອຢິບ. ພຣະອົງເຈົ້າກ່າວວ່າ: ຍ້ອນພວກເຂົາບໍ່ໄດ້ຖືຕາມສັນຍາຂອງເຮົາ, ເຮົາເລີຍປະຖິ້ມພວກເຂົາ. 10ພຣະອົງເຈົ້າກ່າວອີກວ່າ: “ນີ້ແມ່ນສັນຍາທີ່ເຮົາຈະກະທຳກັບຕະກູນອິດສະລະແອນ ຄື ເມື່ອຫວິດວັນເຫລົ່ານັ້ນແລ້ວ ເຮົາຈະເອົາບັນຢັດຂອງເຮົາໃສ່ເຂົ້າໃນຈິດໃຈຂອງພວກເຂົາ, ຈະພິມຂໍ້ບັນຢັດນັ້ນໄວ້ໃນດວງໃຈຂອງພວກເຂົາ ເຮົາຈະເປັນພຣະເຈົ້າຂອງພວກເຂົາ, ພວກເຂົາຈະເປັນປະຊາກອນຂອງເຮົາ. 11ບໍ່ມີໃຜຈະຕ້ອງສັ່ງສອນໝູ່ເພື່ອນ ແລະພີ່ນ້ອງຂອງຕົນອີກເລີຍວ່າ: “ຈົ່ງຮູ້ຈັກພຣະເຈົ້າ” ຍ້ອນວ່າທຸກຄົນຈະຮູ້ຈັກເຮົາ ຕັ້ງແຕ່ຜູ້ນ້ອຍຈົນເຖິງຜູ້ໃຫຍ່. 12ຍ້ອນວ່າເຮົາຈະອະໄພໂທດໃຫ້ພວກເຂົາ ແລະຈະຫລົງລືມບາບຕ່າງໆຂອງພວກເຂົາດ້ວຍ. 13ເມື່ອຊົງກ່າວວ່າ “ພຣະສັນຍາໃໝ່”, ພຣະອົງກໍທຳໃຫ້ພຣະສັນຍາເດີມນັ້ນເກົ່າແກ່ ພົ້ນສະໄໝໄປແລ້ວ. ດັ່ງນີ້ ແນວໃດເກົ່າ ແລະພົ້ນສະໄໝແລ້ວ ກໍໃກ້ຈະສູນຫາຍໄປເທົ່ານັ້ນເອງ.