ການປະຕິບັດທີ່ຊອບພຣະໄທພຣະເຈົ້າ

1ຂໍໃຫ້ຄວາມຮັກຖານພີ່ນ້ອງໝັ້ນຄົງຕໍ່ໄປ. 2ຢ່າລືມການຮັບແຂກຮັບຄົນ ຍ້ອນວ່າ ເມື່ອທຳດັ່ງນີ້ ກໍມີບາງຄົນໄດ້ຕ້ອນຮັບເທວະດາໂດຍບໍ່ຮູ້ເມື່ອ. 3ຈົ່ງລະນຶກເຖິງພວກທີ່ຖືກຄຸມຂັງ ເໝືອນກັບວ່າ ພວກພີ່ນ້ອງເອງກໍໄດ້ຖືກຄຸມຂັງກັບພວກເຂົາແຕ່ກ່ອນ ຢ່າລືມພວກທີ່ຖືກຂົ່ມເຫງ ຍ້ອນວ່າພວກພີ່ນ້ອງກໍມີຮ່າງກາຍຄືເຂົາດ້ວຍ. 4ໃຫ້ການແຕ່ງງານເປັນທີ່ນັບຖືຂອງທຸກຄົນ, ໃຫ້ຕຽງວີວາປາດສະຈາກຄວາມມົວໝອງ, ຍ້ອນວ່າພຣະເປັນເຈົ້າຈະຕັດສິນລົງໂທດພວກມີຊູ້ແລະຜິດປະເວນີ. 5ຢ່າເປັນຄົນເຫັນແກ່ເງິນ. ຈົ່ງພໍໃຈໃນສິ່ງທີ່ຕົນມີຢູ່, ຍ້ອນພຣະອົງເຈົ້າເອງໄດ້ກ່າວວ່າ: “ເຮົາຈະບໍ່ປະວາງ ແລະບໍ່ຖິ້ມເຈົ້າດອກ”. 6ດັ່ງນີ້ ພວກເຮົາຈຶ່ງກ່າວໄດ້ດ້ວຍຄວາມໝັ້ນໃຈວ່າ: “ພຣະອົງເຈົ້າເປັນຜູ້ຊ່ວຍເຫລືອຂ້າພະເຈົ້າແລ້ວ, ຂ້າພະເຈົ້າຈະບໍ່ຢ້ານກົວຫຍັງເລີຍ ມະນຸດຈະເຮັດຫຍັງໃຫ້ຂ້າພະເຈົ້າໄດ້ບໍ? 7ຈົ່ງລະລຶກເຖິງພວກຜູ້ນຳຂອງພວກພີ່ນ້ອງ ຄືພວກທີ່ໄດ້ປະກາດພຣະວາຈາຂອງພຣະເຈົ້າແກ່ພວກພີ່ນ້ອງ. ຈົ່ງພິຈາລະນາເບິ່ງວ່າ ຊີວິດຂອງພວກເພິ່ນໄດ້ສິ້ນສຸດຢ່າງໃດ, ຈົ່ງເອົາຢ່າງຄວາມເຊື່ອຂອງພວກເພິ່ນ. 8ພຣະເຢຊູກຣິສໂຕຊົງເປັນຢູ່ຄືເກົ່າ ທັງວານນີ້ ມື້ນີ້ ແລະຕະຫລອດນິຣັນດອນ. 9ຢ່າປ່ອຍຕົວໃຫ້ຫລົງຜິດໄປຕາມຄຳສອນແປກໆຫລາຍແບບຫລາຍແຜນ. ຍ້ອນວ່າເປັນການດີທີ່ຈະທຳໃຫ້ດວງໃຈເຂັ້ມແຂງດ້ວຍພຣະຄຸນ, ບໍ່ແມ່ນດ້ວຍອາຫານ ອັນບໍ່ໄດ້ນຳຜົນປະໂຫຍດຫຍັງມາໃຫ້ຜູ້ທີ່ປະຕິບັດຕາມ. 10ພວກເຮົາມີແທ່ນບູຊາ ຊຶ່ງພວກທີ່ຮັບໃຊ້ຢູ່ໃນຜາມໄຊ ບໍ່ມີສິດເອົາອາຫານຢູ່ແທ່ນນັ້ນໄປກິນໄດ້. 11ຍ້ອນວ່າ ຊາກສັດທີ່ມະຫາສົງເອົາເລືອດເຂົ້າໄປໃນສະຖານສັກສິດ ເພື່ອການລຶບລ້າງບາບນັ້ນ ໄດ້ຖືກເຜົາຢູ່ນອກຄ້າຍພັກ. 12ດ້ວຍເຫດນີ້ເອງ ພຣະເຢຊູເຈົ້າຈຶ່ງຮັບທຸກທໍຣະມານຢູ່ນອກປະຕູເມືອງດ້ວຍ ເພື່ອເອົາພຣະໂລຫິດຂອງພຣະອົງມາທຳໃຫ້ປະຊາກອນສັກສິດໄປ. 13ດັ່ງນີ້ ພວກເຮົາຈົ່ງອອກໄປຕ້ອນຮັບພຣະອົງຢູ່ນອກຄ້າຍພັກດ້ວຍຍອມແບກເອົາຄວາມອັບປະຍົດທີ່ພຣະອົງໄດ້ຮັບ 14ຍ້ອນວ່າ ພວກເຮົາບໍ່ມີນະຄອນອັນຖາວອນໃນໂລກນີ້, ພວກເຮົາກຳລັງຊອກຫານະຄອນໃນຊີວິດໜ້າ. 15ພວກເຮົາຈົ່ງຖະຫວາຍສິນບູຊາສັນຣະເສີນແດ່ພຣະເຈົ້າສະເໝີໄປ ໂດຍທາງພຣະອົງ ຄືສິນບູຊາອັນອອກມາຈາກຄວາມປາກຄວາມເວົ້າ ທີ່ກ່າວສະແດງຄວາມເຄົາລົບຕໍ່ພຣະນາມຂອງພຣະອົງ.16ຢ່າລືມແຜ່ເມດຕາຈິດ ແລະຊ່ວຍເຫລືອກັນແລະກັນ ຍ້ອນວ່າແມ່ນສິນບູຊາທີ່ຊອບພຣະໄທພຣະເຈົ້າ.

