ຄຳຕຸກເຕືອນກ່ຽວກັບຄວາມຮອດ

1ດ້ວຍເຫດນີ້, ຖ້າພວກເຮົາບໍ່ຢາກເຫີນຫ່າງໄປໄກ, ກໍໃຫ້ມີຄວາມສົນໃຈນຳຂ່າວສານທີ່ໄດ້ຍິນໄດ້ຟັງນັ້ນຫລາຍຂຶ້ນ. 2ຍ້ອນວ່າ ຖ້າຂ່າວສານທີ່ພວກເທວະດາປະກາດນັ້ນ ໄດ້ຮັບການຮັບຮອງ, ແລະການລະເມີດ ທັງການບໍ່ເຊື່ອຟັງ ກໍໄດ້ຮັບການລົງໂທດຢ່າງສະສົມແລ້ວ. 3ພວກເຮົາເອງຈະຫວິດພົ້ນໄດ້ຢ່າງໃດ, ຖ້າພວກເຮົາເສີຍເລີຍຕໍ່ຄວາມຮອດອັນຍິ່ງໃຫຍ່ນີ້? ຄວາມຮອດນີ້ ແມ່ນພຣະອົງເຈົ້າເອງໄດ້ຊົງປະກາດແຕ່ຕົ້ນ, ແລ້ວຕໍ່ມາ ພວກທີ່ໄດ້ຍິນໄດ້ຟັງ ກໍຢັ້ງຢືນຕໍ່ພວກເຮົາວ່າເປັນຄວາມຈິງ. 4ພຣະເຈົ້າເອງກໍໄດ້ຮັບຮອງຄຳຢັ້ງຢືນຂອງພວກເຂົາ ດ້ວຍປະທານໃຫ້ມີເຄື່ອງໝາຍ ແລະການປະຫລາດອັດສະຈັນຕ່າງໆ ແລະຍັງໄດ້ແບ່ງປັນປະທານຂອງພຣະຈິດໃຫ້ ຕາມນ້ຳພຣະໄທຂອງພຣະອົງດ້ວຍ. 5ພຣະເຈົ້າບໍ່ໄດ້ມອບສິດຄຸ້ມຄອງໂລກພາຍໜ້າ ທີ່ພວກເຮົາກ່າວເຖິງນັ້ນ ໃຫ້ພວກເທວະດາ. ມີຫລັກຖານຢືນຢັນໄວ້ຕອນໜຶ່ງວ່າ: “6ມະນຸດແມ່ນໃຜໜໍ ພຣະອົງຈຶ່ງລະນຶກເຖິງ? ຫລືລູກຫລານຂອງມະນຸດເປັນຜູ້ຢ່າງໃດໜໍ ພຣະອົງຈຶ່ງເປັນຫ່ວງໃຍນຳ?” 7ພຣະອົງຊົງລົດຖານະຂອງພຣະອົງທ່ານ ໃຫ້ຕ່ຳກວ່າເທວະດາຊົ່ວໄລຍະໜຶ່ງ, ແລ້ວກໍຊົງປະທານມຸງກຸດແຫ່ງສີມຸງຄຸນແລະກຽດຕິຍົດໃຫ້, 8ຊົງມອບທຸກສິ່ງໄວ້ໃຕ້ພະບາດຂອງພຣະອົງ, ເມື່ອໄດ້ມອບທຸກສິ່ງໃຫ້ພຣະອົງແລ້ວ, ກໍບໍ່ມີສິ່ງໃດເລີຍຈະລອດພົ້ນຈາກອຳນາດຂອງພຣະອົງໄດ້. ແຕ່ຕາມຄວາມຈິງແລ້ວ, ດຽວນີ້ ພວກເຮົາຍັງບໍ່ທັນເຫັນທຸກສິ່ງຢູ່ກ້ອງອຳນາດຂອງພຣະອົງ. 9ແຕ່ພວກເຮົາສັງເກດໄດ້ແນວໜຶ່ງຄື ພຣະເຢຊູເຈົ້າຜູ້ຖືກລົດຖານະໃຫ້ຕ່ຳກວ່າເທວະດາ ພຽງຊົ່ວໄລຍະໜຶ່ງນັ້ນ, ບັດນີ້ໄດ້ຮັບມຸງກຸດແຫ່ງສີມຸງຄຸນແລະກຽດຕິຍົດ, ຍ້ອນພຣະອົງຊົງຍອມຮັບຄວາມຕາຍ. ດັ່ງນີ້ ດ້ວຍອາໄສພະກະລຸນາທິຄຸນຂອງພຣະເຈົ້າ, ພຣະອົງຈຶ່ງຮັບຊິມຄວາມຕາຍເພື່ອມະນຸດທຸກຄົນ. 10ດັ່ງນີ້ ຍ້ອນວ່າພຣະຜູ້ສ້າງແລະຜູ້ເປັນເຈົ້າທຸກສິ່ງທຸກຢ່າງ ມີຄວາມປາດຖະໜາຢາກພາບຸດຈຳນວນມາກໄປສູ່ສີມຸງຄຸນ ຈຶ່ງເປັນການສົມຄວນໃຫ້ພຣະອົງ ພາອົງຜູ້ເປັນກົກເຄົ້າຄວາມຮອດຂອງມະນຸດທັງຫລາຍ ໄປເຖິງຄວາມສົມບູນ ໂດຍທາງການທົນທຸກທໍຣະມານ. 11ຍ້ອນວ່າຜູ້ບັນດານຄວາມສັກສິດ ແລະຜູ້ຮັບຄວາມສັກສິດ ກໍມີກຳເນີດອັນດຽວກັນ. ດ້ວຍເຫດນີ້ ພຣະອົງຈຶ່ງບໍ່ອາຍຮຽກຄົນເຫລົ່ານັ້ນວ່າເປັນ “ພີ່ນ້ອງ” 12ໂດຍກ່າວວ່າ: “ຂ້າພະເຈົ້າຈະປະກາດພຣະນາມຂອງພຣະອົງແກ່ພີ່ນ້ອງຂອງຂ້າພະເຈົ້າ, ຈະຮ້ອງສັນຣະເສີນພຣະອົງຢູ່ກາງຊຸມຊົນ”. 13ແລະອີກບ່ອນໜຶ່ງວ່າ: “ຂ້າພະເຈົ້າຈະໄວ້ວາງໃຈໃນພຣະອົງ” ແລະຍັງອີກບ່ອນໜຶ່ງວ່າ: “ນີ້ ເຫັນບໍ? ແມ່ນເຮົາເອງພ້ອມບັນດາບຸດຊຶ່ງພຣະເຈົ້າມອບໃຫ້ເຮົາ”. 14ດັ່ງນີ້ ຍ້ອນວ່າບຸດທັງຫລາຍມີເລືອດເນື້ອດຽວກັນແນວໃດ, ພຣະອົງກໍຍອມມີສະພາບດັ່ງນັ້ນດ້ວຍ, ເພື່ອຜາບຜີປີສາດເຈົ້າແຫ່ງຄວາມຕາຍ ໃຫ້ສິ້ນອຳນາດໄປຢ່າງເດັດຂາດ ດ້ວຍອາໄສການສິ້ນພຣະຊົນຂອງພຣະອົງ, 15ແລະເພື່ອປົດປ່ອຍພວກທີ່ຕົກເປັນຂ້ອຍທາດຕະຫລອດຊີວິດຂອງຕົນ ຍ້ອນຢ້ານຕາຍນັ້ນ ໃຫ້ມີອິດສະລະພາບ. 16ຍ້ອນວ່າ ພວກທີ່ພຣະອົງສະເດັດມາຊ່ວຍນັ້ນ ບໍ່ແມ່ນພວກເທວະດາ, ແຕ່ແມ່ນພວກລູກຫລານຂອງອາບຣາຮຳ. 17ດັ່ງນັ້ນ ພຣະອົງຈຶ່ງຈຳເປັນຕ້ອງເປັນເໝືອນພີ່ນ້ອງຂອງພຣະອົງໃນທຸກຢ່າງ ເພື່ອຈະໄດ້ເປັນມະຫາສົງຜູ້ມີຄວາມເມດຕາ ແລະສັດຊື່ໃນການສຳພັນກັບພຣະເຈົ້າ ເພື່ອລຶບລ້າງບາບທັງມວນຂອງປະຊາກອນ. 18ຍ້ອນວ່າພຣະອົງເອງໄດ້ຜ່ານການທົດລອງມາແລ້ວ ພຣະອົງຈຶ່ງສາມາດຊ່ວຍເຫລືອຜູ້ທີ່ຖືກທົດລອງໄດ້.