ເຊື່ອຟັງຜູ້ນຳສາດສະໜາ

17ຈົ່ງນອບນ້ອມແລະເຊື່ອຟັງຜູ້ນຳຂອງພວກພີ່ນ້ອງ, ຍ້ອນພວກເພິ່ນມີໜ້າທີ່ເບິ່ງແຍງວິນຍານຂອງພວກພີ່ນ້ອງ ແລະຕ້ອງໃຫ້ການເຖິງເລື່ອງນີ້ ເພື່ອໃຫ້ພວກເພິ່ນປະຕິບັດໜ້າທີ່ນີ້ດ້ວຍຄວາມຊື່ນໃຈ ບໍ່ແມ່ນດ້ວຍຄວາມເສົ້າໃຈ ອັນຈະບໍ່ນຳຜົນດີຫຍັງມາໃຫ້ພວກພີ່ນ້ອງເລີຍ.18ຂໍພວກພີ່ນ້ອງພາວະນາຊ່ວຍພວກເຮົາ, ຍ້ອນພວກເຮົາແນ່ໃຈວ່າ ມີມະໂນທຳໃສ ສະອາດ ພ້ອມທັງຕັ້ງໃຈວ່າຈະປະພຶດຕົນໃຫ້ດີໃນທຸກໂອກາດ. 19ຂ້າພະເຈົ້າຂໍພວກພີ່ນ້ອງຈົ່ງພາວະນາໃຫ້ຂ້າພະເຈົ້າດ້ວຍຄວາມຮ້ອນໃຈ ເພື່ອຈະໄດ້ຄືນມາຫາພວກພີ່ນ້ອງໂດຍໄວ.

ອວຍໄຊໃຫ້ພອນແລະສັ່ງລາ

20ຂໍພຣະເຈົ້າແຫ່ງສັນຕິສຸກ ຜູ້ຊົງບັນດານໃຫ້ພຣະເຢຊູເຈົ້າ, ພະຊຸມພາບານຜູ້ຍິ່ງໃຫຍ່ຂອງພວກເຮົາ ກັບຄືນຊີບຈາກພວກຜູ້ຕາຍ ດ້ວຍເດຊະພຣະໂລຫິດແຫ່ງພຣະສຳພັນໄມຕີນິຣັນດອນນັ້ນ. 21ຈົ່ງໂຜດໃຫ້ພວກພີ່ນ້ອງເປັນຜູ້ເໝາະສົມກັບທຸກສິ່ງທີ່ດີງາມ ເພື່ອປະຕິບັດຕາມນ້ຳພຣະໄທຂອງພຣະອົງ. ຂໍພຣະອົງດົນບັນດານໃຫ້ສິ່ງທີ່ພໍພຣະໄທພຣະອົງ ເກີດຂຶ້ນໃນຕົວພວກເຮົາ ເດຊະພຣະເຢຊູກຣິສໂຕເຈົ້າ. ສີມຸງຄຸນຈົ່ງມີແດ່ພຣະອົງຕະຫລອດນິຣັນດອນ. ອາແມນ.

22ພີ່ນ້ອງທີ່ຮັກ, ຈົ່ງຮັບເອົາຄຳຕຸກເຕືອນນີ້, ຍ້ອນວ່າຂ້າພະເຈົ້າຂຽນມາຫາພວກພີ່ນ້ອງແຕ່ສອງສາມຄວາມເທົ່ານັ້ນ. 23ພວກພີ່ນ້ອງກໍຮູ້ແລ້ວວ່າ ຕີໂມເທນ້ອງຊາຍຂອງເຮົາໄດ້ຖືກປ່ອຍຕົວແລ້ວ. ຖ້າເພິ່ນຫລົບມາໄວ, ຂ້າພະເຈົ້າກໍຈະມາຢາມພວກພີ່ນ້ອງພ້ອມກັບເພິ່ນ. 24ຂໍຝາກຄວາມຢາມບັນດາຜູ້ນຳຂອງພວກພີ່ນ້ອງ ແລະພວກສັດຕະບຸຣຸດທຸກຄົນ. ພວກພີ່ນ້ອງຢູ່ອີຕາລີ ກໍຝາກຄວາມຢາມພວກພີ່ນ້ອງດ້ວຍ. 25ຂໍພຣະຄຸນຈົ່ງຢູ່ນຳພວກພີ່ນ້ອງທຸກຖ້ວນໜ້າເທີນ!